Lc 21
21
Jaga'me lajaqaje jañe'me p'ai jo'ne choĝodaq
(Mc 12.41-44)
1Jesús yec'ate'tape gaa'me neuoyaĝadi jo'ne yadegue jaga'me laicaua, yemetetedapiñgui jaga'me najaqaje lae't, 2qama'le nach'e ena'am yauana jañe'me p'ai jo'ne choĝodaq da'me yachedañgui dojole naicaual jaga'me najaqaje lae't. 3Chane'eja Jesús enaac:
—Eja da'me ami ja'aĝatema queda'me janjo' p'ai jo'ne choĝodaq, ga'me yanegue napacalegue yema; 4qa'a ena'uaque e'n lajaqaje' jaga'me ch'e 'liyoqote', qalaĝaja jañe'me, da'me choĝodaq, yanegue yema ga'me yiyamaqa'tam.
Jesús yaqataĝañi queda'me pal qomle ga'me tamenaĝaiqui
(Mt 24.1-6; Mc 13.1-7)
5Uo'oe gaa'me jo'ne dojetedapiye ga'me tamenaĝaiqui, da'me 'lonaĝac ga'me qadipi nataq'aen najaqajel jo'ne qoyanoto joñe'me Dios jo'ne qoyen li'yoĝodaqa'te ga'me tamenaĝaiqui. Qalaĝaja Jesús enaac:
6—Novi't qomle gaa'me noloqo'ote jo'ne yema jenjo' auec'achiñetac, qaya'te onolec qa' ta'le maqachaĝa uetalegue ga'me laqaya qomle. Yema qoyapalaĝat qom'te.
7Chane'eja yauote da'me lachimaqataĝanaĝa'j:
—Paĝaguenataĝanaĝaic, ¿jach'e jogamaĝa laloqo' da'me 'uo da'me dojo'? ¿Jach'e jogamaĝa 'nanec qomle da'me yauaqa'a da'me male di'yo't naa'me naajo' uo'oe?
8Jesús 'yategueta:
—Achiya'aguet qomle da'me dojo' qaedi ja ami 'te qoyoqovi'n. Qa'a qayoĝode' gaa'me novi't qomle jo'ne ch'e jayem 'naĝachidiye. Eet'oi qomle: «Mach'e jayem Dios Liquiyac», nataq'aen «Mach'e laloqo'ena.» Qalaĝaja ami, ena'te oquiyegue. 9Nataq'aen qom auep'iquitapega queda'me 'uo ga'me nalatetapega't nataq'aen deloiquitapega't, qama'le ena'te at'oiyi, qa'a nach'eda dojo' 'uaeñe 'uo qomle; qalaĝaja, maliaĝa ja yovita ga'me loiquiaqa'.
'Nanaqa jo'ne uo'oe qom nadi'ta ga'me loiquiaqa' jena'me aleua
(Mt 24.7-14; Mc 13.8-13)
10Qama'le Jesús enaac: “Ga'me noic delo'ye' ga'me noic laqaya, nataq'aen gaa'me nejaliaqa'te 'uo ga'me nalada't. 11Nataq'aen jalcote qomle da'me deda'tape jena'me aleua, da'me ne'ep gaa'me ale'u, nataq'aen 'uo da'me napite'nadi, choqoda'me uo'oe qomle gaa'me di'yo't di'me piyem jo'ne chaqayaqa let'al nataq'aen jalcoli'tolqa gaa'me 'nanaqa.
12“Qalaĝaja nadi'ta da'me uo'oe naa'me naajo', ami qoyecoñede'tape qomle nataq'aen 'uo da'me anecanaguequi. Ami qoyaue'ualo gaa'me nemaĝaiqui' qaedi anenaĝachiyegue ga'me ami yajouaĝa't, ami qoyanedaue jaga'me coñetaĝanaĝaiqui nataq'aen ami qoyajoĝona'agueta gaa'me jaliaĝanaqa jo'ne p'ajodaye choqogaa'me jaliaĝanaqa jo'ne yelolo'te gaa'me ale'u lael, qa'a yajouaĝat da'me ami yapaĝaguenataqa. 13Nach'eda 'uo da'me adedaqadi' da'me auepitaqachiñiyac da'me jayem a'uaĝachetac. 14Qalaĝaja, auacoñiyeguet da'me ja diyachitapiyelo naa'me adai'lidi' da'me jach'e jogamaĝa anenaĝachiyegue qomle a'uaĝachi, 15qa'a naqayem jo'ne ami janema qomle ga'me at'aqataqadi' jo'ne ami najaqachiguilo da'me adayatenaĝanaĝaqui, qama'le qaya'te gamachaqaega gaa'me ami nautenalo yaqanatet ta'le napogaĝadeneguet uotaĝa yaqanatet ta'le nautenaĝaneguet ga'me 'laqatac. 16Qalaĝaja chayovida'alo gaa'me mach'e adet'aldi' ami p'alo'te qomle da'me ami nautenalo, jogaa'me adaqayadejoda, nataq'aen ga'me lael da'me adaqayayaĝaqui nataq'aen ga'me anaigaĝa'udi'. Uo'oe gaa'me qoyala't da'me ami, 17nataq'aen yema jena'me aleua ami qoniquiyatapegalo jouaĝat da'me jayem oquiyegue. 18Qalaĝaja, qaya'te onolec adayoĝochi ta'le qoyeguem: 19¡'noota qom a'nañaĝachela't, qaedi auaqanachichi da'me adec'aliyegue!
Di'me Jerusalén qoyapalaĝat qom'te
(Mt 24.15-28; Mc 13.14-23)
20“Qom auañiya di'me Jerusalén da'me qodique'tajop ga'me coicopi nalada't lo'olpi, male auayachiñe da'me ja cop'a da'me qoyapalaĝat. 21Chane'eja gaa'me jo'ne ueteda'a di'me Judea, 'noota da'me dajodegue, yec'atalo gaa'me qajoĝona'a; jogaa'me jo'ne ueteda'a di'me Jerusalén, 'noota ta'le yenoĝodegue queda'e ga'me, nataq'aen gaa'me ueteda'ague ga'me 'nonaĝa 'noota ta'le ja 'viyelaĝadoue joga'me noic. 22Qa'a mach'e noloqo'ote jo'ne qoyen tachiguilo da'me male 'uo da'me Dios le'uaĝanaĝanaĝac qomle, nach'eda male yepaquichiguilo ena'uaque ga'me jo'ne 'yaĝatetac daa'me nedii's joca'li. 23¡Yataqachiñe choĝodailole gaa'me yauo' jo'ne nalotapegueta gaa'me noloqo'ote qom'te da'me qo'uaĝail, uotaĝa qom uo'oe gaa'me c'oqo'te jo'ne maliaĝa nojoqotedapeuo! Qa'a yataqachiñe jalcote qomle da'me layaliyaĝac jena'me jenjo' aleua, nataq'aen yataqachiñe qoyachalegue da'me Dios lalemataic jenjo' noic qomle. 24Uo'oe gaa'me qoyalateque ga'me daĝanaĝat nataq'aen gaa'me laqaya' qoyaue'j qomle qama'le e'n lecoñetae's ga'me noyaqapi jena'me aleua; qama'le ga'me ja judiopi ch'e e'n lapiaĝala't qomle di'me Jerusalén, chayovida'a qom yenoĝodegue gaa'me noloqo'ote jo'ne qoyanema.
Da'me 'liyelaĝajoĝoc ñe'me yataqachiñe Jiyaĝaua Lec'oĝot
(Mt 24.29-31; Mc 13.24-27)
25“Uo'oe qom'te gaa'me 'nanaqa'te jañe'me ajeua nataq'aen ñe'me auoĝoic nataq'aen ga'me uaqachiñipi; nataq'aen yema jena'me aleua 'uo da'me nachitataic nataq'aen jalcote da'me loqolanaqa', jouaĝat ga'me chaqae'ta lejamaĝa ga'me noĝop lepa'. 26Qama'le ga'me jiyaĝadipi copecheyapeguem qom uenata da'me dojo' 'uo qomle jo'ne ualegue jena'me aleua; qa'a qoyedaĝa'tape qomle ena'uaque gaa'me jo'ne neda'ague di'me p'ajeguem 'me laqauaejeguem. 27Qom yem da'me dojo' qama'le jayem jo'ne yataqachiñe Jiyaĝaua Lec'oĝot jayem qoyela'aguet da'me japetalegue ga'me piyem lo'oc da'me ñovi', nataq'aen yataqata t'adaic da'me yañoqotaĝanaĝac choqoda'me 'yonaĝac. 28Qom yepacalegue da'me di'yo'quena naa'me naajo' uo'oe, qama'le 'noota qom auacoñiyeguet da'me at'añaĝaqui, qa'a nach'ega laloqo' da'me ami qonec'alaĝatedegue.”
'Noota qom aniyamaĝacheta't
(Mt 24.32-35,42-44; Mc 13.28-37)
29Nach'e ena'am yanema dojo' en laloĝoiqui ga'me 'yaĝatetac: “Auec'achiñe jaga'me epaq jo'ne higuera, uotaĝa gamachaqaega epaq laqaya. 30Qom auañiya da'me nejetedegue naa'me layoqotel, qama'le auayachiñe queda'me male yauaqa'a ga'me uo'e. 31Nach'e naq'aeta qomle, qom auañiya da'me male yepacalo'te di'yo't naa'me naajo' jo'ne uo'oe, auayachiñe jo' qomle queda'me yamta'le novitequena da'me lejaliaĝa ñe'me Dios.
32“Eja da'me ami ja'aĝatema, da'me ena'uaque naa'me naajo' uo'oe yepacalo'te di'yo't qom maliaĝa 'uo jena'me jenjo' jiyaĝadipi naa'me naajo' noloqo'ote. 33Jodi'me piyem nataq'aen jena'me aleua ja yitaĝa 'uo qom'te, qalaĝaja da'me 'yaqataqa qamqa'me ja yenoĝodegue.
34“Achiya'aguet: ena'te ademiya'alo gaa'me namanaĝanaĝaco uotaĝa ta'le ami taĝayaqa uotaĝa ta'le diyachitapiyelo naa'me adai'lidi' queda'me cha'li 'uo da'me at'oyaĝaqui nayi, qaedi ga'me nolo' qomle ja ami 'te yepelaĝa't da'me ami ualo'te 35ena'am ta'le ami qonapogoĝo'tape. Qa'a neda'ñalo ena'uaque jogaa'me jo'ne netedalegue jena'me aleua. 36'Noota qom a'vicheta't nataq'aen anetameñetac yemeda naa'me noloqo'ote, qaedi maqachaĝa ami yaĝa'n ena'uaque naa'me naajo' uo'oe qomle nataq'aen qaedi auaqanachichi ta'le auec'aeche'uo qama'le auajoyiya'aguet ñe'me Jiyaĝaua Lec'oĝot.”
37Quete' gaa'me noloqo'ote da'me Jesús dapaĝaguenataĝatapegoue ga'me tamenaĝaiqui, qama'le ne'uaĝanañe nale ua'a ga'me qajoĝonaĝa jo'ne Olivo Lichidijat. 38Qama'le ena'uaque ga'me jiyaĝadipi yec'adeta nale ne'teta ga'me tamenaĝaiqui qaedi qodomachiya.
Currently Selected:
Lc 21: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina