Hag 2
2
Ri ruk'ojlemal ri k'ak'a' rachoch ri Dios
1Chupan ri q'ij juwineq jun chire ri ruwuq ik' chire ri juna' ri', xch'on chik k'a pe ri Jehová rik'in ri Hageo. Y ri Hageo xubij chike ri winaqi': 2Jare' ri ruch'abel ri Dios ri ninbij chawe rat Zorobabel, q'atoy-tzij pa ruwi' ri Judá, chawe rat Josué nimalej sacerdote, y chiwe rix konojel winaqi'. 3¿K'o kami jun chiwe rix ri xk'oje' wawe' ojer kan, ri tz'eteyon ta re jay re' y ri jebelej rubanik pa rutikeribel? Y ¿achike k'a rubanon ri nitz'et wakami? ¿Man nuk'en ta pe q'axo'n pan iwánima roma la rubanon? 4Ri Jehová nubij chiwe rix Zorobabel y ri Josué chi tik'oje' iwuchuq'a'. Y rix winaqi' tikuqer ik'u'x y kixsamej, roma rija' kan nik'oje' iwik'in. Ri Jehová ri k'o ronojel uchuq'a' pa ruq'a' rusujun ronojel re'. 5Y re' xusuj chuqa' chike ri qati't-qamama', toq xe'el-pe pan Egipto. Ri Dios nubij chuqa' chi rija' kan k'o pan inik'ajal rix. Roma ri' man nixibij-iwi'.
6Roma ri Jehová ri k'o ronojel uchuq'a' pa ruq'a' nubij chi tiwoyobej na juba', roma rija' nuyikiya' ri kaj y ri ruwach'ulew, ri palou y ri tz'iran taq ruwach'ulew. 7-8Rija' xtuben chike konojel winaqi' chi xkebaybot. Jari' k'a toq rije' xtikik'en-pe ronojel ri kibeyomel re wawe', roma richin rija' ronojel ri saqipueq y ri q'anapueq. Y ri ruk'ojlen ri Dios xtunojisaj ri k'ak'a' rachoch. Ri Jehová ri k'o ronojel uchuq'a' pa ruq'a' rusujun ronojel re'. 9Ri ruka'n rachoch kan más k'a jebel xtiban chire chuwech ri nabey. Y chupan ri jay ri', rija' xtuya' uxlanibel-k'u'x, nicha' ri Jehová ri k'o ronojel uchuq'a' pa ruq'a', xcha' ri Hageo.
Ri Jehová nusuj urtisanik pa kiwi' ri ruwinaq
10Chupan ri q'ij juwineq kaji' chire ri ik' beleje', chupan ri juna' ri', ri Jehová xch'on chik rik'in ri Hageo. Y ri Hageo xubij chike ri winaqi': 11Ri Jehová ri k'o ronojel uchuq'a' pa ruq'a' nuk'utuj chiwe rix sacerdote, pa ruwi' ri rupixa'. 12Wi k'o ta jun ri nuk'uaj chupan ri rutziaq, juba' ti'ij ri kan ch'aron chik y ri tzieq ri' chaq k'ate' xik'o-el rik'in jun kaxlan-wey, o jun q'utun chaq'arisan, ri vino, ri aceite, o xabachike na jun chik ri nitij, ronojel re', ¿xke'ok kami ch'aron chuqa'? Y ri sacerdote xkibij chi man keri' ta. 13K'ari' ri Hageo xubij chik: Wi k'o ta jun ri man ch'ajch'oj ta roma nuchop jun kamineq, y k'ari' nuchop jun chike ronojel re', ¿xketz'ilobitej kami kan rije'? Y ri sacerdote xkibij chi keri'. 14Jari' k'a toq ri Hageo xubij: Keri' k'a ibanon rix chuwech ri Jehová. Ronojel ri isamaj y ronojel ri nisuj chire, chuqa' e tz'ilobitajineq.
15Kixch'obon utz chirij ri ninbij wakami y chirij ri xtibe-apo chiqawech. Toq xich'on iwik'in pa nabey, rokik toq man jani niya-qa ri nabey taq abej chupan ri rachoch ri Jehová, 16jun chiwe rix niberukanoj wo'o' quintal ixin, jari' k'a toq xaxe ka'i' rik'in nik'aj nril-pe. Y toq napon rik'in ri yitz'bel-uva richin nrelesaj-pe kawineq lajuj kuku' vino, jari' toq xaxe juwineq kuku'*f1* ri nel-pe. 17Ri Jehová xuya-pe ruyabil ri tiko'n y chuqa' ri saqboch richin xuk'is ronojel ri isamaj rix. Man rik'in ri' man xtzolin ta pe ik'u'x rik'in. 18Kixch'obon k'a utz chupan re q'ij re', q'ij juwineq kaji' chire ri ik' beleje', roma ja q'ij re' toq xiben-qa ruxe' ri rachoch ri Jehová. 19Stape' man jun chik k'o chupan ri ik'ujay, y man jani yewachin-pe ri juwi-uva, ri wíkix, ri granado y ri olivo, jak'a re wakami rija' nutikeriba' nuya' chik urtisanik pan iwi', xcha' ri Hageo.
Ri xsuj chire ri Zorobabel
20Chupan ri q'ij juwineq kaji' chire ri ik' ri', xch'on chik jun bey ri Jehová rik'in ri Hageo, y xubij 21chi tich'on rik'in ri Zorobabel, ri q'atoy-tzij pa ruwi' ri Judá, y kere' tubij chire: Yin Jehová kan xtinsiloj ri kaj y ri ruwach'ulew. 22Y xkentek'mayila' ri kitz'uyubal richin q'atbel-tzij ri ajawaren y xtink'is ri kuchuq'a'. Chuqa' xkentek'mayila' ri ki-carruaje e richin labal y ri yejote' chupan. Xkeken k'a ri kikiej y ri achi'a' ri yech'oke' chirij kiej. Chikijujunal xketzaq roma ri ki-espada ri kach'alal. 23Chupan ri q'ij ri', yin Jehová ri k'o ronojel uchuq'a' wik'in, xkatinjikiba' chi ja rat nusamajel Zorobabel xtaq'et-tzij pa nubi'. Yin Jehová ri k'o ronojel uchuq'a' wik'in kere' ninbij, xcha' ri Dios.
Currently Selected:
Hag 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.