Ex 1
1
Ri tijoj-poqonal kichin ri israelita pan Egipto
1Jere' ri kibi' ri e ruk'ajol kan ri Israel, ri achin ri nibix chuqa' Jacob chire, ri xe'ok-apo pa ruwach'ulew Egipto y chikijujunal rije' chi achijlonel, ixjayilonel y alk'ualaxel: 2Ri Rubén, ri Simeón, ri Leví, ri Judá, 3ri Isacar, ri Zabulón, ri Benjamín, 4ri Dan, ri Neftalí, ri Gad, y ri Aser. 5Konojel k'a ri e rijatzul kan ri Jacob e oxk'al lajuj chi konojel y ri José kan k'o chik chiri' pan Egipto.
6Toq q'axineq chik janila chi juna', ri José, ri rach'alal y konojel ri winaqi' richin ri sol ri' xa xeken k'a el. 7Y ri e rijatzul kan ri Israel kan xe'alk'ualan-wi, kan janila k'a xek'iyer. Kan janila k'a xewinaqir, kan janila xk'oje' kuchuq'a' y xkinojisaj chijun ri ruwach'ulew Egipto.
8Y chupan k'a ri q'ij ri' xok chik jun k'ak'a' rey, richin niq'aton-tzij pa ruwi' ri Egipto, y ri rey ri' man xretamaj ta ruwech ri José, y roma ri' xch'on kik'in ri ruwinaq y xubij chike: 9Titzu', ri e rijatzul ri Israel janila xewinaqir, y más kuchuq'a' chiqawech roj. 10Wakami k'a qojok aj-na'oj y tiqanojij k'a achike niqaben chike. Richin man tiqaya' q'ij chi yek'iyer más, man xa titz'ukutej jun labal y nikitun-ki' kik'in ri e etzelanel qichin y yeyakatej chiqij y ye'animej-el chupan re qaruwach'ulew, xcha' ri rey. 11Kan ja ri q'ij ri', ri aj-Egipto xekikanoj achi'a' richin yek'oje' pa kiwi' ri israelita richin niya'ox k'ayew taq samaj chike y xban chike chi xkipaba-q'anej ri nima'q taq tinamit kibini'an Pitón y Ramsés, richin nuyek ri ru-trigo ri rey. 12Jak'a toq xeya'ox más pa tijoj-poqonal, jari' toq más xewinaqir y más xkinojisaj ruwech ri tinamit. Roma ri' ri aj-Egipto kan nikixibij chik ki' chikiwech ri israelita.
13Y xkiben chike ri israelita chi xekiben janila k'ayew taq samaj. 14Kan xk'ayewatej k'a ri kik'aslen roma ri ilinri'il xya'ox pa kiwi'. Xeya'ox k'a pa banoj ch'abeq richin xkiben xan chire richin nok ladrillo y ronojel ri kow taq samaj richin pa juyu', y kan xetz'ilox k'a chubanikil ri samaj ri'. 15Pa ruwi' ronojel ri' ri rey xch'on kik'in ri Sifrá y ri Puá, ri e k'exelo'n kichin ri ixoqi' israelita y xubij chike: 16Toq yixbe kik'in ri ixoqi' israelita toq ye'alan, kan titz'eta' chi'anin ri achike ri nalex, wi ti ala' ri nalex, tikamisaj y wi ti xten, tik'asba' kan, xcha' chike. 17Jak'a ri k'exelo'n ri' kan xkixibij-ki' chuwech ri Dios y man xkiben ta achi'el ri xubij ri rey chike, roma ri' rije' xa man xekikamisaj ta ri taq alaboni'. 18Y toq ri rey xrak'axaj re', xuteq k'a koyoxik ri ixoqi' ri', y xubij chike: ¿Achike roma rix xa man e ikamisan ta ri taq alaboni'?, xcha'.
19Ri k'exelo'n ri' xkibij chire ri rey: Ri ixoqi' israelita man e junan ta qik'in roj ri oj aj-Egipto, roma rije' kan k'o kuchuq'a' y kan xek'achoj yan toq roj yojapon kik'in, xecha'.
20-21Y roma ri k'exelo'n ri' kan k'o rukiy ri Dios chikiwech, ri Dios xuben chike ri e ka'i' ixoqi' ri' chi xek'oje' kal y xek'iyer chuqa'. Y ri israelita kan xek'iyer más y man xek'is ta qa y xk'oje' más kuchuq'a'. 22Y toq ri rey xutz'et chi xa man nitikir ta yerukamisaj, jari' toq xubij chike ri ruwinaq chi toq ye'alex ri ak'uala' taq alaboni' chikikojol ri winaqi' israelita, kan ketorix-el pa raqen-ya', y wi taq xtani' ri ye'alex, kekik'asba' kan.
Currently Selected:
Ex 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.