2 OMAFIMBO 2
2
Salomo ta udafana naHiram Etungo lotembeli
1Ndele Salomo okwe liudanekela okutungila edina lOmwene otembeli, nongulu youhamba. 2Ndele Salomo okwa vala ovahumbati omayovi omilongo heyali, novatatuli vomamanya omayovi omilongo hetatu vokeemhunda novapashukili vavo omayovi atatu nomafele ahamano. 3Opo nee Salomo a shiivifila Hiram, ohamba yaTirus, ta ti: “Ngaashi wa ningila tate David, eshi we mu tumina omisederi, ye e litungile ongulu yokukala mo, shi ningile nge yo. 4Tala, ame ohandi hovele okutungila edina lOmwene, Kalunga kange ongulu, ndi i mu yapulile, opo muyo mu twiminwe koshipala shaye oidimba iwa, nomingome detaliko di kale mo alushe nomaxwikiloyambo a yambwe ongula nonguloshi nomomashabata nopeehani dipe nopomafimbo oivilo yOmwene Kalunga ketu, osho oshinakuwanifwalonga shaalushe shOvaisraeli. 5Nongulu oyo ame handi ka tunga otai ka ninga inene, osheshi Kalunga ketu Ye omunene, e dule oikalunga aishe. 6Ndelenee olyelye ta dulu oku mu tungila ongulu? Osheshi omaulu, heeno, eulu lopombadambada tali nyengwa oku mu kwatela mo. Aame omushike hano? Ndi dule oku mu tungila ongulu, okuyamba ashike omayambo koshipala shaye. 7Tumine nge hano omulumenhu omunongo e shii kulonga oshingoldo noshisiliveli noshikushu noshivela, noilonga yeengodi dapurpuri noditilyana ngaashi ohonde nodomavala, ndele e nounongo okunyola omafano pamwe novanongo ve li pwaame muJuda nomuJerusalem, ovo tate David e va konga. 8Tumine nge omiti domisederi nodomisipresi nodomisandeli dokuLibanon, osheshi ndi shi shii, ovapiya voye ve shii kuka omiti domuLibanon. Ndele tala, ovapiya vange tava ka kala pamwe novapiya voye, 9nokutya, va kele nge omiti dihapu, osheshi ongulu oyo handi ke i tunga tai ka ninga inene ndele tai kumwifa. 10Ndele tala, ngaashi eendja, ame ohandi yandje kovapiya voye oonakuka omiti, oilyavala eetona omayovi avali, nomahangu eetona omayovi avali, nomaviinyu eelita omayovi omafele ane, nomaadi eelita omayovi omafele ane.”
11Ndele Hiram, ohamba yaTirus, okwa tonga monhumwafo oyo e i tumina Salomo: “Omwene eshi e hole oshiwana shaye, Ye e ku ninga ohamba yasho.” 12Hiram okwa tya vali: “Omwene Kalunga kaIsrael, ou a ninga eulu nedu, na hambelelwe, eshi a yandja kohamba David omona omulumenhu omunongo, ou e nomayele neendunge a tungile Omwene otembeli ndele a tungile ouhamba waye ongulu. 13Ame ohandi tumu hano paife omunongo e neendunge, nokutya Huram Abi, 14ye omona womwalikadi womovana oukadona vomuDan, ndelenee xe omulumenhu Omutirus, ou a shiiva okulonga oshingoldo noshisiliveli noshikushu noshivela nomamanya nomiti neengodi dapurpuri nodomavala noliina iwa neengodi ditilyana ngaashi ohonde. Nokunyola omafano e lili nae lili nokudiladila oilonga younongo, oyo e i pewa e i longe, pamwe novanongo voye novanongo vomwene wange, xo David. 15Omwene wange na tume hano paife kovapiya vaye oilyavala nomahangu nomaadi nomaviinyu. 16Ndele fye ohatu ka ka omiti domuLibanon di fike pwaado we di pumbwa, ndele fye ohatu di eta kuJoppa tadi ende mefuta oshipandi. Opo nee ove to dulu oku di twala kuJerusalem.”
17Ndele Salomo okwa vala ovanailongo aveshe, ovo va li moshilongo shOvaisraeli pamuvalo wavo wa ningwa kuxe David, ndele vo va li omayovi efele nomilongo nhano naatatu nomafele ahamano. 18Okwa ninga omayovi omilongo heyali vomuvo ovahumbati ndele omayovi omilongo hetatu va ninga ovatatuli vomamanya okeemhunda, na omayovi atatu nomafele ahamano ovalongifi ovo va li ve nokulongifa ovanhu.
Currently Selected:
2 OMAFIMBO 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.