Hag 1
1
Ri Dios nubij chi nipabex chik q'anej ri rachoch
1K'o k'a jun q'alajirisey ruch'abel ri Dios rubini'an Hageo. Y chupan k'a ri nabey q'ij chire ri ruwaqxaq ik' chire ri ruka'n juna' richin ri q'atbel-tzij richin ri rey Darío, ri Dios xch'on k'a pe rik'in ri Hageo y xuya' jun rutzijol chire richin nubij chire ri q'atoy-tzij pa ruwi' ri ruwach'ulew Judá rubini'an Zorobabel ruk'ajol ri Salatiel, y chire chuqa' ri nimalej sacerdote rubini'an Josué, ruk'ajol ri Josadac. 2Y ri Jehová ri k'o ronojel uchuq'a' pa ruq'a' xubij chire ri Hageo: Ri awinaq nikibij chi man jani napon ruq'ijul chi nipabex chik q'anej jun bey ri wachoch. 3Wakami k'a tak'utuj chire ri tinamit, 4wi kan ruk'amon chi rije' ek'o pa taq jebelej jay, rokik ri wachoch yin xa mulumik abej rubanon. 5Roma ri' yin Jehová ri k'o ronojel uchuq'a' wik'in ninbij: Tich'obo' jebel wi utz ri yixajin chubanik. 6Rix xixtikonej-qa, jak'a xa juba' ok ri xik'ol. Yixwa', jak'a man ninoj ta ri ipan. Yixqumun, jak'a man nik'o ta qa ri chaqi'j-ichi'. Nikusaj itziaq pim, jak'a man yixmeq'e' ta chupan. Y ri nuk'ul rajel chiq'ij, achi'el xa nuk'ul pa jun peqes ri xa teq'el.
7Yin Jehová ri k'o ronojel uchuq'a' wik'in ninbij chiwe chi tich'obo' k'a wi utz ri yixajin chubanik. 8Kixjote' k'a pa ruwi' ri juyu', y tik'ama-pe ri che' richin nipaba' chik jun bey ri wachoch, roma re' niqa' chinuwech y nuya' nuq'ij. 9Rix nikanoj janila, jak'a juba' ok ri niwil; y ri juba' ri nik'en-pe chi'iwachoch, yin ninben chire chi chaq k'ate' nik'is-qa. Y rix nik'utuj achike roma. Y re' kan roma k'a ri wachoch wulatejineq, rokik chi'ijujunal rix xaxe ri nik'atzin chire ri iwachoch rix ri nikanoj. 10Roma ri', maneq chik job, y ri ulew man xuya' ta pe ri tiko'n. 11Y xinben chi man niwachin ta chik ri k'echelaj, ri juyu', ri itiko'n, ri juwi-uva, ri olivo y ronojel ri nuya' pe ri ruwach'ulew. Y chuqa' man xkixk'iyer ta chik rix, ni ta ri iwawej man xkek'iyer ta chik. Y ronojel ri itiko'n man xtel ta chik pe, nicha' ri Jehová, xcha' ri Hageo.
Ri tinamit nikinimaj rupixa' ri Dios
12Jari' toq ri Zorobabel, ri Josué y konojel ri winaqi', xkak'axaj ri ruch'abel ri Jehová ri ki-Dios ri xubij ri Hageo. K'ari' rije' xkik'en rukiy y xkiya' rejqalen ri Jehová. 13Jari' toq ri Hageo, xch'on chik rik'in ri tinamit, y xubij ri rubin-pe ri Jehová chire. Xubij k'a chi ri Jehová k'o kik'in. 14-15Y rik'in re' ri Jehová xuk'asoj kánima ri Zorobabel, ri Josué y konojel ri winaqi' israelita. Y roma ri' xepe chupan ri q'ij juwineq kaji' chire ri ik' ri', y xkitikeriba' chik q'anej ri rachoch ri Dios.
Currently Selected:
Hag 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.