Jos 23
23
Ri rupixabanik ri Josué chire ri tinamit
1Ri Jehová xuya' uxlanenri'il chike ri israelita pa kiq'a' ri e etzelanel kichin, y toq xq'ax yan k'iy juna', ri Josué janila chik ri'j. 2Ja q'ij ri' xuteq koyoxik konojel ri ruwinaq, ri achi'a' ri k'o kiq'ij, ri e tata'al, ri to'onela' y ri e samajela' ri k'o kiq'ij richin ri tinamit y xubij chike: Yin kan janila k'a in ri'j chik, y k'o chik k'a k'iy nujuna'. 3Rix xitz'et ronojel ri xuben ri Jehová ri qa-Dios kik'in konojel ri etzelanel qichin qoma roj, y ja rija' ri xbanon ri oyowal pa qak'exel. 4Yin kan xinch'er yan k'a chiwech ri ruwach'ulew rik'in sakinik richin xiwichinaj. Y chuqa' xinjech yan chiwech ri kiruwach'ulew ri winaqi' ri xech'akatej yan y ri man jani kech'akatej. Re ruwach'ulew re' nitiker-pe rik'in ri raqen-ya' Jordán y napon k'a rik'in ri palou ri k'o pa qajbel-q'ij. 5Ri Jehová ri qa-Dios xkerelesaj-el konojel ri winaqi' chiwech rix y kan man xke'itz'et ta chik y rix kan xtok k'a iwichin ri kiruwach'ulew rije' achi'el rubin rija'.
6Titija' k'a iq'ij richin nik'oje' pan iwánima y tibana' ronojel ri tz'ibatel kan chupan ri wuj richin ri pixa' kichin konojel winaqi' ri ruya'on kan ri Moisés. Man tich'er kan iwi' ni pan iwijkiq'a' ni pan iwajxokon, 7richin man nixol ta iwi' kik'in ri winaqi' richin ri tinamit ri k'a ek'o na kan chupan re ruwach'ulew re'. Man tiya' itzij pa kibi' ri ki-dios, ni man ke'isamajij, ni man tiya' kiq'ij y man ke'inataj. 8Kan ja ri Jehová ri qa-Dios ri xtitzeqelibej, achi'el ri qabanon-pe k'a re wakami. 9Ri Jehová xerelesaj k'a chiqawech ri nima'q taq tinamit ri kan k'o kuchuq'a'. K'a re wakami man jun tikirineq ri rupaban ta ri' chiqawech. 10Roma jun achin chi'ikojol rix, ye'animej k'a e 1,000 achi'a' chuwech, roma ja ri Jehová ri qa-Dios ri nibanon oyowal pa qak'exel achi'el rubin rija'. 11Xaxe k'a ninwajo' ninbij chiwe, chi kan titija' iq'ij richin nichajij-iwi', y kan rik'in k'a ronojel iwánima tiwajo' ri Jehová ri qa-Dios, 12roma wi xa xtich'er kan iwi' y xtijunamatej-iwech kik'in ri winaqi' ri k'a ek'o na kan chuwech ri ruwach'ulew ri', y xkixk'ule' kik'in richin xtixol-iwi' kik'in rije' y rije' iwik'in rix; 13kan tiwetamaj k'a chi wi xtiben keri', ri Jehová man xkerelesaj ta el chiwech rix ri winaqi' richin ri ruwach'ulew ri'. Y xa xke'ok k'a jun pikbel chiwe rix, y xkixqaqa pa kiq'a', y xtina' k'a achi'el yixjich' chi xik'a'y y achi'el chuqa' jun k'ix k'o pa runaq'-iwech, y kan xkixruk'is-el chuwech re jebelej ruwach'ulew ri xuya' ri Jehová ri qa-Dios chiqe.
14Roma yin xa yiken yan, wakami k'a tiwetamaj kan jebel y tik'oje' kan pan iwánima, y tik'oje' kan chi'ik'u'x, chi ronojel ri rusujun ri Jehová ri qa-Dios chiqe, ronojel xbanatej y man jun xk'oje' ta kan chaq keri'. 15-16Wi xtiq'ej ruwi' ri rujikibel-tzij ri Jehová ri qa-Dios ri ruya'on chiwe, y kan xkixbe chikij ri jujun chik dios, xtiya' kiq'ij, y xke'isamajij; wi xtiben keri' ri Jehová ri qa-Dios xtuya-pe ruk'ayewal pan iwi'. Achi'el k'a ri urtisanik ri xuya' rija' pa qawi', keri' chuqa' xtuya-pe ri etzelanik pan iwi', y xkixruk'is-el chuwech ri ruwach'ulew ri xuya' chiqe, xcha' ri Josué.
Currently Selected:
Jos 23: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.