Jon 1
1
Toq ri Jonás xrajo' ta xrewaj-ri' chuwech ri Jehová
1Xk'oje' k'a jun achin rubini'an Jonás, ruk'ajol ri Amitai. Y k'o k'a jun q'ij ri Jehová xch'on rik'in rija' y xubij chire: 2Kabiyin chupan ri nimalej tinamit Nínive y taya' rutzijol chike, chi ri kimak kan xik'o yan ruwi', y roma ri' xkenk'is, xcha' ri Dios chire.
3Jak'a rija' man keri' ta xuben, xa xuch'ob richin nibe pa Tarsis*f1* richin nanimej chuwech ri Jehová. Y roma ri' xbe-qa chuchi' ri palou ri k'o pa Jope, y chiri' xril-wi jun barco ri nibe yan pa Tarsis. Xutoj ri ru-pasaje y xok-el chupan ri barco y xbe chikikojol ri winaqi' ri e beneq chupan, richin nrewaj-el-ri' nej chuwech ri Jehová. 4Jak'a ri Jehová xuben k'a chi xpe jun nimalej kaq'iq'-job pa ruwi' ri ya', y ri ya' nibolqo't-nibolqo't y roma ri' xkina' chi niwuluwu' yan ri barco. 5Roma ri' ri samajela' richin ri barco xkixibij-ki', y chikijujunal rik'in uchuq'a' xech'on rik'in ri ki-dios richin xkik'utuj to'onik. Y ronojel k'a ri ejqa'n xkitorila' kan chupan ri ya' richin chi nitzoyotzo-qa ri barco. Jak'a ri Jonás kan k'a chukojol k'a qa ri ejqa'n k'o-wi y chiri' kamineq chi waran. 6Jari' toq ri rajaw ri barco xqaqa-qa rik'in y xubij chire: ¿Achike roma toq yawer rat? Kayakatej y tak'utuj chire ri a-dios; rik'in juba' nujoyowaj qawech y man yojken ta, xcha'.
7Y ri Jonás kan xbejote' k'a pe kik'in, y konojel xkibila' k'a qa chikiwech chi achike roma nikik'uluwachij re jun ruk'ayewal re yakatajineq pa kiwi'. Y xkibij k'a chi nikisakij richin nikitz'et achoq pa ruwi' xtiqaqa-wi. Y keri' xkiben y xqaqa pa ruwi' ri Jonás. 8K'ari' xkik'utuj chire y xkibij: Tabij chiqe: ¿Achike roma peteneq re ruk'ayewal re' pa qawi'? ¿Achike roma at peteneq kere' rat? ¿Akuchi at peteneq-wi? ¿Achike atinamit? ¿Achike k'a ri e awinaq?, xecha' chire.
9Rija' xubij chike: Yin in hebreo, y ninya' ruq'ij ri Jehová ri Dios ri rajaw ri kaj, ri xbanon re palou y ri ruwach'ulew, xcha'.
10-11Rija' xutzijoj k'a chike chi animajineq chuwech ri Jehová, y toq xkak'axaj ronojel re' y xkitz'et chi ri kaq'iq' xnimer-pe, más xkixibij-ki'. Roma ri' xkik'utuj chire: ¿Achike k'a roma at animajineq-pe chuwech ri a-Dios? ¿Wakami achike k'a niqaben awik'in rat richin chi ri ya' nisile-qa y yojkolotej?, xecha' chire.
12Jari' toq ri Jonás xubij chike: Jare' ink'o pan iq'a'; kinik'aqa' kan chupan ri ya' y xtitane-qa. Roma xa woma yin peteneq re jun ruk'ayewal re' pan iwi', xcha'. 13Y rije' xesamej k'a richin chi xkitzolij ta ri barco chuchi' ri ya', jak'a man xetikir ta roma ri ya' nibolqo't-nibolqo't.
14Y rije' xech'on rik'in ri Jehová rik'in raqoj-chi'ij y xkibij: Niqak'utuj k'a utzil chawe, Jehová, chi man ta xtaya' pa qawi' ri rukamik re jun achin re', roma rik'in juba' xa maneq rumak, y rat kan awetaman k'a re yatajin chubanik, xecha'. 15K'ari' xkichop k'a el ri Jonás y xkik'eq kan chupan ri ya', y kan chi'anin k'a xtane' ri ya' ri nibolqo't. 16Y ri achi'a' ri xebanon, kan xk'oje' rukiy ri Jehová chikiwech; xkisuj kamelabel y xkiya' kitzij chi kan xtikisamajij. 17Y ri Jehová xunaba' jun nimalej ker richin xubeq' ri Jonás, y keri' ri Jonás, xk'oje' k'a oxi' q'ij y oxi' aq'a' pa rupan ri ker.
Currently Selected:
Jon 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.