Abd 1
1
Ri ruk'ayewal pa ruwi' ri ruwach'ulew Edom
1Yin Abdías xink'ul k'a jun rutzijol rik'in ri Jehová Dios pa ruwi' ri ruwach'ulew Edom. Kere' nubij:
Xak'axatej jun rutzijol richin ri Dios;
jun uk'uey rutzijol xtaq-el kik'in ri ajawaren,
y nubij: Qojyakatej chikij ri aj-Edom
richin niqaben labal kik'in, nicha'.
2Jare' k'a ri nubij ri Dios pa ruwi' ri ruwach'ulew Edom:
Xtinben chiwe chi maneq iwuchuq'a' chikikojol ri ch'aqa' chik ruwach'ulew;
Kan xkixetzelex koma ch'aqa' chik winaqi'.
3Rix ixk'o chukojol nima'q taq abej,
ixk'o pa ruwi' taq juyu';
y roma ri' iq'olon-iwi' y chuqa' inimirisan-iwi',
y nibij-qa pan iwánima:
¿Achike ta k'a xtitikir xtich'akon chiqij roj?, yixcha-qa.
4Jak'a yin ninbij chi stape' ta yixxik'an achi'el ri kot,
y chikikojol ta ri ch'umil niben-wi ri isok,
yin chuqa' chiri' xkinapon-wi,
richin k'a chiri' xkixinqasaj-pe k'a pan ulew.
5Wi ta ri eleq'oma' yepe chaq'a' richin ye'eleq'an iwik'in,
kan xaxe k'a ri nikajo' rije' ri xtikik'uaj.
Chuqa' wi ta yepe iwik'in ri yewuxun uva richin nikeleq'aj,
xa kan k'a k'o xtikiya' kan.
Jak'a ri e etzelanel iwichin, kan xtikik'uaj-el ronojel.
6Ronojel ri k'o iwik'in xtikik'uaj-el.
Kan xtikeleq'aj k'a el ronojel ri ibeyomel.
7Konojel ri man e iwinaq ta ri xjunamatej-kiwech iwik'in,
xa xkixkiq'ol y xkixkelesaj chupan ri iwulew.
Stape' xkiben tununri'il iwik'in,
xa xkeyakatej-pe richin xkixketzelaj kan.
Y stape' xkitijla' ri ikaxlan-way,
xa xtikiya' pikbel pan ibey.
Y rix man jun xtiq'ax chiwech.
8Chupan ri q'ij ri' yin xkenk'is konojel ri etamanela' aj-Edom.
Xtinwelesaj ri na'oj chike ri ek'o pa juyu' richin ri Esaú.
9Ri aj-labal aj-Temán xkebaybot k'a roma xibinri'il chinuwech yin,
y chupan ri juyu' richin ri Esaú man jun chik xtik'oje' kan rik'in ruk'aslen.
10Ronojel re' xtibanatej roma xe'iwetzelaj y xe'ikamisaj ri iwach'alal e rijatzul kan ri Jacob.
Roma ri' xkixk'ixbitej y xkixk'is jumul.
11Chupan ri q'ij toq ri Jerusalem xch'akatej koma ri e etzelanel kichin,
rix xa man xe'ito' ta,
ri winaqi' ri' xkik'uaj-el ronojel ri k'o kik'in ri aj-Jerusalem.
Toq xbanatej ch'akonik pa ruwi' ri Jerusalem,
rix chuqa' xa kan xiben achi'el xkiben rije'.
12Man ruk'amon ta chi rix xe'iwetzelaj ri iwach'alal toq xech'akatej.
Man ruk'amon ta chi xixkikot toq xitz'et chi xwulex ri Judá.
Man ruk'amon ta chuqa' xixyojoben chikij toq xek'oje' pa bis.
13Man ruk'amon ta richin xixeleq'an chupan ri kachoch chupan ri q'ij richin ri ruk'ayewal.
Man ruk'amon ta chi xe'iwetzelaj chupan ri q'ij toq xech'akatej.
Man ruk'amon ta chi xik'en-pe ri k'o rejqalen chuwi-kiq'a' chupan ri q'ij richin ri kitzaqik.
14Man ruk'amon ta chuqa' chi xixpa'e' tzan taq jay richin xe'ikamisaj ri xkito-ki'.
Man ruk'amon ta xe'ijech ri winaqi' israelita ri xe'animej chupan ri q'ij richin ri ruk'ayewal.
15Achi'el ri xiben rix aj-Edom, keri' chuqa' xtiban chiwe rix,
ri itzel ibanobal xtitzolix k'a ruk'exel chiwe.
roma ri' naqaj chik k'o-wi ri q'ij richin ri Jehová;
q'ij richin oyowal pa kiwi' konojel ajawaren.
16Achi'el ri aj-Judá xkitej poqon chupan ri ruk'ayewal,
keri' xtikitej poqon ri ch'aqa' chik winaqi' richin ri ruwach'ulew;
kan xtikitej poqon richin xkek'is jumul.
Ri runimirinen ri Israel
17Jak'a chupan ri juyu' Sión ek'o ri xkekolotej kan,
y ri juyu' ri' kan xtok xaxe richin ri Dios.
Ri e rijatzul kan ri Jacob xtikichinaj chik jun bey ri kulew.
18Ri e rijatzul kan ri Jacob xke'ok achi'el q'aq',
y ri e rijatzul kan ri Esaú xa xke'ok achi'el k'im.
Ri e rijatzul kan ri José xke'ok achi'el ruxaq q'aq';
xkekik'et y xkekik'is ri aj-Edom.
Man jun chik xtikolotej kan chike ri rijatzul kan ri Esaú:
Keri' nubij ri Jehová.
19Ri israelita ri ek'o pa xokon xtikich'ek ri ruwach'ulew Edom richin xkek'oje' chiri',
y ri ek'o chuwa taq juyu', xtikichinaj ri ruwach'ulew Filistea, y ri ulew richin ri Efraín y ri Samaria.
Chuqa' ri e rijatzul ri Benjamín xtikich'ek ri ruwach'ulew Galaad.
20Ri aj-Samaria ri ek'o pa ximonri'il, xtikichop-qa ri kiruwach'ulew ri aj-Canaán;
xtikichinaj ri k'o k'a pa xaman y napon k'a pa tinamit Sarepta.
Y ri aj-Jerusalem ri ek'o pa ximonri'il chupan ri tinamit Sefarad xtikichop-qa ri tinamit ri ek'o pa xokon chire ri Judá.
21Y rije' xkejote' k'a el pa ruwi' ri juyu' Sión
richin xtikiq'et-tzij pa kiwi' ri winaqi' e richin ri Esaú.
Y ri q'atbel-tzij ri' xtok richin ri Jehová.
Currently Selected:
Abd 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.