Hab 2
2
1Yin kan xtinwoyobej k'a y xtinchajij,
achi'el nuben jun chajinel toq nichajin,
richin ninwetamaj ri achike xtibix chuwe,
y achike xtibix pa ruwi' ri nusujunik.
Ri Dios xuk'uluba-pe ruch'abel ri Habacuc
2Ri Jehová kan xuk'uluba' k'a pe ri nuch'abel y xubij chuwe:
Ri xtinbenk'utu' chawech kan tatz'ibaj k'a kan chuwech jun tz'alem richin kan niq'alajin,
chi xabachike ri xtitz'eton kan xtiq'ax chuwech.
3Stape' re yinajin chubixik chawe, kan k'a niyaloj na juba' richin nibebanatej
Man rik'in ri' kan xtapon k'a ri q'ij richin kan xtibebanatej.
Rat kan tawoyobej k'a, roma xa kan xtapon k'a ri q'ij ri'.
4Y jare' ri rutzijol ri k'o chi natz'ibaj:
Ri winaqi' aj-Babilonia man choj ta kánima,
y xa kan janila kinimirisan-ki'.
Jak'a ri winaqi' ri yetzeqeliben wichin
y man xkinkimalij ta kan roma kikuquban kik'u'x wik'in,
kan xtink'en chik kiwech, y roma ri' xkek'ase' xcha' ri Dios.
5Ri winaqi' ri kikuquban kik'u'x rik'in ri kibeyomel,
xa nikiq'ol-ki'.
Ri wineq ri jantape' nirayin man jun bey nikuqer ruk'u'x rik'in ri k'o rik'in.
Achi'el ri jul richin muqbel ri man jun bey nikuqer ta ruk'u'x.
Roma ri' yekich'ek ch'aqa' chik tzobaj winaqi' richin ri ruwach'ulew.
Ri xtikik'uluwachij ri man choj ta kik'aslen
6Jak'a konojel winaqi' ri yech'akatej,
xa xkebetze'en k'a chirij ri xch'akon kichin y xtikibij:
Kan toq'ex k'a awech rat ri xanimirisaj ri abeyomel rik'in ri aweleq'.
Chuqa' toq'ex awech rat ri xabeyomer roma xaya' pa poqon jun chik.
¿K'a janipe' k'a yatane' richin namol beyomel rik'in ri aya'on pa qajik?
7Toq rat man jun namey,
kan jari' k'a toq xkebeyakatej-pe chawij ri e rajaw ronojel ri beyomel ri ak'amon-qa.
Kan xtikiben k'a chawe chi xkak'ark'ot chikiwech.
Y pa ruk'exel chi ja rat ri yach'akon,
xa ja rije' ri xkech'akon chawij.
8Kere' xtak'uluwachij roma xe'ak'is janila chi winaqi',
y xak'uaj janila chi beyomel,
konojel ri winaqi' ri k'a ek'o na kan, xa xtikimol k'a ki'
richin xtikik'uaj-el ronojel ri k'o rejqalen ri k'o awik'in.
Xtikiben k'a ronojel re' roma ri ruk'ayewal ri xaben chike,
roma xe'akamisaj e k'iy chike rije',
xawulaj ri kitinamit y xak'is ronojel ri kulew.
9Kan toq'ex awech rat ri yabeyomer rik'in q'oloj,
richin chi yabe pa jotol,
y nawewaj-awi' chuwech ri ruk'ayewal.
10Kan ayon k'a rat xawoyoj ruk'ayewal pa kiwi' ri janila chi winaqi',
y roma ri' xak'en-pe k'ixbilal pa kiwi' ri e aj pan awachoch,
y ri ak'aslen kan k'o pa kamik.
11Konojel k'a xkesujun chawij;
kan jajun ri jay, ri abej y ri che' ri e kusan chike.
12Kan toq'ex awech rat ri kan k'o chi naben na kamik richin napaba' jun tinamit,
ri kan chupan k'a ri mak nayek-q'anej.
13Jak'a ri Jehová kan rubin k'a chi ri kisamaj ri winaqi',
xaxe xtik'atzin richin ri q'aq',
y ri kow taq samaj kichin ri winaqi',
xa kan man jun k'a rejqalen xtiban chike.
14Roma ri winaqi' ri ek'o chuwech chijun ri ruwach'ulew,
kan xtiketamaj jebel ri ruchuq'a', ri ruq'ij-ruk'ojlen ri Jehová,
achi'el nuben ri ya' toq napon chupan ri palou.
15Kan toq'ex awech rat ri kan naben chike ri winaqi'
ri ek'o chunaqaj ri aruwach'ulew, chi tikiqumu' k'iy vino,
richin chi rije' yeq'aber y yekiben banobel ri kan nuk'en-pe k'ixbilal.
16Y re wakami pa ruk'exel chi xtiya'ox ta aq'ij,
xa kan xtiqasex aq'ij.
Xtaqum k'a k'iy vino richin chi ri xke'aben xtuk'en-pe k'ixbilal.
Wakami, pan awi' rat xtiqaqa-wi royowal ri Jehová.
Y re' kan xtuben chawe chi xkabiyin achi'el jun q'abarel,
y kan xkak'ixbitej.
17Rat kan xe'achoy ronojel che' ri ek'o chiri' pa juyu' Líbano,
jak'a re wakami ja rat ri xkachoy-el.
Rat xakamisan kichin ri taq chikopi' ri ek'o chiri',
jak'a re wakami ja rat ri xkaken.
Ronojel re' xtiqaqa pan awi' roma ri kamik ri xe'abanala',
roma ri eleq' ri xe'abanala' pa taq tinamit
y ri wululen ri xe'aya' pa taq ruwach'ulew.
18¿Achike ta k'a nik'atzin-wi ri ruwachibel jun dios?,
roma xa jun relik wineq xbanon.
¿Achike k'a roma naben jun wachibel?,
roma xaxe richin yaruq'ol.
Rat xaben kiwachibel mem,
y k'ari' nakuquba' ak'u'x kik'in ri xa ja rat at banayon.
19Kan toq'ex awech rat ri yach'on rik'in jun che',
y nabij chire chi karak'axaj;
y nabij chire ri wachibel ri banon rik'in
abej chi tik'astej-el.
¿Xtitikir ta k'a re wachibel re' chi xkarupixabaj?
Stape' kan nojisan-rij chi q'anapueq y saqipueq
xa maneq ruk'aslen.
20Jak'a ri Jehová kan k'o-wi chupan ri rachoch, roma ri' konojel tzobaj winaqi' richin re ruwach'ulew man keq'ajan chuwech.
Currently Selected:
Hab 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.