ᓂᔥᑕᒻ ᑎᒧᑎ 6
6
1ᐁᑯᔑ ᐊᓂᑭ ᐊᑑᔅᑫᓛᑲᓇᒃ ᑳ ᑎᐯᓕᒫᑲᓂᐎᒋᒃ, ᑲᑕ ᐃᑕᑭᒣᐗᑳ ᑎᐱᓚᐌ ᐅᑦ ᐅᑭᒫᒥᐗᐗ ᐁ ᑌᐸᑫᓕᑖᑯᓯᓕᑭ ᒥᓯᐌ ᐃᔑ ᑭᒋ ᑭᔅᑌᓕᒫᑲᓂᐎᓕᒋ, ᐅᑦ ᐃᔑᓂᑳᓱᐎᓐ ᑭᒋᒪᓂᑐ ᓀᔥᑕ ᐅ ᑭᔅᑭᓄᐊᒫᑫᐎᓐ ᐁᑳ ᑭᒋ ᒪᒋ ᐋᓕᒧᒋᑳᑌᓕᒃ᙮ 2ᐊᓂᑭ ᒫᑲ, ᐅᑦ ᐅᑭᒫᒥᐗᐗ ᑳ ᑖᐺᔦᓕᑕᒥᓕᒋ, ᐁᑳᐎᓚ ᑲᑕ ᐋᑕᐌᓕᒣᐗᒃ, ᐁ ᐎᒋᔖᓂᒪᐎᓕᒋ; ᒫᑲ ᐊᐙᓯᑌ ᑲᑕ ᐊᑑᔅᑲᐌᐗᒃ, ᐁ ᑖᐺᔦᓕᑕᒥᓕᒋ ᓀᔥᑕ ᐁ ᓵᑭᐋᑲᓂᐎᓕᒋ, ᐁ ᐎᒋᐅᑎᓇᒥᓕᒋ ᐊᓂᐁᓕᐤ ᒥᓗᐋᔨᑎᐎᓂᓕᐤ᙮
ᓇᔅᐹᒋ ᑭᔅᑭᓄᐊᒫᑫᐎᓐ ᓀᔥᑕ ᑖᐺ ᐌᓘᑎᓯᐎᓇ
ᐅᐅ ᑫᒀᓇ ᑭᔅᑭᓄᐊᒫᑫ ᓀᔥᑕ ᔑᑭᑫᒧ᙮ 3ᑮᔥᐱᓐ ᐊᐌᓇ ᐱᑐᔥ ᐃᔑ ᑭᔅᑭᓄᐊᒫᑫᒋ, ᓀᔥᑕ ᐁᑳ ᓇᔅᑯᑕᑭ ᐱᒫᑎᓯᐎ ᐋᔭᒥᐎᓇ, ᐊᓂᐃ ᐅᑎ ᐅᑦ ᐋᔭᒥᐎᓇ ᑭ ᑎᐯᓕᒋᑫᒥᓇᐤ ᒋᓴᔅ ᙭, ᓀᔥᑕ ᐊᓂᒪ ᑭᔅᑭᓄᐊᒫᑫᐎᓐ ᒪᓂᑐᐙᑎᓯᐎᓂᒃ ᑳ ᐃᑕᔅᑌᒃ: 4ᑭᔅᑌᓕᒧ, ᐁᑳ ᑫᒀᓐ ᐁ ᑭᔅᑫᓕᑕᒃ, ᒫᑲ ᐁ ᑭᔥᑴᓕᑕᒃ ᑲᑴᒋᑫᒧᐎᓇ ᓀᔥᑕ ᐋᔭᒥᐎᓂ ᐋᔑᑌᒥᑐᐎᓇ, ᐃᑕ ᑳ ᐅᒋᐸᓕᒃ ᐅᑌᓕᒥᑐᐎᓐ, ᒀᓗᑐᑖᑐᐎᓐ, ᒪᒋ ᐋᔭᒥᐃᑐᐎᓐ, ᒪᒋ ᐃᑌᓕᒥᑐᐎᓇ, 5ᐃᓕᓕᐗᒃ ᐁ ᒪᒋᑡᒪᑲᓂᓕᑭ ᐅ ᒥᑐᓀᓕᒋᑲᓂᐗᐗ ᐁ ᒪᒋ ᐋᔑᑌᒥᑐᒋᒃ, ᐁᑳ ᓀᔥᑕ ᐁ ᐋᔮᒋᒃ ᑖᐺᐎᓂᓕᐤ, ᐅᑎᓯᐎᓐ ᐁᐗᑯ ᒪᓂᑐᐙᑎᓯᐎᓐ ᐁ ᐃᑌᓕᑕᑭᒃ: ᐁᑯ ᑐᐎ ᓇᑲᔑᒃ᙮
6ᒫᑲ ᒪᓂᑐᐙᑎᓯᐎᓐ ᐁ ᐊᓯᒋᐸᓕᒃ ᑌᐱᓚᐌᓯᐎᓐ ᐁᐗᑯ ᑭᒋ ᐅᑎᓯᐎᓐ᙮ 7ᐌᓴ ᓇᒪᐎᓚ ᑫᒀᓐ ᑭ ᑮ ᐯᑖᓈᓇᐤ ᐅᑕ ᐊᔅᑮᒃ, ᑫᒋᓈᔥ ᒫᑲ ᓇᒪᐎᓚ ᑫᒀᓐ ᑭ ᑳ ᑭᒋᐎᑖᓈᓇᐤ᙮ 8ᐁ ᐋᔮᔭᒃ ᒫᑲ ᑫ ᒥᒋᔭᒃ ᓀᔥᑕ ᑫ ᐎᓛᑕᒪᒃ, ᐁᑯᔑ ᐁᐗᑯ ᐅᒋ ᑌᐯᓕᑖᑕᐤ᙮ 9ᒫᑲ ᐊᓂᑭ ᑫ ᐎ ᐌᓗᑎᓯᑭᒃ, ᐸᑭᔑᓋᒃ ᑲᑴᒋᐃᐌᐎᓂᒃ, ᓀᔥᑕ ᓇᒀᑲᓂᒃ, ᓀᔥᑕ ᒥᒉᑦ ᑲᑫᐹᑎᓯᐎ ᓀᔥᑕ ᐋᑯ ᒪᒋᓇᑕᐌᓕᑕᒧᐎᓂᒃ, ᐊᓂᐃ ᑳ ᓂᔅᑖᐸᐗᓕᑯᒋᒃ ᐃᓕᓕᐗᒃ ᓂᔑᐗᓈᑎᓯᐎᓂᒃ ᓀᔥᑕ ᐗᓂᔑᓄᐎᓂᒃ᙮ 10ᐌᓴ ᐁ ᓵᑭᐊᑲᓂᐎᑦ ᔔᓕᐋᓐ ᐁᐗᑯ ᑳ ᐅᒉᐱᑭᐎᒃ ᒥᓯᐌ ᑳ ᒫᓚᑕᒃ: ᐊᓂᒪ ᒣᒀᒡ ᐋᑎᑦ ᐁ ᑮ ᒧᔅᑌᓇᑭᒃ, ᑮ ᐗᓂᔑᓋᒃ ᑖᐺᔦᓕᑕᒧᐎᓂᒃ ᐅᒋ, ᓀᔥᑕ ᑮ ᔖᐳᔅᑕᐅᓱᐗᒃ ᒥᒉᑦ ᒥᒋᓚᐌᓯᐎᓇ ᐅᒋ᙮
ᑎᒪᑎ ᐎᑕᒪᐗᑲᓂᐎᐤ ᑫ ᐃᔑ ᐱᒫᑎᓯᔅᐸᓐ
11ᒫᑲ ᑭᓚ ᑳ ᐅᑦ ᐃᓕᓕᒥᒥᔉ ᑭᒋᒪᓂᑐ, ᐅᔑᒧᔅᑕ ᐅᐅ ᑫᒀᓇ: ᓄᔅᐱᓇᑖ ᒫᑲ ᒀᔭᔅᑭᑖᑎᓯᐎᓐ, ᒪᓂᑐᐙᑎᓯᐎᓐ, ᑖᐺᔦᓕᑕᒧᐎᓐ, ᓵᑭᐃᐌᐎᓐ, ᔑᐱᓚᐌᓯᐎᓐ, ᓗᔅᑳᑎᓯᐎᓐ᙮ 12ᓄᑎᓂᑫ ᒥᓗ ᑖᐺᔦᓕᑕᒧᐎᓂ ᓄᑎᓂᑫᐎᓐ, ᒥᒋᒥᓇ ᑲᑭᑫ ᐱᒫᑎᓯᐎᓐ, ᐃᑕ ᑳ ᑮ ᐃᔑ ᓇᑐᒥᑲᐎᔭᓐ, ᓀᔥᑕ ᐁ ᑮ ᐎᑕᒪᓐ ᒥᓗ ᐎᑕᒫᑫᐎᓐ ᐅᑎᔥᑲᐤ ᒥᒉᑦ ᐅᑎᐹᒋᒧᐗᒃ᙮ 13ᑭᑦ ᐃᑕᔓᒥᑎᓐ ᐁ ᐙᐸᒥᔉ ᑭᒋᒪᓂᑐ, ᑳ ᐱᒫᒋᑖᑦ ᒥᓯᐌ ᑫᒀᓇ, ᓀᔥᑕ ᐅᑎᔥᑲᐤ ᙭ ᒋᓴᔅ, ᐊᓇ ᐁ ᐅᑎᔥᑲᐎᑳᐸᐎᔅᑕᐙᑦ ᐸᓐᑎᔭᔅ ᐹᐃᓚᑕ ᑳ ᑮ ᐎᑕᒃ ᒥᓗ ᐎᑕᒫᑫᐎᓂᓕᐤ; 14ᑭᒋ ᑲᓇᐌᓕᑕᒪᓐ ᐅᒪ ᑲᑫᔅᑴᐎᓐ ᐁᑳ ᑭᒋ ᒪᒋ ᐃᑌᓕᑖᑾᒃ ᐁᑳ ᓀᔥᑕ ᑭᒋ ᒪᒋ ᐋᓕᒧᒋᑳᑌᒃ, ᐹᑎᒫ ᓄᑯᓯᑌ ᑭ ᑎᐯᓕᒋᑫᒥᓇᐤ ᒋᓴᔅ ᙭; 15ᐅᑎᒋᐸᓕᓕᑫ ᐅ ᑭᔑᑳᒻ ᑫ ᐙᐸᑎᓕᐌᑦ, ᐊᓇ ᑳ ᔕᐌᓕᑖᑯᓯᑦ ᓀᔥᑕ ᑳ ᐯᔭᑯᑦ ᑭᒋᐅᑭᒪᐤ, ᑭᒋᐅᑭᒪᐗᒃ ᐅ ᑭᒋᐅᑭᒫᒥᐙᐗ, ᓀᔥᑕ ᐅᑎᐯᓕᒋᑫᐗᒃ ᐅ ᑎᐯᓕᒋᑫᒥᐗᐗ: 16ᐊᓇ ᐱᑯ ᑳ ᐋᔮᑦ ᑳᑭᑫ ᐱᒫᑎᓯᐎᓂᓕᐤ, ᐁ ᑕᔑᑫᑦ ᐙᓭᔮᓯᐎᓂᒃ, ᐃᑕ ᐁᑳ ᐊᐌᓇ ᐃᓕᓕᐤ ᑫ ᑮ ᓈᑕᒃ; ᐊᓇ ᐁᑳ ᑳ ᑮ ᐙᐸᒥᑯᑦ ᐃᓕᓕᐗ, ᐁᑳ ᓀᔥᑕ ᑳ ᑲᔥᑭᑖᓕᒋ ᑭᒋ ᐙᐸᒥᑯᑦ: ᐊᓇ ᑫ ᐋᔮᑦ ᑭᔅᑌᓕᑖᑯᓯᐎᓂᓕᐤ ᓀᔥᑕ ᑲᔥᑭᐅᐎᓂᓕᐤ ᑳᑭᑫ᙮ ᐁᒣᓐ᙮
17ᐃᑕᔓᒥᒃ ᐊᓂᑭ ᑳ ᐌᓗᑎᓯᒋᒃ ᐅᑕ ᐊᔅᑮᒃ, ᐁᑳ ᑭᒋ ᑭᔅᑌᓕᒧᒋᒃ, ᐁᑳ ᓀᔥᑕ ᑭᒋ ᒪᒥᔑᑐᑕᑭᒃ ᐁᑳ ᑳ ᑫᒋᓇᐅᒪᑲᑭ ᒥᔕᑭᓯᐎᓇ, ᒫᑲ ᑳ ᐱᒫᑎᓯᓕᑭ ᑭᒋᒪᓂᑐᐗ, ᐊᓇ ᒥᓯᐌ ᑫᒀᓇ ᑳ ᐌᓗᒋ ᒥᓕᑕᒃ ᑭᒋ ᐅᒋ ᒥᓜᓕᑕᒪᒃ; 18ᑭᒋ ᒥᓗ ᑐᑖᑫᒋᒃ, ᑭᒋ ᐌᓗᑎᓯᒋᒃ ᒥᓗ ᐊᑑᔅᑫᐎᓂᒃ, ᑭᒋ ᒥᓜᓕᑕᑭᒃ ᐁ ᒫᑎᓇᒫᑫᒋᒃ, ᑭᒋ ᓯᑭᓓᓯᒋᒃ ᐁ ᒥᓕᐌᒋᒃ; 19ᐁ ᒥᓗ ᐊᔅᑖᒋᑫᔅᑕᒫᓱᒋᒃ ᒥᓗ ᐊᔅᑕᒋᑲᓂᓕᐤ ᐊᓂᒪ ᐁ ᑭᔑᑳᒃ ᐅᒋ ᑫ ᐅᑎᒋᐸᓕᒃ, ᑭᒋ ᑮ ᒫᒋᑯᓇᑭᒃ ᑳᑭᑫ ᐱᒫᑎᓯᐎᓂᓕᐤ᙮
20ᐅ ᑎᒧᑎ, ᑲᓇᐌᓕᑕ ᐊᓂᒪ ᑳ ᑲᓇᐌᓕᑎᓕᑲᐎᔭᓐ, ᐁ ᐌᐱᓇᒪᓐ ᒪᒋ ᓀᔥᑕ ᐸᑾᓐᑕᐤ ᐱᑭᔅᑴᐎᓇ, ᓀᔥᑕ ᓇᔅᑯᔅᑕᒧᐎᓇ ᑳ ᐅᒋᐸᓕᑭ ᑭᔅᑫᓕᑕᒧᐎᓂᒃ ᐁᑳ ᒀᔭᔉ ᒫᑲ ᐅᒪ ᐁ ᐃᔑᓂᑳᑌᒃ; 21ᐊᓂᒪ ᐋᑎᑦ ᐁ ᓄᔅᐱᓇᑕᑭᒃ, ᑮ ᐗᓂᔑᓋᒃ ᑖᐺᔦᓕᑕᒧᐎᓂᒃ ᐅᒋ᙮
ᔕᐌᓕᒋᑫᐎᓐ ᑭ ᑳ ᐎ ᐎᒉᐎᑯᓐ᙮ ᐁᒣᓐ᙮
Currently Selected:
ᓂᔥᑕᒻ ᑎᒧᑎ 6: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.