Ex 2
2
Ri ralaxbal ri Moisés
1Chupan k'a ri q'ij ri' xk'oje' k'a jun achin chikikojol ri rijatzul kan ri Leví, rija' k'ulan k'a rik'in jun ixoq ri junan kati't-kimama'. 2Re ixoq re' xyawej kan chirij jun chik ti ral, y toq xalex ri ak'ual xutz'et chi ti ala' y kan janila ti jebel ok, y roma ri' xrewaj oxi' ik'.
3Jak'a toq man xtikir ta chik xrewaj ri ti ak'ual, rija' xuben ruchojmil jun ti chakech, y richin man niq'ax ta ya' chupan, xuq'olij-el rik'in asfalto y q'ol, y k'ari' xuya-el ri ak'ual chupan, y xberuya' kan chuchi' ri raqen-ya' Nilo, chukojol pop ri k'iyineq-pe chupan ri ya'. 4Y ri ti rana' ri ti ak'ual ri', xk'oje' kan nej richin nunachaj-apo achike xtik'uluwachitej rik'in ri ti ruxibal.
5Y ri rumi'al ri rey xbe-qa chuchi' ri raqen-ya' ri' richin nibe'atin, e rachibilan-el jun tzobaj xtani' ri e rusamajela'. Y rokik ri xtani' ri' yebiyajilan chuchi' ri ya', jari' toq rija' xutz'et ri jun ti chakech chukojol ri pop ri'. Y jari' xuteq jun chike ri e rusamajela' ri e beneq chirij richin xberuk'ama-pe ri ti chakech. 6Toq ri rumi'al ri rey xujeq ruwi' ri ti chakech, xutz'et chi k'o jun ti ak'ual chupan y re ti ak'ual re' noq'. Jari' toq re xten re' xujoyowaj ruwech y xubij: Re ak'ual re' jun chike ri ak'uala' hebreo, xcha'.
7Jari' toq ri ti rana' ri ti ak'ual xubij chire ri rumi'al ri rey: ¿Nawajo' chi ninkanoj-pe jun ixoq israelita richin chi nuya' rutz'um re ak'ual re', richin nuk'iytisaj chawech?, xcha' chire.
8Y ri rumi'al ri rey xubij chi tiberukanoj-pe. Y ri ti xten kan ja ri rute' ri ak'ual xberoyoj-pe. 9Y ri rumi'al ri rey xubij chire: Tak'uaj re ak'ual re' y tak'iytisaj-pe chinuwech y yin xkatintoj, xcha'.
Ri te'ej xuk'uaj k'a el ri ak'ual y xuk'iytisaj. 10Y toq ri ak'ual kan nim chik, jari' toq xberuya' kan chire ri rumi'al ri rey, y re xten re' kan ral xuben chire y xubij: Roma pa ruwi' ya' xinwelesaj-wi-pe, roma ri' xtubini'aj Moisés, xcha'.
Ri Moisés nanimej-el pan Egipto
11Y toq q'axineq chik k'iy juna', toq ri Moisés kan achin chik, k'o k'a jun q'ij xbe richin chi xeberutz'eta' ri e ruwinaq israelita, y xutz'et chi kan janila nikitej poqon pa samaj. Xutz'et chuqa' chi jun aj-Egipto janila nuch'ey jun chike ri ruwinaq. 12Jari' toq rija' kan k'ulan xtzu'un y xutz'et chi man jun nitz'eton-pe, xukamisaj ri aj-Egipto y xumuq kan pa sanayi'. 13Ri ruka'n q'ij xbe chik jun bey chikitz'etik ri ruwinaq y jari' toq xerutz'et chi e ka'i' ruwinaq yech'ayon-ki', y ri Moisés xch'on rik'in ri nich'ayon y xubij: ¿Achike roma nach'ey la awachpochel?, xcha' chire.
14Y ri achin ri' xubij: ¿At achike k'a rat? Rat man at tata'al ta y man at q'atoy-tzij ta chi nachojmirisaj oyowal ri yebek'ulun-pe chiqakojol ¿O xa nawajo' yinakamisaj achi'el xaben chire ri aj-Egipto?, xcha' chire ri Moisés.
Jari' toq ri Moisés kan janila xuxibij-ri' y xubij-qa: Xa xnabetej yan ri xinben, chi xinkamisaj ri jun aj-Egipto, xcha-qa. 15Toq ri rey xretamaj ri xuben ri Moisés, jari' toq xuteq rukanoxik richin chi tikamisex; jak'a ri Moisés xa xanimej-el chuwech ri rey y xbe k'a pa ruwach'ulew rubini'an Madián, y toq xapon xbetz'uye' k'a chuchi' jun pozo.
16Y ri chiri' pa Madián k'o k'a jun sacerdote rubini'an Jetro ri ek'o wuqu' rumi'al. Re xtani' re' e kik'uan k'a ri rukarne'l ri kitata' y k'o chi nikelesaj na ri ya' y nikinojisaj ri juku' richin ye'uk'ya' ri karne'l. 17Jak'a ri ch'aqa' chik yuq'unela' xepe y xekoqotaj-el ri xtani' ri chiri', y toq xutz'et ri Moisés chi keri' xban chike ri xtani' ri', xeruto' y xuya-el kiya' ri kikarne'l. 18Y toq xetzolin rik'in ri kitata', rija' xubij chike: ¿Achike xiben-pe, achike roma chi'anin xixtzolej-pe wakami?, xcha'.
19Rije' xkibij: K'o jun achin aj-Egipto xojruto' chikiwech ri yuq'unela', k'ari' xrelesaj ri ya' pa qak'exel, y xuya' kiya' ri qakarne'l, xecha'.
20Y ri kitata' xuk'utuj chike ri rumi'al: ¿Akuchi k'o-wi ri achin ri'? ¿Achike roma xiya' q'ij richin xk'oje' kan? Ja tibewoyoj y tisuju' ruway richin niwa'. 21Y keri' toq ri Moisés kan xqa' chuwech richin xk'oje' kan chiri' pa rachoch ri achin ri'. Y toq ik'owineq chik juba' q'ij, ri Jetro xuya' k'a jun chike ri rumi'al chire richin nok rixjayil. Ri xten ri' rubini'an Séfora. 22Y rija' xralaj k'a jun ak'ual ti ala', ri Moisés xunojij-qa y xubij: Re ak'ual re' xtubini'aj Guersón,*f1* roma yin xa in q'axel chupan jun chik ruwach'ulew, xcha'.
23Toq q'axineq chik k'iy q'ij, ri rey richin Egipto xken. Man rik'in ri' ri winaqi' israelita kan k'a yejilon na roma ri ilinri'il ri k'o pa kiwi' y xech'on k'a rik'in ri Dios. Y rija' kan xrak'axaj k'a ri kich'abel, roma kan janila nikitej poqon chupan ri ilinri'il ri'. 24Y ri Dios kan xrak'axaj k'a ri kijiloj rije', y kan k'o k'a chi yeruto' roma keri' ri jikibel-tzij ri rubanon ojer, kik'in ri Abraham, ri Isaac y ri Jacob. 25Ri Dios kan xerutzu-pe ri winaqi' israelita y rija' kan xujoyowaj k'a kiwech.
Currently Selected:
Ex 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.