Isa 2
2
Ri uxlanibel-k'u'x richin jantape'
1Jare' k'a ri xq'alajirisex chinuwech yin Isaías, ri achike xtibekik'uluwachij ri tinamit Jerusalem y ri ruwach'ulew Judá.
2Chupan ri ruk'isibel taq q'ij, xtijikibex k'a ri juyu' Sión,
ri akuchi k'o-wi ri rachoch ri Jehová.
Y jak'a juyu' ri' ri más nej jotol chikaj,
kan janila nim chikiwech ri ch'aqa' chik juyu' ri ek'o chunaqaj.
Y konojel k'a ri winaqi' richin ri ruwach'ulew xtikinojisaj ri ruwech.
3Janila chi winaqi' xke'apon y xtikibij k'a chikiwech:
Kixanpe, qojjote-el pa ruwi' la juyu' richin ri Jehová.
Jo' chupan ri rachoch ri ki-Dios ri israelita.
Chiri' ri Jehová xtiberuk'utu' ri rubey chiqawech,
y roj kan xqojtikir xqojbiyin chupan.
Roma chiri' pa Sión xtel-wi-pe ri rutijonik ri Jehová,
y chiri' pa Jerusalem xtibeq'alajin-wi ri ruch'abel, xkecha'.
4Ri Jehová xtiq'aton-tzij chikikojol ri ch'aqa' chik winaqi'.
Rije' man jun chik labal xtibekibana'.
Roma ri' ri ki-espada xa xtikijel rubanik, y xtikiben arado chike.
Chuqa' ri kikum xa xtikiben kijos chike.
Man jun chik ruwach'ulew xtiyakatej chirij jun chik ruwach'ulew,
ni man xketijox ta chik richin yebe pa taq labal.
5Y ri israelita xtikibij:
¡Wakami k'a roj ri oj aj pa rachoch kan ri Jacob,
qojbiyin pa saqil ri ruya'on kan ri Jehová!, xkecha'.
Ri rutojbalil pa kiwi' ri e banoy etzelal
6Kan qitzij na wi, rat Jehová xa xojawetzelaj kan roj ri oj atinamit,
roj ri oj rijatzul kan ri Jacob.
Roma ri qawinaq kan xkinimaj ri kibanobal ri winaqi' ri e peteneq pa relebel-q'ij,
banobel ri man jun rejqalen.
Nikik'utuj chike ri winaqi' ri ketaman ri peteneq chiqawech-apo,
achi'el nikiben ri aj-Filistea.
Chuqa' kan nikiya' k'a kitzij kik'in ri man e aj chiri' ta.
7Ri qaruwach'ulew xa kan nojineq rik'in q'anapueq y saqipueq.
Ri qabeyomel xa man ajlatel ta.
Chuqa' chupan ri qaruwach'ulew janila chi kiej ek'o,
y ri carruaje kan man e ajlatel ta.
8Chuqa' pa qaruwach'ulew janila chi wachibel ek'o richin nikiya' kiq'ij.
Kan nikiya' kiq'ij ri xa ja ri kiq'a' ri banayon.
9Rik'in k'a ronojel re' kan xtibeqasex kiq'ij,
y kan xkek'ixbitej.
Roma ri', rat Jehová, man takuy kimak.
10Roma ri' rix winaqi' tiwewaj-iwi' chikikojol nima'q taq abej,
Tiwewaj-iwi' chuxe' taq jul.
Tiwewaj k'a iwi' chuwech ri Jehová,
roma rija' kan k'o rukiy
y ri rusaqil ri ruk'ojlemal kan nunojisaj ri ruwach'ulew rik'in xibinri'il.
11Y xtapon k'a jun q'ij toq ri kinimirisan-ki' k'o chi xtikiqasaj-ki'.
Kan xtiqasex k'a kiq'ij roma ri kibanobal.
Kan xaxe chik ri Jehová ri xtinimirisex ruq'ij chupan ri q'ij ri'.
12Roma ri q'ij richin ri Jehová ri k'iytisanel richin ronojel,
xtoqaqa pa kiwi' konojel winaqi' ri kinimirisan-ki';
pa kiwi' konojel winaqi' ri kan janila nikina-ki',
y kan xtiqasex k'a kiq'ij.
13Kan xtiqasex k'a kiq'ij konojel ri nima'q taq kipalen ri ek'o chuwech re ruwach'ulew:
ri e nima'q taq tiox-che' ri ek'o pa Líbano,
ri e nima'q taq paten-che' ri ek'o pa Basán,
14ri e nima'q taq juyu',
y chuqa' ri ch'aqa' chik juyu',
15ri jay ri janila e nima'q kipalen,
y ri e nima'q taq tz'aq,
16ri e nima'q taq che' ri e ya'on chupan ri barco ri ek'o pa Tarsis,
y ri ch'aqa' chik jebelej taq barco.
17Y wi ronojel re' xtiqasex kiq'ij,
k'atala' chik ri winaqi' ri kinimirisan-ki'.
Xa kan xaxe chik k'a ri Jehová xtuk'ut ri ruk'ojlen chupan ri q'ij ri'.
18Y kan xkeruk'is k'a el ronojel kiwech taq wachibel ri yekiya' kiq'ij.
19Toq ri Jehová xtiyakatej richin nusiloj ri ruwach'ulew,
ri winaqi' xtikewaj-ki' chuxe' nima'q taq abej,
y chuxe' taq jul xtikewaj-ki' chuwech ri Jehová,
roma rija' kan k'o rukiy
y ri rusaqil ri ruk'ojlemal kan nunojisaj ri ruwach'ulew rik'in xibinri'il.
20Chupan k'a ri q'ij ri', ri winaqi' xtikik'uaj-el ri wachibel ri e kibanalon rik'in q'anapueq y saqipueq,
ri e kibanalon richin xekiya' kiq'ij,
y xtikik'aqala-el k'a akuchi ek'o-wi ri ch'oy y ri sotz'.
21Xtibanatej ronojel re' toq ri Jehová xtiyakatej richin nusiloj ri ruwach'ulew,
y ri winaqi' xtikewaj-ki' chuxe' nima'q taq abej,
chuqa' chuxe' taq jul xtikewaj-ki' chuwech ri Jehová,
roma rija' kan k'o rukiy
y ri rusaqil ri ruk'ojlemal kan nunojisaj ri ruwach'ulew rik'in xibinri'il.
22Roma ri', rix nuwinaq, man tikuquba' ik'u'x kik'in ch'aqa' chik winaqi',
roma rije' kan juba' ok kejqalen
y ri kik'aslen xa juba' ok k'o chuwech re ruwach'ulew.
Currently Selected:
Isa 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.