Dn 2
2
Ri achik' ri xuben ri rey Nabucodonosor
1Toq ri Nabucodonosor ruchapon ka'i' juna' chi niq'aton-tzij, jari' toq xeruben k'iy achik', y roma ri' kan nisach ruk'u'x man niwer ta chik. 2Roma ri' xuteq koyoxik ri e aj-q'ija' y ri e aj-itza' y ri etamanela' aj-Caldea, richin nikiq'alajirisaj chuwech ri achik' ri xeruben. Y konojel re achi'a' re' kan xe'apon k'a chuwech. 3Ri rey xubij k'a chike chi k'o achik' ri yeruben, y man xaxe ta jun bey xrachik'aj. Y roma ri' sachineq ruk'u'x. Y rija' nrajo' nretamaj ri achike nel chi tzij, y roma ri' xuteq kik'amik richin chi nikiq'alajirisaj chuwech. 4Jari' toq ri etamanela' xech'on-apo chire ri rey pa ch'abel arameo y xkibij chire: Jantape' k'a xkak'ase' rat rey. Tatzijoj k'a pe chiqe ri awachik' y roj kan xtiqaq'alajirisaj chawech ri nel chi tzij, xecha' chire.
5Jak'a ri rey xubij chike ri achi'a' ri': Yin kan xinch'ob yan chi wi rix man xtiq'alajirisaj ta chinuwech ri xinwachik'aj, kan xtik'ajix ri ich'akul, y ri iwachoch kan kewulex-el jumul. 6Jak'a wi xtibij chuwe ri xinwachik'aj y ri nel chi tzij, kan xtiwil k'a utzil wik'in, xtinya' k'a sipanik chiwe y kan xtiya'ox iq'ij. Roma ri' tibij k'a pe chuwe ri achik' y ri nel chi tzij, xcha' ri rey. 7Rije' xech'on chik apo jun bey y xkibij chire ri rey chi tubij ri rachik' chike, y rije' kan xtikiq'alajirisaj ri nel chi tzij.
8Jak'a ri rey xubij: Kan wetaman chik chi rix, niwajo' chi yin ninya' ta k'iy q'ij chiwe, roma xiwetamaj ri nuch'obonik. 9Wi rix man xtibij ta chuwe ri wachik', kan junan k'a xtik'uluwachij chi'iwonojel. Yin kan wetaman k'a chi rix xa niya' chiwech jun tz'ukuj-tzij, richin nik'is-qa ronojel re'. Kan tibij k'a pe chuwe ri wachik' richin chi niq'alajin chinuwech yin chi rix kan yixtikir-wi niq'alajirisaj achik', xcha' ri rey.
10Jak'a ri etamanela' xkibij chik chire ri rey: Kan maneq k'a etamanela' chuwech re ruwach'ulew ri xketikir ta xtikiq'alajirisaj chawech ri nak'utuj rat rey. Pa ruwi' ri' kan man jun k'a rey, ni man jun tata'al ri ruk'utun ta chike ri etamanela' achi'el re nak'utuj rat. 11Roma re nak'utuj chiqe kan yalan-wi k'ayew y kan man jun xtitikir xtiq'alajirisan. Xa kan xaxe k'a ri e dios ri yetikir yeq'alajirisan, jak'a rije' xa man chiqakojol ta roj ek'o-wi, xecha'. 12Toq ri rey xrak'axaj re' kan xyakatej janila royowal, y roma ri' xubij chi kekamisex konojel ri e pixabanela'. 13Y kan xtalux k'a rutzijol chi konojel rije' ye'uk'uex richin yebekamisex, y roma ri' xkanox chuqa' ri Daniel y ri e rachibil.
Ri Daniel nuq'alajirisaj ri rachik' ri rey
14Rik'in k'a na'oj y nojibel ri Daniel xbech'on rik'in ri Arioc, ri aj-raqen pa kiwi' ri chajinela' richin ri rey, ri k'o chi xtibekamisan kichin. 15Y ri Daniel xuk'utuj chire achike roma kan chi'anin xtalux rutzijol re jun pixa' re' ri xubij ri rey. Y ri Arioc xutzijoj chire ri achike roma keri' nibebanatej. 16K'ari' ri Daniel xbe rik'in ri rey richin xberuk'utuj utzil chire chi tuya' ka'i-oxi' q'ij chire, richin rija' xtuq'alajirisaj ri achik' y ri nel chi tzij. 17Chirij ri' ri Daniel xtzolej chirachoch y xberubij k'a chike ri Ananías, ri Misael, y ri Azarías, 18richin nikik'utuj utzil chire ri Dios ri niq'aton-tzij ri chila' chikaj, chi xtujoyowaj ta kiwech y nuq'alajirisaj ta ri jun achik' ri' richin keri' man yekamisex ta rije', junan kik'in ri ch'aqa' chik pixabanela'. 19-20Y chupan k'a ri aq'a' ri' ri Dios xuben chi xk'utumej chuwech ri Daniel, ri achik' y ri nel chi tzij. Y roma ri' ri Daniel kan xunimirisaj ruq'ij ri Dios ri niq'aton-tzij ri chila' chikaj. Y kere' k'a xubij:
Nimalej aq'ij rat Dios tibe-q'ij tibe-seq.
Kan awik'in k'a rat k'o-wi ri na'oj y ri uchuq'a'.
21Ja rat yabanon richin yeq'ax ri ik' y ri juna'.
Ja rat yaya'on ri q'atbel-tzij, y rat yatelesan kichin.
Ja rat yaya'on na'oj chike ri e aj-na'oj,
ri etamabel kan rat k'a yaya'on chike ri etamanela'.
22Rat yaq'alajirisan ri k'ayew y ri ewatel,
kan atzuliben ronojel ri k'o pa q'equ'm,
roma ri saqil kan ja rat ri'.
23Nu-Dios yin, ri ki-Dios chuqa' ri nte-nata',
yimatioxin awik'in y ninya' aq'ij.
Kan xaya' k'a chuwe ri etamabel y nojibel.
Xak'ut k'a chinuwech ri xqak'utuj chawe,
roma kan xaq'alajirisaj k'a chiqawech ri nrajo' nretamaj ri rey, xcha' ri Daniel.
24Xeri' ri Daniel xbech'on rik'in ri Arioc, roma ja rija' k'o chi yekamisan ri etamanela', y xubij k'a chire chi man kerukamisaj, jak'a xuk'utuj utzil chire chi tuk'uaj chuwech ri rey richin nuq'alajirisaj ri achik' ri'. 25Jari' toq ri Arioc chi'anin xuk'uaj-el ri Daniel chuwech ri rey, y xubij chire: Chikikojol ri aj-Judá ri e k'amon-pe k'o re jun ala' re' y rija' xtuq'alajirisaj chawech ri achik' ri xaben, xcha'.
26K'ari' ri rey xuk'utuj chire ri Daniel wi kan qitzij nitikir nubij chire ri rachik' y ri nel chi tzij. 27Y ri Daniel xch'on k'a apo chire y xubij: Ri ewatel chawech ri kan nawajo' nawetamaj, kan man jun k'a etamanel, ni aj-q'ij, ni aj-itz, ni ri nubananej chi retaman ri peteneq, ri xtitikir ta xtiq'alajirisan chawech. 28Jak'a, kan k'o jun Dios ri k'o chila' chikaj ri niq'alajirisan ronojel ri e ewatel. Rija' xtiq'alajirisan chawech ri xtik'uluwachitej chiqawech-apo. Wakami k'a xtinq'alajirisaj ri awachik' y ri nel chi tzij. 29Rat rey atk'o k'a pan awarabel y xpe k'a k'iy ch'obonik awik'in richin nawetamaj ri peteneq chiqawech-apo. Jak'a ri Dios kan xuq'alajirisaj k'a chawech. 30Keri' chuqa' chinuwech yin kan xuq'alajirisaj yan chuqa' ri achike nel chi tzij re achik' re'. Re' man nel ta k'a chi tzij chi yin k'o más na'oj wik'in chikiwech konojel winaqi'. Xa kan richin k'a chi niq'alajin chawech ri nel chi tzij ri achik', y richin niq'ax chawech ri ch'obonik ri xepe pan ajolon. 31Rat xatz'et k'a jun wachibel paban ri kan janila nim. Re wachibel re' kan niyik'lun k'a ri nitzu'un, y kan namey k'a ri rubanik. 32Ri jolomaj richin ri wachibel kan rik'in k'a q'anapueq banon-wi, ri ruwa-ruk'u'x y ri ruq'a' rik'in k'a saqipueq banon-wi, ri rupan y ri tzan-racheq rik'in q'enq'oj-pueq banon-wi, 33ri ka'i' ra' banon rik'in q'eqapueq, y ri ka'i' raqen banon rik'in q'eqapueq xolon rik'in xeq-ulew. 34Rat kan atzuliben k'a ri jun wachibel ri', toq chaq k'ate' xbe'el-pe jun choyon abej chuwech jun juyu', jak'a ri abej ri' kan man jun wineq xk'aqon-pe richin. Y ri abej ri' kan nibolqo't-nibolqo't peteneq y xapon chiraqen ri wachibel y xuwulaj k'a. 35K'ari' kan pa jun k'a ramaj ronojel ri q'eqapueq, ri xeq-ulew, ri q'enq'oj-pueq, ri saqipueq y ri q'anapueq xe'ok poqolaj, y xuk'uaj-el kaq'iq' ronojel, achi'el ri solot toq nijosq'ix ri ixin; y kan man jun k'a retal ri wachibel ri xk'oje' kan. Jak'a ri abej ri xwulan ri wachibel, xa kan xok k'a q'anej jun nimalej juyu' ri kan xunojisaj ronojel ri ruwach'ulew.
36Ja achik' re' ri xaben; wakami kan xtinbij k'a chawe rat rey ri nel chi tzij re achik' re'. 37Rat rey kan más k'a nimalej aq'ij chikiwech konojel rey, roma ri Dios ri niq'aton-tzij chila' chikaj ruya'on ri ajawaren pan aq'a', ruya'on ruwaq'ijaj, uchuq'a' y nimirinen chawe. 38kan ruya'on k'a pan aq'a' ri uchuq'a' richin naq'et-tzij pa kiwi' konojel tinamit, pa kiwi' awej, y pa kiwi' ri aj-xik' taq chikopi'. Roma ri' ri jolomaj ri xatz'et ri banon rik'in q'anapueq kan nuk'exewachuj k'a chi ja rat ri'. 39Chirij k'a ri aq'atbel-tzij xtibeyakatej chik k'a pe jun q'atbel-tzij ri juba' ok rejqalen, y chirij chik ri' xtibeyakatej chik k'a pe ri rox q'atbel-tzij. Jari' ri nel chi tzij ri q'enq'oj-pueq, y jari' ri xtuq'et-tzij pa ruwi' chijun ruwach'ulew. 40Chirij k'ari' xtibeyakatej k'a pe ri rukaj q'atbel-tzij ri kan k'o ruchuq'a' achi'el ri q'eqapueq. Y achi'el k'a nuben ri q'eqapueq ri kan nuwulaj y nukubij ronojel, keri' k'a xtuben ri jun rukaj q'atbel-tzij: Kan xtuwulaj k'a ronojel. 41K'ari' xatz'et chi ri ruwi-raqen e banon rik'in q'eqapueq y rik'in xeq-ulew. Re' nel chi tzij jun q'atbel-tzij ri ruch'aron-ri', roma ri' xa kan k'o juba' uchuq'a' ruk'uan roma ri q'eqapueq xolon rik'in xeq-ulew. 42Roma ri ruwi-raqen xolon q'eqapueq rik'in xeq-ulew, ri q'atbel-tzij ri' juba' k'a k'o uchuq'a' y juba' maneq uchuq'a' rik'in. 43Achi'el k'a ri xatz'et chi ri q'eqapueq xolon rik'in xeq-ulew, keri' k'a xtuben ri q'atbel-tzij kik'in ri winaqi'. Xtikitun k'a ki', jak'a xa man xtikik'uaj ta ki' jebel, achi'el ri q'eqapueq ri man nuxol ta ri' rik'in ri xeq-ulew. 44Chupan k'a ri q'ij toq ri winaqi' richin chijun ruwach'ulew k'o chik ri q'atbel tzij kik'in, jari' k'a toq ri Dios xtoruya-qa jun q'atbel-tzij ri kan richin rija' ri man jun xtiwulan richin. Ri q'atbel-tzij ri' kan man xtiya'ox ta k'a pa kiq'a' ri winaqi'. Kan xkeruk'is k'a ronojel ri q'atbel taq tzij ri ek'o chuwech ri ruwach'ulew, y ja ri q'atbel-tzij richin rija' ri xtik'oje' jantape'. 45Xatz'et k'a ri abej ri xchoy-pe, jak'a man xchoy ta pe roma jun wineq. Ri abej ri' xbe'el-pe chuwech juyu', ri nibolqo't peteneq y xuwulaj chijun ri wachibel, y xuben poqolaj chire ri q'eqapueq, ri q'enq'oj-pueq, ri xeq-ulew, ri saqipueq y ri q'anapueq; ronojel re' xaxe k'a chi xuk'ut chawech ri nimalej Dios ri xtik'uluwachitej ri chiqawech-apo. Re achik' re' kan qitzij y ri nel chi tzij kan keri' k'a xtibanatej, xcha' ri Daniel.
46Toq ri Nabucodonosor xrak'axaj ronojel re', kan jari' xuqasaj-ri' k'a pan ulew chuwech ri Daniel, y xubij chi tiya'ox k'iy kamelabel y jubulej pom chuwech. 47Y xubij k'a chire ri Daniel: Wakami kan ninimaj chi ri i-Dios rix kan jari' ri Dios pa kiwi' konojel ri ch'aqa' chik dios. Rija' kan ajaw pa kiwi' konojel ri rey. Kan xaxe rija' ri nitikir niq'alajirisan ronojel ri ewatel, y roma ri' rat kan xatikir xaq'alajirisaj chinuwech re jun achik' re', xcha'.
48Chirij ri' ri Nabucodonosor xunimirisaj ruq'ij ri Daniel y xuya' nima'q taq sipanik chire y xuben chire chi xok aj-raqen pa ruwi' ri ruwach'ulew ri k'o pa Babilonia, y chuqa' nimalej aj-raqen pa kiwi' konojel ri etamanela' richin ri ruwach'ulew ri'. 49Y ri Daniel kan xch'on k'a rik'in ri rey pa kiwi' ri Sadrac, Mesac, y Abed-negó roma ri' ri rey kan xeruya' k'a pa utzilej taq samaj ri alaboni' ri' y xe'ok aj-raqen pa ruwi' chijun ruwach'ulew Babilonia. Jak'a ri Daniel kan chupan ri jay richin q'atbel-tzij rik'in ri rey xk'oje-wi.
Currently Selected:
Dn 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.