Jeremías 52
52
Tej tcawin rey Sedequías tuj Judá
2 Reyes 24.18-20; 2 Crónicas 36.11-16
1Toctok Sedequías twi' 21 abk'i tej toc te rey, ex junlaj abk'i o cawin tuj Jerusalén. Aju ttxu', Hamutal tbi aju aj Libna, ex tme'jel juntl xjal Jeremías tbi, 2Akeju tbinchben Sedequías mya ba'n e e'la tuj twitz Kman, ic tza'n ke tbinchben rey Joacim. 3Cyja'tzun tzaj tk'oj Kman cyi'j aj Jerusalén ex cyi'j aj Judá ex e ex tlajo'n tu'ntzun mi cytentl twitz.
Tej tcub ti'j tnam Jerusalén
2 Reyes 24.20—25.7; Jeremías 39.1-7
Jawtzun ti'n tib rey Sedequías ti'j rey te Babilonia, 4cyja'tzun, tuj tlajin k'ij te tlajin xjaw tuj tbelajin abk'i toclen Sedequías te rey, tzaj rey Nabucodonosor cyuc'il cycyakil t-soldad, baj cytxolban cyib ti'jele tnam Jerusalén, ex jaw cybincha'n cyxwetzbil ti'jele muro toc ti'j tnam, tu'ntzun cyoc tzokpaj ti'j. 5Cucxtok cytxolban cyib soldad ti'jele tnam tej tjapun tjunlajin abk'i toclen Sedequías te rey. 6Tuj belaj tajlal tcyajin xjaw tujx abk'i lu, tzaj mas we'yaj tuj tnam ex ya minti'tl cywa xjal. 7Ocxtzun cyxoptz'i'n aj k'oj jun toy' muro toc ti'jele tnam, ex masque cytxolbantok cyib aj Babilonia ti'jele tnam, pero te konic'an ex ok rey Sedequías cyuc'il cycyakil t-soldad, ttzi' jun pwert tcubsa'n t-xol cabe muro, tuj be nne'x tuj tkan tawal rey, ex atzun be xi cyi'n, aju in cu'pun tuj chk'ajlaj ttzi nima Jordán. 8Pero akeju soldad aj Babilonia e je'x lpe' ti'j rey Sedequías, ex max cub ti'j cyu'n tuj tchk'ajlajil tnam Jericó. Atzun ke t-soldad Sedequías cyaj colin cyu'n, ex e baj sputj. 9Tzyettzun rey Sedequías cyu'n aj k'oj ex xi cyi'n twitz rey te Babilonia max tuj tnam Ribla tuj cytx'otx' aj Hamat. Atzun cub t-sentens Sedequías tu'n rey Nabucodonosor, 10ex twitzx e cub byo'n ke tc'wa'l cyuc'ix cycyakil xjal ma' cyoclen tuj Judá. 11Atzunte Sedequías e jatz k'i'n ke tbak' twitz tu'n Nabucodonosor aju rey te Babilonia, baj c'alo'n tu'n caden, xi k'i'n tuj Babilonia, ex atzun ocx k'o'n tuj pres max tejxi tcyim.
Tej tcub xitun tja Dios
2 Reyes 25.8-21; 2 Crónicas 36.17-21; Jeremías 39.8-10
12Tuj tlajin k'ij te tjwe'yin xjaw ex tuj tbelajlajin abk'i toclen Nabucodonosor te rey tuj Babilonia, ate Nabuzaradán aju at toclen ttxlaj rey te Babilonia ex nejenel cye t-soldad rey, pon tuj Jerusalén, 13ex oc tk'o'n tk'ak'al tja Dios, tuc'ix tja rey ex cycyakil ja tuj tnam, ax icx oc tk'o'n tk'ak'al cyja xjal ma' cyoclen, 14atzun cye soldad uc'in tu'n cub cyxitun muro toc ti'jele tnam Jerusalén. 15E je'x ti'n Nabuzaradán aju nejenel cye soldad junjun xjal mas meba ke, cyuc'ix xjal otok che cyaj clet tuj Jerusalén, cyuc'ix keju otok txi cyk'on cyib tuj tcwent rey te Babilonia, ex junjuntl xjal ba'n che binchan tcyakil txcaj ak'untl, tu'n cypon ti'n tuj Babilonia. 16O'cx e cyaj tk'o'n Nabuzaradán junjun xjal mas tal meba, tu'n toc cycwentin tkan uva ex tu'n cyak'nan tuj cojbil.
17Baj cybuchin aj Babilonia cycyakil ke macbil k'an c'uxbil cytx'otx'il: Ke tkan ja, ke tk'ukbil tcubil a' ex ju pil matij, akeju ate' twitz tja Dios, ex xi cyi'n tcyakil k'an c'uxbil lu tu'n tpon tuj Babilonia. 18Ax icx xi cyi'n ke c'il, ke palet, ke matzbil cywi mech, ke lak, ke pac' ex tcyakil macbil k'an c'uxbil ttx'otx'il in che ajben tuj c'ulbil. 19Atzunte nejenel cye soldad xi ti'n tcyakil ti'xti k'an pwak ex sak pwak cytx'otx'il; e je'x ti'n ke palangán, ke ẍla'c, ke lak, ke tcubil tza'j, ke candil, ke pac', ex ke copa tcubil oyaj ta'l twitz uva. 20Atzun keju cabe tkan ja, tuc'ix matij pil tcubil a' ex keju cablaj tilbilal tor k'an c'uxbil cytx'otx'il in che ajben te tk'ukbil pil, ex keju tk'ukbil tcubil a', akeju otok txi tma'n Salomón tu'n tbaj cybincha'n tu'n cyajben tuj tja Dios, minti' o bant ttantearj tajlal k'an c'uxbil lu. 21Akeju cabe tkan ja, belaj var twa'l junjun ex kak var tc'itz; catl cyuj ex te cyaje k'ab tpimil ju k'an c'uxbil. 22Teyle junjun tkan ja tcub jun adorn k'an c'uxbil xawc'in tten tuj twi', te cab var tuc' mey twa'l, ex cyoc tilbilal carnad ẍok' ti'jele, k'an c'uxbil cytx'otx'il. Cycabil tkan ja lu junx binchben cye. 23Jun syent tilbilal carnad ẍok' txolin tten toc ti'jele adorn tcub twi tkan ja, ex nok 96 at tuj k'ancha'l.
E je'x k'i'n xjal Judiy tuj juntl nasyon najchak
24Ax icx tzaj tzyu'n Seraías aju tnejel pal tu'n nejenel cye soldad aj Babilonia, tuc'ix Sofonías tzaj tzyu'n, aju tcabin tnejel pal, cyuc'ix ox xk'ukil ttzi tja Dios. 25Cyxol ke xjal ate'tok tuj tnam, xi ttzyu'n aju nejenel cye cysoldad xjal Judiy, cyuc'ix wuk xinak k'ol tconsej rey, akeju ax otok che cyaj ten tuj tnam, tuc'ix ju chmol xjal tu'n cyoc te soldad ex 60 xinak ate'tok tuj tnam. 26E je'xtzun ti'n Nabuzaradán cycyakil xjal lu tuc'il rey te Babilonia max tuj tnam Ribla. 27Ex atzun tma rey te Babilonia tu'n cycub byo'n ke xjal lu tuj tnam Ribla tuj cytx'otx' aj Hamat.
Cyja'tzun tten e ex k'i'n aj Judá tuj cytanmi tu'n cyxi k'i'n tuj juntl nasyon najchak. 28Aju cyajlal xjal e je'x ti'n Nabucodonosor, atzun jlu: Tuj twukin abk'i toclen te rey, e je'x ti'n 3,023 xjal aj Judá; 29tuj twajxaklajin abk'i toclen te rey, e je'x ti'n 832 aj Jerusalén, 30ex tuj 23 abk'i toclen te rey, e je'x ti'n Nabuzaradán 745 xjal aj Judá. Tu'n cycyakil xjal japun jun cyajlal te 4,600.
Tzokpet Joaquín ex tc'am nimbilte tuj Babilonia
2 Reyes 25.27-30
31Tuj 25 tajlal tcablajin xjaw tuj 37 abk'i tocxlen presin Joaquín aju rey te Judá, oc Evil-merodac te rey tuj Babilonia, tbincha xtalbil te Joaquín ex etz ti'n tuj pres. 32O tbincha ba'n te ex mas ma' toclen oc tk'o'n cywitz mastl rey ate' tuc'il tuj Babilonia. 33Cyja'tzun tten, xi tma'n tu'n tel ch'expu'n t-xbalun Joaquín, aju tocsa'ntok tu'n tej tocxtok tuj pres, ex ax o wa'n junx tuc'il rey tuj tcyakil k'ij te tank'ibl. 34Ax icx o tc'am Joaquín ch'in pwak tcyakil k'ij tu'n rey te Babilonia tuj tcyakil tank'ibl tejxi tcyim.
Currently Selected:
Jeremías 52: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993