DEUTERONOMION 3
3
Etwikilo lehepaululo laMoses: Oshilongo shaOg sha tewa
1“Ndele fye twa fikama, notwa ya mondjila yokuBasan. Nohamba yaBasan, Og, okwa fikama e tu shakeneke, ye nomatanga aye aeshe, va lwe puEdrei. 2Opo nee Omwene okwa lombwela nge: ‘Ino mu tila, osheshi Ame ohandi mu yandje meke loye pamwe novanhu aveshe noshilongo shaye. Ndele nye mu noku va ninga ngaashi mwa ningile Sihon, ohamba yOvaamori, ei ya kala muHesbon.’ 3NOmwene Kalunga ketu okwa yandja momake etu Og, ohamba yaBasan nomatanga aye aeshe, fye twe mu taataa fiyo inapa xupa nande umwe womuvo. 4Nomefimbo tuu olo fye twa nangala oilando yaye aishe. Inapa kala nande eenhele dohotekuma fye inatu di kufa ko: oilando omilongo hamano, oshikandjo ashishe shaArgob, ouhamba waOg muBasan. 5Oilando ei aishe ya li i neehotekuma dile, noivelo noiidilifo, nopa li yo omikunda dihe nomakuma. 6Ndele fye twe i hanauna po ngaashi twa ningile Sihon, ohamba yaHesbon, oshilando keshe, novalumenhu novakainhu nounona twe va dipaa. 7Ndelenee oimuna aishe noixuulwa yomoilando otwe i tinha.
8“Osho ngaha hano mefimbo tuu olo fye twa nangala edu leehamba mbali dOvaamori, kombinga ei yaJordan, okudja komulonga waArnon fiyo okomhunda yaHermon; 9(Ovasidoni ohava ifana Hermon, ‘Sirjon’, nOvaamori ohave i ifana ‘Senir’.) 10Noilando aishe yokedu la lalakana naGilead ashishe naBasan ashishe fiyo okuSalka naEdrei, oilando yoshilongo shaOg muBasan. 11Osheshi Og, ohamba yaBasan, oye aeke a xupa po mOvarefai. Ombete yaye oya li ombete yoshivela; kai li natango muRabba shovana vaAmmoni? Oule wayo omaludimbo omugoi nolumbubu layo omaludimbo ane, paludimbo lomufyoona.
Edu lokoushilo waJordan tali tukulwa
12“Nedu tuu eli twe li nangala mefimbo olo, okudja kuAroer, osho shi li pomulonga waArnon, netata leemhunda daGilead noilando yomusho, ame nde i yandja kOvarubeni nokOvagad. 13Ndele oshitukulwa eshi sha xupa muGilead pamwe naBasan ashishe, oshilongo shaOg, ame nde shi yandja ketata lepata laManasse, oshikandjo ashishe shaArgob. Oshilongo ashishe shaBasan osha ifanwa edu lOvarefai. 14Jair yaManasse okwa nangala oshikandjo ashishe shaArgob fiyo okongaba yOvagesuri noyOvamaakati, nokutya Basan, ndele okwe shi lilukila Omatwalimikunda aJair fiyo onena eli. 15Ndele kuMakir ame nda yandja Gilead. 16Ndele nda yandja kOvarubeni nokOvagad edu okudja kuGilead fiyo okomulonga waArnon, pokati okomulonga pamwe nedu lominghulo dao, nofiyo okomulonga waJabbok, ongaba yovana vaAmmoni. 17Nosho yo edu la lalakana naJordan, lomominghulo dao, okudja kuKinneret fiyo okefuta loluhaela, Efuta lOmongwa, pefina lomhunda yaPisga kombinga yokoushilo. 18Ndele ame onde mu lombwela pefimbo olo, ndele handi ti: ‘Omwene Kalunga keni okwe mu pa edu eli mu li nangale. Ndele mwa dililwa, nye ovalumenhu ovakwanyati amushe, mu nokuya komesho yovamwanyoko ovalumenhu, ovana vaIsrael. 19Ovalikadi veni novana veni noimuna yeni, ame ondi shi shii omu noimuna ihapu, ashishe nashi fyaale moilando ei nde i mu pa, 20fiyo Omwene ta yandje kovamwaxo nokunye etulumuko, navo yo va shiive okunangala oshilongo osho Omwene Kalunga keni te ke va pa langhele kwinya yaJordan. Opo nee nye, keshe umwe, tamu dulu okushuna keenhele deni ame nde di mu pele.’
21“NaJosua yo ame nde mu lombwela mefimbo tuu olo ndele handi ti: ‘Omesho oye a mona ashishe eshi Omwene Kalunga keni a ningila eehamba edi mbali. Osho tuu ngaha Omwene ota ka ninga noilongo aishe oko tamu i. 22Inamu va tila, osheshi Omwene, Kalunga keni ote mu kondjele.’
Moses a shilikwa okutauluka Jordan
23“Mefimbo tuu olo ame nda indila onghenda kOmwene, ndele handi ti: 24‘Omwene Kalunga! Ove wa hovela okuhololela omupiya woye ounene woye neenghono deke loye. Osheshi meulu nokombada yedu oku na tuu Kalunga ta dulu okulonga oilonga ya tya ngaha, noilonga ya tya ngaha yeenghono ngaashi Ove? 25Efe nge ndi tauluke ndi tale edu liwa li li langhele kwinya yaJordan, eemhunda dinya diwa naLibanon!’ 26Ndelenee Omwene okwa handukila nge omolweni, ndele ina uda nge. Ndelenee Omwene okwa lombwela nge: ‘Osha wana paife! Ino lombwela nge vali oshinima eshi. 27Londa koxulo yaPisga u yelule omesho oye kouninginino nokoumbangalanhu nokoumbuwanhu nokoushilo, ndele li tala nomesho oye, ndele ove ito tauluka Jordan ou. 28Lombwela hano Josua noku mu pameka noku mu nyatipalifa, osheshi ye ota ka kwatela oshiwana eshi komesho, ndele ye ote ke va fyuululifa edu eli. Ove to ke li tala.’
29“Ndele fye otwa kala mefilu la shaama naBet-Peor.
Currently Selected:
DEUTERONOMION 3: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.