Jos 24
24
Ruk'isibel taq ch'abel richin ri Josué
1K'ari' ri Josué xerumol chik k'a jun bey ri achi'a' ri k'o kiq'ij, ri e tata'al richin ri tinamit, ri to'onela', ri samajela' ri k'o kiq'ij richin ri tinamit y konojel ri winaqi' israelita. Konojel rije' junan xe'apon chuwech ri Dios chiri' pa tinamit Siquem. 2K'ari' ri Josué xubij chike: Kere' xubij ri Jehová ri qa-Dios: Ri iwati't-imama' ri xubini'aj Térah ri ojer kan xk'ase' ri juk'an chik ruchi' ri raqen-ya' Éufrates, e rachibilan ri e ka'i' ruk'ajol kibini'an Abraham y ri Nacor, xekisamajij ch'aqa' chik dios. 3Y yin xink'en-pe ri itata' Abraham re juk'an chik chire ri raqen-ya' y xinben chire chi xbe juba' kela', y juba' kela' chupan re ruwach'ulew Canaán, y yin xinben chi janila xk'iyer ri rijatzul roma ri Isaac. 4Y ri Isaac xinya' k'a ka'i' ruk'ajol; ri jun xubini'aj Jacob y ri jun chik xubini'aj Esaú. Ri Esaú xinya' chire ri juyu' rubini'an Seír richin xrichinaj, jak'a ri Jacob y ri e ralk'ual xebe pa ruwach'ulew Egipto. 5Yin xenteq ri Moisés y ri Aarón richin xinben chike ri aj-Egipto chi xkitej poqon. Chirij re' xenwelesaj-pe chiri' ri ite-itata'. 6Toq xenwelesaj-pe pan Egipto, ri ite-itata' xe'apon chupan ri Kaqa-Palou, y ri aj-Egipto chuqa' xekitzeqelibej rik'in carruaje y ri aj-labal. 7Jak'a toq ri ite-itata' xech'on wik'in yin Jehová, yin xinya' jun q'equ'm chikikojol rije' y ri aj-Egipto, y xinben chike ri aj-Egipto richin xerumuq ri palou ri'. Rix kan xiwetamaj k'a ronojel ri xinben pan Egipto.
Y rix kan xiq'axaj k'a k'iy juna' pa tz'iran ruwach'ulew. 8Xixink'en k'a pe chupan ri kiruwach'ulew ri winaqi' amorreo, ri ek'o juk'an chire ri raqen-ya' Jordán. Y rije' xkiben oyowal iwik'in rix, jak'a yin kan xenjech pan iq'a'. Xenk'is k'a el chiwech y ja rix xixok kan chuwech ri kiruwach'ulew. 9Y ri Balac rey kichin ri aj-Moab ruk'ajol ri Sipor xyakatej k'a pe richin nuben oyowal iwik'in rix. Y chuqa' xuteq royoxik ri Balaam, ri ruk'ajol ri Beor, richin xroyoj ta itzel pan iwi' rix. 10Jak'a yin man xinya' ta q'ij chire ri Balaam, y roma ri' pa ruk'exel ri etzelanik ri', xinben chire chi ja ri urtisanik ri xya'ox pan iwi'. Y keri' toq yin xixinkol pa ruq'a' ri Balac.
11Xiq'axaj k'a pe ri raqen-ya' Jordán y xixoqaqa pa tinamit Jericó. Y ri winaqi' aj chiri' xebeyakatej-pe chiwij richin xkiben oyowal iwik'in y chuqa' ri winaqi' amorreo, ri ferezeo, ri cananeo, ri hitita, ri gergeseo, ri heveo y ri jebuseo. Jak'a yin kan xinjech pan iq'a' konojel re winaqi' re'. 12Nabey chire ronojel ri', xinben chike ri e ka'i' rey kichin ri amorreo chi xe'animej-el chiwech. Man ja ta k'a ri i-espada y ni ta ri rute-ich'ab ri xbanon, xinben chi chaq k'ate' xkik'en jun nimalej rukiy richin xe'animej-el. 13Y chirij re' xinya' ri ruwach'ulew chiwe ri man xisamajij ta na qa, y chuqa' ri tinamit ri man rix ta xixpaban-q'anej. Y chiri' k'a ixk'o-wi re wakami, y wakami nitej ri uva y ri aceituna ri man ja ta rix xixtiko-qa, xcha' ri Jehová chuwe.
14Wakami k'a kan tiqasaj-iwi' chuwech ri Jehová y kan xaxe rija' tisamajij rik'in ch'ajch'ojil y tz'aqetri'il; tiwelesaj chi'ikojol ri ch'aqa' chik dios, ri xkisamajij ojer kan ri qate-qatata' ri juk'an chik chire ri raqen-ya' Éufrates y ri chiri' pan Egipto. Kan ja k'a ri Jehová tisamajij. 15Wi man niqa' ta chiwech nisamajij ri Jehová, kan ticha' k'a wakami ri achike ri nisamajij; wi ja ri dios ri xkisamajij ri qate-qatata' toq xek'oje' ri juk'an chik chire ri raqen-ya' Éufrates, o ja ri ki-dios ri amorreo ri akuchi ixk'o-wi wakami. Jak'a yin y ri e aj pa wachoch kan ja k'a ri Jehová ri xtiqasamajij, xcha'.
16K'ari' konojel ri winaqi' xkibij: Man ta jun bey xtik'uluwachitej keri' chi xtiqaya' kan ri Jehová ri qa-Dios richin yeqasamajij ri ch'aqa' chik dios, 17roma ja ri Jehová ri qa-Dios ri xojelesan-pe roj y ri qate-qatata' pa ruwach'ulew Egipto chire ri ilinri'il. Y chiqawech k'a roj xuben ri nima'q taq banobel richin retal, y chuqa' kan xojruchajij chijun ri bey ri akuchi xojbiyin-wi-pe y ri pa taq tinamit ri akuchi xojq'ax-wi. 18Y chuqa' ri Jehová xerelesaj-el chiqawech roj konojel ri winaqi' amorreo ri xek'oje' re akuchi ojk'o-wi re wakami. Kan xtiqasamajij k'a ri Jehová, roma kan ja rija' ri qa-Dios, xecha'.
19K'ari' ri Josué xubij chike ri ruwinaq: Rix kan man xkixtikir ta xtisamajij ri Jehová, roma rija' kan jun Dios loq'olej, y kan man niqa' ta chuwech richin niya' ruq'ij jun chik dios. Chuqa' kan man xtukoch' ta ri yakatajinenri'il y xabachike mak niban chuwech. 20Wi niya' kan ri Jehová y nisamajij jun chik dios ri man ja ta qa-Dios roj, rija' xtuya' ri ruk'ayewal pan iwi' y xkixruk'is, stape' kan jebel rubanon chiwe, xcha'. 21K'ari', konojel ri winaqi' xkibij chire ri Josué chi rije' kan xaxe k'a ri Jehová ri xtikisamajij. 22Y ri Josué xubij chike chi kan ja rije' xebin ronojel re', roma xkicha' ri Jehová richin nikisamajij. Y rije' xkibij chi kan keri' wi. 23Y ri Josué xubij: Wakami k'a tiwelesaj-el chi'ikojol ri ch'aqa' chik dios, y titzolej-pe ik'u'x rik'in ri Jehová ri qa-Dios richin ri tinamit Israel, xcha'.
24Konojel k'a ri winaqi' xkibij chire ri Josué: Kan ja k'a ri Jehová ri qa-Dios ri xtiqasamajij, y kan xtiqaben k'a ronojel ri xtubij rija', xecha'.
Ri jikibel-tzij ri xban pa Siquem
25K'ari', ri Josué xuben jun jikibel-tzij kik'in ri ruwinaq chupan ri q'ij ri', chiri' pa Siquem. Y xuya' ri ruchojmilal chike, 26y xutz'ibaj kan re ch'abel re' chupan ri wuj richin ri rupixa' ri Dios. Xuchop k'a jun nimalej abej y xupaba' kan chuxe' jun paten-che', ri k'o chuwa-jay richin ri rachoch ri Jehová. 27Y k'ari' ri Josué xubij chike ri ruwinaq: Wakami ja abej k'a re' ri niq'alajirisan ronojel ri xubij ri Jehová chiqe; re' kan xtik'atzin k'a chiwe richin natabel richin chi man timalij kan ri qa-Dios, xcha'. 28K'ari' ri Josué xerujech-el ri winaqi' pa taq kiruwach'ulew ri akuchi kichinan-wi kan.
Ri rukamibal ri Josué
29Chirij k'a ronojel re', xken ri Josué toq k'o 110 rujuna'. Rija' kan jun chike ri rusamajel ri Jehová. 30Y xkimuq k'a akuchi richinan kan rija', pa tinamit Timnat-sérah pa xaman chire ri juyu' Gaas, chiri' chuwi-juyu' richin ri Efraín. 31Chijun k'a ruk'aslen ri Josué ri tinamit Israel kan xkisamajij k'a ri Jehová. Y chuqa' k'a xkisamajij na toq k'a xek'ase' na kan ri e tata'al ri kan ketaman ronojel ri xuben ri Jehová kik'in ri tinamit Israel.
Ri rubaqil ri José xmuq pa Siquem
32Ri israelita kik'amon k'a pe pan Egipto ri rubaqil ri José, y xkimuq kan chupan ri ulew ri ruloq'on kan ri Jacob chiri' pa tinamit Siquem, ri xuloq' chike ri e ralk'ual kan ri Jamor. Re achin re' tata'aj richin ri Siquem. Y ri rajel ri xuya' chuwech, ja ri wok'al raqen saqipueq; y re ulew re' xok kan kichin ri e rijatzul kan ri José.
Ri rukamibal ri Eleazar
33Chuqa' xken ri Eleazar, ri ruk'ajol kan ri Aarón y xkimuq ri chuwa-juyu', ri ruk'uluman kan ri ruk'ajol ri Eleazar rubini'an Finees, ri k'o chuwi-juyu' richin ri Efraín.
Currently Selected:
Jos 24: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.