ᐅᐸᓓᑭᔅ ᒫᕐᒃ 3
3
ᒋᓴᔅ ᒥᓇᐙᒋᐁᐤ ᐃᓕᓕᐗ ᐁ ᒫᔅᑭᒋᒉᓕᒋ
(ᒫᑎᐤ 12:9–14; ᓘᒃ 6:6–11)
1ᒥᓇ ᒫᑲ ᑮ ᐱᑐᑫᐤ ᐋᔭᒥᐁᐎᑲᒥᑯᒃ: ᐁᑯᑕ ᒫᑲ ᐁᑖᑦ ᐃᓕᓕᐤ ᐁ ᓂᐳᐎᒋᒉᑦ᙮ 2ᑮ ᓈᓈᑲᑕᐙᐸᒣᐙᒃ ᒫᑲ, ᑭᒋ ᒥᓇᐙᒋᐋᓕᒋ ᒣᒀᒡ ᐁ ᐋᔭᒥᐁᑭᔑᑳᓕᒃ; ᑭᒋ ᑮ ᒫᒥᔑᒫᒋᒃ᙮ 3ᐃᑌᐤ ᒫᑲ ᐊᓂᐃ ᐃᓕᓕᐗ ᑳ ᓂᐳᐎᒋᒉᓕᒋ, ᑌᑖᐎᒡ ᓂᐸᐎ᙮ 4ᐃᑌᐤ ᒫᑲ, ᐅᓚᔓᐌᓕᑖᒀᓐ ᓈ ᑭᒋ ᒥᓗ ᐋᔨᑎᓈᓂᐗᒃ ᐁ ᐋᔭᒥᐁᑭᔑᑳᒃ, ᓀᔥᑕᐱᑯ ᑭᒋ ᒪᒋ ᐋᔨᑎᓈᓂᐗᒃ? ᑭᒋ ᐱᒫᒋᐎᐙᓂᐗᒃ, ᓀᔥᑕᐱᑯ ᑭᒋ ᓂᐹᔨᐙᓂᐗᒃ?
ᒫᑲ ᓇᒪᐎᓚ ᑮ ᐅᒋ ᑭᑐᐗᒃ᙮ 5ᐃᔅᐱ ᒫᑲ ᐙᔅᑳ ᑳ ᑮ ᑲᓇᐙᐸᒫᑦ ᐁ ᑭᓯᐙᓯᑦ, ᐁ ᒥᒋᓚᐌᓯᑦ ᐁ ᐃᔅᐱᒋ ᒪᔥᑲᐎᑌᐁᓕᒋ, ᐃᑌᐤ ᐊᓂᐃ ᐃᓕᓕᐗ, ᔓᐎᓂᔅᑫᓕ᙮ ᑮ ᔓᐎᓂᔅᑫᓕᐤ ᒫᑲ: ᓀᔥᑕ ᐅᒋᒋ ᑮ ᒥᓇᐙᒋᑖᓂᐗᓂᓕᐤ ᑖᐱᔅᑯᒡ ᑯᑕᑭᓕᐤ᙮ 6ᐹᕋᓯᔭᒃ ᒫᑲ ᑮ ᑭᑐᑌᐗᒃ, ᑣᔦᒃ ᒫᑲ ᑮ ᐋᔭᔭᒥᐃᑐᐗᒃ ᐊᓯᒋ ᐦᐃᕈᑎᔭᓇᒃ, ᑖᓂ ᑫ ᐃᔑ ᓂᔑᐗᓈᒋᐋᒋᒃ᙮
ᐁ ᒥᒉᑎᒋᒃ ᓛᓕ ᓵᑲᐃᑲᓂᒃ
7ᒫᑲ, ᒋᓴᔅ ᐊᓯᒋ ᐅ ᑭᔅᑭᓄᐊᒪᐙᑲᓇ ᑭᒋᑲᒦᒃ ᐃᔑ ᑮ ᐃᑐᑌᐗᒃ: ᓈᔅᐱᒡ ᒥᔮᒪᐎᒥᒉᑎᓕᒋ ᐃᓕᓕᐗ ᒫᑲ ᑮ ᓄᔅᐱᓇᑎᑯ ᑳᓕᓕᒃ ᐅᒋ ᓀᔥᑕ ᒎᑎᐊᐃᒃ ᐅᒋ, 8ᓀᔥᑕ ᒋᕉᓴᓚᒥᒃ ᐅᒋ, ᓀᔥᑕ ᐋᑎᐤᒥᔭᐃᒃ ᐅᒋ, ᓀᔥᑕ ᐊᑳᒥᒃ ᒐᕐᑕᓂᒃ ᐅᒋ, ᐊᓂᑭ ᓀᔥᑕ ᐙᔅᑳ ᑖᐃᕆᒃ ᓀᔥᑕ ᓵᐃᑕᓂᒃ, ᓈᔅᐱᒡ ᒥᔮᒪᐎᒥᒉᑎᒋᒃ, ᐃᔅᐱ ᐱᐁᑕᑭᒃ ᐊᓂᐃ ᑭᒋ ᑫᒀᓇ ᑳ ᑐᑕᒥᓕᒋ, ᑮ ᐯᒋ ᓈᑌᐗᒃ᙮ 9ᑮ ᐋᔭᒥᐁᐤ ᒫᑲ ᐅ ᑭᔅᑭᓄᐊᒪᐙᑲᓇ, ᓈᐱᒀᓂᔑᓕᐤ ᑭᒋ ᐋᔦᔅᑲᐗᔅᑌᓕᒃ, ᐁ ᒫᒪᐎᒥᒉᑎᓕᒋ ᐅᒋ, ᐁᑳ ᑭᒋ ᓯᑎᔥᑳᑯᑦ᙮ 10ᐌᓴ ᒥᒉᑦ ᑮ ᒥᓇᐙᒋᐋᐗᒃ, ᑳ ᐅᒋ ᓯᑎᔥᑳᑯᑦ ᐁ ᐎ ᓵᒥᓂᑯᑦ, ᒥᓯᐌ ᐊᓂᐃ ᑳ ᐊᔨᑖᔅᐱᓀᓕᒋ᙮ 11ᓀᔥᑕ ᐎᓕᐱ ᐊᒑᑾᒃ, ᐃᔅᐱ ᐎᐋᐸᒫᒋᒃ, ᑮ ᐸᑭᔑᓃᔅᑕᐌᐗᒃ, ᑮ ᑌᐺᐗᒃ ᒫᑲ, ᐁ ᐃᑗᒋᒃ, ᑭᓚ ᑭᒋᒪᓂᑐ ᐅᑯᓯᓴ᙮
12ᓱᑳ ᒫᑲ ᑮ ᐃᑕᔓᒣᐤ ᐁᑳ ᑭᒋ ᑭᔅᑫᓕᑖᑯᐃᑯᑦ᙮
ᒋᓴᔅ ᐙᐌᓛᐸᒣᐤ ᓂᔓᔖᑉ ᐊᑄᔅᑕᓚ
(ᒫᑎᐤ 10:1–4; ᓘᒃ 6:12–16)
13ᑯᔅᐹᒪᒋᐌᐤ ᒫᑲ ᐗᒋᒃ, ᑮ ᓇᑐᒣᐤ ᒫᑲ ᐊᓂᐃ ᑳ ᓇᑕᐌᓕᒫᑦ: ᑮ ᐯᒋ ᓈᑎᑯ ᒫᑲ᙮ 14ᑮ ᐙᐌᓛᐸᒣᐤ ᓂᔓᔖᑉ, ᑭᒋ ᐙᐎᒉᐎᑯᑦ, ᓀᔥᑕ ᑭᒋ ᑮ ᑭᒋᑎᔕᐙᑦ ᑭᒋ ᑲᑫᔅᑭᒥᐌᓕᒋ, 15ᓀᔥᑕ ᑭᒋ ᐋᔮᓕᒋ ᑲᔥᑭᐅᐎᓂᓕᐤ ᑭᒋ ᒥᓇᐙᒋᑖᓕᒋ ᐋᑯᓯᐎᓇ, ᓀᔥᑕ ᑭᒋ ᐗᓚᐎᐌᐱᓈᓕᒋ ᒪᒋ ᐊᒑᑾ᙮
16ᓵᐃᒪᓐ ᒫᑲ ᑮ ᐊᔅᐱᓂᑳᑌᐤ ᐱᑕᕐ; 17ᓀᔥᑕ ᒉᒻᔅ ᓭᐱᑎ ᐅᑯᓯᓴ, ᓀᔥᑕ ᒑᓐ ᐎᒋᔖᓇ ᒉᒻᔅ; ᑮ ᐊᔅᐱᓂᑲᑌᐤ ᒫᑲ ᐳᐊᓇᕐᒌᔅ, ᐁᐗᑯ ᐅᓂᒥᔅᑭᐗᒃ ᐅᑯᓯᓯᐙᐗ; 18ᓀᔥᑕ ᐋᓐᑦᕉ, ᓀᔥᑕ ᐱᓕᑉ, ᓀᔥᑕ ᐹᕐᑕᓕᒥᐤ, ᓀᔥᑕ ᒫᑎᐤ, ᓀᔥᑕ ᑕᒪᔅ, ᓀᔥᑕ ᒉᒻᔅ ᐋᓪᐱᔭᔅ ᐅᑯᓯᓴ, ᓀᔥᑕ ᑕᑎᔭᔅ, ᓀᔥᑕ ᓵᐃᒪᓐ ᑳ ᑫᓇᓂᐃᓕᓕᐎᑦ, 19ᓀᔥᑕ ᒎᑕᔅ ᐃᔅᑳᕆᔭᑦ, ᑳ ᐙᔦᔑᐸᑭᑎᓈᑦ: ᑮ ᐱᑐᑫᐗᒃ ᒫᑲ ᐙᔅᑳᔨᑲᓂᒃ᙮
ᒋᓴᔅ ᓀᔥᑕ ᐱᓪᓯᐸᑉ
(ᒫᑎᐤ 12:22–32; ᓘᒃ 11:14–23; 12:10)
20ᒥᓇ ᒫᑲ ᑮ ᐯᒋ ᒫᐗᒋᐃᑐᓕᐗ ᑳ ᒥᒉᑎᓕᒋ ᐃᓕᓕᐗ, ᐃᓕᑯᒃ ᐱᓕᔥ ᐁᑳ ᐁ ᑮ ᑐᑕᑭᒃ ᑭᒋ ᒧᐙᒋᒃ ᐊᓚᑯᓈᐗ᙮ 21ᐃᔅᐱ ᒫᑲ ᐅᑐᑌᒪ ᐱᐁᑕᒥᓕᒋ, ᑮ ᐗᓚᐎᐗᒃ, ᐁ ᐎ ᒫᑯᓈᒋᒃ; ᐌᓴ ᑮ ᐃᑗᐗᒃ, ᐗᓂᑖᑐᑫ ᐅ ᒥᑐᓀᓕᒋᑲᓐ᙮
22ᐅᒪᓯᓇᐃᑫᐗᒃ ᒫᑲ ᑳ ᑮ ᐯᒋ ᐅᑐᑌᒋᒃ ᒋᕉᓴᓚᒥᒃ ᑮ ᐃᑗᐗᒃ, ᐋᔭᐌᐤ ᐲᓪᓯᐸᓚ, ᓀᔥᑕ ᐊᓂᐃ ᑳ ᑎᐯᓕᒫᓕᒋ ᒪᒋ ᐊᒑᑾ ᐅᒋ ᐗᓚᐎᐌᐱᓀᐤ ᒪᒋ ᐊᒑᑾ᙮
23ᑮ ᓇᑐᒣᐤ ᒫᑲ, ᓀᔥᑕ ᑮ ᐃᑌᐤ ᓇᔅᐱᑐᐌᐎ ᐗᑕᓗᑳᓂᒃ, ᑖᓐᑎ ᓭᑕᓐ ᑫ ᑮ ᐅᒋ ᐙᓚᐎᐌᐱᓈᑦ ᓭᑕᓇ? 24ᑮᔥᐱᓐ ᒫᑲ ᐅᑭᒫᐎᐎᓐ ᓄᑎᓂᑎᓱᒪᑲᒃ, ᐊᓂᒪ ᐅᑭᒫᐎᐎᓐ ᓇᒪᐎᓚ ᑲᑕ ᑮ ᐃᑕᑾᓐ᙮ 25ᑮᔥᐱᓐ ᒫᑲ ᐙᔅᑳᔨᑲᓐ ᓄᑎᓂᑎᓯᒪᑲᒃ, ᐊᓂᒪ ᐙᔅᑳᔨᑲᓐ ᓇᒪᐎᓚ ᑲᑕ ᑮ ᐃᑕᔅᑭᑌᐤ᙮ 26ᑮᔥᐱᓐ ᒫᑲ ᓭᑕᓐ ᐯᓯᑯᑖᑎᓱᑶ, ᓀᔥᑕ ᓂᐅᑎᓂᑎᓱᑴ, ᓇᒪᐎᓚ ᑲᑕ ᑮ ᐃᑕᐤ, ᒫᑲ ᑲᑕ ᐳᓂ ᐃᑕᐤ᙮
27ᓇᒪᐎᓚ ᐊᐌᓇ ᑲᑕ ᑮ ᐱᑐᑫᐌᐤ ᐁ ᒪᔥᑲᐎᓯᓕᒋ ᐃᓕᓕᐗ ᐎᑭᓕᒃ, ᑭᒋ ᓂᔑᐗᓈᒋᑖᐙᑦ ᐅᑦ ᐋᔮᓂᓕᐗ, ᐹᑎᒫ ᓃᔥᑕᒻ ᑮ ᒫᒪᑯᐱᑖᒋ ᑳ ᒪᔥᑲᐎᓯᓕᒋ ᐃᓕᓕᐗ; ᐁᑯ ᒫᑲ ᑫ ᓂᔑᐗᓈᒋᑖᐙᑦ ᐎᑭᓕᐤ᙮
28ᑖᐺ ᑭᑦ ᐃᑎᓇᐗᐤ, ᒥᓯᐌ ᒪᒋᑐᑕᒧᐎᓇ ᑲᑕ ᐌᐯᓕᑕᒪᐙᐗᒃ ᐃᓕᓕᐎᑯᓯᓵᓇᒃ, ᓀᔥᑕ ᐹᔅᑕᒧᐎᓇ ᑫ ᐃᔑ ᐸᐹᔅᑕᒧᐙᑴ: 29ᒫᑲ ᐊᓇ ᑫ ᐸᐹᔅᑕᒫᑦ ᐸᓓᑭ ᐊᒑᑾ ᓇᒪᐎᔅᑳᑦ ᐋᔭᐤ ᐌᐯᓕᑕᒫᑯᓯᐎᓂᓕᐤ, ᒫᑲ ᓈᓂᓵᓂᓯᐤ ᑭᒋ ᐋᔮᑦ ᑳᑭᑫ ᓂᔑᐗᓋᑎᓯᐎᓂᓕᐤ᙮ 30ᐁ ᑮ ᐃᑗᒋᒃ, ᐋᔭᐌᐤ ᐎᓕᐱ ᐊᒑᑾ᙮
ᒋᓴᔅ ᐅᑳᐎᔭ ᓀᔥᑕ ᐐᒋᔕᓇ
(ᒫᑎᐤ 12:46–50; ᓘᒃ 8:19–21)
31ᐁᑯ ᐱᐁᒋ ᐃᑐᑌᓕᒋ ᐎᒋᔖᓇ ᓀᔥᑕ ᐅᑳᐎᔭ, ᐗᓚᐎᑎᒥᒃ ᒫᑲ ᐁ ᓂᐹᐎᓕᒋ, ᑮ ᐃᔑᑎᔕᐅᐌᓕᐗ, ᐁ ᓇᑐᒥᑯᒃ᙮ 32ᒥᔮᒪᐎᒥᒉᑎᓕᒋ ᐃᓕᓕᐗ ᒫᑲ ᑮ ᐙᔅᑳᐲᔅᑖᑯ; ᑮ ᐃᑎᑯ ᒫᑲ; ᒫᑎᑲ, ᑭᑳᐎ ᓀᔥᑕ ᑭᒋᔖᓇᒃ ᐗᓚᐎᑎᒥᒃ ᐃᑖᐗᒃ ᐁ ᓇᓈᑐᓂᔅᑭᒃ᙮
33ᑮ ᓇᔥᑴᐗᔑᐁᐤ ᒫᑲ, ᐁ ᐃᑗᑦ, ᐊᐌᓇ ᓂᑳᐎ, ᓀᔥᑕᐱᑯ ᓂᒋᔖᓇᒃ? 34ᐙᔅᑲ ᒫᑲ ᑮ ᑲᓇᐙᐸᒣᐤ ᐊᓂᐃ ᑳ ᐙᔅᑳᐱᔅᑖᑯᑦ, ᑮ ᐃᑗᐤ ᒫᑲ, ᒫᑎᑳᓂᑭ ᓂᑳᐎ ᓀᔥᑕ ᓂᒋᔖᓇᒃ! 35ᐌᓴ ᐊᐌᓇ ᑫ ᑐᑕᒸᑴ ᐅᑦ ᐃᑌᓕᑕᒧᐎᓂᓕᐤ ᑭᒋᒪᓂᑐᐗ, ᐁᐗᒀᓇ ᓂᒋᔖᓐ, ᓀᔥᑕ ᓂᒋᔖᓂᔅᑴᒻ, ᓀᔥᑕ ᓂᑳᐎ᙮
Currently Selected:
ᐅᐸᓓᑭᔅ ᒫᕐᒃ 3: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.