OVAROMA 2
2
Ovajuda ovo yo ovalunde ngaashi ovapaani
1Onghee hano, omunhu ove, uhe nelipopilo, nande u kale oove olyelye ho tokola. Osheshi mwaai ho tokola omunhu, oho litokola ove mwene, osheshi ove ou ho tokola, osho yo ho ningi. 2Ndele tu shi shii etokolo laKalunga oli li lopaushili kwava hava longo ei. 3Ndele omunhu ove ou ho tokola ava hava ningi ngaha ndele osho ove mwene yo ho ningi, u shii oto i etokolo laKalunga onhapo? 4Ile oto dini ouyadi wouwa nowonheni nowomutima mule waye, ndele ove ino shiiva ouwa waKalunga tau ku shilile kelidilululo? 5Ndelenee melikukutiko loye nomokuhelidilulula kwomutima woye, oto lihapupalifile ehandu mefiku lehandu noleholoko liyuki laKalunga, 6ou ta ka pa keshe tuu ou shi fike poilonga yaye: 7Kwaava tava kongo oshinge nefimano nokuhaxulapo mokudiinina oilonga iwa, omwenyo waalushe, 8ndelenee kwaava hava kongo osho shavo vene nokwaava ihava dulika koshili, ndele hava dulika koulunde, ehandukilo nonya. 9Oudjuu netilo otali uya komwenyo wakeshe tuu omunhu ta ningi owii, tete owOmujuda nowOmugreka yo; 10ndele oshinge nefimano nombili okukeshe tuu ou ta wanifa ouwa, tete Omujuda nOmugreka yo. 11Osheshi Kalunga iha tale oshipala shomunhu.
12Osheshi aveshe ava va nyona vehe nomhango, ovo tava ka kana vehe nomhango, ndele ava va nyona ve nomhango, otava ka tokolwa pamhango; 13osheshi ava tava pwilikine omhango, havo ovayuki koshipala shaKalunga, ndelenee ovawanifi vomhango ovo tava ka yukipalifwa. 14Osheshi ovapaani ava vehe nomhango, nge tava longo pashitwe eshi tashi pulwa komhango, nande vehe nomhango, ovo omhango kuvo vene, 15ndele ohava holola nokutya, oshilonga shomhango osha shangelwa ngaha momitima davo, omaliudo avo pamwe nomadiladilo avo eshi taa hepaululilafana noku va pa oushima ile noku va popila, 16efiku olo Kalunga eshi ta tokola muKristus Jesus oiholekwa yovanhu opavaengeli lange.
17Tala, ngeenge ho ti, oove Omujuda, ndele ho lineekele omhango, ndele ho litangele Kalunga, 18nehalo laye u li shii, ndele u shii okutongola oinima ei ya wapala shili, shaashi wa longwa momhango, 19ndele ho diladila to dulu okukala omukwati komhango wovapofi, ouyelele waava ve li momulaulu, 20omutekuli waava vehe neendunge, nomulongi wounona, eshi u na momhango olupe lounongo noloshili; 21ongahelipi hano, ove ou ho longo ovanhu, iho lilongo ove mwene; ho udifa vaha vake, ndele ove ho vake; 22ho ti, vo vaha haele, ndele ove ho haele, ho nyanyaula oikalunga ndele oto nyeke eetembeli; 23ove ho litangele omhango ndele oto dini Kalunga mokunyona omhango? 24Osheshi omolweni edina laKalunga tali shekwa movapaani, ngaashi pa shangwa.
25Heeno, epitotanda otali kwafa ashike ngeenge to wanifa omhango; ndelenee ove ngeenge omunyoni womhango, opo nee nande wa pita etanda, oto kala wa fa ino li pita. 26Navali, ou ina pita etanda, ngeenge ta wanifa eenghedi domhango, ita talwa mbela oye a pita etanda, nande ina pita etanda? 27Hano ou ina pita etanda palutu ndele ota wanifa omhango, oye te ku tokola, oove ou u neendada domhango nowa pita etanda, ndele to nyono omhango. 28Osheshi Omujuda haye ou e wetike kombada, nepitotanda kali fi eli hali ningwa kombada mombelela, 29ndelenee, Omujuda washili oye ou Omujuda womeni, nepitotanda loshili oleli lomomutima, omomhepo, hapaendada, ndele ye oku nepandulo, hapovanhu, ndelenee opuKalunga.
Currently Selected:
OVAROMA 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.