Deuteronomio 3
3
Cub ti'j Og aju rey te Basán, cyu'n ke aj Israel
Números 21.31-35
1Xi klajo'ntl kbe, o jax tuj be in xi' tuj Basán, pero ate Og aju rey te Basán etz k'ojlel ki'j, cyuc'ix cycyakil t-soldad, ex e jo'c tzokpaj ki'j tuj tnam Edrei.
2Atzunte Kman tzaj tma'n weye cyja': Mi'n xoba twitz, porque ma txi nk'o'ne tuj tk'aba cyuc'ix ke t-soldad ex tcyakil ttx'otx'. Binchama ti'j ic tza'nx o tbinchaya ti'j Sehón aju rey cye aj Amorrey, aju najltok tuj tnam Hesbón, chi.
3Cyja'tzun tzaj tk'o'n Kman Dios aju rey Og tuj kk'ab, ex cycyakil ke t-soldad. Cub kbyo'n cycyakil ex mi jun cyaj ank'in ku'n. 4Ax icx e tzyet cycyakil tnam ku'n; mi jun o tzokpaj. Tzyet 60 tnam ku'n tuj tcyakil tx'otx' Argob, akeju ate'tok tjak' tcawbil Og tuj tx'otx' Basán. 5Cycyakil tnam lu ma' twa'l muro toc cyi'j; at cylamel ex toc c'uxbil tzyulte cye; minti' e oc te tajlal ke tnam minti' muro cyi'j. 6Cycyakil ke jlu bi'x e naj ku'n, ic tza'nx otok kbincha ti'j Sehón aju rey te tnam Hesbón, ex cub kbyo'n ke xinak, ke xu'j ex ke c'wa'l; 7o'cx ke alumaj ex cycyakil ti'xti wi'yilxix at cye aj k'oj ki'j, e cyaj kclo'n tu'n tajben te ke.
8Cyja'tzun, tuj tk'ijlalil lu o jo'c te cyajwil ke tx'otx' tzyu'ntok cyu'n cabe rey aj Amorrey, akeju najltok tuj tumlal tjawitz k'ij te nima Jordán, tzajnix ke' ttzi tk'ab xak Arnón ex ponin baj max twi witz Hermón. 9(Aju witz lu, Sirión tbi cyu'n aj Sidón, ex Senir tbi cyu'n aj Amorrey.) 10E tzyet ku'n cycyakil tnam cycubsa'n tuj chk'ajlaj tuj tiwitz tx'otx', tuc'ix tcyakil tx'otx' Galaad ex Basán, aju ponin baj max cyuj tnam Salca ex Edrei, akeju ate'tok tjak' tcawbil Og tuj Basán. 11(O'cx te rey Og otok cyaj ank'in cyxol cyiyjil xjal ma' cywa'l. Aju twatbil puro c'uxbil te cyaje var tnukbil ex var tuc' mey twitz. Ax ta' watbil ja'lo tuj tnam Rabá tuj cytx'otx' aj Amón.)
Ke tiyjil Rubén, ke tiyjil Gad, tuc'ix mij tiyjil Manasés ax e cyaj ten najal tuj tumlal tjawitz k'ij te nima Jordán
Números 32.1-42
12Tejtzun ttzyet tx'otx' lu ku'n, xi nk'o'ne cye tiyjil Rubén ex cye tiyjil Gad aju tx'otx' xi'ynix tuj tnam Aroer, aju tcub ttzi tk'ab xak Arnón ex ponin baj max tuj tmijil tx'otx' Galaad, cyuc'ix cycyakil tnam ate' tuj. 13Atzun juntl piẍ tx'otx' Galaad, ex tcyakil tx'otx' Basán aju tcyajsa'ntok tjak' tcawbil rey Og, tuc'ix tcyakil tx'otx' Argob aju toctok tbi cytx'otx' aj Refait, xi nk'o'ne cye mij tiyjil Manasés. 14(Ate Jair tiyjil Manasés oc te tajwil tx'otx' Argob, aju ponin baj max tuj tmojonil tx'otx' Gesur ex Maaca, ex tex tbi oc tk'o'n ti'j tx'otx' Basán, atzun jlu: Havot-jair, ex axtzun tbi tocsa'n ja'lo.) 15Aju tx'otx' Galaad xi nk'o'ne te Maquir; 16atzun cye tiyjil Rubén ex cye tiyjil Gad xi nk'o'ne aju tx'otx' tcubsa'n t-xol Galaad tuc'il tk'ab xak Arnón, ex atzun nne'x tmojonil tuj tmijil tk'ab xak, ex ponin baj max ttzi tk'ab xak Jaboc, aju tmojonil cytx'otx' aj Amón. 17Atzun ponin tmojonil cytx'otx' ttzi nima Jordán, tzajnix ke' ttzi lagun Cineret ex ponin baj max ttzi mar at tuj chk'ajlaj Arabá, ex nnic' ttzi'yile mar t-xe'yile witz Pisga tuj tumlal tjawitz k'ij.
18Xitzun nma'ne cyeye cyja': Ate Kman Dios ctzajel k'onte tx'otx' lu cyeye tu'n toc te cyetzbile. Cycyakil keju o bant cyk'ojin, cyi'nx cymacbil in che ajben tuj k'oj, ex e cycub nej cywitz ke cyerman ax aj Israel; 19o'cx ke xu'j cyuc'ix ke c'wa'l ex ke wacẍ che cyjel ten cyuj ke tnam o txi nk'o'ne cyeye, porque ba'n wu'ne nimxix cywacẍe at. 20Ocxi ttzaj tk'o'n Kman cye cyermaniye jun lugar jatum tu'n cyojlan, ic tza'n o tzaj tk'o'n cyeye, icxtzun cye tu'n cyetzan ti'j tx'otx' aju ctzajel tk'o'n Kman cye jlajxi nima Jordán, maxitzun c'ajel meltz'aj teyle junjun cyeye tuj cyetzbile o txi nk'o'ne.
21Ax icx xi nma'ne te Josué cyja': O tila tcyakilju o tbincha Kman Dios cyi'j cabe rey; icxtzun cbantel tu'n Kman cyi'j cycyakil ke cawbil ate' jatum c'ic'el beta. 22Mi'n xoba cywitz, porque ate Kman Dios ctel cyuc'ile tuj k'oj.
Minti' xi tk'o'n Kman ambil te Moisés tu'n tocx tuj tx'otx' Canaán
23Tujx tk'ijlalil lu in cubsane twitz Kman ex xi nma'ne te cyja': 24Nman, tu'na tzaj xe't tu'n ttzaj tyec'una tajwalila ex tipumala weye, akine tmajena. Minti' juntl Dios at tuj cya'j mi twitz tx'otx' jacu bant tu'n ic tza'n ke teya tak'unben ex ke techal ma'xix cyxilen in che bant tu'na. 25In chin cubsane twitza tu'n ttzaj tk'o'na ambil weye tu'n wic'xe jlajxi nima Jordán, porque wajbile tu'n twile aju tbanil tx'otx' at ma chixin, ex aju tiwitz tx'otx' tbanilxix, ax icx aju witz Líbano, nchiye te. 26Pero otok jaw k'ojl Kman wi'je nok tu'n cyeye cylaj, ex minti' tzaj tbi'n nyole, o'cx tzaj tma'n weye cyja': Mi'n cucx tyolina. Mi'n tzaj tma'na mastl tyola weye ti'j jlu. 27Tjaxa twi witz Pisga ex que'yinxa tx'otx' te jawni, te cubni, te elni ex te ocni, pero tu'n tic'xa tuj nima Jordán, mi'n txi nk'o'ne ambil teya. 28O'cx k'manxa te Josué alcye tu'n tbant tu'n, cyuwsanxa tc'u'j ex k'onxa tipun, porque ate Josué cbel nej cywitz ke xjal, ex tu'n ctzyetel tx'otx' aju cxel tque'yina, tu'n toc te cyetzbil.
29Axtzun o ko cyaj ten tuj chk'ajlaj tcubsa'n tumlal twitz lugar Bet-peor.
Currently Selected:
Deuteronomio 3: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993