Job 3
3
Ri Job kan xretzelaj ri q'ij toq xalex
1K'ari' ri Job xch'on k'a, y rija' kan xretzelaj k'a ri q'ij toq xalex; 2Roma ri' xubij:
3K'ate' ta man ta k'o ri q'ij toq yin xinalex,
y maneq ta chuqa' ri itzel aq'a' toq xbix chi jun ti ala' ri xtz'ukutej rik'in ri nte',
4k'ate' ta ri saqil richin ri qij ri' xq'equmatej ta,
y ri Dios man ta xoqaqa chuk'u'x ri q'ij ri'
y kan man ta xseqer chuqa' ri q'ij ri'.
5Jebel ta ri', xa ta ri q'ij ri' xqa' ta q'equ'm y muj pa ruwi',
kan ta xmuqutej ri q'ij ri' roma ri q'equ'm;
y ri rumujal ri ik' xuk'en ta pe xibinri'il pa ruwi' ri q'ij ri'.
6Ri chi'aq'a' toq xitz'ukutej rik'in ri nte' más ta utz man ta xk'is;
richin chi ri q'ij toq xinalex man ta q'alaj chupan ri juna',
richin chi ri q'ij ri' man ta q'alaj chupan ri ik'.
7Ri chi'aq'a' ri' man ta jun ixoq xyawej kan,
y keri' man ta k'o kikoten.
8Jebel ta ri' xa ta ri aj-itza' xkiya' ta etzelanik pa ruwi' ri q'ij ri',
y achi'el ri etzelanik ri nikiya' pa ruwi' ri cocodrilo.*f1*
Keri' ta xkiben pa ruwi' ri chi'aq'a' ri'.
9Xa man ta xebeyik'ulun-pe ri ch'umila' ri nimaq'a' ri';
xa man ta xbek'ulun-pe ri saqil ri oyoben,
y xa man ta xtzu'un-pe ri q'ij.
10Itzel k'a ri q'ij ri' roma kan man xuben ta chire ri nte' chi man ta xinalex,
y man xuben ta chire ri runaq' taq nuwech chi man ta nintz'et re tijoj-poqonal re'.
11¿Achike roma man in kamineq xinalex,
ó xiken ta chupan ri walaxik?
12Ri nte' xa man ta na xiruk'ul,
y ri ruwa taq ruk'u'x rija' xa man ta xkiya' nutz'um.
13Richin keri' in kamineq ta y yinuxlan ta chik.
Keri' nuchapon ta waran y in li'an ta.
14Xa in li'an ta chik junan kik'in ri e rey ri xeken yan el.
Chuqa' junan ta chik ink'o kik'in ri xepixaban ojer,
ri xepaban chik q'anej tzaqineq taq tinamit.
15Kan yinuxlan ta chuqa' kik'in ri tata'al ri e rajaw ri q'anapueq,
ri kinojisan ri kachoch chi saqipueq.
16¿Achike roma man ximuq pan ewel achi'el ri ak'ual ri man nril ta ruq'ijul,
ri kan man jun bey xutz'et ta ruwech ri saqil?
17Chiri' chuxe' ulew man yenaqon ta chik pe ri e banoy taq etzelal,
y chiri' chuqa' ye'uxlan-wi ri xk'is-el kuchuq'a'.
18Chiri' ye'uxlan-wi ri xkitej-el poqon pa taq samaj,
y man nikak'axaj ta chik ri kiraqoj-chi'ij ri xek'oje' pa kiwi'.
19Chiri' ye'uxlan-wi chi ch'uti'q chi nima'q,
y chiri' ri samajel xa xkolotej yan k'a chuwech ri rajaw.
20¿Achike na roma toq ek'o ri k'a e k'es na y xa nikitej poqon,
y k'a e k'es na chuqa' ri k'eyurneq kik'aslen?
21¿Achike na roma ri koyoben kikamik y xa man yeken ta,
stape' kan nikikanoj kikamik achi'el ta nikikanoj jun beyomel?
22Rije' yekikot k'a ja toq yebemuq kan.
23¿Achike roma toq k'o ruk'aslen jun achin ri xa man nril ta el rubey,
ri banon chire roma ri Dios chi q'aton rubey?
24Y keri' yin, roma ri nuq'axo'n, xa man yiwa' ta.
Ri ruya'al nuwech nibiyin y nich'otot-qa pan ulew.
25Xa kan xoqaqa k'a wik'in ri nuxibin-wi' chuwech.
Kan xink'uluwachij k'a ri nupoqonan yinapon chupan.
26Yin man yich'uch'u' ta, ni man yinuxlan ta juba'.
Xa pa ruk'exel ri' xa ruyon q'axo'n ri wilon, xcha' ri Job
Currently Selected:
Job 3: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.