Colosas 3
3
1Tu'nju ma che jaw ank'ine tuc'il Crist, cyk'o'nc cyximbetze ti'j ju at tuj cya'j, jatum ta' Crist k'ukl ttxlaj Dios tuj bank'abaj. 2O'cx che ximane ti'j ju at tuj cya'j, mya aju at twitz tx'otx'. 3Porque o che cyime, ex aju cychwinklale ewan junx tuc'il Crist tuj tcwent Dios. 4Octzun tyec'unte tib Crist, aju k'ol cychwinklale, ax icx cyeye oc che yec'etele junx tuc'il tu'n cytene tuc'il tuj tajwalil.
Aju ojtxi kchwinklal ex aju ac'aj kchwinklal tu'n Crist
5Cyja'tzun, cytzokpincje tcyakilju mya ba'n in cybincha'n xjal: Aju yaẍbil, ex ju ttz'ilil, tuc'ix ju achbil mya ba'n, tuc'ix ju cyajbile mya ba'n, tuc'ix ju in pon cyc'u'je ti'j nimcu; junx ta' jlu ic tza'n in che c'ulune cywitz ke tilbilal. 6Tu'n tlaj tcyakil jlu in tzaj tk'oj Dios cyi'j ke xjal miban che bin; ma'xix jun castiw tzul cyi'j. 7Ic tza'n cyeye, o cybinchaye tcyakil jlu ojtxi tej ate'xtoke tuj. 8Atzun ja'lo cyk'oncje tcyakil jlu: Mi'n che k'ojine, mi'n tzaj tlo'ch cyc'u'je, mi'n cybinchaye mya ba'n, mi'n che yasune, mi'n che yoline ti'j tc'ayil yol. 9Mi'n che nic'ane yol cyxolxe, porque ma tz'el cycotpi'ne aju ojtxi cytene tuc'ix ju ojtxi cybinchbene. 10Ex ma tz'oc cyk'o'ne ju ac'aj cytene cucx tu'n cyoque te ac'aj, ic tza'n tilbilal Dios aju ch'isal cyeye, ex tu'n telxix cynic'e ti'j. 11Tu'ntzun jlu, mya part cyxilen xjal grieg mi xjal judiy, mya part xjal sircunsidarin mi xjal mya sircunsidarin, mya part jun xjal te junxitl tnam najchak mi keju xjal minti'x ch'in ba'n cyu'n, mya part cyxilen ke majen tzyu'n ex ke xjal tzokpi'n, nok o'cxte Crist tibaj tcyakil ex at kuc'il kcyakil.
12K'ak'anx cyc'u'je ti'j juntl, cybinchame xtalbil, mi'n jaw cyniman cyibe, che oque mans, ten cypasense; cybinchame jlu porque c'ujla'n keye tu'n Dios ex sc'o'maj keye tu'n, tu'n cyoque tecuxix. 13Tzic'x cyu'ne aju cypaltil junjuntl, cynajsam cyile cyxolxe ka at jun at tyol ti'j juntl; ic tza'n te Crist cub najsa'n cyile tu'n, ax icx cyeye tu'n cybinchanteye icju. 14Ex aju mas il ti'j twitz tcyakil jlu, tu'n tten cyc'ujlalile, porque tu'ntzun jlu ktzuylaj kib kcyakil. 15Awt Dios cawin tuj cyanmiye tu'n tten cymojbabl cyibe, porque o che txconjtze tu'n tten jun mojbabl tib cyxolxe; ex cyk'onxe chjonte te Dios.
16Nojxwit cyanmiye tu'n tyol Crist. Cyxnak'tzam cyibe ex cyk'onxe cynable cyxolxe, tenxix cynable ti'j jlu. Cybitzanxe bitz, tuc'ix salmo, tuc'ix bitz te Dios, ex cyk'onxe chjonte te Dios tuj cyanmiye. 17Ex tcyakilju in cybincha'ne ex in cyma'ne, cybinchame tcyakil ic tza'n tajbil Kajaw Jesús, ex cyk'onxe chjonte te Kman Dios nok tu'n Jesús.
Tza'n tten tu'n kank'in cyxol kuc'il
18Akeye xu'j, cynimanxe cychmile, atzun jlu il ti'j porque ocslal keye ti'j Kajaw. 19Akeye chmilbaj, cyc'ujlam cyxu'jile ex mi'n che yoline cyuw cye. 20Akeye c'wa'lbaj, cynimanx cymane tuj tcyakil, porque in tzalaj Kajaw ti'j jlu. 21Akeye mambaj, mi'n tz'oc cyic'le'ne cyc'wa'le, tu'ntzun mi'n tbaj cyc'u'j. 22Akeye majen, cucx tu'n t-xi cynimane cypatrone ate' twitz tx'otx', mi'n che ajbene nok tu'nju at jun to'yil cyeye ic tza'n keju in che ximan ti'j o'cx tu'n cytzalaj xjal cyi'j; nok o'cx che ajbene tu'n tcyakil cyc'u'je, tu'nju in che xobe twitz Dios. 23Ex tcyakilju in cybincha'ne, cybinchame tu'n tcyakil cyanmiye, ic tza'n te Kajaw in che ajbene ex mya cye xjal. 24Porque ba'n cyu'ne, ctzajel tk'o'n Kajaw jun etzbil cyeye te t-xel cyajbeble, porque te Crist in che ajbene, atzun mer Kajaw. 25Aju in binchan mya ba'n ti'j juntl, axju mya ba'n oc tc'ma' te t-xel ju tbinchben, porque minti' in tque'yin Dios ti t-xilen xjal.
Currently Selected:
Colosas 3: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993