Éxodo 3
3
Tej ttxocl Moisés tu'n Dios
1In cwentintok Moisés cyi'j t-ẍne'l Jetro*fn* aju tji' ex pal te Madián, at jun k'ij xi ti'n ke ẍne'l tuj tzkij tx'otx' ex pon t-xe witz Horeb, aju witz te Dios. 2Cubtzun tyec'un tib t-anjel Kman twitz tuj jun wi' ch'i'x c'ul in julintok tu'n k'ak'. O til in julintok ch'i'x c'ul tu'n k'ak' ex minti' in cub tz'e'ytok. 3Tmatzun Moisés: Chin xel lak'e'ye que'yilte te, ex oc wila'ye tiku'n minti' in cub tz'e'y aju ch'i'x c'ul lu. 4Tej tlonte Kman cyja'tok t-xi lak'e' Moisés que'yilte te, tzaj k'ajt tuj ch'i'x c'ul ex tzaj tma'n te cyja':
—Moisés, Moisés.
—Lu kine lu, chi Moisés, xi ttzak'we'n.
5Tzajtzun tma'n Dios te cyja':
—Mi'n tzaj lak'e'ya. K'i'mela t-xajbiya cyi'j tkana, porque xjan aju lugar jatum tcuba. 6Ex tzaj tma'ntl: Akine Tdios tmana, aju Tdios Abraham, Tdios Isaac ex Tdios Jacob, chi Kman.
Octzun tmaksi'n Moisés twitz tu'nju tzaj t-xobil ti'j tu'n tlonte twitz Dios. 7Tzaj tma'ntl Kman:
—Ma wile yajbil cye xjal etzan wu'ne, akeju ate' tuj Ejipt. Ma nbiye tk'ajk'ajel cywi' in che ayayan cyu'n caporal, ex ba'n wu'ne nic'pun in che c'ixbisanjtz, 8ex tu'ntzun jlu ma chin cu'tze tu'n cyclet wu'ne tuj cyk'ab aj Ejipt, tu'n cyetz wi'ne tuj tx'otx' ma chixin ex tu'n cypon wi'ne tuj jun tx'otx' ba'n ex ma' twitz. Aju tx'otx' lu, k'inunxix ex tbanilxix. Atzun najl ke aj Canaán, ke aj Hetey, ke aj Amorrey, ke aj Ferezey, ke aj Hevey ex ke aj Jebusey. 9Ma nbiye in che ayayan aj Israel ex ma wile in che c'ixbisanjtz cyu'n aj Ejipt. 10Tu'ntzun jlu, txi'ya ja'lo. Cxel nsama'na twitz Faraón tu'n cyetz ti'na tuj Ejipt ke xjal etzan wu'ne, akeju aj Israel, chi Dios.
11Xitzun tma'n Moisés te Dios:
—¿Ti woclene tu'n nxi'ye twitz Faraón ex tu'n cyetz wi'ne aj Israel tuj Ejipt?
12Tzaj ttzak'we'n Dios te:
—Txi'ya, porque chin tele tuc'ila. Atzun jlu c'ajbel te jun techal teya ka wu'ne otok txi nsama'na: Oc cyetz ti'na tuj Ejipt ke xjal etzan wu'ne, cycyakile che c'ulule weye t-xe witz lu, chi Dios.
13Xitzun tma'n Moisés te Dios:
—Oc npone cywitz aj Israel, ex oc t-xi nma'ne cye cyja': Ma chin tzaj sama'ne cyuc'ile tu'n Cydios kxe'chel, nchiloye, ex ka ma tzaj cykanin weye: ¿Titzun tbi? ka che chi, ¿titzun cxel nma'ne cye? Chi Moisés.
14Tzaj ttzak'we'n Dios te Moisés:
—AKINE AJU AX KINE, chi Dios. Ax icx tzaj tma'ntl: Cyja'tzun tten cxel tma'na cye aj Israel: Aju toc tbi AKINE ma tzaj samante weye cyuc'ile, chicuya. 15Xi tma'ntl Dios te Moisés: Atzun jlu cxel tma'na cye aj Israel: Ate Kman*fn* aju Cydios kxe'chel, Tdios Abraham, Tdios Isaac ex Tdios Jacob, ma tzaj samante weye cyuc'ile. Atzun nbiye jlu te jumajx, chi Dios, ex cucx ctzajel na'n cyuj cycyakil tabk'iyil, chicuya cye. 16Txi'ya, chmon baja ke tij xjal at cyoclen cyxol aj Israel ex k'manxa cye cyja': Ate Kman aju Cydios kxe'chel, Tdios Abraham, Tdios Isaac ex Tdios Jacob, cub tyec'un tib nwitze, ex tzaj tma'n weye cyja': Ax toc ma tz'oc nk'o'ne cwent cyi'je ex ma wile aju in binchanjtz cyi'je tuj Ejipt, chi Dios. 17Ex tmatl: Akine chin eletz k'inte cyeye tuj yajbil cyi'je tuj Ejipt, tu'n cyxi'ye tuj cytx'otx' aj Canaán, aj Hetey, aj Amorrey, aj Ferezey, aj Hevey ex aj Jebusey. Aju tx'otx' lu k'inunxix ex tbanilxix, chicuya cye. 18Cxel bi'n tyola cyu'n ke tij xjal cyxol aj Israel. Aya cyuc'ix ke tij xjal lu che xe'le twitz rey te Ejipt, ex cxel cyma'ne te cyja': Ate Kmane aju Kdiose, ako'ye aj Hebrey, cub tyec'un tib kwitze. Tu'ntzun jlu, k'ontza ambil keye tu'n kxi'ye tuj tzkij tx'otx' ox k'ij kbeye, tu'n t-xi kk'o'ne chojbil te Kmane aju Kdiose, che chicuye te. 19Ba'n wu'ne, mlay che etz tzokpi'ne tu'n rey te Ejipt ka minti' ma cub tcastiw wu'ne. 20Atzun weye cxel nyec'une wipumale, che bel nc'ixbisa'ne ke aj Ejipt cyu'n cycyakil nbinchbene nim cyipumal che bantel wu'ne cyi'j, ex maxitzun che eletz tzokpi'ne tu'n. 21Wu'ne cnetel xtalbil cyu'n aj Israel cywitz aj Ejipt, tu'ntzun mi'n cyetz minti' k'i'n cyu'n. 22Cxel tkanin teyle junjun xu'j te tvesin aj Ejipt, ex te xu'j aj Ejipt ax najl tuj tja, ke ti'xti sak pwak cytx'otx'il, k'an pwak cytx'otx'il ex xbalun tu'n toc cyk'o'n cyi'j cyal; cyja'tzun tten c'eletz cyi'n aju at cye aj Ejipt, chi Dios.
Currently Selected:
Éxodo 3: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993