ᓂᔓ ᑎᒧᑎ 1
1
1ᐹᓪ, ᐅᑦ ᐊᐸᔅᑕᓕᒪ ᒋᓴᔅ ᙭, ᑭᒋᒪᓂᑐ ᐅᑦ ᐃᑌᓕᑕᒧᐎᓐ ᐅᒋ ᑳ ᐃᑕᔅᑌᒃ ᐊᓂᒪ ᐱᒫᑎᓯᐎᓂ ᐊᔓᑕᒫᑫᐎᓐ ᑳ ᐃᑕᑾᒃ ᙭ ᒋᓴᓯᒃ, 2ᑎᒧᑎ ᐁ ᒪᓯᓇᐊᒪᐗᒃ ᓈᔅᐱᒡ ᑳ ᓵᑭᐊᒃ ᓂᑯᓯᔅ:
ᑭᔐᐙᑎᓯᐎᓐ, ᔕᐌᓕᒋᑫᐎᓐ, ᓀᔥᑕ ᑳᔮᒣᓕᑕᒧᐎᓐ, ᑭᒋᒪᓂᑐ ᐌᐅᑖᐎᒪᐎᑦ ᐅᒋ, ᓀᔥᑕ ᙭ ᒋᓴᔅ ᑭ ᑎᐯᓕᒋᑫᒥᓇᐤ᙮
ᓇᓈᔅᑯᒧᐎᓐ ᓀᔥᑕ ᔑᑭᒥᐌᐎᓐ
3ᓂ ᓇᓈᔅᑯᒪᐤ ᑭᒋᒪᓂᑐ, ᑳ ᐊᑐᔅᑫᔅᑕᐗᒃ ᓂ ᑳᔮᔑ ᓄᑖᐎᔭᒃ ᐅᒋ, ᐸᓓᑭ ᒥᑐᓀᓕᒋᑲᓂᒃ, ᐁᑳ ᐁ ᐳᓂᔮᓐ, ᐁ ᑭᔅᑭᓯᑐᑖᑖᓐ ᓂᑦ ᐋᔭᒥᐋᐎᓂᒃ ᐁ ᑎᐱᔅᑳᒃ ᓀᔥᑕ ᐁ ᑭᔑᑳᒃ; 4ᓈᔅᐱᒡ ᐁ ᓇᑕᐌᓕᑕᒫᓐ ᑭᒋ ᐙᐸᒥᑖᓐ, ᐁ ᒫᒥᑐᓀᓕᑕᒫᓐ ᐁ ᐃᔑ ᐅᒋᑲᐙᐱᔭᓐ, ᑭᒋ ᓵᑭᓀᔅᑳᑯᔮᓐ ᒥᓚᐙᑕᒧᐎᓐ; 5ᐃᔅᐱ ᑫᔅᑭᓯᑐᑕᒫᓂ ᐊᓂᒪ ᑖᐺ ᑖᐺᔦᓕᑕᒧᐎᓐ ᑳ ᐱᒋᔅᑳᑯᔭᓐ, ᓂᔥᑕᒻ ᑳ ᑮ ᐱᒋᔅᑳᑯᑦ ᑯᑯᒻ ᓗᐃᔅ ᓀᔥᑕ ᑭᑳᐎ ᐃᔫᓂᔅ; ᓀᔥᑕ ᓂ ᑫᒋᓇᐅᓐ ᑭᓚ ᐊᓯᒋ ᐁ ᐱᒋᔅᑳᑯᔭᓐ᙮ 6ᐁᐗᑯ ᐅᒋ ᒫᑲ ᑭ ᑭᔅᑭᓯᐃᑎᓐ, ᑭᒋ ᐃᑌᐊᒶᑦ ᐅ ᒥᓕᐌᐎᓐ ᑭᒋᒪᓂᑐ, ᐊᓂᒪ ᑳ ᐱᒋᔅᑳᑯᔭᓐ ᐁ ᑮ ᓴᒥᓂᔅᑎᒀᓂᑖᓐ ᐅᒋ᙮ 7ᐌᓴ ᑭᒋᒪᓂᑐ ᓇᒪᐎᓚ ᑯᔅᑖᒋᐎᓂ ᐊᒑᑾ ᑭ ᑮ ᒥᓕᑯᓇᐤ; ᒫᑲ ᑲᔥᑭᐅᐎᓂ, ᓀᔥᑕ ᓵᑭᐃᐌᐎᓂ, ᓀᔥᑕ ᐁ ᒪᔥᑲᐙᒃ ᒥᑐᓀᓕᒋᑲᓂᐎ ᐊᒑᑾ᙮
8ᐁᐗᑯ ᐅᒋ ᐁᑳᐎᓚ ᓇᓀᐯᐎᓰᔅᑕᒻ ᐅ ᑎᐹᒋᒧᐎᓐ ᑭ ᑎᐯᓕᒋᑫᒥᓇᐤ, ᐁᑳ ᓀᔥᑕ ᓂᓚ ᐅᒋ ᐅ ᑭᐸᐙᑲᓇ: ᒫᑲ ᐎᒋᐅᑎᓇ ᑲᒀᑕᑭᓯᐎᓇ ᒥᓗᐋᒋᒧᐎᓂᒃ ᑳ ᐅᒋᐸᓕᑭ, ᑳ ᐃᑕᔅᑌᓕᒃ ᑭᒋᒪᓂᑐ ᐅ ᑲᔥᑭᐅᐎᓐ; 9ᐊᓇ ᑳ ᑮ ᐱᒫᒋᐃᑕᒃ, ᓀᔥᑕ ᑳ ᑮ ᓇᑐᒥᑕᒃ ᐸᓓᑭ ᓇᑐᑫᐎᓂᒃ, ᓇᒪᐎᓚ ᐁ ᐃᔑ ᐊᑑᔅᑫᔭᒃ, ᒫᑲ ᑳ ᐃᑕᔅᑌᓕᒃ ᑎᐱᓚᐌ ᐅᑦ ᐃᑌᓕᑕᒧᐎᓐ, ᓀᔥᑕ ᐅ ᔕᐌᓕᒋᑫᐎᓐ ᑳ ᑮ ᒥᓕᑲᐎᔭᒃ ᙭ ᒋᓴᓯᒃ, ᐸᒧᔑ ᒥᐊᒋ ᐃᑕᑾᒃ ᐊᔅᑭ; 10ᒫᑲ ᐊᓄᒡ ᓄᑯᑖᓂᐗᓐ ᐁ ᑮ ᐯᒋ ᓄᑯᓯᑦ ᑭ ᐱᒫᒋᐃᐌᒥᓇᐤ ᒋᓴᔅ ᙭, ᑳ ᑮ ᓂᔑᐗᓈᒋᑖᑦ ᓂᐱᐎᓂᓕᐤ, ᓀᔥᑕ ᑮ ᐹᔭᑌ ᐙᐸᑎᓕᐌᐤ ᐱᒫᑎᓯᐎᓂᓕᐤ ᓀᔥᑕ ᑳᑭᑫ ᐱᒫᑎᓯᐎᓂᓕᐤ ᒥᓗᐋᒋᒧᐎᓐ ᐅᒋ:
11ᐃᑕ ᑳ ᑮ ᐅᒋ ᐃᑕᔓᐙᑎᑲᐎᔮᓐ ᑭᒋ ᑲᑫᔅᑭᒥᐌᔮᓐ, ᓀᔥᑕ ᑭᒋ ᐊᐸᔅᑕᓕᐎᔮᓐ, ᓀᔥᑕ ᑭᒋ ᑭᔅᑭᓄᐊᒪᐗᑭᒃ ᒉᓐᑖᐃᓚᒃ᙮ 12ᐁᐗᑯ ᑳ ᐅᒋ ᐎᓴᑫᓕᑕᒫᓐ ᐅᐅ ᑫᒀᓇ: ᐁᓕᐌᒃ ᒫᑲ, ᓇᒪᐎᓚ ᓂ ᓇᓀᐯᐎᓰᓐ, ᐌᓴ ᓂ ᑭᔅᑫᓕᒪᐤ ᐊᓇ ᑳ ᑮ ᑖᐺᔦᓕᒪᒃ, ᓀᔥᑕ ᓂ ᑫᒋᓇᐅᓐ ᐁ ᑲᔥᑭᑖᑦ ᑭᒋ ᑲᓇᐌᓕᑕᒃ ᐊᓂᒪ ᑳ ᑮ ᐸᑭᑎᓇᒪᐗᒃ ᐱᓕᔥ ᐁᐗᑯ ᐁ ᑭᔑᑳᒃ᙮ 13ᓱᑲ ᒥᒋᒥᓇ ᐊᓂᐃ ᒥᓗᒪᒋᐅᐎ ᐋᔭᒥᐎᓇ ᓂᓚ ᑳ ᑮ ᐅᒋ ᐯᑕᒪᓐ, ᑖᐺᔦᓕᑕᒧᐎᓂᒃ ᓀᔥᑕ ᓵᑭᐃᐌᐎᓂᒃ ᑳ ᐃᑕᑾᒃ ᙭ ᒋᓴᓯᒃ᙮ 14ᐊᓂᒪ ᒥᓗ ᑫᒀᓐ ᑳ ᑮ ᐸᑭᑎᓇᒫᑲᐎᔭᓐ, ᑲᓇᐌᓕᑕ ᐸᓓᑭ ᐊᒑᒃ ᐅᒋ ᑳ ᐱᒋᔅᑳᑕᒃ᙮
15ᐅᒪ ᑭ ᑭᔅᑫᓕᑌᓐ, ᒥᓯᐌ ᐊᓂᑭ ᐁᔕᐃᒃ ᑳ ᐃᑖᒋᒃ ᐁ ᑮ ᓇᑲᔑᒋᒃ; ᐅᑯ ᐋᑎᑦ ᐊᓂᑭ ᐸᐃᒋᓚᔅ ᓀᔥᑕ ᐦᐊᕐᒪᒋᓃᔅ᙮ 16ᐅᑎᐯᓕᒋᑫᐤ ᑲᑕ ᐎ ᒥᓓᐤ ᔕᐌᓕᒋᑫᐎᓂᓕᐤ ᐁᑕᓯᓕᒋ ᐎᑭᓕᒃ ᐅᓂᓯᐳᕋᔅ; ᐌᓴ ᒥᒉᑡᐤ ᓂ ᑮ ᒥᓜᓕᑕᒥᐃᒃ, ᓇᒪ ᓀᔥᑕ ᑮ ᓇᓀᐯᐎᓯᔅᑕᒻ ᓂ ᑕᑯᐱᓱᐎᓈᐱᔉ; 17ᒫᑲ ᐃᔅᐱ ᑳ ᐃᑖᑦ ᕈᒥᒃ, ᓱᑲ ᓂ ᑮ ᓈᓇᑕᐙᐸᒥᒃ, ᓀᔥᑕ ᓂ ᑮ ᒥᔅᑳᒃ᙮ 18ᐅᑎᐯᓕᒋᑫᐤ ᑲᑕ ᒥᓓᐤ ᑭᒋ ᒥᔅᑲᒥᓕᒋ ᔕᐌᓕᒋᑫᐎᓂᓕᐤ ᐅᑎᐯᓕᒋᑫᐤ ᐅᒋ ᐊᓂᒪ ᑭᔑᑳᑫ᙮ ᓀᔥᑕ ᐁᔅᐱᒋ ᒥᒉᑦ ᑫᒀᓇ ᐁ ᑮ ᐅᑎᓇᒪᐎᑦ ᐁᐱᓴᓯᒃ, ᒥᑐᓂ ᑭ ᑭᔅᑫᓕᑌᓐ᙮
Currently Selected:
ᓂᔓ ᑎᒧᑎ 1: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.