JOEL 3
3
Etokolo loiwana
1“Osheshi tala, pomafiku tuu enya nomefimbo tuu linya, ngeenge handi lundulula okukala kwaJuda nokwaJerusalem, 2ohandi ka ongela oiwana aishe nohandi i twala mefilu laJosafat (tashi ti: Omwene ta tokola), nde i tokolele kwinya omolwaIsrael, oshiwana shange nefyuululo lange. Osheshi ovo ve shi halakanifila moiwana ndele ve litaulila edu lange. 3Ndele va ningila oshiwana shange oshihoololifo, va yandjela oulume ombwada, nokakadona ve ka landifa po omaviinyu ve a nwa.
4“Ndele nanye yo Tirus naSidon noikandjo aishe yOvafilisti, nye omu na shike naame? Omwa hala okukwatela nge onghone, ile mwa hala okuninga ngahelipi? Oilonga yeni ohandi i mu twike divadiva komitwe deni. 5Osheshi onye omwa kufa oshisiliveli noshingoldo shange, mwa twala oinima yange ya wapala meetembeli deni. 6Natango omwa landifa po ovana vomuJuda novana vomuJerusalem kOvagreka, opo mu va ehenife kokule noshilongo shavo. 7Tala, Ame ohandi ke va fikamifa oko mwe va landifa, ndele oilonga yeni handi ke i mu twika komitwe deni. 8Ndele ovana veni ovamati noukadona Ame ohandi ke va landifa kovana vomuJuda, ndele vo otave ke va landifa po kOvasaba, oshiwana shi li kokule. Osheshi Omwene e shi tya.
9“Shi shiivifileni moiwana! Longekideni oita! Ladipikeni ovaladi! Ovakwaita aveshe nava ehene popepi ndee tamu katuka. 10Omatemo eni hambuleni omaongamukonda nomakatana eni hambuleni omaonga. Ou ehe neenghono na tye: Aame omuladi! 11Endeleleni, ileni! Onye oiwana aishe yokeembinga adishe. Ndele ongaleni!” Omwene, ovaladi vaye nava kuluke ko. 12“Oiwana nai fikame, nai totele efilu laJosafat. Osheshi oko Ame ohandi ka kala omutumba nokutokola oiwana aishe keembinga adishe.
13“Tumeni oshikashulifo, osheshi oilya oya pya! Ileni, koleni oshikolelo, osheshi osha yada, netemba tali xunga! Owii wao muhapu. 14Eemhunga, eemhunga mefilu letokolo. Osheshi efiku lOmwene oli li popepi mefilu letokolo. 15Etango nohani otai ka laula neenyofi itadi ka yela vali. 16Omwene ota ndunduma muSion, ndele ta yelula ondaka yaye muJerusalem, opo eulu nedu otali kakama. Ndelenee Omwene Oye ehondameno loshiwana shaye neameno kovana vaIsrael.
17“Opo nee nye tamu ka shiiva nokutya, Aame Omwene Kalunga keni, nda kala muSion komhunda yange iyapuki. Opo nee Jerusalem otashi ka kala shiyapuki, novanailongo itava ka enda mo vali. 18Ndele mefiku tuu olo eemhunda otadi fulukifa omaviinyu, moikulundudu tamu tondoka mo omashini. Ndele momilonga adishe domuJuda tamu ka kunguluka omeva. Nofifiya otai ka fuluka mongulu yOmwene, ndele tai tutike efilu laSittim. 19Egipiti tali ka ninga omaputu naEdom tali ningi ofuka yongaho, omolwomahepeko eshi va hepeka ovana vaJuda naashi va tilashi ohonde ihe netimba koshilongo shavo. 20Ndelenee Juda tashi ka kala fiyo alushe naJerusalem okoludalo fiyo okomaludalo. 21Ndelenee Ame ohandi ke va dimina po omatimba avo ohonde, aa inandi a dima po nale. Ndele Omwene ota ka kala nokukalelela muSion.”
Currently Selected:
JOEL 3: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.