Sof 2
2
Jun oyonik richin nitzolin-pe kik'u'x ri winaqi'
1K'ari' ri Dios xubij chuwe: Timolo' k'a iwi' y kixch'obon rix winaqi' ri maneq ik'ix;
2richin chi man napon ta ri q'ij richin xkixelesex-el wawe',
achi'el toq ri kaq'iq' nuk'uaj-el ri solot;
richin chi man nipe ta pan iwi' ri ruq'aq'arinen ri royowal ri Jehová;
ni man noqaqa ta ri q'ij richin ri royowal ri Jehová pan iwi'.
3Chi'iwonojel rix ri iqasan-iwi', tikanoj k'a ri Jehová;
rix ri kan iniman-pe rutzij.
Kan jantape' k'a tikanoj ri ruchojmilal,
tikanoj ri qasanri'il.
Rik'in juba' keri' xkixkolotej ta kan chupan ri q'ij richin ri royowal.
Ri xtuk'uluwachij ri ruwach'ulew Filistea
4Ri tinamit Gaza kan xtok kan tz'iran,
y ri tinamit Ascalón xtiwuluwu' kan.
Pa nik'aj-q'ij xke'uk'uex-el konojel ri winaqi' aj-Asdod.
Y ri winaqi' aj-Ecrón xke'elesex-el jumul chuwech ri ruwach'ulew.
5Kan toq'ex k'a kiwech ri ek'o pa taq'aj chuchi' ri palou.
Ri ruch'abel ri Jehová kan nich'on pan iwi' rix aj-Canaán.
Rija' kan xkixruk'is rix aj-Filistea,
y kan man jun chik xtik'oje' kan chiwe.
6Ri iruwach'ulew ri ek'o chuchi' ri palou xa xtok kan soq'olbel,
akuchi xtikimol-wi-ki' ri yuq'unela'
y akuchi yek'oje-wi ri karne'l.
7Ri tinamit ri' xtok kichin ri aj-Judá ri xkekolotej kan.
Y chiri' rije' kan xkekikot k'a.
Ri pa taq chi'aq'a' xkek'oje' kan pa kachoch ri winaqi' aj-Ascalón,
y chiri' k'a xkewer-wi.
Man jun xtinaqo kichin, roma ri Jehová ri qa-Dios xkeruchajij.
Rija' kan xkerurtisaj y xkeruya-q'anej pa jotol.
Ri xtikik'uluwachij ri ruwach'ulew Moab y Amón
8Yin, Jehová, kan xinwak'axaj toq ri aj-Moab xekiyojobej ri israelita.
Chuqa' xinwak'axaj toq ri aj-Amón xech'on itzel chikij ri nutinamit,
y xkinimirisaj-ki' chi nikik'en kan ri kiruwach'ulew.
9Roma ri' yin Jehová, ri in k'iytisanel richin ronojel, ninya' nutzij
chi ri ruwach'ulew Moab xtiberuk'uluwachij achi'el ri Sodoma,
y ri Amón achi'el ri Gomorra.
Xtibe'ok kan juyu' richin k'ix y ulew richin atz'an.
Kan xtitole' k'a kan richin q'asen.
Jak'a ri xkekolotej kan chike ri nutinamit yin, xtikichinaj kan ronojel ri k'o rejqalen,
y xtok kan kichin rije' richin q'asen.
10Jak'a rajel ruk'exel re' ri xtikik'ul ri moabita y ri amonita,
roma kan xkinimirisaj-ki',
y kan xekik'ixbisaj ri e nutinamit;
yin Jehová ri k'iytisanel richin ronojel ri yibin.
11Rije' kan xkinkimey k'a yin,
toq xkenk'is-el konojel ri ki-dios.
Y yin Jehová kan xtiya'ox k'a nuq'ij koma konojel winaqi' chupan ri kiruwach'ulew.
Ri xtuk'uluwachij ri ruwach'ulew Etiopía
12Keri' chuqa' rix winaqi' aj-Etiopía, yin, Jehová, kan xkixinkamisaj rik'in ri nu-espada,
y xkixk'is chi'iwonojel, xcha'.
Ri xtuk'uluwachij ri ruwach'ulew Asiria
13Ri Jehová kan xtutzeqej k'a ri ruq'a' pa xaman richin nuk'is ri ruwach'ulew Asiria.
Keri' ri tinamit Nínive kan xtitole' kan,
y kan xtok kan tz'iran-tz'iran.
14Ri kiruwach'ulew xtok kan soq'olbel kichin nima'q y kokoj taq awej.
Chuqa' chiri' xkek'oje-wi ronojel kiwech chikopi' e richin pa k'echelaj.
Ri túkur xkewer pa kiwi' ri xata't,
y ri qo'ch xkebebixan pa taq ventana.
Y ronojel ri tz'alem ri e banon rik'in tiox-che' ri e ya'on chire ri jay xa xketzaq-el.
15Ri ojer kan ri tinamit ri' janila xkikot,
y kan kuqul ruk'u'x xk'ase'.
Ri winaqi' ri xek'oje' chiri' xkibij chi kan man jun chik tinamit achi'el rije',
jak'a re wakami xa tolan-tolan chik kan.
Xa ja chik ri chikopi' richin pa k'echelaj e chajiyon kan.
Ri wineq ri xtiq'ax-el keri', xtitze'en kan chirij,
y kan janila xtuyojobej kan.
Currently Selected:
Sof 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.