1 Corint 15
15
Jatz ank'in Crist cyxol cyimni
1Ctzajel nna'ntle cyeye erman aju tkanil colbil xi npacba'ne cyeye ex o cyc'ame ex ocsla'nx cyu'ne. 2Tu'ntzunju tkanil lu ma che clete, ka ocsla'nx cyu'ne aju yol xi npacba'ne cyeye, ex ka mya tu'n cabe cyc'u'je xi cyocsla'ne.
3Porque tnejelxix xi nk'o'ne xnak'tzbil cyeye, axju o nc'ame. Xi nma'ne: Ate Crist o cyim tu'n tchjet kil, ic tza'n in tma'n tuj Tu'jil; 4ex cu'x maku'n, ex jatz ank'in tuj toxin k'ij, ic tza'n in tma'n tuj Tu'jil; 5ex cub tyec'un tib twitz Pedro, ex te tibajxi cub tyec'un tib cywitz keju cablaj apostl. 6Ex te tibajxi cub tyec'un tib cywitz mas te jwe' syent erman ate' junx; cyxol ke jlu nimcu itz'x ke, ex junjuntl o che cyim. 7Ex te tibajxi cub tyec'un tib twitz Jacobo; ex te tibajxi jlu cub tyec'un tib cywitz cycyakil apostl.
8Te mancbilxitzun cub tyec'un tib nwitze, ic ntene ic tza'n jun c'wa'l in itz'j na'nxtok tpon tk'ijlalil. 9Porque akine tal ch'in kine cywitz ke mastl apostl, mya ba'n kine tu'n toc k'o'n nbiye apostl, porque e baj nyajla'ne ke ocslal etzan ke tu'n Dios. 10Pero nok tu'n t-xtalbil Dios ma chin oque apostl; ex mya nokx gan ju t-xtalbil Dios tzaj tk'o'n weye, porque mas ma chin ak'nane cywitz cycyakil; pero mya wu'nxe ma bant, nok o'cx tu'n t-xtalbil Dios at wuc'ile. 11Cyja'tzun, ka akine ma chin ak'nane ex ka ake mastl apostl, pero atzun jlu in xi kpacba'ne, ex atzun jlu ma txi cyocsla'ne.
Che jawitz ank'in ke cyimni
12Katzun in xi kpacba'ne ka o jaw ank'in Crist cyxol cyimni, ¿tza'ntzun tten in cyma'n junjun cyxole ka mlayx jatz ank'in jun xjal cyxol cyimni? 13Porque ka mlayx jatz ank'in jun xjal cyxol cyimni, entons minti' o jatz ank'in Crist. 14Ex ka minti' o jatz ank'in Crist, entons nokxlo gan aju in xi kpacba'ne, ax icx nokxlo gan aju cyocslable. 15Entons ma ko oque nic'al yol ti'j Dios; porque ma txi kma'ne ka o jatz ank'in Crist tu'n Dios, pero ka ax toc mlayx jaw ank'in jun xjal cyxol cyimni, entons minti'lo o jatz ank'in Crist tu'n Dios. 16Porque ka mlayx che jatz ank'in ke cyimni, entons icx te Crist minti'lo o jatz ank'in; 17ex ka minti' o jatz ank'in Crist, nokxlo gan aju cyocslable; ex axlo ate'ye tuj cyile. 18Ax icx keju o che cyim ocslal ke ti'j Crist, bi'xlo ma che naj. 19Ka o'cx at tajben kocslabl ti'j Crist acux itz'x ko' tzalu twitz tx'otx', bec'bilxix kwitz cywitz cycyakil xjal.
20Pero ja'lo ax toc o jatz ank'in Crist cyxol cyimni; ate Crist o jatz ank'in nej, tu'ntzun cyjaw ank'in keju o che cyim ic tza'nx te, ic tten jlu ic tza'n tnejel twitz awal in tyec'un ka tzul mastl twitz. 21Porque nok tu'n jun xjal tzaj camic, ax icxtzun nok tu'n jun xjal oc che jawil ank'in xjal cyxol cyimni. 22Porque ic tza'n in che cyim cycyakil xjal nok tu'nju tiyjil Adán ke, icxtzun oc che jawil ank'in cycyakil keju o che ocslan ti'j Crist. 23Pero teyle junjun tu'n tjaw ank'in tuj tk'ijlalil; ate Crist o jatz ank'in nej; ex te yajxi, akeju otok che ocslan ti'j Crist che jawitz ank'in oc tul juntl maj. 24Tzultzun tk'ijlalil tu'n tjapun baj tcyakil, oc t-xi tk'o'n Crist ju cawbil te Dios aju Mambaj, tcublenxi cyi'j cycyakil keju in che cawin, keju at cyoclen ex keju at cyipumal. 25Porque il ti'j cucx tu'n tcawin Crist ocxi cycub baj cycyakil ke aj k'oj ti'j tjak' tcawbil. 26Aju mancbil aj k'oj tu'n tcub xitj, ate camic. 27Porque tcyakil ma cub tk'o'n Dios tjak' tcawbil Crist ic tza'n in tma'n tuj Tu'jil. Ex tej tmante ka tcyakil ma cub k'o'n tjak' tcawbil Crist, clarxix ta' mya ajunte Dios tcub tjak' tcawbil Crist, nok o'cx ate Dios cub k'onte tcyakil tjak' tcawbil Crist. 28Ocxitzun cycub k'o'n tcyakil tjak' tcawbil Crist, ax icxtzunte Crist aju Tc'wa'l Dios cbel tk'on tib tjak' tcawbil Dios, como ate Dios cub k'onte tcyakil tjak' tcawbil Crist. Cyja'tzun tu'n tten toclen Dios tibaj tcyakil.
29Nokwit mya ic tten, ¿tiku'ntzun in che byan junjun cyxole te cyxel keju o che cyim? Ka minti' tumel tu'n cyjaw ank'in ke cyimni, ¿tiku'ntzun in che byan junjun te cyxel?
30¿Ex tiku'n nne'lje' ki'je tcyakil k'ij? 31Ax toc erman, nne'lje' wi'je tcyakil k'ij tu'n ncyime; cxel nma'ne jlu cyeye tu'nju in chin tzalaje cyi'je nok tu'nju ocslal keye ti'j Kajaw Jesucrist. 32Ka o chin k'ojine cyuc'il nmak txcup tuj tnam Efeso ic tza'n in cybincha'n xjal, ¿ti tajben jlu weye? Ka mlayx che jatz ank'in cyimni, mas ba'n ko wa'n ex ko c'an, porque nchi'j ko cyim.
33Mi'n che el tzpete ti'j: Ka ma txi cyuc'in cyibe cyuc'il xjal mya ba'n, oc tzacjel cynable. 34Tzulx cynable tuj tumelxix, ex mi'n cybinchaye il; porque at junjun cyxole minti' ojtzki'n Dios cyu'n. In xi nma'ne jlu tu'n ttzaj cych'ixwiye.
Tza'n tten che jawitz ank'in ke cyimni
35Pero atlo junjun ctzajel tma'n: ¿Tza'nlo tten tu'n cyjaw ank'in ke cyimni? ¿Alcye cyximlal oc cyul? 36Minti' tnabla, baka minti' ba'n tu'na, aju iyaj in cu'x tawa'na, mlay tz'itz'j ka mi xcyim nej. 37Aju iyaj cbelex tawa'na, oc tja'wil itz'j mya icx tten ic tza'n oc tcu'x tawa'na, nok o'cx ju twitz iyaj cbelex tawa'na, ka twitz triw ex ka twitz junxitl iyaj; 38ex teyle junjun at tkan tu'n Dios ic tza'nx tajbil, ex teyle junjun iyaj junxitl tkan. 39Mya junx ta' cychibjal cycyakil; part cychibjal xjal, part cychibjal jil, part cychibjal cyiẍ, ex part cychibjal chyu'j. 40Part che que'yin keju ate' tuj cya'j, ex part che que'yin keju ate' twitz tx'otx'; part cyspic'umal keju ate' tuj cya'j, ex part cyspic'umal keju ate' twitz tx'otx'. 41Part t-spic'umal k'ij, ex part t-spic'umal xjaw, ex part cyspic'umal ke che'w, porque at junjun che'w mas in che koptz'aj, ex at junjuntl minti'xix in che koptz'aj. 42Icxtzun ttenju oc cyjatz ank'in ke cyimni. Oc tcu'x maket kximlal at ttzuwal, octzun tjatz ank'in minti' ttzuwal. 43Octzun tcu'x maket bi'x in tzacj tilbilal, octzun tjatz ank'in puro tbanil; cbelex maket minti' tipun, octzun tjatz ank'in at tipun. 44Aju kximlal cbelex maket te twitz tx'otx'; octzun kjatz ank'in, aju kximlal te tuj cya'j. Ic tza'n at kximlal te twitz tx'otx', ax icx at kximlal te tuj cya'j. 45Porque ictzun in tma'n tuj Tu'jil: Aju tnejel xjal Adán oc te xjal itz', chi ju tz'iban, pero aju mancbil Adán itz' ex k'ol chwinklal. 46Aju kximlal bant nej te twitz tx'otx', mya te tuj cya'j; te tibajxi in tzaj k'o'n aju kximlal te tuj cya'j. 47Aju tnejel xjal te twitz tx'otx', ax tx'otx' te; aju tcabin xjal te tuj cya'j, [atzun Kajawju.] 48Akeju tx'otx' cyximlal ic cyten ic tza'n Adán tx'otx' t-ximlal; ex akeju che tel tuj cya'j ic che oquel ic tza'n Kajaw aju at tuj cya'j. 49Ex ic tza'n ax tilbilal Adán k'i'n ku'n aju at twitz tx'otx', ax icxtzun c'elel ki'n tilbilal Crist aju at tuj cya'j.
50Pero cxel nma'ne jlu cyeye erman, aju kximlal at ja'lo mlay bant tu'n tocx tuj cya'j tuj tcawbil Dios, ex aju kximlal cyja' tbaj minti' toclen ti'j ju kximlal mlay baj. 51Lu cxel nma'ne cyeye jun yol minti'tok bi'n cyu'n xjal: Mya kcyakil ko cymel, pero kcyakil cch'expetel kximlal. 52Te jurat tu'n kch'expet ic tza'n in mutz'un tbak' kwitz; atzun ko ch'expetel oc tk'ajt mancbil chun. Porque c'oquel k'ajtza'n chun, ex che jawil ank'in ke cyimni, mlay che cyimtl, atzun ke cch'expetel kximlal. 53Aju kximlal at ja'lo cnajel, pero ilxix ti'j tu'n toc te ac'aj tu'ntzun mi'n tnaj; ex aju kximlal at ja'lo cymel, pero ilxix ti'j tu'n toc te ac'aj tu'ntzun mi'n tcyim. 54Aju kximlal at ja'lo cyja' tnaj ex cyja' tcyim; pero oc toc te ac'aj tu'n mi'n tnaj ex tu'n mi'n tcyim, maxitzun cjapunel aju yol in tma'n tuj Tu'jil: Bi'x cnajel camic te jumajx porque ma cub ti'j. 55Aya camic, ¿jatumtzun ma pon tipumala tu'n kc'ixbisanjtze tu'na? Aya camic, ¿jatum ta' tipumala tu'n tcub ki'je tu'na? Minti'tl tipumala ja'lo, chi tuj Tu'jil. 56Porque ate il, atzun in k'onte tipumal camic tu'n kc'ixbisanjtz tu'n, ex aju ojtxi ley, atzun in k'onte tipumal il. 57Pero kk'onx chjonte te Dios tu'nju ma tzaj tk'o'n kipumal tu'n tcub ti'j ku'n nok tu'n Kajaw Jesucrist. 58Cyja'tzun erman akeye at nc'u'je cyi'je, che we'xixe, mi'n che yucche, cucx che ak'nane tuj tak'un Kajaw; porque ba'n cyu'ne, aju ak'untl in cybincha'ne te Kajaw mya nokx gan.
Currently Selected:
1 Corint 15: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993