Ro 1
1
Lep'iyenataĝanaĝac ñe'me Pablo
1Jayem Pablo lalemaĝajet ñe'me Cristo Jesús, nach'eñe jo'ne jayem yiyaĝana qaedi jayem lamaĝajec, jayem qoyiyota'a qaedi ja'aĝatetac da'me onaĝaic 'laqataĝanaĝac ñe'me Dios, ami janema da'me yamaic.
2Dios naya'alo q'aen ca'li gaa'me 'laqataĝanaĝanaqa da'me yaqataĝañi da'me dojo' jo'ne 'uo ca'li. 3Qama'le nach'eda da'me 'naqataĝanaĝac jo'ne 'yaĝat ñe'me c'oĝot Jesucristo mach'e Qadejaliaĝanec, nach'eñe niyiñe ca'li ena'am ga'me ch'e jiyaĝaua jo'ne chiyoĝogueta ga'me c'oqo'tepi ñe'me David, 4qalaĝaja chiyoqotelegue ca'li 'niyelaĝajeguem male qoyen najaqachigui da'me lañoqotaĝanaĝac nataq'aen qoyanem da'me lec'oĝochiyaĝac ñe'me Dios, nach'eñe ladic ga'me ja 'nalegue.
5Chiyaqayi ñe'me Jesucristo jaconeguet da'me jayem qoyeyala'ac da'me jayem namaĝajec, jayem qoyanec da'me jo'onataĝaneuo'o, qaedi yema jena'me aleua uo'oe gaa'me p'iida'a joñe'me nataq'aen yoqochideta. 6Qama'le nach'e ena'am ami jo'ne oñiya'ña di'me Roma, joote ami qoyiyaĝanalo qaedi oviya'ajop ñe'me Jesucristo. 7Dios ami noqopitalo, nataq'aen ami qoyapetenegueta gaa'me Dios lec'oqo'tepi. 'Noota qom Dios mach'e Qadet'a nataq'aen ñe'me Qadejaliaĝanec Jesucristo ami yanema da'me anichoĝodenataguequi nataq'aen da'me at'emaĝaqui.
Pablo jetaque dejapichiya di'me Roma
8Da'me 'uaeñe ja'aĝatetac, chiyaqayi ñe'me Jesucristo da'me janem yamaic ñe'me Dios jouaĝat onolqa'tape ami, qa'a yema qo'yaĝatetac da'me adepi'i.
9Ñe'me Dios jo'ne nach'eñe jo'onataĝaneuo'o, qama'le yataqata 'ñañaĝatec da'me japaĝaguenataĝatapec da'me 'laqataĝanaĝac ñe'me C'oĝot, nach'eñe yayaten da'me nach'e eta't ami ñetouetapeque. 10Nataq'aen daa'me ñetamenaĝaco nach'e eta't jajelaĝanot ñe'me Dios, qaedi qom naqaeda loequenataĝanaĝac qama'le ua'aqueda qo'che' ami jejapichiyalo. 11Qa'a jalcote yamaic ta'le ami jauanalo, nataq'aen ami yecochaĝanaĝaneque ga'me chiyaqayi ñe'me Dios Lepaqal, qaedi nach'e eta't ami t'añidañe; 12eetojo' da'me 'yaqatac, qaedi onolqa'tape 'yañaqatetapec ga'me laqaya da'me qadepe'e 'me qo'mi uetauelo.
13Ami yaqaya'olqa, jepaquetapega ta'le auayachiñe da'me uaĝa'aegue jetaque ja'uo da'me yeuoĝoc qaedi ami jauanalo, qalaĝaja chayovida'a nayi nach'e eta't jayem nedalegue ga'me jo'ne jayem nauaneguet nale. Da'me yamaic, ena'am ta'le jetaque jatoĝon ga'me jalayaĝac ñe'me Dios Lepaqal 'me ami uetauelo, ena'am da'me joote jatoĝon gaa'me ale'u lael laqaya'. 14Janomeguet da'me ena'am ta'le yema netaye da'me ñep'iayaĝac, ga'me 'uo da'me niyamaĝataĝac, uotaĝa ga'me qaya'te niyamaĝataĝac, yatenaĝanaĝayaqa, uotaĝa gaa'me qaya'te yayate'n. 15Qo'che' jayem jalcote da'me jediaĝalegue da'me ami ja'aĝatema da'me onaĝaic 'naqataĝanaĝac, da'me ami jo'ne at'achaqadi' di'me Roma.
Dojo' onaĝaic 'naqataĝanaĝac nach'eda let'adaic lañoqotaĝanaĝac ñe'me Dios
16Ja jepocoĝolegue da'me dojo' onaĝaic 'naqataĝanaĝac, qa'a nach'eda lañoqotaĝanaĝac ñe'me Dios qaedi ena'uaque gaa'me jo'ne p'iida'a yededalegue da'me qonec'alaĝatedegue, nach'egaua joga'me judiopi jo'ne 'uaediñe, qama'le nach'e ena'ama yema joga'me jiyaĝadipi. 17Qa'a da'me onaĝaic 'naqatac qo'mi yatetonaĝanaĝaneque da'me lajoĝoc q'aen da'me qo'mi e'n chimadichidiñe: nach'eda da'me qadepe'e, chiyoqotelegue ga'me 'uaechiñe chayovida'a qom yovita ga'me p'ategue. Naq'aeta da'me 'yaĝatetedac jogaa'me nedii's, eet'oi: “Ga'me jo'ne chiyaqayi da'me lepe'e da'me male chimaqachiñe, nach'ega nec'alegue.”
Ga'me jiyaĝadipi jo'ne ja p'iida'a joñe'me Dios
18Qa'a ñe'me Dios yaloĝon da'me lalemataic 'me chiyoĝogue di'me piyem ya'uo ne'uaĝanaguec yema ga'me jiyaĝadipi 'me ja 'noe'n gaa'me 'lonataqa nataq'aen gaa'me ja chimadichidiñe, qa'a queda'me ja chimadichiñe qama'le ena'am ta'le yecoñedetedac da'me yataqatelegue. 19Jogaa'me joote yateto'n ñe'me Dios, qa'a nach'eñe ñe'me yaloĝonalo da'me mach'e 'loyaĝac.
20Qa'a chiyoqo'teguet ca'li ye'et jena'me aleua, ga'me ja di'yoq 'loyaĝac ñe'me Dios male qoyaqanatet ta'le qoyayaten, yajouaĝat da'me qoyauanalo naa'me 'lonataqa joñe'me, qama'le naq'aeta da'me di'yoqochigui da'me lañoqotaĝanaĝac jo'ne ja yitaĝa 'uo da'me loiquiaqa'. Qo'che' gaa'me ja 'noe'n daa'me 'lonataqa ja naq'aeta ta'le qaya'te lajouaĝa'j. 21Qa'a mate mane'e yateto'n ñe'me Dios, qalaĝaja eetede'em da'me ja naqaeñe ñe'me Dios da'me ja 'nonaĝachidegue, uotaĝa ta'le yate'm da'me lamai'j. Ja naq'aeta, dite da'me chayovida'a yovideta da'me nichiyoĝojoĝo'j naa'me lelnataĝaco nataq'aen naa'me lai'li yataqachiñe uetayelo da'me 'lalaĝa. 22Temaqaedi da'me eetapela'ajalo yatenaĝanaĝayaqa, qalaĝaja chiyoĝo's, 23qa'a jogaa'me male yaĝadiñi da'me netametedapecot ñe'me Dios jo'ne ja pal, nach'edata da'me netametapecoto naa'me lequi'ipi gaa'me qonetametapecoto 'me 'uo ga'me loiquiaqa' nale, uotaĝa gaa'me lequi'il ga'me jiyaĝaua, chayovida'alo jena'me mayodipi liqui'ipi, nanayaqapi choqoga'me yejidipi.
24Qo'che' ñe'me Dios yaje'tema ta'le tadoue da'me lelnataĝaco jo'ne paĝachiguilo 'me uetauelo naa'me lai'li jogaa'me, qama'le onolqa'tape da'me yeda'ape na'me lo'oc qama'le naqaeda chiyaqayi da'me lepocoĝoc. 25Qa'a da'me yataqatelegue chiyaqayi ñe'me Dios, ja naqaeda ta'le yitaĝa yelodaque, dite da'me male yelodaque da'me noqovinaĝanaĝac, qama'le netotedapec. Nataq'aen 'nonaĝachiguilo gaa'me Dios 'lonataqa, qama'le ja naqaeñe ñe'me Dios ta'le 'nonaĝachidegue, nach'eñe jo'ne tayet da'me nach'e eta't qo'nonaĝachigui. Jaja'a, nach'e naq'aeta da'me dojo'.
26Qo'che' ñe'me Dios yemegueta daa'me mach'e lamaico jogaa'me 'me chiyaqayi da'me nepocoĝo. Chayovida'a gaa'me yauodipi yaĝadiñi da'me mach'e 'loyaĝa'j 'me nauoejeyaĝa'j qama'le yacoteguet dojo' nauteta da'me yataqachiñe 'loyaĝa'j qoyen. 27Qama'le nach'e naq'aeta gaa'me le'emdipi yegue'm da'me 'loyaĝa'j qoyen da'me 'uoneguet jaga'me yauo qa'a mach'egaua yip'iyaqatet ga'me mach'e namijeua. Ga'me onolec jiyaĝaua 'yetec ga'me mach'e namijeua ga'me chiyaqayi da'me nepocoĝo, qama'le naq'aeta da'me 'uo da'me lachoĝodec da'me nejiyaĝauayaĝa'j jo'ne chiyaqayi da'me lejomaĝa'j.
28Qa'a queda'me ja jetaque yatetoteguet ñe'me Dios, joñe'me yegue'm jogaa'me yemegueta gaa'me jomayaqa lelnataĝaco, qaedi ye't ga'me jo'ne yepaquetedapega. 29Yataqachiñe nejaqachiguilo da'me 'letaĝaloĝo'j jogaa'me, da'me nequejeguetaĝa, nemite'tae jana'me laicaua, nataq'aen da'me ja no'enpi. P'aguenataĝanaĝayaqa, lataĝanaĝayaqa, loequiaĝaiquipi, qovinaĝanaĝaiquipi, denataĝanaĝaiquipi. 30Ja 'nonaĝachiguilo naa'me mach'e laqaya', nauteta ñe'me Dios, c'onaĝanaĝaiquipi, 'yoĝodenaĝaiquipi, eetedapela't p'ajodaye, chiyaqapiyilo da'me ja no'en, ja yoqocha'alo naa'me let'al jogaa'me. 31Nichiyoĝojoĝola'ajalo jogaa'me, ja ejoda naa'me 'laqataqa 'me joote nenaĝatedegue, qaya'te yaloĝota ta'le 'uo da'me loqopich'i, yataqata qaya'te ta'le maqachaĝa yichoĝoden. 32Jogaa'me yataqachiñe joote yayate'n queda'me Dios yauo'oe gaa'me 'laqataqa queda'me qom 'uo ga'me 'ye'tape naa'me naajo' ja qoyiyamaĝade'n, qama'le qoya'uo da'me nalataguec. Qalaĝaja jogaa'me taqaedita da'me quetedalegue da'me 'yetetedac da'me ja no'en, chayovida'a machidiñe q'ae'n da'me yeloteda'a ga'me laqaya da'me nach'e ena'am ye'tetac ga'me ja no'en.
Currently Selected:
Ro 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina