Markus 16
16
Eimuko lyaJesus
(Mat. 28:1-8; Luk. 24:1-12; Joh. 20:1-10)
1Iya hipa piti Esabati, Maria Magdalena naSalome naMaria ina yaJakob va landa ovidhimba, va ka vaveke olutu lwaJesus. 2Iya omuhuka omunene wetango lyolutenga lyotjivike etango himali tumbu, va ya kombila. 3Iya ve lipula hava tyaa: “Iya atjaa aan̯i ngume ke tu alangatethela po ewe li dhe po pombila?” 4Iya hiva tala ko, va mona okutya ewe ndyoka ndyaa li enene unene lya alangatethwa po, kali po. 5Iya hiva hiti mombila, va mona mo etele ndyaa li alya kala pohi kokulyo, aa lya dhala omudhalo omule omupembadhi, iya va li ava tila unene.
6Ye he ve heele ha tyaa: “Hámu tila, mamu taendha Jesus Omunasareta, ngwaa papelwa komutjaakano. Ye wa imunwa kout̯e, ke mo hemu. Talen̯i tuu pompuka mpave mu twiile. 7Iya enden̯i ka heele ovalongwa ve naPetrus mu tyee: Jesus ma ka tenga okuya koGalilea. Oko mamu ke mu mona ngahi e mu heela.”#Mat. 26:32; Mark. 14:28 8Ovakadhintu va inkola pombila, amava teketa, ava ngwangwana. Wo kave na omuntu noumo nguva heela, mena lyokutya va li ava tila.
Jesus me liholololele Maria Magdalena
(Mat. 28:9-10; Joh. 20:11-18)
[9Omuhuka omunene wetango lyolutenga lyotjivike, Jesus hiaa imuka kout̯e, olutenga we liholololela Maria Magdalena, ngoka Jesus mwaa ithile odhondemoni epanduvali. 10Iya ye wa ya, he tji hipululile mboka mbava kala naJesus, mbava li ave otjo mava lili. 11Iya hiva tee okutya u na omwenyo, Maria we mu mono, kave tji itavelele.
Jesus me liholololele ovalongwa vavali
(Luk. 24:13-35)
12 Jesus kon̯ima we liholololela ovalongwa ve vavali molupe nduu lili, tainkolo va li amava dhi motjitungwalongo. 13Hemba va ya, have tji hipululile ovakwawo, iya novakwawo kave tji itavelele.
Jesus me liholololele ovalongwa omulongo naumo
(Mat. 28:16-20; Luk. 24:36-49; Joh. 20:19-23; Ovil. 1:6-8)
14Kon̯ima we lihololela mboka omulongo naumo, tainkolo va li amava li. Jesus we ve tangunithila okuhaitavela noukukutu womitima vyawo, mena lyokutya kava itavelele mboka mbave mu mona hiaa imunwa kout̯e. 15Jesus we ve heela ha tyaa: “Enden̯i nouye auhe, n̯e mu ka teethele ovantu avehe ondaka ombwa.#Ovil. 1:8 16Nguma itavele, ha tjatjwa, ma hupithwa, iya nguhama itavele, ma ka koyelwa mekeko. 17Mboka mbava itavela, mava ka undapa ovilingatangan̯eko. Mena lyandje mava ka itha mo odhondemoni, mava ka popya omalaka omape. 18Mava ka kambula odhonyoka, andaa va nu oudhioo, kau na himau ve ningi, mava ka tendeka omawoko awo kovavedhi, hava veluka.”
Jesus ma i meulu
(Luk. 24:50-53; Ovil. 1:9-11)
19Iya kon̯ima Muhona Jesus hiee ve heele nyahoka, wa twalwa meulu. Iya ha kala pohi kokulyo kwaKalunga.#Luk. 24:50-51; Ovil. 1:9-11 20Iya ovalongwa va ya, hava teethele akuhe, iya Ohamba wa li pamo nawo, ovilingatangan̯eko mbiva undapa vya yulika okutya eteetho lyawo olyatjatjili.]
Currently Selected:
Markus 16: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.