Lamentaciones 2
2
Tcabin ok'el
1Nimxix te Dios tk'oj ma tzaj ex bi'x ma cub klolj tuj tnam Jerusalén tu'n. Ma naj cyajwalil aj Israel tu'n Kman, mer ic tza'n twitz cya'j ma tzaj tz'ak tu'n tcubil twitz tx'otx'; tuj k'ij tej ttzaj tk'oj minti' tzaj k'ak'an tc'u'j ti'j tja at tuj Jerusalén.
2Ma cub t-xitun Kman cyja cycyakil aj Israel ex minti' ma tzaj k'ak'an tc'u'j cyi'j; tej ttzaj tk'oj e cub t-xitun cycyakil ke ja te cycolbil cyib aj Judá, aju cawbil cyuc'ix keju in che cawin tuj ma che cub t-xitun Kman, ex ma tzaj cych'ixwi tu'n.
3Ma cub naj tcyakil cyipumal aj Israel tu'n tk'oj Dios. Ma tz'el tlak'ba'n tk'ab aju in colin ki'j cywitz ke aj k'oj ki'j; ma tz'oc tk'o'n tk'ak'al cytanmi tiyjil Jacob, ex ma baj tz'e'y tcyakil tu'n nok jatum in pon canun.
4Ate Kman ic tten ic tza'n jun aj k'oj ma tz'el t-xkinin t-xobl plech ex ma txi tbincha'n tten tbank'ab; ic tten ic tza'n jun aj k'oj ma baj t-xitun tcyakil ju tbanilxix que'yin, ex aju tk'oj ic tten ic tza'n jun k'ak' tzaj tk'o'n tibaj cyja aj Jerusalén.
5Ic ma tbincha Kman ic tza'n in tbincha'n jun aj k'oj; bi'x ma cub t-xitun tcyakil cytanmi aj Israel; ma cub t-xitun tcyakil cyja ke rey, ma cub t-xitun ke ja ma' cywa'l jatum in che ocx ten keju xk'ukil tnam, ex ma tzaj tk'o'n nim bis ex ok'el tuj Judá.
6Jurat naj ma cub t-xitun tja ic tza'n jun tal ja t-xak tze'yin twi' at tuj tkan awal, ma cub t-xitun ju ja jatum in cub cybuyin cyib xjal tu'n cyc'ulun te. Ma tbincha Kman tu'n tic' cyna'njtz ke nink'ij tuj Jerusalén ex ke k'ij te ojlabl. Tu'nju tk'oj ma tzaj ma che el tic'un ke rey ex ke pal.
7Ma tz'el tic'un Kman t-altar ex ju tja xjan; aju muro toc ti'jele tja ma txi tk'o'n tuj cyk'ab ke aj k'oj. In che sch'in ke aj k'oj tuj tja Dios mer ic tza'n tuj nink'ij.
8Cub t-ximan Kman tu'n tcub t-xitun ke muro toc ti'jele tnam Sión. Xi techan tu'n tcub t-xitun tnam ex o binchet tu'n jurat naj. Aju tnejel muro ex aju tcabin muro, tu'n Dios ma che oc tuj bis, ex te junx tyemp ma che cub xitj.
9Palch ke tpwertil tnam twitz tx'otx' ex ke pasador ma che baj piẍj. Ke rey ex ke nejenel ate' tuj Jerusalén o che'x k'i'n pres cyxol xjal mya nimal Dios ke ex minti'tl tley Dios cyuc'il. Ex mi ke t-sanjel Dios minti'tl in cyc'mo'n aju tu'n ttzaj tma'n Dios cye.
10Ke tij xjal ate' tuj tnam Sión minti' in che k'ajt, in che cub ke' twitz tx'otx', in jax cyjato'n kuk tuj cywi' ex nno'c cyk'o'n cyxbalun ch'i'x twitz. Ke k'apoj ate' tuj Jerusalén in cub moc'e' cywi' ex in pon tacl max twitz tx'otx'.
11Ma che naj ke tbak' nwitze tu'nju in chin ok'e, ex nna'ne mer ic tza'n cjawitz ok wanmiye; bi'x ma tz'el wipune tej twile otok baj xitj aju cytanmi ke nxjalile, ex tej cywile ke c'wa'l cyuc'ix ke tal c'wa'l cucx cych'u'n in che cyimtok tu'n we'yaj tuj cay.
12In cyma'ntok ke tal c'wa'l te cytxu': Kaje kwaye ex kaje kc'aye, che chi. Ex in che cub tz'ak cyuj cay te tnam mer ic tza'n at ẍil cyi'j, ax in jaw baj cyxew tuj tk'ab cytxu'.
13¿Atpe jun c'ixc'oj tuj tcyakil twitz tx'otx' o baj ic tza'n jlu, akeye aj Jerusalén? ¿Al uc'il ba'n nmojbanteye aju c'ixc'oj cyi'je? ¿Alcye jacu tz'ajben wu'ne tu'n tk'ukbanjtz cyc'u'je, akeye aj Sión? Porque ma'xix aju c'ixc'oj ma tzaj cyi'je ic tza'n mar ma' t-xe'; ¿alcye ba'n toc k'anan te cyeye?
14Keju nno'c cyk'on cyib te t-sanjel Dios ate' cyxole, o tzaj cyma'n nimcu cywitzic' cyeye pero mya ax toclen ke jlu ex nokx gan. Ex minti' cub cychic'ba'n cywitze aju cyile, tu'ntzun tbant cytene tu'n mi'n cyxi k'i'ne pres; tzaj cyma'n ke witzic' cyeye mya ax toclen ex te sbubl.
15Oc tilwaj tnam Jerusalén cyu'n xjal in che bet tuj be, nno'c cypok'cha'n cyk'ab te xmaybil; in che ẍut'in ex in xi cyyucun cywi' te xmaybil, ex in cyma'n ti'j tnam Jerusalén: ¿Maj atzunju tnam lu aju nno'c k'o'n tbi aju mas tbanilxix que'yin tuj enter twitz tx'otx'? Che chi.
16Cycyakil ke aj k'oj ti'j tnam Jerusalén in che oc ten xmayil. In che ẍut'in, in kitx'itx'in t-xe cye' ex in cyma'n: Ma baj kxitun tcyakil. Atzun k'ij lu aju nimxix in ko ayon ti'j, matzun ma kil ja'lo, che chi.
17Ma japun tu'n Kman aju o baj t-ximan, ma japun baj aju tyol aju cub t-ximan atxix ojtxi. Ma cub t-xitun ju tnam ex minti' ma tzaj k'ak'an tc'u'j ti'j; ma txi tk'o'n ambil tu'n cyjaw tze'n ke aj k'oj cyi'je, ex ma txi tk'o'n cyipun ke aj k'oj cyi'je.
18Ke xjal aj Jerusalén in che cubsan twitz Kman. Akeye aj Sión, mi'n txi cycoline tu'n cyok'e k'ijl ex konic'an, e tbet ta'l cywitze ic tza'n jun nima. Mi'n txi cycoline tu'n cyok'e ex mi'n txi cyk'o'ne ambil tu'n cyojlan ke tbak' cywitze.
19Che we'ctze, che sch'ine konic'an, cucx che sch'ine tcyakil or; tcyakil bis at tuj cyanmiye cyk'manxe te Kman; cyk'on jaw cyk'abe twitz cya'j te cubsbil ex cubsan cywitze cyi'j cyc'wa'le tu'n cyank'in, akeju ch'ix cycyim tu'n we'yaj cyuj cycyakil cay.
20Que'yintza Nman ex ximana ti'j aju ma tbinchaya, ax cyi'j ke xjal etzan tu'na ma tzaj tk'o'na c'ixbisabl lu. ¿Ba'npe tu'n t-xi cychyo'n ke txubaj cyal akeju ma in che ch'u'n? ¿Ba'npetzun tu'n cycub byo'n ke pal ex ke t-sanjela tujx tjaya?
21Ke c'wa'l ex ke tij xjal palch ke tuj cay; ke cu'xun ex ke k'apoj ate' tuj Jerusalén ma che cub byo'n tu'n spad. Tuj k'ij tej ttzaj tk'oja, ma biyuna, ma che cub tbyo'na ke xjal ex minti' ma tzaj k'ak'an tc'u'ja cyi'j.
22Tu'na ma tzaj xobajil tuj tcyakil part, mer ic tza'n oc in che tzaj xjal tuj jun nink'ij. Nman, tuj k'ij tej ttzaj tk'oja, mi a'l jun o tzokpaj. Akeju ẍe ch'iy wu'ne ex e oc nc'a'chane, ma che cub byo'n cyu'n aj k'oj.
Currently Selected:
Lamentaciones 2: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993