Jn 11
11
Ca'li yeleu di'me Lázaro qama'le Jesús nec'alaĝachijeguem
1'Uo di'me jiyaĝaua jo'ne leuaĝaic 'me lenaĝat da'me Lázaro, yataqachiñe Betania le'ec, di'me noic jo'ne 'lachaqa' jañe'me María nataq'aen jañe'me Marta, nach'eñaua jo'ne mach'e laqaya' di'me Lázaro. 2Jañe'me María nach'añe jo'ne yiyoĝolo'te joca'li ga'me yoĝoqui da'me ualo'te q'ae'n gaa'me lapia'te joñe'me Jaliaĝanec Jesús, qama'le nataq'aen da'me daqaqa'y q'ae'n joga'me layoĝot. 3Qo'che' naq'aeta gaa'me dos 'me mach'e naqaya' telopaĝata ñe'me Jesús qaedi t'aqataĝanem:
—Jaliaĝanec, di'me anauotaĝaua uetaue da'me leleuaĝa.
4Mane'e da'me Jesús domachiya, qama'le enaac:
—Jenjo' lapite'nayaĝac ja naqaena ta'le en yeleu q'aen, nach'edata da'me uetaue da'me nichoĝodenataĝanaĝac qaedi yaloĝon da'me 'loyaĝac ñe'me Lec'oĝot joñe'me Dios, da'me 'uo da'me li'yoĝodic joñe'me Dios.
5Qa'ejole Jesús jalcote da'me noqopita jañe'me Marta chaqañe'me laqaya María nataq'aen ga'me Lázaro. 6Mane'e ca'li qot'aqataĝanem da'me Lázaro uetaue da'me leleuaĝa, qalaĝaja chayovida'a da'me dos jaa'me noloqo'ote da'me ueta'ñdi. 7Ca'li yem qama'le t'aqataĝanema jogaa'me lapaĝaguenataqa, enaac:
—¡Qolaq nayi, ji'iyelaĝajoĝogue di'me Judea!
8Jogaa'me lapaĝaguenataqa t'aqataĝatem joñe'me:
—Paĝaguenataĝanaĝaic, ja cop'a joga'me judiopi 'me 'lachaqa't di'me dijo' aleua jetaque am yajaĝateque gaa'me qadi da'me am yala't, qama'te ¿toqoch'e jetaque yitaĝa auajoyi jodi'me?
9Qama'le Jesús 'yategueta jogaa'me, enaac:
—¿Qo'li ja eja ga'me nolo' da'me yauana doce horas? Qom 'uo ga'me yeuotapiye ga'me nolo', ja chiyaqajeguem, qa'a nelotegue q'aen da'me yoqochiñe jo'ne yecoyadelegue jena'me aleua. 10Qalaĝaja qom 'uo ga'me yeuotapiye ga'me 'lalaĝa, qama'le chiyaqajeguem qa'a qaya'te yoqochiñe.
11Yem da'me nenaĝategue da'me dojo' qama'le nataq'aen yapoteneuo da'me jo'ne eetac:
—Ñe'me mach'e qanauotaĝaua 'me Lázaro male t'ochetac, qalaĝaja jec'ata qaedi ñoqotoĝon.
12Jogaa'me lapaĝaguenataqa enapega'ajalo:
—Jaliaĝanec, qom eja da'me t'ochetac, qama'le yemegue jo' qomle.
13Qalaĝaja da'me Jesús 'yaĝatetac queda'me Lázaro joote yeleu, da'me cha'li uenate'tape jogaa'me lapaĝaguenataqa queda'me 'uo da'me 'laqatac 'yaĝatetac da'me ch'e lochaĝa ga'me jiyaĝaua. 14Qama'le Jesús 'yoqo'tegue q'aen da'me 'yaĝatema:
—Di'me Lázaro joote yeleu. 15Qalaĝaja 'noota da'me ja joue'tague di'me ua'ña, qa'a naq'aeta yataqachiñe 'noota queda'me jouaĝat ami, qaedi auep'iiya'a. Qalaĝaja, ¡jajoĝogue jec'atenaĝanaĝa!
16Qama'le ñe'me Tomás, ñe'me jo'ne qoyanec da'me Uadiaĝaic, t'aqataĝanema jogaa'me napaĝaguenataqa laqaya':
—¡Nach'e ena'am qo'mi jajoĝogue, qaedi qadeleua'y!
17Da'me yovita, Jesús yauana qaale joote cuatro jaa'me noloqo'ote da'me Lázaro uetaue jaga'me napa'l lae't. 18Di'me Betania yauaqa'a di'me Jerusalén, nalo'taguet tres kilómetros, 19qama'le jalcote joga'me judiopi da'me dejapichiyalo gaa'me Marta chaqañe'me María, qaedi qoloyaĝanate't queda'me 'uo da'me lajouaĝac yeleu di'me mach'e laqaya'.
20Joca'li Marta yayaten da'me Jesús joote nadiiteuo, qama'le yenoĝonegue qa'aguet joñe'me, qalaĝaja jañe'me María ueta'ña ga'me 'lachaqa'. 21Marta t'aqataĝanem ñe'me Jesús:
—Jaliaĝanec, ta'le oue'ta jenjo', di'me yaqaya ja yeleu ta'le. 22Qalaĝaja jayaten nayi ñe'me Dios am yanem yema ga'me aviyaĝanaque.
23Jesús 'yateguet jañe'me:
—Di'me adaqaya yitaĝa nec'alegue qomle.
24Marta 'yateguet joñe'me:
—Jaja'a, eja jayaten da'me yitaĝa nec'alegue qom qo'niyelaĝachidijeguem jodia'me jo'ne joote yele'u, qom yovita ga'me nolo' jo'ne p'ategue.
25Qama'le enaac ñe'me Jesús:
—Jayem naqayem jo'ne 'ñiyelaĝachidijeguem jogaa'me napa'lpi nataq'aen da'me ñec'alaĝatedegue. Gaa'me jo'ne jayem p'iida'a, mate mane'e yele'u qalaĝaja yitaĝa ñec'alaĝatedegue; 26nataq'aen ena'uaque jogaa'me jo'ne nec'aletedaye, qom jayem p'iida'a qama'le ja nale'en ta'le yele'u. ¿Qo'li a'uamaqaten nayi da'me dojo'?
27Jaga'me male enaac:
—Jaja'a, Jaliaĝanec. Am jep'iya'a queda'me naqa'am jo'ne am Dios Liquiyac 'me Lec'oĝot ñe'me Dios, nach'e am jo'ne am qo'yaĝat ca'li da'me anec'achi'ña jena'me aleua.
28Ca'li yem da'me nenaĝategue da'me dojo', jañe'me Marta ec qama'le yiyaĝana jañe'me laqaya María, qalaĝaja ch'e nejoĝo'tot:
—Ñe'me Paĝaguenataĝanaĝaic joote novitequena, am yiyaĝana.
29Jañe'me María paja'a da'me nedotela't da'me dep'iyeya, qama'le ñijeguem, yec'ata ñe'me Jesús.
30Ñe'me Jesús maliaĝa jona'li taue joga'me noic, qa'a cha'li ueta'ña ga'me jo'ne ue'ta jañe'me Marta, di'me jo'ne ua'a da'me naua'ne' jañe'me choqoñe'me Jesús. 31Joga'me judiopi jo'ne neteda'ña ga'me 'lachaqa' jañe'me María da'me loyaĝanatetedac, mane'e da'me yauata jañe'me enegue da'me ñijeguem, yenoĝonegue, qama'le nach'e ena'am ñidijeguem, quetegue, qa'a yepetetedapega ta'le dajoyi jaga'me napa'l lae't da'me noyen.
32Mane'e joca'li María yovita joga'me ue'ta ñe'me Jesús, qama'le paja'a da'me yejoqoto' naa'me leliquetel jogaa'me lapia'te joñe'me qama'le enaac:
—Jaliaĝanec, ta'le oue'ta jenjo', di'me yaqaya ja yeleu ta'le.
33Ca'li Jesús yauana jañe'me María da'me noyen choqoga'me judiopi jo'ne naequetedapegue', qama'le yataqachiñe let'adaic da'me nedotela't choqoda'me diviloĝol, 34qama'le yenateque jogaa'me:
—¿Jach'e ga'me na'ña jaga'me napa'l lae't jo'ne uetaue?
'Yadeteguet:
—Jaliaĝanec: auanaequena, auec'atenaĝana di'me ua'ña.
35Qama'le Jesús noyen. 36Joga'me judiopi male enapega'ajalo:
—¡Auec'achiñe da'me let'adaic da'me loqopich'i!
37Qalaĝaja uo'oe gaa'me jo'ne enapega't:
—Da'me dojo' jiyaĝaua jo'ne neloye q'aen ga'me qanam, ¿qo'li ja yaqanatet ta'le 'uo ga'me ee'tec ca'li di'me Lázaro qaedi ja yeleu?
38Jesús yitaĝa let'adaic da'me nedotela't qama'le yec'ata jaga'me napa'l lae't, jo'ne ch'e jauac joca'li, ga'me nadiiuo napadetaye neta'uet ga'me qa'. 39Jesús enaac:
—Anaqachi na'me qa'.
Marta, jañe'me laqaya di'me yeleu, enapega joñe'me:
—Jaliaĝanec, joote ja no'en da'me laeta, qa'a joote cuatro jaa'me noloqo'ote da'me yeleu.
40Jesús 'yateguet jañe'me:
—¿Qo'li ja joote am ja'aĝatem da'me qom auep'iya'a, qama'le auana qomle da'me 'lonaĝac ñe'me Dios?
41Qama'le qonaqategue ga'me qa'. Ñe'me Jesús male yeloje'ma di'me piyem qama'le enaac:
—Taĝadena', am janem da'me yamaic queda'me jayem anaquiaĝana. 42Da'me jayem joote jayaten da'me nach'e eta't jayem auomachiya, qalaĝaja am ja'aĝatem da'me qaedi 'uo da'me layamaĝac jena'me jenjo' jiyaĝadipi jo'ne ueta'ñena, qaedi ja yoqolegue't da'me naqa'am da'me jayem anamaĝaquena.
43Ca'li yem da'me nenaĝategue da'me dojo', qama'le netenec da'me liyaĝanaĝac:
—¡Lázaro, anenoĝonegue, oca'e na'me nojo'!
44Joga'me jo'ne te'me joote yeleu male nenoĝonegue, jonaa'me loua' choqonaa'me lapia'te naĝatetayelo jogaa'me laĝanaqa'te, nataq'aen ga'me latajoĝoc lecoĝojop qoyen ga'me ualoq lae. Jesús yamaĝalo'te ga'me jiyaĝadipi:
—Auejoyelegue, anaqachi' naa'me laĝanaqa'te qama'le auomachii'ta da'me ec.
Jetaque da'me qoyecoñe' ñe'me Jesús qaedi qoyalat
(Mt 26.1-5; Mc 14.1-2; Lc 22.1-2)
45Qama'le uo'oe ca'li jalcote joga'me judiopi jo'ne dajotegue qaedi naequetedapegue' jañe'me María, ca'li yauata da'me jo'ne ya'uo ñe'me Jesús, qama'le p'iida'a joñe'me. 46Qalaĝaja uo'oe gaa'me laqaya' jo'ne eque' da'me yec'atalo joga'me fariseopi, qama'le t'aqataĝa'tape da'me ya'uo joñe'me Jesús. 47Chane'eja joga'me fariseopi choqogaa'me lejaliaĝanaqa gaa'me tamenaĝaiqui lo'ol yemata'a't yema jogaa'me najoĝola'te, qama'le dojapega't, enapega't:
—¿Jach'e ga'me jauoqo? Qa'a jojo' jiyaĝaua en di'yo't qayoĝode' gaa'me 'nanaqa. 48Qom ch'e jomachaqa'ta, qama'le ena'uaque ga'me jiyaĝadipi 'yamaqate'n qomle joñe'me. Qom naq'aeta qama'le na'taquena qomle gaa'me nejaliaĝanaqa jo'ne Roma laje' da'me nolaĝachidiñe jena'me mach'e qanetamenaĝaiqui nataq'aen da'me 'naĝa't jena'me qadayi.
49Qama'le 'uo ga'me onolec jo'ne chiyaqauelo jogaa'me, lenaĝat da'me Caifás, 'me nach'eñe lejaliaĝane'j gaa'me tamenaĝaiqui lo'ol jojo'me uo'e, enapegalo jogaa'me:
—Da'me ami qaya'te auayachiñe, 50qama'le ja auenache'ta da'me mach'e qo'mi 'ñamaqatenaĝaye qom yeleu ga'me onolec jiyaĝaua qaedi qoyiyamaĝam ga'me jiyaĝadipi jo'ne noic le'ec, qama'le ja pa'l qomle yemeda gaa'me noyaqa jo'ne qat'achaqa'te laje'.
51Qalaĝaja ñe'me Caifás ja mach'e lelnataĝac da'me jo'ne nenaĝategue, qa'a nach'eñe jo'ne lejaliaĝane'j jogaa'me tamenaĝaiqui lo'ol, qama'le 'yaĝatetac da'me Dios 'laqataĝanaĝac queda'me yeleu jo' qomle ñe'me Jesús qaedi yiyamaĝam gaa'me noyaqa jo'ne judiopi. 52Qalaĝaja ja nach'edata da'me yiyamaĝam ga'me judiopi, dite da'me qaedi yapotena't ena'uac jogaa'me nelagaĝa ga'me neteda'ña jo'ne Dios lec'oqo'tepi.
53Chane'eja chiyoqotelegue jo'me jojo' nolo' jogaa'me lajoĝola'te ga'me judiopi male 'nachediye qaedi male qoyala't ñe'me Jesús.
54Qo'che' naq'aeta ñe'me Jesús male ja nechoĝotalo joga'me judiopi jo'ne uetauelo. Nach'edata da'me ca'e di'me aleua jo'ne Judea qama'le dajoyi ga'me 'nachaqa' jo'ne yauaqa'a ga'me aleua jo'ne totapega't, di'me noic jo'ne lenaĝat da'me Efraín, qama'le nach'edi ue'ta choqogaa'me lapaĝaguenataqa.
55Male nadi'ta joga'me Pascua, da'me nemaĝac jo'ne leualaĝayaĝaiqui joga'me judiopi, qama'le jalcote ga'me jiyaĝadipi jo'ne noyaqa laje' male yec'adeta di'me Jerusalén qaedi niyamaĝatetapela'ajalo. 56Qama'le qonetetaque ñe'me Jesús, nataq'aen gaa'me jiyaĝa'u jo'ne ueteda'a ga'me tamenaĝaiqui male nenatetapega't:
—¿Jach'e ga'me adelnataĝaqui? ¿Qo'li nec'ata jenjo' neualaĝayaĝac, uotaĝa ja nec'ata?
57Jogaa'me lejaliaĝanaqa gaa'me tamenaĝaiqui lo'ol choqoga'me fariseopi yauote da'me 'laqata'j da'me qom 'uo ga'me yayaten ga'me ue'ta ñe'me Jesús, qama'le paja'a da'me qot'aqataĝanema jogaa'me qaedi yaqanate't ta'le yecoñe't joñe'me.
Currently Selected:
Jn 11: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina