John Enadjimomagag oo mazinaigan
Enadjimomagag oo mazinaigan
Mi aa kitcit8a John kagi ojibiag oo mazinaigani. Mi aa pejig Jesos okikinoamaganibanin, 8in ini ako ma8adji ketci sagiapanin. Ab8amaci nd8e8emigodjin Jesosan, kigozike8inni8iban 8aa John.
Ka8in 8in pejig8an ijinag8asinoban ii omazinaigan tabickotc ka ijinag8anigibanin Matio (Matthieu), Mak (Marc) acitc Lok (Luc) omazinaigani8an. Nandam eta ki tatibadjimo John adi ka pi inadizindjin Jesosan, anic dac nandam omikodanan iji8ebizi8inan ega kagi mikodjigadenigin kodagian mazinaiganikag. Okitci mikodanan dac Jesosan okikinoamage8inan, acitc okitci apitendanan adi 8a ikidomaganigin ini kikinoamage8inan.
John 8i 8abadai8e mi ini Jesosan Kije Manidon kagi ikidondjin kidji pidjinija8andjin, aa8e ka piigodjin Israel a8iagon. 8abadai8e acitc mi ini Jesosan Kije Manidon Og8izisini, kagi pi nda migi8endjin pimadizi8ini acitc kagi pi ag8acimandjin a8iagon mizi8ekamig. John ikido: “Nigi ojibian dac oo8e kidji gi teb8etameg mi aa Jesos kagi ikidonipanin Kije Manidon kidji pidjinijaogodjin, acitc dac Kije Manido ini Og8izisan. Kicpin dac teb8etameg, Jesos kiga minigo8a pimadizi8ini” (20.31).
Currently Selected:
John Enadjimomagag oo mazinaigan: ALGNT
Highlight
Share
Copy
Want to have your highlights saved across all your devices? Sign up or sign in
Algonquin New Testament © 1998 Canadian Bible Society