ᐅᐸᓓᑭᔅ ᒫᑎᐤ 27
27
ᒋᓴᔅ ᐃᑐᑕᐋᑲᓂᐐ ᐹᐃᓚᑕ
(ᒫᕐᒃ 15:1; ᓘᒃ 23:1–2; ᒑᓐ 18:28–32)
1ᐃᔅᐱ ᒫᑲ ᐁ ᑭᑭᔐᐹᔮᒃ ᐌᑎᒋᐸᓕᒃ, ᒥᓯᐌ ᑭᒋ ᓵᓵᑭᐎᓕᐌᐎᓕᓕᐗᒃ ᓀᔥᑕ ᑳ ᓂᑳᓀᓕᑖᑯᓯᒋᒃ ᐃᓕᓕᐗᒃ ᑮ ᐋᔭᔭᒥᐃᑐᐗᒃ ᒋᓴᓴ ᑭᒋ ᓂᐸᐋᒋᒃ᙮ 2ᐃᔅᐱ ᒫᑲ ᑳ ᑮ ᒫᒫᒋᑯᐱᑖᒋᒃ, ᑮ ᑭᑐᑕᐁᐗᒃ, ᑮ ᐸᑭᑎᓇᒪᐌᐗᒃ ᒫᑲ ᐸᓐᑎᔭᔅ ᐹᐃᓚᑕ ᐅᑎᐯᓕᒋᑫᐗ᙮
ᐁ ᑮ ᐃᔑ ᓂᐱᑦ ᒎᑕᔅ
(ᐊᐸᔅᑕᓚᒃ 1:18–19)
3ᐁᑯ ᒎᑕᔅ, ᑳ ᑮ ᐙᔦᔑᐸᑭᑎᓈᑦ, ᐃᔅᐱ ᐎᐋᐸᑕᒃ ᐁ ᑮ ᓂᔑᐗᓈᒋᒥᒥᒋ, ᑮ ᒥᒋᓚᐌᔦᓕᑕᒻ, ᒥᓇ ᒫᑲ ᑮ ᐯᔑᐌᐤ ᐊᓂᐃ ᓂᔅᑐᒥᑕᓇᐤ ᐙᐱᓯ ᔔᓕᐋᓈᐱᔅᑾ, ᑭᒋ ᓵᓵᑭᐎᓕᐌᐎᓕᓕᐗ ᓀᔥᑕ ᑳ ᓂᑳᓀᓕᑖᑯᓯᓕᒋ ᐁ ᐎ ᒥᓛᑦ, 4ᐁ ᐃᑗᑦ, ᓂ ᑮ ᒪᒋᑐᑌᓐ, ᐁ ᑮ ᐙᔑᔦᐸᑭᑎᓇᒫᓐ ᐊᓂᒪ ᐸᓓᑭ ᒥᑯ᙮
ᑮ ᐃᑗᐗᒃ ᒫᑲ, ᑖᓂ ᒫᑲ ᑫ ᑐᑕᒫᒃ ᓂᓚᓈᓐ? ᑭᓚ ᐁᐗᑯ ᑲᓇᐙᐸᑕ᙮
5ᑮ ᐸᑭᒋᐌᐱᓀᐤ ᒫᑲ ᐊᓂᐃ ᐙᐱᓯ ᔔᓕᐊᓈᐱᔅᑾ ᑭᒋᐋᔭᒥᐁᐎᑲᒥᑯᒃ, ᑮ ᑭᑐᑌᐤ ᒫᑲ, ᓀᔥᑕ ᑮ ᓇᑕᐎ ᐊᑯᓕᑎᓱ᙮
6ᑭᒋ ᓵᓵᑭᐎᓕᐌᐎᓕᓕᐗᒃ ᒫᑲ ᑮ ᐅᑎᓀᐗᒃ ᐊᓂᐃ ᐙᐱᓯ ᔔᓕᐊᓈᐯᔅᑾ, ᑮ ᐃᑗᐗᒃ ᒫᑲ, ᓇᒪᐎᓚ ᐅᓚᔓᐌᓕᑖᑾᓐ ᑭᒋ ᐸᑭᑎᓈᑲᓂᐎᒋᒃ ᔔᓕᐊᓇᐎᑲᒥᑯᒃ, ᐁ ᑮ ᐅᒋ ᐊᑖᐙᑲᓂᐗᒃ ᒥᑯ᙮ 7ᑮ ᐋᔭᔭᒥᐃᑐᐗᒃ ᒫᑲ, ᐊᓂᐃ ᒫᑲ ᑮ ᐅᒋ ᐊᑖᐙᑫᐗᒃ ᐊᔑᔥᑭ ᐅᓛᑲᓂᑫᐗ ᐅ ᓂᑖᐎᑭᒋᑲᓂᓕᐤ, ᐁᑯᑕ ᑭᒋ ᓇᐃᑲᐙᑲᓂᐎᓕᒋ ᒫᓐᑌᐗ᙮ 8ᐁᐗᑯ ᐅᒋ ᒥᑯ ᓂᑖᐎᑭᒋᑲᓐ ᑳ ᐃᔑᓂᑳᑌᒃ ᐊᓂᒪ ᓂᑖᐎᑭᒋᑲᓐ ᐱᓕᔥ ᐊᓄᒡ ᑳ ᑭᔑᑳᒃ᙮
9ᐁᑯ ᑌᐱᐸᓕᓕᒃ ᐊᓂᐁᓕᐤ ᑳ ᑮ ᐃᑗᑦ ᒉᕆᒫᔭ ᐅᑭᔅᑭᐙᐃᑫᐤ, ᐁ ᐃᑗᑦ, ᑮ ᐅᑎᓀᐗᒃ ᒫᑲ ᐊᓂᐃ ᓂᓯᑐᒥᑕᓇᐤ ᐙᐱᓯ ᔓᓕᐊᓈᐱᔅᑾ, ᐁ ᑮ ᐃᑕᑭᒫᒋᒃ ᐊᓂᐃ ᑳ ᑮ ᐅᓚᑭᒥᒥᒋ, ᐎᓚᐗᐤ ᐃᔅᕃᐃᓪ ᐅᑦ ᐊᐙᔑᒥᔕ ᑳ ᑮ ᐅᓚᑭᒫᒋᒃ: 10ᑮ ᒥᓕᐌᐗᒃ ᒫᑲ ᒦᔅᑯᒡ ᐊᓂᐁᓕᐤ ᐊᔑᔥᑭ ᐅᓛᑲᓂᑫᐗ ᐅ ᓂᑖᐎᑭᒋᑲᓂᓕᐤ, ᑖᐱᔅᑯᒡ ᐁ ᑮ ᐃᑕᔓᐗᔑᑦ ᐅᑎᐯᓕᒋᑫᐤ᙮
ᑮ ᑲᑴᒋᒥᑯ ᒋᓴᔅ ᐅᑎᐯᓕᒋᑫᐗ
(ᒫᕐᒃ 15:2–5; ᓘᒃ 23:3–5; ᒑᓐ 18:33–38)
11ᒋᓴᔅ ᒫᑲ ᑮ ᐅᑎᔥᑲᐎᑳᐸᐎᔅᑕᐌᐤ ᐅᑎᐯᓕᒋᑫᐗ; ᑮ ᑲᑴᒋᒥᑯ ᒫᑲ ᐅᑎᐯᓕᒋᑫᐗ, ᐁ ᐃᑎᑯᑦ, ᑭᓚ ᓈ ᐅ ᑭᒋᐅᑭᒫᒥᐙᐗ ᒎᐗᒃ?
ᒋᓴᔅ ᒫᑲ ᑮ ᐃᑌᐤ, ᑭᑦ ᐃᑣᓐ᙮ 12ᐃᔅᐱ ᒫᑲ ᒥᐋᒥᔑᒥᑯᑦ ᑭᒋ ᓵᓵᑭᐎᓕᐌᐎᓕᓕᐗ ᓀᔥᑕ ᑳ ᓂᑳᓀᓕᑖᑯᓯᓕᒋ, ᓇᒪᐎᓚ ᐙᔦᔥ ᑮ ᓇᔥᑴᐗᔑᐃᐌᐤ᙮
13ᐁᑯ ᐹᐃᓚᑦ ᐁᑖᑦ, ᓇᒪ ᓈ ᑮ ᐯᑌᓐ ᐃᔅᐱᒋ ᒥᒉᑦ ᑫᒀᓇ ᐁ ᒫᒥᔑᒥᔅᑭᒃ?
14ᓇᒪᐎᓚ ᐙᔦᔥ ᒫᑲ ᑮ ᐅᒋ ᓇᔥᑴᐗᔑᐁᐤ; ᑳ ᐅᒋ ᒫᒪᔅᑳᑕᒥᓕᒋ ᓈᔅᐱᒡ ᐅᑎᐯᓕᒋᑫᐗ᙮
ᒋᓴᔅ ᐸᑭᑎᓇᑲᓂᐐ ᑭᒋ ᓂᐱᑦ
(ᒫᕐᒃ 15:6–15; ᓘᒃ 23:13–25; ᒑᓐ 18:39—19:16)
15ᒣᒀᒡ ᐁ ᑲᓇᐌᓕᒋᑳᑌᒃ ᐊᓂᒪ ᒪᑯᔐᐎᓐ ᐅᑎᐯᓕᒋᑫᐤ ᒧᔕᒃ ᑮ ᐸᑭᑎᓇᒪᐌᐤ ᐯᔭᒃ ᑭᐸᐙᑲᓇ, ᐱᑯ ᐊᓂᐃ ᑫ ᓇᑕᐌᓕᒫᓕᒋ᙮ 16ᐁᑯᔅᐱ ᒫᑲ ᑮ ᐋᔭᐌᐗᒃ ᐯᔭᒃ ᒥᓯᐌ ᑳ ᑭᔅᑫᓕᒥᒥᒋ ᑭᐸᐙᑲᓇ, ᐸᕌᐸᔅ ᐁ ᐃᔑᓂᑳᓱᓕᒋ᙮ 17ᐁᐗᑯ ᐅᒋ ᒫᑲ ᐃᔅᐱ ᑳ ᒪᐗᒋᐃᑐᓕᒋ, ᐹᐃᓚᑦ ᑮ ᐃᑌᐤ, ᐊᐌᓇ ᓀᑕᐌᓕᒣᒃ ᑭᒋ ᐸᑭᑎᓇᒫᑕᑾᒃ? ᐸᕌᐸᔅ ᓀᔥᑕᐱᑯ ᒋᓴᔅ ᑳ ᐃᔑᓂᑳᓱᑦ ᙭? 18ᐌᓴ ᑮ ᑭᔅᑫᓕᑕᒻ ᐁ ᑮ ᐅᑌᓕᒫᓕᒋ ᐌᒋ ᑮ ᐸᑭᑎᓇᒫᑯᑦ᙮
19ᒣᒀᒡ ᐁ ᐊᐱᑦ ᑎᐹᔅᑯᓂᑫᐎ ᐊᐱᐎᓂᒃ, ᐎᐗ ᑮ ᐯᒋᑎᔕᐅᐌᓕᐗ, ᐁ ᐃᑎᑯᑦ, ᐁᑳᐎᓚ ᐙᔦᔥ ᑐᑕᐤ ᐊᓇ ᑳ ᑾᔭᔅᑭᑎᑦ ᐃᓕᓕᐤ; ᐌᓴ ᓂ ᑮ ᒥᑯᔅᑳᒋᐃᑯᓐ ᒥᒉᑦ ᑫᒀᓇ ᐊᓄᒡ ᑳ ᑭᔑᑳᒃ ᐸᐙᒧᐎᓂᒃ ᐎᓚ ᐅᒋ᙮
20ᒫᑲ ᑭᒋ ᓵᓵᑭᐎᓕᐌᐎᓕᓕᐗᒃ ᓀᔥᑕ ᑳ ᓂᑳᓀᓕᑖᑯᓯᒋᒃ ᑮ ᔖᑯᒋᒣᐗᒃ ᒥᔮᒪᐎᒥᒉᑎᓕᒋ ᐃᓕᓕᐗ ᑭᒋ ᓇᑐᑕᒫᓕᒋ ᐸᕌᐸᓴ, ᑭᒋ ᓂᔑᐗᓈᒋᐃᒥᒋ ᒫᑲ ᒋᓴᓴ᙮ 21ᐅᑎᐯᓕᒋᑫᐤ ᒫᑲ ᐁ ᓇᔥᑴᐗᔑᐋᑦ, ᑮ ᐃᑌᐤ, ᐊᐌᓇ ᐅᑯ ᑳ ᓂᔑᒋᒃ ᓀᑕᐌᓕᒣᒃ ᑭᒋ ᐸᑭᑎᓇᒫᑕᑾᒃ?
ᑮ ᐃᑗᐗᒃ, ᐸᕌᐸᔅ᙮
22ᐹᐃᓚᑦ ᐃᑌᐤ, ᑖᓂ ᒫᑲ ᑫ ᑐᑕᐗᒃ ᒋᓴᔅ, ᑳ ᐃᔑᓂᑳᓱᑦ ᙭?
ᒥᓯᐌ ᐃᑌᐗᒃ, ᐁᑯᔑ ᑲᑕ ᒋᔅᑖᔅᑾᐗᐤ᙮
23ᐅᑎᐯᓕᒋᑫᐤ ᑮ ᐃᑗᐤ, ᑖᓀᑭ ᐌᒋ, ᑫᒀᓕᐤ ᑳ ᒪᒋᑐᑕᒃ?
ᒫᑲ ᐊᐙᓯᑌ ᑮ ᑌᐺᐗᒃ, ᐁ ᐃᑗᒋᒃ, ᐁᑯᔑ ᑲᑕ ᒌᔅᑖᔅᑾᐗᐤ᙮
24ᐃᔅᐱ ᐹᐃᓚᑦ ᐎᐋᐸᑕᒃ ᐁᑳ ᐁ ᑮ ᔖᑯᒋᒫᑦ, ᐁ ᒫᒋ ᐹᔑᑯᓚᐌᓯᓕᒋ ᒫᑲ, ᑮ ᐅᑎᓇᒻ ᓂᐱᓕᐤ, ᑮ ᑭᓯᐯᑭᓇᒻ ᒫᑲ ᐅᒋᒋᔭ ᐁ ᐙᐸᒥᑯᑦ ᒥᔮᒪᐎᒥᒉᑎᓕᒋ ᐃᓕᓕᐗ, ᐁ ᐃᑗᑦ, ᓇᒪᐎᓚ ᓂᓚ ᓂ ᐎ ᓯᑭᓇᒸᓐ ᐅᒥᑯ ᐊᐗ ᑳ ᒀᔭᔅᑭᑎᑦ ᐃᓕᓕᐤ; ᑲᓇᐙᐸᑕᒧᒃ ᑭᓚᐗᐤ᙮
25ᐁᑯ ᓀᔥᑴᐗᔑᐃᐌᒋᒃ ᒥᓯᐌ ᐃᓕᓕᐗᒃ, ᑮ ᐁᑗᐗᒃ ᒫᑲ, ᐁᑯᔑ ᐅᒥᑯ ᓂ ᑳ ᐅᑎᑎᑯᐙᓈᓐ ᓀᔥᑕ ᓂᑦ ᐊᐙᔑᒥᔑᓈᓇᒃ᙮
26ᐁᑯ ᐯᑭᑎᓇᒪᐙᑦ ᐸᕌᐸᓴ; ᐃᔅᐱ ᒫᑲ ᑳ ᑮ ᐸᓴᔅᑌᐙᑦ ᒋᓴᓴ, ᑮ ᐸᑭᑎᓀᐤ ᑭᒋ ᒌᔅᑖᔅᑾᐙᑲᓂᐎᓕᒋ᙮
ᓇᑐᐸᓕᐎᓕᓕᐗᒃ ᐋᔭᓵᒋᐁᐗᒃ ᒋᓴᓴ
(ᒫᕐᒃ 15:16–20; ᒑᓐ 19:2–3)
27ᐁᑯ ᐅᑎᐯᓕᒋᑫᐤ ᐅ ᓇᑐᐸᓕᐎᓕᓕᒪ ᐁᑐᑖᐋᓕᒋ ᒋᓴᓴ ᐅᑎᐯᓕᒋᑫᐗ ᐅ ᐙᔅᑳᔨᑲᓂᒥᓕᒃ, ᑮ ᒫᐗᓴᑯᓇᑐᒣᐗᒃ ᒫᑲ ᒥᓯᐌ ᓇᑐᐸᓕᐎᓕᓕᐗ᙮ 28ᑮ ᑫᑕᑯᐯᓀᐗᒃ ᒫᑲ, ᑮ ᐳᔅᑕᑯᐸᐁᐗᒃ ᒫᑲ ᒥᑴᑭᓐ ᐊᑯᐅᓂᓕᐤ᙮ 29ᐃᔅᐱ ᒫᑲ ᒥᔑᑳᐎᒥᓇᑯᔑᔭ ᑳ ᑮ ᐅᒋ ᐋᐱᑳᑕᑭᒃ ᐅᑭᒪᐗᔅᑐᑎᓂᓕᐤ, ᑮ ᐳᔅᑕᔅᑐᑎᓇᐁᐗᒃ, ᐎᐹᔅᑯᓕᐤ ᓀᔥᑕ ᐅ ᑭᒋᓂᔅᑭᒃ ᑮ ᒥᒋᒥᓇᒥᐁᐗᒃ: ᑮ ᐅᒋᒋᑾᓇᐲᔅᑕᐌᐗᒃ ᒫᑲ, ᓀᔥᑕ ᑮ ᐋᔭᓵᒋᐁᐗᒃ, ᐁ ᐃᑗᒋᒃ, ᐦᐁᓪ, ᑭᓚ ᒎᐗᒃ ᐅ ᑭᒋᐅᑭᒫᒥᐙᐗ᙮ 30ᑮ ᓯᒀᑌᐗᒃ ᒫᑲ, ᓀᔥᑕ ᐁ ᐅᑎᓇᑭᒃ ᐎᐹᔅᑯᓕᐤ, ᑮ ᐅᒋ ᐅᑖᒪᐌᐗᒃ ᐅᔅᑎᒀᓂᓕᒃ᙮ 31ᐃᔅᐱ ᒫᑲ ᑳ ᐳᓂ ᐋᔭᓵᒋᐋᒋᒃ, ᑮ ᒪᓂᓇᒬᐗᒃ ᐊᓂᐁᓕᐤ ᐊᑯᐅᓂᓕᐤ, ᑎᐱᓚᐌ ᐅ ᐎᓛᒋᑲᓇ ᒫᑲ ᑮ ᐳᔅᑎᔅᑲᒣᓀᐗᒃ, ᑮ ᑭᑐᑕᐁᐗᒃ ᒫᑲ ᑭᒋ ᒌᑖᔅᑾᐙᒋᒃ᙮
ᒋᓴᔅ ᒌᔅᑖᔅᒀᐙᑲᓂᐎᐤ
(ᒫᕐᒃ 15:21–32; ᓘᒃ 23:26–43; ᒑᓐ 19:17–27)
32ᐁ ᐊᑎ ᐗᓚᐎᒋᒃ ᒫᑲ ᑮ ᒥᔅᑲᐌᐗᒃ ᐯᔭᒃ ᓵᐃᕆᓂᐎᓕᓕᐗ, ᓵᐃᒪᓐ ᐁ ᐃᔑᓂᑳᓱᓕᒋ: ᐁᐗᒀᓂᐃ ᔑᐋᑯᒋᒫᒋᒃ ᑭᒋ ᐱᒥᐎᑖᓕᒋ ᐅᑦ ᐋᔑᑌᐋᑎᑯᒥᓕᐗ᙮ 33ᐃᔅᐱ ᒫᑲ ᐌᑎᑕᑭᒃ ᐊᓐᑕ ᑲᓪᑯᑕ ᑳ ᐃᔑᓂᑳᑌᒃ, ᑳ ᐃᑗᒪᑲᒃ, ᐁ ᐃᑗᔅᒋᑳᑌᒃ, ᐅᔅᑎᒀᓂᑲᓐ᙮ 34ᑮ ᒥᓓᐗᒃ ᔑᐎᑳᐳᓕᐤ ᑭᒋ ᒥᓂᑴᓕᒋ ᐎᓱᐱᓕᐤ ᐁ ᑭᓕᑲᐎᓂᑳᑌᓕᒃ: ᐃᔅᐱ ᒫᑲ ᑳ ᑮ ᑯᒋᔅᑕᒃ, ᓇᒪᐎᓚ ᑮ ᐎ ᒥᓂᑴᐤ᙮
35ᑮ ᒋᔅᑖᔅᑾᐌᐗᒃ ᒫᑲ, ᑮ ᒫᑎᓇᒫᑐᐗᒃ ᒫᑲ ᐅ ᐎᓛᒋᑲᓂᐙᐗ, ᐁ ᒪᐃᑲᓈᑎᑯᑫᒋᒃ: ᑭᒋ ᑎᐱᐸᓕᓕᒃ ᑳ ᐃᑗᑯᐸᓀ ᐅᑭᔅᑭᐙᐃᑫᐤ, ᑮ ᒫᑎᓇᒫᑐᐗᒃ ᓂ ᐎᓛᒋᑲᓇ, ᓂᑦ ᐊᑯᐅᓂᓕᐤ ᒫᑲ ᑮ ᐅᒋ ᒪᐃᑲᓈᑎᑯᑫᐗᒃ᙮ 36ᐁᑯᑕ ᒫᑲ ᐁ ᓇᐊᐱᒋᒃ, ᑮ ᓇᓈᑲᑕᐙᐸᒣᐗᒃ: 37ᐃᔥᐱᒥᒃ ᒫᑲ ᐅᔅᑎᒀᓂᓕᒃ ᑮ ᐊᔅᑖᐌᐗᒃ ᑳ ᑮ ᐅᒋ ᒫᒥᔑᒫᑲᓂᐎᑦ ᐁ ᒪᓯᓇᐃᑳᑌᓕᒃ, ᐁᐗᑯ ᐊᐗ ᒋᓴᔅ ᒎᐗᒃ ᐅ ᑭᒋᐅᑭᒫᒥᐙᐙ᙮ 38ᐁᑯ ᓀᔥᑕ ᓂᔓ ᑭᒧᑎᔅᑲᒃ ᑳ ᒌᔅᑖᔅᑾᐙᑲᓂᐎᒋᒃ ᐊᓯᒋ, ᐯᔭᒃ ᐅ ᑭᒋᓂᔅᑮᒃ ᐃᑌᑫ, ᑯᑕᒃ ᒫᑲ ᐅ ᓇᒪᑎᓂᔅᑮᒃ ᐃᑌᑫ᙮
39ᐊᓂᑭ ᒫᑲ ᑳ ᐱᒥᒥᔮᔥᑲᐙᒋᒃ ᑮ ᒫᓓᓕᒣᐗᒃ, ᐁ ᐌᐌᐱᔅᑴᓕᒋᒃ, 40ᐁ ᐃᑗᒋᒃ ᒫᑲ, ᑭᓚ ᑳ ᓂᔑᐗᓈᒋᑖᔭᓐ ᑭᒋᐋᔭᒥᐁᐎᑲᒥᒃ, ᒥᓇ ᒫᑲ ᑳ ᐅᔑᑖᔭᓐ ᐃᔥᐱᔥ ᓂᔅᑐ ᑭᔑᑳᐗ, ᐱᒫᒋᐃᑎᓱ᙮ ᑮᔥᐱᓐ ᑭᒋᒪᓂᑐ ᐅᑯᓯᓴ ᐃᔮᐎᐗᓀ, ᐯᒋ ᓂᔖᑕᐎ ᐋᔑᑌᐋᑎᑯᒃ ᐅᒋ᙮
41ᑖᐱᔅᑯᒡ ᓀᔥᑕ ᑭᒋ ᓵᓵᑭᐎᓕᐌᐎᓕᓕᐗᒃ, ᐁ ᐋᔭᓵᒋᐋᒋᒃ, ᐊᓯᒋ ᐅᒪᓯᓇᐃᑫᐗᒃ ᓀᔥᑕ ᑳ ᓂᑳᓀᓕᑖᑯᓯᒋᒃ ᐃᓕᓕᐗᒃ, ᑮ ᐃᑗᐗᒃ, 42ᑮ ᐱᒫᒋᐁᐤ ᑯᑕᑭᔭ, ᐎᓚ ᑫᒋᐙᒃ ᒫᑲ ᓇᒪᐎᓚ ᑮ ᐱᒫᒋᐃᑌᓱ᙮ ᑮᔥᐱᓐ ᐃᔮᐎᑴ ᐃᔅᕃᐃᓪ ᐅ ᑭᒋᐅᑭᒫᒪ, ᐁᑯᔑ ᐊᓄᒡ ᑲᑕ ᐯᒋ ᓂᔖᑕᐎᒃ ᐋᔑᑌᐋᑎᑯᒃ ᐅᒋ, ᐁᑯ ᒫᑲ ᑫ ᑖᐺᑕᐗᒃ᙮ 43ᑮ ᒪᒥᔑᑐᑕᐌᐤ ᑭᒋᒪᓂᑐᐗ: ᐁᑯᔑ ᐊᓄᒡ ᑲᑕ ᐱᒫᒋᐃᑯ, ᑮᔥᐱᓐ ᓀᑕᐌᓕᒥᑯᑴ: ᐌᓴ ᑮ ᐃᑗᐤ, ᓂᓚ ᑭᒋᒪᓂᑐ ᐅᑯᓯᓴ᙮
44ᑭᒧᑎᔥᑲᒃ ᓀᔥᑕ, ᑳ ᐊᓯᒋ ᒋᔅᑖᔅᑾᐙᑲᓂᐎᒋᒃ ᐁᐗᑴᓕᐤ ᐁᔑ ᐌᐱᓇᒸᒋᒃ ᐎᐱᑎᓕᒃ᙮
ᒋᓴᔅ ᐅᓂᐱᐎᓐ
(ᒫᕐᒃ 15:33–41; ᓘᒃ 23:44–49; ᒑᓐ 19:28–30)
45ᐁᑯ ᓂᑯᑣᔅ ᑎᐹᔨᑲᓐ ᐱᓯᒧᑳᓂᒃ ᐅᒋ ᑮ ᑲᔥᑭᑎᐱᔅᑲᐤ ᒥᓯᐌ ᐊᓂᒪ ᐊᔅᑮᒃ ᐱᓕᔥ ᔖᑭᑖᑦ ᑎᐹᔨᑲᓐ ᐱᓯᒧᑳᓂᒃ᙮ 46ᓈᓐᑕᐤ ᒫᑲ ᔖᑭᑖᑦ ᑎᐹᔨᑲᓐ ᐱᓯᒧᑳᓂᒃ ᒋᓴᔅ ᑮ ᑌᐺᐤ ᐁ ᑭᔗᐌᑦ, ᐁ ᐃᑗᑦ, ᐃᓛᐃ, ᐃᓛᐃ, ᓛᒪ ᓴᐹᒃᑕᓇᐃ? ᑳ ᐃᑗᒪᑲᒃ, ᓂ ᑭᒋᒪᓂᑐᒻ, ᓂ ᑭᒋᒪᓂᑐᒻ, ᑖᓀᑭ ᐌᒋ ᐌᐱᓂᔭᓐ?
47ᐋᑎᑦ ᐊᓂᑭ ᐁᑯᑕ ᐁ ᓂᐹᐎᒋᒃ, ᐃᔅᐱ ᐊᓂᐁᓕᐤ ᐱᐁᑕᑭᑦ, ᑮ ᐃᑗᐗᒃ, ᐊᐗ ᐃᓕᓕᐤ ᓇᑐᒣᐤ ᐃᓛᐃᒐᐗ᙮ 48ᑣᔦᒃ ᒫᑲ ᐯᔭᒃ ᐊᓂᑭ ᑮ ᐃᔅᐸᑕᐤ, ᑮ ᐅᑎᓇᒻ ᒫᑲ ᐅᐸᓂᓕᐤ, ᓀᔥᑕ ᑮ ᐊᑯᑎᑕᐤ, ᔑᐎᑳᐳᒃ, ᑮ ᐊᔅᑕᐤ ᒫᑲ ᐎᐹᔅᑯᒃ, ᐁᑯ ᒫᑲ ᒫᓛᑦ ᑭᒋ ᒥᓂᑴᓕᒋ᙮
49ᑯᑕᑭᔭᒃ ᑮ ᐃᑗᐗᒃ, ᐁᑳ ᑐᑕ, ᒫᑎ ᐙᐸᑖᑕᐤ ᑖᐺ ᐃᓛᐃᒐ ᑫ ᐯᒋ ᐱᒫᒋᐃᑯᑴ᙮
50ᒋᓴᔅ, ᐃᔅᐱ ᒥᓇ ᑳ ᑮ ᑌᐺᑦ ᐁ ᑭᔗᐌᑦ, ᑮ ᐸᑭᑎᓀᐤ ᐅᑦ ᐊᒑᑾ᙮
51ᒫᑎᑲ, ᒫᑲ, ᐊᑯᐃᑲᓐ ᑭᒋᐋᔭᒥᐁᐎᑲᒥᑯᒃ ᑌᑖᐎᒡ ᑮ ᑖᑐᐸᓕᐤ ᐃᔥᐱᒥᒃ ᐅᒋ ᐱᓕᔥ ᑕᐸᔒᔥ; ᐊᔅᑭ ᒫᑲ ᑮ ᑶᑯᐸᓕᐤ, ᓀᔥᑕ ᐁ ᑭᔅᑭᓭᑳᑭ ᑮ ᑖᔥᑖᔥᑭᐸᓕᐗ, 52ᒋᐹᔨᑲᒥᑾ ᒫᑲ ᑮ ᐹᔅᑭᑌᐸᓕᐗ; ᓀᔥᑕ ᒥᒉᑦ ᐎᔭᐎᐙᐗ ᐅᐸᓓᑭᓴᒃ ᑳ ᓂᐹᒋᒃ ᑮ ᐗᓂᔥᑳᒪᑲᓂᓕᐗ, 53ᑮ ᐯᒋ ᐗᓚᐎᐗᒃ ᒫᑲ ᒋᐹᔨᑲᒥᑯᒃ ᐅᒋ ᐃᔅᐱ ᑳ ᑮ ᐗᓂᔥᑳᓕᒋ, ᐸᓓᑭ ᐃᑖᐎᓂᒃ ᒫᑲ ᐁ ᐃᑐᑌᒋᒃ, ᒥᒉᑦ ᑮ ᓄᑯᓰᔅᑕᐌᐗᒃ᙮
54ᐃᔅᐱ ᒫᑲ ᓇᑐᐸᓕᐎᑭᒪᐤ, ᓀᔥᑕ ᐊᓂᐃ ᑳ ᐎᒉᐎᑯᑦ, ᐁ ᓈᓈᑲᑕᐙᐸᒫᒋᒃ ᒋᓴᓴ, ᐎᐋᐸᑕᑭᒃ ᐁ ᑶᑾᓂᓕᒃ, ᓀᔥᑕ ᐊᓂᐃ ᑫᒀᓇ ᑳ ᑐᒋᑳᑌᓕᑭ, ᓈᔅᐱᒡ ᑮ ᓭᑭᓯᐗᒃ, ᐁ ᐃᑗᒋᒃ, ᑖᐺ ᐊᐗ ᑭᒋᒪᓂᑐ ᐅᑯᓯᓴ᙮
55ᒥᒉᑦ ᒫᑲ ᐃᔅᑴᐗᒃ ᐊᓐᑕ ᑮ ᐃᑖᐗᒃ ᐙᓚᐤ ᐁ ᐅᒋ ᑲᓇᐙᐸᑕᑭᒃ, ᑳ ᑮ ᓄᔅᐱᓇᑖᒋᒃ ᒋᓴᓴ ᑳᓕᓖᒃ ᐅᒋ, ᐁ ᐅᒌᔅᑕᒪᐙᒋᒃ; 56ᐅᑯ ᐋᑎᑦ ᐊᓂᑭ, ᒣᕆ ᒫᒃᑕᓖᓐ, ᓀᔥᑕ ᒣᕆ ᒉᒻᔅ ᓀᔥᑕ ᒍᓯᔅ ᐅᑳᐎᐙᐗ, ᓀᔥᑕ ᓭᐸᑎ ᐅᑦ ᐊᐙᔑᒥᔕ ᐅᑳᐎᓕᐗ᙮
ᐁ ᓇᐃᓇᑳᓂᐎᑦ ᒋᓴᔅ
(ᒫᕐᒃ 15:42–47; ᓘᒃ 23:50–56; ᒑᓐ 19:38–42)
57ᐃᔅᐱ ᐁ ᐅᑖᑯᔑᒃ ᐌᑎᒋᐸᓕᒃ, ᒣᔕᑭᓰᑦ ᐃᓕᓕᐤ ᐋᕆᒪᑎᔭᐃᒃ ᑳ ᐅᒌᑦ, ᒍᓯᑉ ᐁ ᐃᔑᓂᑳᓱᑦ, ᑮ ᐯᒋ ᐃᑐᑌᐤ, ᐎᓚ ᓀᔥᑕ ᐁ ᐅ ᑭᔅᑭᓄᐊᒪᐙᑲᓂᒥᑯᑦ ᒋᓴᓴ: 58ᑮ ᓈᑌᐤ ᐹᐃᓚᑕ, ᑮ ᓇᑐᑕᒪᐌᐤ ᒫᑲ ᒋᓴᓴ ᐎᔭᐎᓕᐤ᙮ ᐁᑯ ᐹᐃᓚᑦ ᐁᑕᔓᐌᑦ ᑭᒋ ᐸᑭᑎᓂᑳᑌᓕᒃ᙮ 59ᐃᔅᐱ ᒫᑲ ᒍᓯᑉ ᑳ ᑮ ᐅᑎᓇᒃ ᒥᔮᐎᓕᐤ, ᑮ ᐎᔅᑴᓇᒻ ᐙᐱ ᐸᐸᑭᐙᔮᓀᑭᓄᒃ, 60ᑮ ᐊᔅᑕᐤ ᒫᑲ ᑎᐱᓚᐌ ᐅᑦ ᐅᔥᑭ ᒋᐹᔨᑲᒥᑯᒃ, ᑳ ᑮ ᐙᓚᐱᔅᑲᐊᒃ ᑭᔅᑭᓭᑲᒃ; ᑮ ᑎᑎᐱᓀᐤ ᓀᔥᑕ ᒥᔑ ᐊᓯᓂᔭ ᐃᔥᒀᑌᒥᒃ ᐃᔑ ᒋᐹᔨᑲᒥᑯᒃ, ᐁᑯ ᑫᑐᑌᑦ᙮ 61ᐁᑯᑕ ᒫᑲ ᐁᑖᒋᒃ ᒣᕆ ᒫᒃᑖᓖᓐ, ᓀᔥᑕ ᐊᓇ ᑯᑕᒃ ᒣᕆ, ᐁ ᐎᑕᐱᑕᑭᒃ ᒋᐹᔨᑲᒥᑯᓕᐤ᙮
ᐁ ᑮ ᐋᔨᒋ ᑲᓇᐌᓕᒋᑳᑌᒃ ᒋᐹᔨᑲᒥᒃ
62ᐃᔅᐱ ᒥᓇ ᐁ ᑭᔑᑳᒃ, ᑭᐃᔥᑾ ᐊᓂᒪ ᐁ ᐋᔦᔅᑲᐎ ᑭᔑᑳᒃ, ᑭᒋ ᓵᓵᑭᐎᓕᐌᐎᓕᓕᐗᒃ ᓀᔥᑕ ᐸᕋᓯᔭᒃ ᑖᐱᔅᑯᒡ ᑮ ᐯᒋ ᓈᑌᐗᒃ ᐹᐃᓚᑕ, 63ᐁ ᐃᑗᒋᒃ, ᐅᑭᒪᐤ, ᓂ ᑭᔅᑭᓯᓈᓐ ᐊᓇ ᐊᐙᔦᔑᒥᐌᐤ ᐁ ᑮ ᐃᑗᑦ, ᒣᒀᒡ ᑫᔮᐸᒡ ᐁ ᐱᒫᑎᓰᑦ, ᑮ ᓂᔅᑐ ᑭᔑᑳᑫ ᒥᓇ ᓂ ᑳ ᐗᓂᔥᑳᓐ᙮ 64ᐁᐗᑯ ᐅᒋ ᐃᑕᔓᐌ ᒋᐹᔨᑲᒥᒃ ᑭᒋ ᐋᔨᒋ ᑲᓇᐌᓕᒋᑳᑌᒃ ᐹᑎᒫ ᑮ ᓂᔅᑐ ᑭᔑᑳᑫ, ᐁᑳ ᐅ ᑭᔅᑭᓄᐊᒪᐙᑲᓇ ᑭᒋ ᐯᒋ ᑮᒣᒡ ᑭᒋᐎᓕᑯᑦ ᓂᐹᑎᐱᔉ, ᐁᑯ ᒫᑲ ᑫ ᐃᑖᓕᒋ ᐃᓕᓕᐗ, ᐗᓂᔥᑲᐤ ᐅᓂᐱᐗ ᐅᒋ: ᐁᑯ ᒫᒋᒡ ᐁ ᐗᓂᐎᓕᐙᓂᐗᒃ ᐊᐙᓯᑌ ᑲᑕ ᓈᔦᑖᐗᓐ ᐃᔥᐱᔥ ᓃᔥᑕᒻ᙮
65ᐹᐃᓚᑦ ᑮ ᐃᑌᐤ, ᑭᑦ ᐋᔮᐙᐗᒃ ᐅᑕᔕᐙᐱᐗᒃ: ᑭᑐᑌᒃ, ᐋᔨᒋ ᑲᓇᐌᓕᑕᒧᒃ ᐃᔥᐱᔥ ᐁ ᑲᔥᑭᑖᔦᒃ᙮
66ᐁᑯ ᒫᑲ ᑫᑐᑌᒋᒃ, ᐁ ᐋᔨᒋ ᑲᓇᐌᓕᑕᑫᒃ ᒋᐹᔨᑲᒥᑯᓕᐤ, ᐁ ᐊᑯᔅᑭᐗᔂᒋᒃ ᐊᓯᓂᔭ, ᓀᔥᑕ ᐁ ᐸᑭᑎᓈᒋᒃ ᐊᓂᐃ ᑫ ᐊᔕᐙᐱᓕᒋ᙮
Currently Selected:
ᐅᐸᓓᑭᔅ ᒫᑎᐤ 27: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.