Ez 48
48
Ri ruwach'ulew richin Israel ri k'o pa xaman
1-7Ri ruk'ulba't ri ruwach'ulew nitiker-pe chuchi' ri palou y nibe pa relebel-q'ij y niq'ax-el pan Hetlón y choj nibe pan Hamat. Napon pan Hasar-enán ri k'o chukojol ri ruwach'ulew Damasco y napon k'a pan Hamat. Ri tzobaj richin Dan xtikichinaj ri kulew ri k'o pa xaman. Y pa xokon chire ri Dan xtikichinaj kan ri tzobaj richin Aser. Y pa xokon chire ri Aser xtikichinaj kan ri tzobaj richin Neftalí. Y pa xokon chire ri Neftalí xtikichinaj kan ri tzobaj richin Manasés. Y pa xokon chire ri Manasés xtikichinaj kan ri tzobaj richin Efraín. Y pa xokon chire ri Efraín xtikichinaj kan ri tzobaj richin Rubén. Y pa xokon chire ri Rubén xtikichinaj kan ri tzobaj richin Judá.
Ri ulew ri nich'ar kan richin ri Jehová
8Pa xokon chire ri Judá k'o chi nich'er kan ri ulew richin jun sipanik chuwe yin. Ri ruwach'ulew ri' nitiker-el pa relebel-q'ij y napon k'a pa qajbel-q'ij chire ri ruwach'ulew Israel. Y ri raqen ri ulew ri nich'er kan 7,485 jaj. Y pa runik'ajal ri ulew ri' xtik'oje-wi ri wachoch.
9K'o chi nich'ar jun ulew chuwe yin y ri ruwech 7,485 jaj y ri raqen 2,973 jaj. 10Nel chi tzij ri pa xaman y pa xokon 7,485 jaj ruwech y ri pa relebel-q'ij y pa qajbel-q'ij k'o 2,973 jaj raqen. Y re ulew re' ch'aron chike ri sacerdote. Y pa runik'ajal ri ulew ri' xtik'oje-wi ri wachoch. 11Re ulew k'a re' kan xtich'ar kan chike ri e sacerdote ri e rijatzul kan ri Sadoc, roma rije' man xekitzeqelibej ta ri ch'aqa' chik levita toq ri israelita xkijech'ej kan ki' rik'in ri nubey. 12Roma ri' ri ulew ri' k'o janila rejqalen y jun sipanik chike ri e sacerdote. Y nik'oje' kan kere' pa xokon chire ri kulew ri levita.
13Chunaqaj ri kulew ri sacerdote pa xaman xtik'oje-wi kulew ri levita. Y ri ulew ri' 7,485 jaj ri ruwech y 2,973 jaj ri raqen. 14Re ulew re' ja re' ri más utz chupan chijun ri ruwach'ulew Israel. Man tik'ayix juba' chire ri ulew o xtijal o xa xtiq'ax ta pa ruq'a' jun chik wineq, roma re ulew re' kan jachon chuwe yin Jehová.
15Ri juba' ulew ri xtik'oje' kan 7,485 jaj ri ruwech y 1,487 jaj ri raqen. Y re' kan ch'aron richin yek'oje' winaqi' chuwech y chuqa' kisoq'olbal ri kawej. Y pa runik'ajal ri ulew ri' xtik'oje-wi ri tinamit. 16Ri akuchi k'o-wi ri tinamit nrajo' 1,338 jaj chi e kaji' ruxikin. 17K'o jun soq'olbel ri xtusutij-rij ri tinamit ri k'o oxk'al kajlajuj jaj rik'in nik'aj raqen. Keri' rubanik chi kaji' ruxikin. 18Y pa relebel-q'ij y ri pa qajbel-q'ij chire ri tinamit xtik'oje' kan juba' ulew richin tiko'n. Y ri retabal ri ulew ri' 1,487 jaj raqen. Keri' rubanik chi ka'i' ruxikin. Re ulew re' xtisamajix ruwech, y toq xtiwachin, re' xtik'atzin richin xketzuq ri winaqi' ri xkesamej chupan ri tinamit ri'. 19Y ri xkesamej chiri', xkepe chupan ri kablajuj tzobaj y yek'oje-qa chiri' pa tinamit. 20Chijun ri ulew ri ch'aron kan, ri retabal 7,485 jaj, chi kaji' ruxikin. Y re ulew re' nich'ar k'a kan juba' chuwe yin y juba' chike ri tinamit.
Ri rulew ri q'atoy-tzij
21-22Ri q'atoy-tzij xtrichinaj ri juba' ulew ri k'o kere' pa relebel-q'ij y pa qajbel-q'ij richin ri ulew ri ch'aron chuwe yin. Ri pa xaman chire ri ulew ri' k'o ri rulew ri Judá y ri pa xokon k'o rulew ri Benjamín. Ri nik'aj chire ri rulew ri q'atoy-tzij 7,485 jaj ri raqen y nitiker-el rik'in ri ulew wichin yin y napon k'a pa palou re kere' pa qajbel-q'ij. Y ri nik'aj chik 7,485 jaj ri raqen y nitiker-el rik'in ri ulew wichin yin y napon k'a pa Tzayi-Choy ri k'o kere' pa relebel-q'ij. Ri wachoch xtik'oje' pa runik'ajal ri ulew ri'. Ri kulew ri levita y ri tinamit ek'o-el chuchi'. Y ri rulew ri q'atoy-tzij ek'o pa taq ka'i' ruxikin.
Ri ruwach'ulew Israel ri k'o pa xokon
23-27Ri kiruwach'ulew ri ch'aqa' chik tzobaj choj nibe pa xokon. Y pa xokon chire ri rulew ri q'atoy-tzij xtikichinaj kan ri tzobaj richin ri Benjamín. Y pa xokon chire ri ruwach'ulew ri Benjamín xtikichinaj kan ri tzobaj richin ri Simeón. Y pa xokon chire ri ruwach'ulew ri Simeón xtikichinaj kan ri tzobaj richin ri Isacar. Y pa xokon chire ri ruwach'ulew ri Isacar xtikichinaj kan ri tzobaj richin ri Zabulón. Y pa xokon chire ri ruwach'ulew ri Zabulón xtikichinaj kan ri tzobaj richin ri Gad.
28Ri k'ulba't ri k'o pa xokon chire ri ruwach'ulew ri Gad, nitiker-el pa tinamit Tamar y niq'ax-el pa qajbel-q'ij chuchi' ri alaxibel-ya' Meribá-cadés y napon k'a pa ch'uti'n raqen-ya' richin ri Egipto y keri' napon k'a pa palou. 29Jak'a ruwach'ulew re' ri xtich'ar richin xtikichinaj kan ri iwijatzul, ri kablajuj tzobaj e richin ri Israel. Yin Jehová ri yibin.
Ri Kablajuj okibel richin ri tinamit Jerusalem
30-34Ri tinamit xtisutix-rij rik'in tz'aq y ri retabal k'o 1,338 raqen y ruwech. Y keri' rubanik chi kaji' ruxikin. Y pa taq kaji' ruxikin ek'o oxi' okibel. Y chikijujunal ri okibel ri' ruk'uan jun chike ri kibi' ri e ruk'ajol kan ri Israel. Ri okibel ri ek'o pa xaman chire ri tinamit, kibini'an Rubén, Judá y Leví. Ri okibel ri ek'o pa relebel-q'ij chire ri tinamit, kibini'an José, Benjamín y Dan. Ri okibel ri ek'o pa xokon chire ri tinamit, kibini'an Simeón, Isacar y Zabulón. Y ri okibel ri ek'o pa qajbel-q'ij chire ri tinamit, kibini'an Gad, Aser y Neftalí. 35Y ri raqen ri tinamit 5,352 jaj pa taq kaji' ruxikin. Y ri tinamit xtubini'aj: Ri Jehová kan wawe' k'o-wi, xcha' ri Jehová.
Currently Selected:
Ez 48: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.