DEUTERONOMION 29
29
Ovaisraeli tava kumaidwa vali va diinine ehangano lOmwene
1Eendjovo dehangano, Omwene e di lombwela Moses e li ninge nOvaisraeli medu laMoab ponho yehangano olo Ye a ninga navo puHoreb.
2Ndele Moses okwa shiva Ovaisraeli aveshe ndele ta ti kuvo: “Onye vene mwa mona ashishe eshi Omwene e shi ningila Farao novapiya vaye aveshe noshilongo shaye ashishe medu laEgipiti, 3oiponga inene omesho eni e i mona, omadidiliko manene noikumwifa. 4Ndelenee Omwene ine mu pa omutima okushiiva, nomesho okumona nomatwi okupwilikina fiyo onena. 5Ndele Ame nde mu endifa mombuwa omido omilongo nhee; oikutu yeni mwe i djala, inai kulupa. Eenghaku deni dokeemhadi inadi kulupa. 6Inamu lya omungome, ndele inamu nwa omaviinyu ile oikunwa idjuu, opo mu shiive nokutya, Aame Omwene Kalunga keni. 7Ndele nye eshi mwa fika ponhele ei, Sihon, ohamba yaHesbon, naOg, ohamba yaBasan, oda fikama, di tu lwife, ndelenee fye otwe di taataa, 8ndele twa nangala oshilongo shado, ndele twe shi yandja efyuululo kOvarubeni nOvagad noketata lepata lOvamanasse. 9Diinineni hano eendjovo dehangano eli noku di wanifa, opo mu mone elao mwaashishe tamu shi ningi.
10“Nye amushe tamu kala ofika nena koshipala shOmwene Kalunga keni: omalenga eni, omapata eni, ovakulunhu veni, ovapashukili veni, heeno, ovalumenhu Ovaisraeli aveshe; 11ovana veni, ovalikadi veni, nomunailongo, ou ta kala meni lonhanda yoye, omutyavi woikuni yoye nomuteki woye womeva, 12opo mu ye mo mehangano lOmwene Kalunga keni, mehangano lokwaana, Omwene Kalunga keni ta ningi nanye nena eli. 13Opo Ye e mu pameke nena eli mu ninge oshiwana shaye, ndele Ye a shiive okuninga Kalunga keni, ngaashi Ye e mu udanekela, ndele ngaashi a udanekela nokwaanena ooxo Abraham, Isak naJakob. 14Ndele itandi ningi ehangano eli, nehangano eli lokwaana, nanye amuke, 15ndelenee onaava ve li ofika nena eli pamwe nafye koshipala shOmwene Kalunga ketu, naava vehe li po pufye nena eli. 16Osheshi onye vene mu shi shii, nhumbi twa li medu laEgipiti, ndele nhumbi twa tauluka moilongo yoiwana, mokati kaayo nye mwa enda. 17Ndele nye omwa mona oixuna yavo, oikalunga yoiti noyomamanya, noyoshisiliveli noyoshingoldo, va li ve i na, 18hano mokati keni muha kale omulumenhu ile omukainhu, epata ile oludi omutima walo tau liteeka nena eli kOmwene Kalunga ketu a ka ye okulongela oikalunga yoiwana, opo mokati keni muha mene nande omudi muwo tamu di oudiyo noshixwa shedimba lii. 19Ndele umwe ngeenge ta udu eendjovo deano eli, nge te litangele ounelao momutima waye, ndele ta ti: ‘Ame ohandi ka mona ouwa nande ohandi ende moukukutu womwenyo wange.’ Osho ngaha tamu dudwa po eshi sha tuta naashi shikukutu! 20Omwene ita hale oku mu dimina po, ndelenee ehandu nouladi wOmwene tau xwamene omulumenhu ou, netulomutima alishe olo la shangelwa mo membo eli, tali ya kombada yaye, nOmwene ta ka dima po edina laye koshi yeulu. 21NOmwene ote ke mu tongola mo momapata aeshe Ovaisraeli noku mu pongeka pamatulomutima aeshe aa a shangelwa mo membo eli lomhango yehangano.
22“Nepupi tali shikula, ovana veni, ava tave mu shikula nomunailongo ou ta di moshilongo shokokule, otava ka mona nghee oiponga yomoshilongo eshi nomaudu aa e shi tuminwa kOmwene, 23heeno, mosulfuri nomongwa, edu alishe eshi la pya, itali kunwa vali ndele itali mene, noimeno itai twiyuka, ngaashi pa li mefimbo linya Sodom naGomorra, Adma naSeboim ya hanaunwa po, Omwene eshi e i hanauna po moupyuhandu waye. 24Noiwana aishe tai ka tya: ‘Omolwashike Omwene a ningila ngaha oshilongo eshi? Ehanyo lehandu linene li fike opo, olashike?’ 25Opo nee vo otava ka nyamukula: ‘Vo eshi va efa ehangano lOmwene Kalunga kooxe, olo Ye e li ningile navo, vo eshi va pitifwa kuye medu laEgipiti, 26ndele va ya va ka longele oikalunga imwe noku i linyongamena, heeno, oikalunga inai shiivika kuvo, naai inava lombwelwa, 27onghee hano ehandu lOmwene la xwamena oshilongo eshi, opo a tume kombada yasho etulomutima laye alishe, eli la shangelwa mo membo eli. 28NOmwene okwe va duda mo moshilongo shavo mehandu nomoupyuhandu nomehanyo linene, ndele Ye e va kupula koshilongo shimwe, ngaashi shi li nena eli.’
29“Oiholekwa oyOmwene Kalunga ketu. Ndelenee eshi sha hololwa, oshetu noshovana vetu fiyo alushe, opo tu wanife eendjovo adishe domhango ei.
Currently Selected:
DEUTERONOMION 29: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.