DEUTERONOMION 28
28
Omanangeko noupuna
1“Ove ngeenge to pwilikine nawa ondaka yOmwene Kalunga koye, u diinine shili oipango yaye aishe, ame handi i ku lombwele nena eli, opo nee Omwene Kalunga koye ote ke ku tula kombada yoiwana aishe yokombada yedu. 2Nomanangeko noupuna aeshe aa tae uya kombada yoye, ndele tae ku hange, ngeenge to pwilikine ondaka yOmwene Kalunga koye.
3“To ka kala wa nangekwa noupuna moshilando ndele to ka kala wa nangekwa noupuna momapya.
4“Oludalo lolutu loye, noiimati yomepya loye, noludalo leengobe doye noludalo leedi doye tali ka kala la nangekwa noupuna.
5“Oshimbale shoye noshiyaxa shoye shokulungila olumbololo lomungome tai ka kala ya nangekwa noupuna.
6“To ka kala wa nangekwa noupuna mokuya kwoye, ndele to ka kala wa nangekwa noupuna mokupita mo kwoye.
7“Omwene te ke ku taataela ovatondadi voye tave ku homona. Tave ku homona nondjila imwe, ndelenee tava ka ya onhapo neendjila heyali.
8“Omwene ta lombwele enangeko noupuna li ku shikule momaanda nomwaaishe ho tula eke loye. Ye ote ku nangeke noupuna moshilongo osho Omwene Kalunga koye te ke ku pa.
9“Omwene ote ke ku likalekela oshiwana shiyapuki, ngaashi Ye e shi ku anenene, ove ngeenge to diinine oipango yOmwene Kalunga koye, ndele to ende neendjila daye. 10Noiwana aishe yokombada yedu otai ka mona nokutya, edina lOmwene ola tumbala kombada yoye, ndele yo otai ke ku tila. 11NOmwene ote ke ku pa ouwa tau xungile moludalo loye nomoludalo loimuna nomoludalo lomapya moshilongo, Omwene e shi udanekela ooxo nokwaana, opo e shi ku pe. 12Omwene ote ke ku yeululila elimba laye liwa, nokutya eulu, opo a lokifile oshilongo shoye odula pefimbo liwa, ndele opo a nangeke noupuna oilonga aishe yomake oye, ndele ove oto ka yandja eengele koiwana ihapu, ndelenee ove mwene ito pumbwa okulya eengele. 13NOmwene ote ke ku ninga omutwe hamushila, ndele ove oto ka tungala, ito ka xutuka, ove ngeenge ho pwilikine oipango yOmwene Kalunga koye, ei ame handi ku lombwele nena eli, ove u i diinine noku i wanifa, 14ndele nye itamu yapuka mo nande kolulyo ile kolumosho meendjovo adishe odo ame handi mu lombwele nena eli, muha shikule oikalunga imwe mu i longele.
Okukala kwaIsrael, Kalunga ngeenge te va tula omutima
15“Ndelenee ove ngeenge ito pwilikine ondaka yOmwene Kalunga koye, opo u diinine shili oipango aishe ei yaye neenghedimhango daye, ame ohandi ku lombwele nena eli, opo nee omatulomutima aeshe aa tae uya kombada yoye ndele tae ku hange.
16“Ove to ka kala wa tulwa omutima moshilando, ndele to ka kala wa tulwa omutima momapya.
17“Oshimbale shoye noshiyaxa shoye shokulungila olumbololo lomungome tai ka kala ya tulwa omutima.
18“Oludalo loye noiimati yomapya oye noutanguda veengobe doye noudjona veedi doye tai ka kala ya tulwa omutima.
19“Ove to ka kala wa tulwa omutima mokuya mo kwoye, ndele to ka kala wa tulwa omutima mokupita mo kwoye.
20“Omwene ta ka tuma mokati keni etulomutima nedundakanifo nomahaluhalu mukeshe eshi to ka longa, fiyo ove to nyonaunwa po diva, omolwoilonga yoye ii, eshi ove we liteeka nge.
21“Omwene te shi ningi, ove to kwatwa koudu wolutapo, fiyo Ye ote ku hanauna po moshilongo oko to i u shi nangale. 22Omwene ote ke ku tumina oudu wenangatelo nolwiidi, oidinda noupyu, epupyu noluteni, okahaudjololo nonhimba; ndele yo otai ke ku shikula fiyo wa xula po. 23Neulu loye li li kombada yomutwe woye tali ka ninga oshikushu, nedu li li koshi yoye tali ka ninga oshivela. 24Omwene ta shitukifa odula yoye ondwi nomute, tai di meulu, tai ya kombada yoye fiyo wa xula po.
25“Omwene te shi ningi nokutya, ove to tewa kovatondadi voye. Nondjila imwe to i u ke va shakeneke, ndelenee neendjila heyali ove to ke va ya onhapo; ndele ove to ka ninga oixuna koilongo aishe kombada yedu. 26Noimhu yeni tai ka ninga eendja deedila adishe dokeulu nodoinamwenyo kombada yedu, itapa kala ou te i te po.
27“NOmwene ote ku tumine omaxwambwa okuEgipiti noidinda nonghana nomavangwa, ndele ito dulu okuveluka kuyo. 28Omwene te ku denge nomhepo yeenghwengu nepofi nepilalalo; 29ndele to ka enda nokupamhadala mokati komutenya ngaashi ovapofi hava ende nokupamhadala momulaulu, ndele ito ka mona elao meendjila doye. Ndele efimbo alishe to ka kala wa fininikwa nokunyekwa, ndele uhe na omupopili. 30Ove to ka putula okakadona, ndele umwe ota ka nangala nako. To ka dika eumbo, ndele ito ka kala mo. To ka kokola oshikokola shomuviinyu, ndelenee ito ka teya oiimati yasho. 31Eengobe doye tadi ka tomenwa moipafi yoye, ndelenee ito ka lya ombelela yado. Ondongi yoye oto ke i kufwa moipafi yoye, ndelenee itai aluka vali kwoove. Oimuna yoye tai ka iwa nayo kovatondadi voye, ndelenee ove ku na omupopili. 32Ovana voye ovamati noukadona tava ka kwatwa nokutwalwa koshiwana shimwe fimbo omesho oye tae shi tale nefiku alishe tae va djuulukwa neenghono, ndele ove ito dulu okuninga sha. 33Oiimati yomomapya oye, nakeshe eshi we shi lilongela, otashi ka liwa kovanhu uhe va shii. Ndelenee ove to ka kala wa fininikwa nokuhepekwa efimbo alishe. 34Ndele ove oto ka ya eenghwengu omolwaashishe eshi omesho oye ta tale. 35Omwene ote ke ku tumina omaxwambwa mai meengolo nomomaulu, ndele ito dulu okuveluka, heeno, okudja komhadi fiyo okoluwewe lomutwe. 36Omwene te ku twala nohamba yeni, ei mwe lihoololela, koshiwana inashi shiivika kooxo. Ndele oko oto ka longela oikalunga imwe, oshiti nemanya. 37Ndele ove oto ka ninga oshinima shoixuna noshitevo shodino nomuyolwa mokati koiwana aishe omo Omwene te ke ku twala.
38“Ove oto ka kuna ombuto ihapu, ndelenee to ka teya shinini, osheshi oshipaxu tashi ke shi lya po. 39Ove to ka twika nokulonga oikokola yomiviinyu, ndelenee ito ka nwa omaviinyu ile oku a tuvikila. Osheshi omainyo tae ke di tuka. 40Ove u nomalumono moshilongo shoye ashishe, ndelenee ito ka vava omaadi ado, osheshi eemono doye tadi ka yaumuka. 41To ka dala ovana ovamati noukadona, ndelenee ito ka kala navo. Osheshi vo otava ka ya moupika. 42Omiti adishe noiimati yomoshilongo shoye tai ka wilwa koshipaxu. 43Omunailongo ou e li pwoove ota ka ehena komesho, e ku dule, fimbo ove to ka xutuka nokuxutuka. 44Ye ote ke ku lila eengele, ndelenee ove ito ke mu lila eengele. Ye ota ka kala omutwe, ndele oove omushila.
45“Nomatulomutima aa aeshe tae ku hange, ndele otae ku shikula, ndele tae ku shakeneke, fiyo ove wa xula po, osheshi ove ino pwilikina ondaka yOmwene Kalunga koye, u diinine oipango yaye neenghedimhango daye, odo Ye e di ku lombwela. 46Ndele do otadi ka kala edidiliko noshikumwifa kwoove nokoludalo loye fiyo alushe. 47Ove eshi ino longela Omwene Kalunga koye nehafo nonenyakuko lomutima pefimbo linya wa li u noshishipo, 48u nokulongela omutondadi woye, ou te ku tuminwa kOmwene mondjala nomenota nolutu longaho nokuhepa ashishe; ndele ye ota ka tula ondjoko yoshivela kofingo yoye fiyo ye te ku mane po. 49Omwene ote ku tumine oshiwana shokokule, okomunghulo wedu, ngaashi onhwa tai tuka, oshiwana elaka lasho ku li udite, 50oshiwana shi noshipala shikukutu, ou ita kenukile eenghwakutoka ndele ita file omunyasha onghenda, 51ndele vo otava ka lya oludalo loimuna yoye noiimati yomepya loye fiyo ove wa xula po. Vo itave ku fiile nande oilya, omaviinyu ile omaadi, eenhana deengobe doye ile oudjona veedi doye, fiyo vo ve ku mana po. 52Ndele vo otave ku fininike meenhu doilando yoye aishe fiyo eehotekuma doye dile noda pamekwa odo we di lineekela, otadi ngumaunwa po moshilongo shoye ashishe. Heeno, vo otave ke ku fininika meenhu doilando yoye aishe moshilongo shoye ashishe, osho we shi pewa kOmwene Kalunga koye. 53Ndele fimbo ho fitikininwa mo noudjuu we ku etelwa komutondadi woye, ove oto ka lya oludalo lomolutu loye, ombelela yovana voye ovamati noukadona, ava Omwene Kalunga koye e ku pa. 54Omulumenhu omulilundukifi nomulilelindebula unene mokati keni ota ka talela kombada yomesho omumwaina nomwalikadi waye e mu hole, novana vaye vamwe, ava ve li puye natango; 55ye ita pe nande umwe ombelela yovana vaye, ye mwene te i li, osheshi ke shi naashi ta li mokufitikininwa nomoudjuu we u etelwa komutondadi woye meenhu doilando yoye aishe. 56Omukainhu omulilundukifi nomulilelindebula mokati keni, ou ina hetekela okweenda kolupadi, ota ka talela omulumenhu waye omuholike nomona waye omumati nomona waye okakadona kombada yomesho, 57ye ite va efele nande oshitungu tashi di moshidalelo shaye, nouhanana ava e noku va dala. Osheshi moluhepo laye alishe ye ote i li po meholeko mokufitikininwa nomoudjuu omo omutondadi waye e mu fininikila mo peenhu doilando yoye aishe.
58“Ove ngeenge ito diinine shili eendjovo adishe domhango ei, da shangelwa mo membo eli, opo u tile edina la fimana nola tilika lOmwene Kalunga koye, 59opo nee Omwene ta tumu kwoove nokoludalo loye omahepeko madjuu, omahepeko manene ndele taa kala omafiku mahapu, nomaudu mai taa kala omafiku mahapu. 60Ndele Ye ote ku undulile omaudu aeshe omuEgipiti, aa wa li wa tila, ndele tae ku kwata. 61Nomaudu e lili naku lili nomahepeko e lili naku lili aa inaa shangelwa mo membo lomhango ei, oo tuu oo Omwene te ke ku tumina, fiyo wa xula po. 62Ndele nye monhele oyo mwa li vahapu ngaashi eenyofi dokeulu tamu ka ninga ovanhu vanini, shaashi ino pwilikina ondaka yOmwene Kalunga koye. 63NOmwene ngaashi e mu hafela shito nokwe mu ningila ouwa, ndele e mu hapupalifa, osho ngaha Omwene te ke mu hafela oku mu hanauna po noku mu mana po; ndele tamu ka kufwa mo moshilongo osho tamu i mo mu ke shi nangale. 64NOmwene ote ke mu undwila moiwana aishe, komunghulo umwe wounyuni fiyo okomunghulo mukwao wounyuni; ndele oko tamu ka longela oikalunga imwe, oshiti nemanya, inai shiivika kooxo. 65Ndele mokati koiwana ito ka mona etulumuko nande, ndele omhadi yoye itai ka mona onhele yetulumuko. Ndelenee Omwene te ku pe omutima tau kakama, nomesho a ilauka, nomwenyo u noluhodi. 66Nokukalawenyo kwoye otaku ka kala koulingodi, ndele to ka kala nokuhaluka oufiku nomutenya, ndele to ka limbililwa omolwokukalamwenyo kwoye. 67Ongula keshe ove to ka tya: ‘Nda hala li toke!’ ndele onguloshi to ti: ‘Nda hala ku she!’ Omolwokuhaluka kwomutima woye taku ku kwata nomolwomamoniko omesho oye to ke a tala. 68NOmwene ote ku shunifa kuEgipiti meeskepa, nondjila tuu oyo, nde i ku lombwela: Ove ito ke i mona vali. Ndele oko otamu ka landwa po ovapika ovalumenhu novakainhu kovatondadi veni, ndelenee itapa ka kala ou te mu lande.”
Currently Selected:
DEUTERONOMION 28: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.