HAGGAI 2
2
Efimano lotembeli lipe
1Mefiku etimilongo mbali nolotete lohani onhiheyali, ondjovo yOmwene ya hanga omuxunganeki Haggai ndele tai ti: 2Lombwela Serubbabel yaSalatiel, omupangeli waJuda naJosua yaJosadak, omupristeli omukulunhu noshixupe shoshiwana, ove u tye: 3“Mokati keni omu na ou a mona otembeli ei moshinge shayo shonale? Otamu i tale, oi li ngahelipi paife? Kai fi oshinima shongaho momesho eni? 4Serubbabel, kala wa pama, Omwene osho ta ti, naave yo Josua yaJosadak, omupristeli omukulunhu, lipameka, novanhu aveshe vomoshilongo, lipamekeni, nye mu longe, Omwene ta ti. Osheshi Ame ndi li pamwe nanye, Omwene womatanga ovakwaita ta ti. 5Omolwehangano nde li ninga nanye mokudja mo kweni medu laEgipiti, nOmhepo yange tai kala mokati keni. Inamu kala mwa tila. 6Osheshi Omwene womatanga ovakwaita osho ta ti: Okafimbo kaxupi akeke, Ame ohandi ka kakamifa eulu nedu, efuta noukukutu. 7Ohandi ka kakamifa yo oiwana aishe, opo omamona oiwana aishe tae ke uya ndele Ame ohandi ka yadifa otembeli ei noshinge, Omwene womatanga ovakwaita ota ti. 8Oshisiliveli oshange noshingoldo oshange, Omwene womatanga ovakwaita ota ti. 9Ewapalo lotembeli ei tali ka ninga linene li dule lonale, Omwene womatanga ovakwaita ota ti. Ndele monhele ei ohandi ka yandja mo ombili tai kala mo,” Omwene womatanga ovakwaita ota ti.
10Mefiku etimilongo mbali netine lohani onhimugoi momudo omutivali waDarius, ondjovo yOmwene ya hanga omuxunganeki Haggai ndele tai ti: 11Omwene womatanga ovakwaita osho ta ti: “Pula kovapristeli omayele omomhango: 12‘Ngeenge pe na umwe ta humbatele moshikutu shaye ombelela iyapuki, ndele ota kumu noshikutu shaye omungome ile shimwe shi lili sha pakwa po ile omaviinyu ile omaadi ile eendja dimwe di lili, oinima ei tai ningi ngeno iyapuki?’ ” Ovapristeli va nyamukula, tava ti: “Ahowe.” 13Haggai okwa pula vali: “Ngeenge pe na umwe e linyikifa oshidila shoshimhu ndele ta kumu oinima aishe ei, yo otai nyika oshidila?” Ovapristeli va nyamukula, tava ti: “Heeno, tai ka nyika oshidila.” 14Opo nee Haggai okwa nyamukula, ndele ta ti: “Hano osho ngaha ovanhu ava ve li, noshiwana eshi osho shi li yo momesho ange, Omwene ta ti. Nosho ngaha oilonga yomake avo aishe i li, nosho yo eshi tave shi yambe: osho oshidila. 15Hano paife taleni nawa hano, nhumbi tashi ka ningwa kokudja kefiku eli fiyo okomesho, emanya fimbo inali tenhekwa kemanya likwao lotembeli yOmwene, 16mefimbo tuu olo ngee kwa iwa koshipale shoilya yoimbale omilongo mbali, tala otapa kala ashike omulongo. Ngee kwa iwa koshikolelo shomaviinyu okuteka mo eelata omilongo nhano, ndelenee tala, tapa kala ashike omilongo mbali. 17Ame onde mu dengifa shili nonhimba nokahaudjololo neemhawe oilonga aishe yomake eni, ndelenee nande ongaha, nande umwe womunye e lialuluka nokuuya kwaame, Omwene ta ti. 18Taleni nawa hano kokudja kefiku tuu eli kefiku etimilongo mbali netine lohani onhimugoi, nokutya kefiku tuu olo nye mwa tunga ekanghameno lotembeli yOmwene. Taleni nawa! 19Omu na tuu ombuto melimba? Heeno, omuviinyu woovene nomukwiyu nomuti wagranati nolumono inadi ima sha. Kokudja kefiku tuu eli, ohandi ka yandja enangeko noupuna.”
20Mefiku etimilongo mbali netine lohani ei, ondjovo yOmwene ye uya lutivali kuHaggai ndele tai ti: 21Lombwela Serubbabel, omupangeli waJuda u tye: “Ohandi ka kakamifa eulu nedu. 22Ndele omalukalwa eehamba ohandi ke a kandula po neenghonopangelo domauhamba ovapaani ohandi ke di hanauna po. Ndele ohandi ke di nyonauna po omatemba oita naava ve li mo; neenghambe novalondi vado tava ka wila po. Umwe ta wilifwa po keongamukonda lamukwao. 23Mefiku tuu olo, Omwene womatanga ovakwaita ta ti: Ohandi ke ku kufa, oove Serubbabel yaSalatiel, omupiya wange, ndele handi ku ningi okalinga koshihako, osheshi Ame onde ku hoolola,” Omwene womatanga ovakwaita ta ti.
Currently Selected:
HAGGAI 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.