2 Crón 2
2
1Ri Salomón xuch'ob nupaba-q'anej ri rachoch ri Jehová, y chuqa' ri jay akuchi nuq'et-wi tzij rija'. 2K'ari' xerukanoj k'a e 70,000 achi'a' ri ye'ejqanej y 80,000 achi'a' ri yechoyon abej pa juyu' y 3,600 achi'a' ri xkek'oje' pa kiwi' ri ch'aqa' chik samajela'.
3Ri pa ruwach'ulew Tiro, k'o k'a jun rey rubini'an Hiram. Y ri Salomón k'o k'a ri xuteq rubixik chire, y kere' k'a xubij-el chire: Tabana' wik'in yin achi'el xaben rik'in ri David ri nata' toq xateq-pe k'iy tiox-che' chire richin xupaba-q'anej ri rachoch rija'. 4Wakami yin ninwajo' ninpaba-q'anej jun rachoch ri Jehová ri nu-Dios richin ninjech pa rusamaj, akuchi xtinbenporoj-wi ri jubulej pom chuwech, akuchi xtinuk'-wi pa cholaj ri kaxlan-wey, y richin ninsuj ri kamelabel ri niporox chijun ronojel nimaq'a' y tiqaq'ij, chuqa' chupan ri q'ij richin uxlanen, y toq yenimaq'ijux ri k'ak'a' taq ik' y ri ch'aqa' chik nimaq'ij toq niya'ox ruq'ij ri Jehová ri qa-Dios. Ronojel re' kan k'o chi xtiqataqej richin q'asen, qonojel roj ri oj aj-Israel. 5Y ri jay richin ri Dios ri xtinpaba-q'anej kan janila nim, roma ri qa-Dios kan janila nim ruq'ij chikiwech ch'aqa' chik dios. 6Stape' keri' rubanik ri jay, kan man jun k'a xtitikir xtipaban-q'anej rachoch rija', roma ri kaj chi tz'etel y ri man tz'etel ta kan man nitikir ta nukuch ri Dios. ¿In achike ta k'a yin richin ninpaba-q'anej jun rachoch, stape' xaxe xtik'atzin richin niporox pom chupan? 7Y roma ri jay ri' ninwajo' chi nateq-pe jun samajel ri nisamej rik'in q'anapueq, saqipueq, ri q'enq'oj-pueq y rik'in q'eqapueq; chuqa' ri nisamej rik'in betz' q'eqq'oj-keq, keq y raxroj yetzu'un, y ri retaman yeruben wachibel e k'oton chuwech tz'alem. Rija' xkeruto' ri aj-raqen pa kiwi' ri samajela' ri ek'o re wawe' pa Judá y pa Jerusalem, ri e rukanon kan ri David ri nata'. 8Chuqa' chiri' pa Líbano ek'o tiox-che', k'isis y che' sándalo. Ke'ataqa-pe chuwe roma wetaman chi ri asamajela' kan ketaman nikisamajij ri che' ri'. Y ri nusamajela' yin xkebe kik'in ri asamajela' rat 9richin tikibana' k'iy nuche', roma ri rachoch ri nu-Dios ri xtinpaba-q'anej kan k'atzinel nim y kan jebel rubanik xtinbenbana' chire. 10Y yin kan xtinbenya' k'a chike ri asamajela' ri yequpin che' 74,000 quintal trigo; junan k'a rajlabal rik'in ri cebada. Chuqa' xtinbenya' 440,000 litro vino, y keri' chuqa' rajlabal ri aceite, xcha-el.
11K'ari' ri Hiram rey richin Tiro xuteq-pe jun wuj rik'in ri Salomón, y kere' nubij: Ri Jehová janila nrajo' ri rutinamit, y roma ri' ja rat xarukusaj kan rey pa ruwi' ri ruwach'ulew Israel. 12Nim ruwa-ruq'ij ri Jehová ri Dios richin Israel, ri xbanon ri kaj y ri ruwach'ulew, ri kan xuya' chire ri rey David jun ruk'ajol ri aj-na'oj, ri k'o retamabal y kan choj, y kan ja rat ri'; y roma ri', rat k'a yapaban-q'anej ri rachoch ri Jehová y ri awachoch rat richin naq'et-tzij. 13Xtinteq k'a el chawe jun achin ri aj-na'oj y k'o retamabal richin niberubana' ri samaj, y rija' rubini'an Huram, 14ral jun ixoq richin ri tinamit Dan, y ri rutata' aj-Tiro. Ri Huram kan janila retamabal chirij ri samaj ri yeban rik'in q'anapueq, saqipueq, q'enq'oj-pueq, q'eqapueq, abej, che', tzieq q'eqq'oj-keq, raxroj y keq yetzu'un, y chuqa' ri tzieq lino, y retaman k'a nuben xabachike wachibel e k'oton chuwech tz'alem y xabachike k'a rubanik wachibel ri nibix chire; rija' junan k'a xtisamej kik'in ri asamajela' rat y chuqa' kik'in ri samajela' ri xek'oje' rik'in ri David ri atata', ri wajaw. 15Wakami k'a, wajaw yin, tataqa' k'a pe ri trigo, ri cebada, ri aceite, y ri vino ri xasuj-pe chuwe. 16Y roj kan xtiqaben k'a ri ache' re wawe' pa Líbano ri nik'atzin chawe rat, y xtiqak'owisaj-el chawe pa ruwi' ri palou, k'a pa tinamit Jope. Y chiri' ja rat chik k'a yatuk'uan-q'anej pa Jerusalem, xcha-el ri rey Hiram.
17Y ri Salomón xerajlaj k'a konojel ri achi'a' ri man e kiwinaq ta ri ek'o chupan ri ruwach'ulew Israel, ri e rajlan chik kan ri David. Konojel ek'o k'a 153,600 achi'a'; 18y xerucha' k'a chikikojol rije' e 70,000 achi'a' richin ye'ejqanej, y e 80,000 richin yechojmirisan abej, y 3,600 richin yek'oje' pa kiwi', richin nikiben chike ri winaqi' richin yesamej.
Ri Salomón xuchop-q'anej rupabaxik ri rachoch ri Dios.
(1 Rey 6:1-38)
Currently Selected:
2 Crón 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.