Jn 6
6
Jesús yiqui'yaĝa'n ga'me jiyaĝadipi jo'ne cinco mil
(Mt 14.13-21; Mc 6.30-44; Lc 9.10-17)
1Ca'li yem da'me dojo', Jesús dajoyi ga'me lajego jaga'me qa'em lat'edai 'me na'ña di'me Galilea, di'me jo'ne nach'edi 'me loogue di'me Tiberias. 2Jalcote ga'me jiyaĝadipi 'me quetapegue', qa'a qoyauana ga'me laloĝonataĝanaĝaco jo'ne di'yo't 'me yauo'oe, e'n yemedegue joga'me leuaĝayaqa. 3Qama'le Jesús queje'mec ga'me qajoĝonaĝa choqoga'me lapaĝaguenataqa ca'li qama'le netedalegue. 4Male qoyoqo'ta ga'me leualaĝayaĝaiqui joga'me judiopi da'me uenateteda'a da'me leuotaye ñe'me piyem le'ec queda'me ja yala't joca'li gaa'me ñoqolqa.
5Mane'e da'me dec'atenaĝan Jesús qama'le yauana ga'me jiyaĝadipi jo'ne quetapegue', qama'le yena't ñe'me Felipe:
—¿Jach'e ga'me jachiyoĝotaqague da'me qoloqot ga'me yali'j jena'me jenjo' jiyaĝadipi?
6Jenjo' enaac qaedi yayaten da'me jach'e jogamaĝa enaac ñe'me Felipe, qa'a ñe'me Jesús joote yataqachiñe yayaten ga'me jo'ne jetaque ya'uo. 7Felipe male 'yateguet:
—¿Jach'e doscientos denariopi jaga'me nalo'taguet da'me qoloqot jaga'me pan qaedi jiqui'yaĝanaĝac jenjo' jiyaĝadipi? Jenjo' nalo'taguet da'me ch'e cale'tapolqa ga'me qoyalic.
8Qama'le Andrés, ñe'me mach'e laqaya' gaa'me lapaĝaguenataqa ñe'me Jesús nataq'aen ñe'me lanoqolec ñe'me Simón Pedro, enaac:
9—Jenjo' 'uo jo'me notolec jo'ne yauanalo cinco paan jo'ne chiyaqayi ga'me cebada lojoche, nataq'aen jaa'me dojolqa niya', qalaĝaja ¿jach'e ga'me nalo'taguet naa'me naajo', da'me jalcote jena'me jiyaĝadipi?
10Jesús male enaac:
—A'uaqataĝañema yema qaedi ñidiñe.
Di'me jo'ne ua'ña 'uo ga'me lolelaĝai let'adaic qama'le joga'me nedalegue. Qaale joga'me nalo'taguet cinco mil ga'me jiyaĝadipi. 11Jesús yaconalo jogaa'me paan, qama'le dajelaĝalo'te ñe'me Dios; qama'le yem da'me lajelaĝanaĝac qama'le yanouelo jogaa'me lapaĝaguenataqa qaedi jogaa'me yanema onolqa'tape jogaa'me jiyaĝa'u jo'ne ñichidiñe. Nach'e ena'am da'me yepagaqate'tegue da'me yema joga'me jiyaĝadipi yanema joga'me niyaq lapat lael, chayovida'a yono't ena'uac jogaa'me jiyaĝa'u da'me yache'tape. 12Joca'li ena'uaque yono't qama'le Jesús enapegalo joga'me lapaĝaguenataqa:
—Auapochiñiya'ajalo yema na'me laelolqa 'me 'niyoqo'te qaedi qaya'te ta'le ne'uela't.
13Qama'le joga'me 'niyoqo'te qoyapetena't qama'le e'n najaĝayelo q'ae'n jogaa'me doce natoĝonaĝaiqui' gaa'me laelolqa jo'ne 'niyoqo'te jaa'me cinco paan jo'ne chiyaqayi ga'me cebada lojoche.
14Joga'me jiyaĝadipi, mane'e da'me yauata da'me dojo' di'yoq q'aen jo'ne 'nanec 'me ya'uo ñe'me Jesús, qama'le enapega't:
—Jenjo' jo'ne nach'ena 'me yataqatelegue 'laqataĝanaĝanec ñe'me Dios, nach'eñe jo'ne qo'yaĝat ca'li da'me nec'achi'ña jena'me aleua.
15Qalaĝaja ñe'me Jesús noma'a queda'me jetaque qoneuoĝochigui da'me qoyauegoue da'me qoyen nejaliaĝanec, qama'le yitaĝa ca'ae joga'me jiyaĝadipi, yec'adije'ma ga'me qajoĝonaĝa jo'ne qayaje'mec qaedi onolac da'me neta'ña.
Jesús quetalegue ga'me noĝop
(Mt 14.22-27; Mc 6.45-52)
16Qaale male yamta'le pi'yaq qama'le jogaa'me lapaĝaguenataqa ñe'me Jesús tadiñgui jaga'me qa'em lat'edai, 17da'me netedañgui jaga'me licota, qama'le e'n lelnataĝa'j da'me yovideda'ata di'me Capernaúm. Qaale male 'naltapiye qalaĝaja ñe'me Jesús maliaĝa jona'li novitalo jogaa'me lapaĝaguenataqa. 18Ga'me noĝop 'uo da'me ja namachiñe qa'a 'uo ga'me layat let'adaic 'me ya'uo ga'me lepaĝa. 19Qama'le joca'li male napacalegue ga'me cinco uotaĝa seis kilómetros, qama'le yauata da'me chiyoĝogue jena'me chiyoqocho'ogue ñe'me Jesús da'me quetalegue joga'me noĝop let'adaic da'me nec'ata jaga'me licota, qama'le jalcote 'uo da'me loqolanaqa'. 20Qalaĝaja joñe'me enaac:
—¡Naqayem, ena'te at'oyiyi!
21Qama'le jogaa'me te'me jetaque paja'a da'me yacoteguet qaedi yanedañgui jaga'me nelicota', qalaĝaja ua'a queda'me ma'te paja'a da'me en yovidedeta ga'me lañaĝa.
Ga'me jiyaĝadipi yelaque ñe'me Jesús
22Jo'me nolo' laqaya, joga'me jiyaĝadipi jo'ne ue'tague ga'me lajego joga'me noĝop let'adaic yayate'n da'me qaga'te licota laqaya, qa'a nach'agata jaga'me onole 'me licota, nataq'aen ñe'me Jesús ja nañgui jaga'me, yejamache joga'me lapaĝaguenataqa, qama'le ñe'me Jesús ja equeguelo. 23Qalaĝaja uo'oe jogaa'me licotal laqaya' jo'ne novi't, chiyoĝotegue di'me Tiberias, di'me noic jo'ne yauoqo'ta di'me ua'ña ca'li ya'uo da'me lajelaĝanaĝac joñe'me Jaliaĝanec, dajelaĝalegue joga'me pan da'me male qoyalic. 24Joca'li qoyauana da'me ja netedañgui jaga'me licota ñe'me Jesús choqogaa'me lapaĝaguenataqa, qama'le joga'me jiyaĝadipi male nedañgui jaga'me licota da'me dajotegue di'me Capernaúm qaedi yelodaque ñe'me Jesús.
Ñe'me Jesús nach'eñe jo'ne pan 'me chiyaqayi da'me nec'alaĝa
25Mane'e da'me yovidedeta ga'me lajego joga'me noĝop let'adaic qama'le yauata ñe'me Jesús queda'me ue'ta joga'me loogue, qama'le 'uo da'me qoyenatetapec:
—Paĝaguenataĝanaĝaic, ¿jach'e jo'me ua'a da'me anovitequena?
26'Yategueta ñe'me Jesús qama'le enaac:
—Eja da'me yataqachiñe ja auayachiñe' naa'me naajo' 'nanaqa jo'ne je'n di'yo't. Onolec da'me ch'e jayem aueloyitaque, qa'a yajouaĝat da'me aualiqui jaa'me pan jecaet, qama'le en adonodiye. 27Da'me ami, a'uonataĝañi, qalaĝaja ja a'uonataĝañetapiye ga'me nalic jo'ne di'yoq, dite ga'me niqui'yaĝat jo'ne nach'e eta't 'uo, 'me chiyaqayi da'me 'nec'alaĝa jo'ne qaya'te loiquiaqa', da'me jo'ne janegue, da'me jayem jo'ne jayem Jiyaĝaua Lec'oĝot, naqayem jo'ne jayem daloĝonataĝana ñe'me Qadet'a Dios, queda'me naqayem jo'ne jayem 'yamaqaten.
28Chane'eja qoyenatec:
—¿Jach'e jogamaĝa eeta ga'me jauoqo qaedi je'etaq da'me 'lonataĝanaĝac ñe'me Dios?
29'Yategueta ñe'me Jesús qama'le enaac:
—Da'me jo'ne Dios 'yamaqaten, jetaque jayem auep'iiya'a, qa'a naqayem jo'ne jayem namaĝaquena.
30Qama'le nach'e ena'am yenadetec:
—¿Jach'e jogamaĝa 'nanec 'me auaqanatet qo'mi aualoĝonalo, qaedi da'me jauanaĝa qama'le am jep'iyaqa? ¿Jach'e jogamaĝa yataqachiñe eeta da'me dojo' at'onatac? 31Dia'me jo'ne mach'e qadet'al yali'j jaga'me maná da'me ueteda'a di'me aleua jo'ne totapega't, joda'me jo'ne joote qoyediñe: «Dios yanema ga'me pan qaedi yali'j, joga'me pan jo'ne chiyoĝogue di'me piyem.»
32Qama'le Jesús 'yategueta, enaac:
—Eja da'me ami ja'aĝatema, queda'me ja naqaeñe ñe'me Moisés ta'le ami yanema jaga'me pan 'me chiyoĝogue piyem, dite ñe'me Taĝadena' jo'ne nach'eñe ami yanema jaga'me jo'ne yataqatelegue pan. 33Qa'a jaga'me pan jo'ne chiyaqayi joñe'me Dios, nach'eñe jo'ne nenochiñe joca'li da'me chiyoĝogue di'me piyem, qama'le nataq'aen da'me ya'uo da'me lec'alaĝa'j jogaa'me jiyaĝadipi.
34Qama'le jogaa'me male yajela'y joñe'me:
—Jaliaĝanec, 'noota qom nach'e eta't qo'mi auanema jana'me pan.
35Jesús 'yategueta jogaa'me:
—Naqayem jo'ne pan 'me jayem chiyaqayi da'me nec'alaĝa. Qama'le ga'me jo'ne jayem nec'ata ja yitaĝa 'uo da'me loqouaĝa, nataq'aen joga'me jayem p'iya'a ja yitaĝa ta'le yelinquip. 36Qalaĝaja da'me joote te'me ami 'ñaĝatetapegueta, qama'te ja jayem 'te auep'iiya'a da'me te'me joote jayem auañiya. 37Ena'uaque gaa'me jiyaĝa'u jo'ne jayem yanema joñe'me Taĝadena', jayem nec'adeta qama'le da'me jayem ja je'uotapegueta. 38Da'me jayem ja ja'uo ga'me jo'ne mach'e yelnataĝac, qa'a jachiyoĝogue di'me piyem qaedi ja'uo ga'me jo'ne lelnataĝac joñe'me Taĝadena' jo'ne jayem namaĝaquena. 39Qama'le da'me jo'ne lelnataĝac joñe'me, ja jetaque 'uo ga'me onolec jo'ne yejomac gaa'me jo'ne jayem qoyanema, qa'a naqayem jo'ne en 'ñiyelaĝachidijeguem qom yovita ga'me nolo' jo'ne p'ategue. 40Qa'a da'me lelnataĝac joñe'me Taĝadena', yemeda jogaa'me jo'ne jayem yauata da'me jayem Lec'oĝot ñe'me Dios, nataq'aen da'me jayem p'iida'a, qama'le jetaque yauata da'me lec'alaĝa'j jo'ne qaya'te loiquiaqa'. Qa'a da'me jayem male 'ñiyelaĝachidijeguem jogaa'me qom yovita ga'me nolo' jo'ne p'ategue.
41Qama'le ua'a ca'li da'me qoyedaĝatetapega joñe'me Jesús, qa'a yajouaĝat da'me 'uo da'me nenaĝategue jo'ne eetac: “Naqayem jo'ne pan 'me jachiyoĝogue di'me piyem.” 42Qama'le ua'a ca'li enapega'ajalo:
—¿Qo'li ja naqaeda da'me dojo' Jesús jo'ne lec'oĝot ñe'me José? Da'me qo'mi joote jatetonaq ñe'me let'a nataq'aen jañe'me lat'e, qama'te ¿teua'atoqo' enapela't chiyoĝogue di'me piyem?
43Jesús 'yategueta, enaac:
—Ena'te jayem auedaĝachitapega. 44Qaya'te ta'le yaqanatet jayem nec'ata, qom ja jayem 'te novidaĝa'ta joga'me joñe'me Taĝadena' jo'ne jayem namaĝaquena, qama'le naqayem da'me 'ñiyelaĝachijeguem qom yovita ga'me nolo' jo'ne p'ategue. 45Uo'oe naa'me ledii's jogaa'me Dios 'laqataĝanaĝanaqa jo'ne eetac: «Yema da'me Dios yapaĝague'n qomle jogaa'me jiyaĝadipi.» Chane'eja ena'uaque jogaa'me jo'ne naquiaĝata ñe'me Qadet'a nataq'aen da'me napaĝaguenalo naa'me 'laqataqa joñe'me, qama'le jayem nec'ata. 46Ena'te aueñetapega ta'le 'uo ga'me yauana ñe'me Taĝadena', dite da'me jayem jo'ne onolec 'me jachiyaqayi ñe'me Dios 'me jauana.
47“Eja da'me ami ja'aĝatema: joga'me jo'ne jayem p'iya'a, male yauana da'me lec'alaĝa jo'ne qaya'te loiquiaqa'. 48Qa'a naqayem jo'ne pan 'me jayem chiyaqayi da'me nec'alaĝa. 49Jogaa'me jo'ne mach'e jachiyojoĝogueta yali'j joca'li jaga'me pan 'me maná da'me ueteda'ague ga'me aleua jo'ne totapega't, qalaĝaja nach'e ena'ama da'me yele'u. 50Qalaĝaja jaga'me pan jo'ne chiyaqaje'ma di'me piyem, ga'me jo'ne yalic joñe'me ja yeleu. 51Naqayem jo'ne pan 'me nec'alaĝa, jo'ne ñenochiñe da'me jachiyoĝogue di'me piyem. Joga'me jo'ne yalic jenjo' pan nach'e eta't da'me nec'aletaye: jenjo' pan jo'ne janegue, nach'ena jo'ne mach'e yapachidiyaĝac, da'me janegue qaedi 'uo da'me lec'alaĝa'j jogaa'me jiyaĝadipi.”
52Joga'me jiyaĝadipi male ua'a ca'li paya'ajalo da'me dapetetedapega't, qama'le enapega'ajalo:
—¿Toqoch'e eetapega yaqanatet da'me qo'mi yiqui'yaĝaneque ga'me mach'e lapat?
53Jesús male enaac:
—Eja da'me ami ja'aĝatema, da'me jayem jo'ne jayem Jiyaĝaua Lec'oĝot: qom ja aualiqui jenjo' yapat, nataq'aen da'me ja aniyomiyigui jana'me yetauo', qama'le ja auañiya da'me nec'alaĝa jo'ne qaya'te loiquiaqa'. 54Chane'eja joga'me jo'ne yalic jenjo' yapat nataq'aen niyomigui janjo' yetauo', male 'uo da'me lec'alaĝa jo'ne qaya'te loiquiaqa', qama'le nach'e ena'am da'me 'ñiyelaĝachijeguem ga'me nolo' jo'ne p'ategue. 55Qa'a jena'me yapat nach'ena jo'ne yataqatelegue niqui'yaĝat nataq'aen jana'me yetauo' nach'e ena'am yataqatelegue naiquip. 56Ga'me jo'ne yalic jena'me yapat nataq'aen da'me niyomigui janjo' yetauo' nach'e eta't da'me jayem ue'tajop, qama'le nach'e ena'am da'me jayem joue'tajop. 57Joñe'me Qadet'a 'me jayem namaĝaquena, 'uo da'me lec'alaĝa jo'ne qaya'te loiquiaqa', qama'le da'me jayem nach'e ena'am da'me nach'e eta't jec'aletaye, qa'a naqayem jo'ne joue'tajop joñe'me Qadet'a. Chane'eja nach'e ena'ama jogaa'me jo'ne yali'j jenjo' yapat: nataq'aen 'uo da'me lec'alaqa' qa'a jouaĝat jayem. 58Naqayem jo'ne pan 'me jachiyoĝogue di'me piyem, jayem jo'ne pan 'me ja jena'am jaga'me maná jo'ne yali'j joca'li jodia'me jo'ne auachiyoĝoyegueta 'me mach'e adet'aldi': jodia'me yali'j joca'li jaga'me maná qalaĝaja nach'e ena'ama da'me yele'u. Qalaĝaja nayi male ja ena'am: jogaa'me jo'ne yali'j jenjo' yapat, nach'egaua jo'ne 'uo da'me 'loyaĝac 'me qaya'te loiquiaqa'.
59Da'me dojo' jo'ne dapaĝaguenataĝanec joñe'me Jesús joca'li uetaue joga'me tamenaĝaiqui di'me noic 'me Capernaúm.
'Naqatac jo'ne chiyaqayi da'me 'noyaĝac 'me qaya'te loiquiaqa'
60Mane'e ca'li qodomachiya da'me dojo' lapaĝaguenataĝanaĝac joñe'me Jesús qama'le uo'oe gaa'me jiyaĝa'u jo'ne qayoĝode' 'me quetedapegue' joñe'me male enapega'ajalo:
—¿Jach'e jogamaĝa yaqanatet ta'le yaconeguet da'me dojo' qaedi yoqo'cha, queda'me 'uo da'me laqalaic?
61Jesús male 'uo da'me yetadenegueta jogaa'me jo'ne jetaque yauote da'me ledaqataĝanaĝa'j, qama'le ua'a ca'li male yena't joñe'me:
—¿Qo'li naqaeda da'me dojo' jo'ne ñenaĝategue 'me qaya'te at'amaqatenataĝanaĝaqui? 62¿Jach'e jogamaĝa eete' gaa'me at'aqataqadi' da'me ta'le jayem auañiya da'me jec'adije'ma di'me jo'ne jalchi'ena 'yachaqa', naqayem 'me Jiyaĝaua Lec'oĝot? 63Ñe'me Dios Lepaqal nach'eñe jo'ne ya'uo da'me nec'alaĝa, qama'le ja ena'am da'me jo'ne ch'e anejiyaĝauayaĝaqui 'me qaya'te 'noota ta'le chiyaqayi. Qama'le ami janema da'me dojo' 'yaqatac qaedi ñe'me Dios Lepaqal ya'uo da'me adec'alaĝaqui. 64Qalaĝaja da'me ami maliaĝa uo'oe gaa'me jo'ne doqoleguetaĝa'n.
Jesús naq'aetec da'me dojo' 'laqatac joca'li qa'a jalchi'ena yayate'n gaa'me jo'ne ja p'iida'a joñe'me, nataq'aen joga'me onolec jo'ne jetaque p'alegue joñe'me. 65Qama'le ua'a ca'li male ya'uo da'me loqotetenaĝanaĝac:
—Qo'che' naq'aeta da'me dojo' ñenaĝategue da'me qaya'te yaqanatet ta'le jayem nec'ata, qom ñe'me Taĝadena' ja jayem 'te novidaĝa'ta joga'me.
66Qama'le ua'a ca'li da'me jalcote jogaa'me jo'ne te'me quetedapegue' joñe'me Jesús male yaĝadegue, nataq'aen da'me ja yitaĝa ta'le quetegue joñe'me. 67Qama'le ua'a ca'li male yena't jogaa'me doce jo'ne lapaĝaguenataqa joñe'me Jesús:
—Da'me ami, ¿qo'li nach'e ena'am jetaque oquiyi?
68Ñe'me Simón Pedro 'yateguet joñe'me:
—Jaliaĝanec, ¿jach'e ga'me jiyaĝaua laqaya jo'ne 'noota ta'le qolaĝague? Qa'a naa'me at'aqataqa 'naqataqa jo'ne chiyaqayilo da'me 'noyaĝac 'me qaya'te loiquiaqa'. 69Da'me qo'mi joote yataqachiñe am jep'iyaqa, nataq'aen da'me jayatenaq da'me naqa'am jo'ne am ja 'nalegue 'me am lamaĝajec ñe'me Dios.
70Jesús male 'yateguet:
—Da'me ami doce, ¿qo'li ja naqayem jo'ne ami yiquiyaqa? Qalaĝaja, nach'e ena'am da'me ami 'uo ga'me onolec jo'ne yataqachiñe payac.
71Mane'e ca'li Jesús nenaĝategue da'me dojo', qama'le 'yaĝatetac ñe'me Judas, jo'ne lec'oĝot ñe'me Simón Iscariote, qa'a ñe'me Judas nach'eñe jo'ne dachinataĝalegue qaedi 'uo ga'me qo'yetec, mate mane'e te'me nach'e ena'am napotenaĝa'u jogaa'me jo'ne doce 'me lapaĝaguenataqa.
Currently Selected:
Jn 6: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina