2 EEHAMBA 2
2
Elia ta i meulu
1Omwene eshi okwa li e nokukufa Elia momhepo inene e mu twale keulu, Elia naElisa va enda pamwe va dja kuGilgal. 2Ndele Elia okwa lombwela Elisa: “Kala apa, osheshi Omwene okwa tuma nge fiyo okuBetel.” Ndelenee Elisa okwa nyamukula: “Oshili, ngaashi Omwene e nomwenyo, noshili ngaashi ove u nomwenyo, itandi ku fii po.” Ndele va ya kuBetel. 3Opo nee ovalongwa vomuxunganeki vomuBetel ve uya kuElisa ndele tava ti kuye: “U shi shii tuu nokutya, onena eli Omwene ta ka kufa po omwene woye kombada yomutwe woye?” Ye okwa nyamukula: “Heeno, ondi shi shii. Mweneni.” 4Ndele Elia okwe mu lombwela: “Elisa, kala apa, osheshi Omwene okwa tuma nge kuJeriko.” Ndelenee ye okwa nyamukula: “Oshili, ngaashi Omwene e nomwenyo, noshili ngaashi ove u nomwenyo, itandi ku fii po!” Ndele ve uya kuJeriko. 5Opo nee ovalongwa vomuxunganeki vomuJeriko ve uya kuElisa ndele tava ti kuye: “U shi shii tuu nokutya, onena eli Omwene ta kufa po omwene woye kombada yomutwe woye?” Ye okwa nyamukula: “Heeno, ondi shi shii. Mweneni!” 6Ndele Elia okwe mu lombwela: “Kala po apa, osheshi Omwene a tuma nge kuJordan.” Ndelenee okwe mu nyamukula: “Oshili ngaashi Omwene e nomwenyo, noshili ngaashi ove u nomwenyo, itandi ku fii po!” Opo nee va enda pamwe.
7Ndelenee ovalongwa vomuxunganeki va fikama va ya naavo, ve fike povalumenhu omilongo nhano, ndele va ehena kokule naavo kanini, vo vavali eshi va kanghama puJordan. 8Opo nee Elia a kufa elwakani laye, e li tonya ndele ta denge momeva. Nomeva a tukauka kombinga nombinga, ndele vo aveshe vavali va enda va tauluka omulonga poukukutu. 9Vo eshi va tauluka, Elia okwa lombwela Elisa: “Indile nge ndi ku ningile ouwa washa, fimbo inandi kufwa po pwoove.” Elisa ta ti: “Nandi mone omhepo yomwoove luvali.” 10Ye okwa nyamukula: “Ope noudjuu okuwanifa eindilo loye. Ndelenee ngeenge to mono nhumbi ame handi kufwa po pwoove, lo otali ka wanifwa. Ndelenee ngeenge ito mono nge, lo itali ka wanifwa.” 11Vo eshi tava ende nokukundafana, tala, divadiva etemba lomundilo neenghambe domundilo da holoka, ndele de va tukaula kumwe. Ndele Elia okwa ya keulu momhepo inene. 12Elisa eshi e shi mona, okwa ingida: “Tate, tate! Omatemba oita aIsrael novalondi veenghambe!” Ndelenee ine mu mona vali. Ndele okwa kwata oikutu yaye nokwe i pombaula oitukulwa ivali. 13Opo nee a kufa po elwakani laElia, olo le mu wa nokwa shuna ndele a kanghama pomunghulo waJordan. 14Nokwa kufa elwakani laElia le mu wa, ndele ta denge nalo omeva ndele ta ti: “Omwene Kalunga kaElia oku li peni?” Ye eshi a denga momeva, oo a tukuka kombinga nombinga, ndele Elisa okwa tauluka. 15Ovalongwa vomuxunganeki ovo va dja kuJeriko, ve shi tala pomunghulo, vo tava ti: “Omhepo yaElia ya kulukila muElisa.” Opo nee ve uya ve mu shakeneka ndele ve linyongamena kuye. 16Ndele ve mu lombwela: “Tala, movapiya voye omu novalumenhu omilongo nhano ovaladi. Nava ye okukonga omwene woye. Kashiimba Omhepo yOmwene ye mu twala ndele ye mu ekela komhunda imwe ile mefilu limwe.” Ye okwa nyamukula: “Inamu tuma!” 17Ndele vo ve mu pula nokupululula, fiyo a loloka ndele ta ti: Tumeni ko hano! Opo nee va tuma ovalumenhu omilongo nhano. Ndele vo ove mu konga omafiku atatu, ndelenee vo inave mu mona. 18Vo eshi va aluka ve uya kuye, ye eshi a li muJeriko, ye ta ti kuvo: “Inandi mu lombwela, muha ye ko?”
19Novalumenhu vomoshilando va lombwela Elisa: “Tala, oshilando shi li monhele iwa, ngaashi omwene wange ta mono, ndelenee omeva omai, onghee moshilongo hamu dalwa eehele.” 20Ye okwa tya: “Etelei nge eholo lipe ndele tuleni mo mulo omongwa.” Ndele ve li mu etela. 21Opo nee ye a ya kofifiya yomeva nokwa ekela mo omongwa ndele ta ti: “Omwene ta ti ngaha: ‘Ame nda wapaleka omeva aa. Oo itaa eta vali efyo neehele.’ ” 22Opo nee omeva a ninga mawa fiyo onena eli pandjovo ya popiwa kuElisa.
23Ndele ye okwa dja ko ta i kuBetel, ndele mokweenda kwaye nondjila, ovamati vanini va dja koshilando ndele ve mu sheka ndele tava ti kuye: “Londa, ila oku omutwe wongwala! Londa, ila oku omutwe wongwala!” 24Ye eshi a punguluka nokwe va mona, te va tula omutima medina lomwene. Opo nee momufitu mwa dja oilyani omamwangha avali, ndele taa pombaula ovamati vanini omilongo nhee navavali, va fya. 25Nokwa dja ko oko, ndele ta i komhunda yaKarmel nokwa shuna kuSamaria.
Currently Selected:
2 EEHAMBA 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.