1 OVATESSALONIKI 2
2
Eyakulolonga laPaulus mokati kOvatessalonika
1Ovamwatate, nye vene omu shi shii okuuya kwetu kunye kakwa li kwongaho, 2ndelenee nande twa hangelwe opo twa hepekwa muFilippi ndele twa langaulwa, ngaashi mu shi shii, otwa li tu nouladi muKalunga oku mu udifila evaengeli laKalunga omolwoodi linene. 3Osheshi ekumaido letu inali dja momapukifo ile momahongaulo nongaashi inali tongwa nekonda; 4ndele ngaashi Kalunga e tu tala twa wana okulineekelelwa evaengeli, osho hatu popi, hakuhala tu wapalele ngeno ovanhu, ndelenee oKalunga, ou ta konakona omitima detu. 5Ngaashi mu shi shii, fye inatu enda nande lumwe neendjovo deheka ile okulikongela emona nekonda, Kalunga Ye ondobwedi yetu. 6Fye inatu konga yo okufimanekwa kovanhu, kunye ile kuvamwe, 7nande ofye ngaashi ovayapostoli vaKristus twa wana okupewa efimaneko, ndelenee otwa holoka mokati keni nombili ngaashi ina omunyamifi ha tekula ouhanana vaye; 8osho nafye yo moku mu djuulukwa neenghono twa hala oku mu pa yo havaengeli laKalunga alike, ndelenee eemwenyo detu vene yo, osheshi onye omwa ninga ovaholike vetu.
9Ovamwatate nye, ndishi omwa dimbulukwa oilonga yetu noudjuu wetu, nokulonga nomake omutenya noufiku, tuha etele nande umwe mokati keni oudjuu, eshi twe mu udifila evaengeli laKalunga. 10Onye naKalunga eendobwedi, nhumbi twa kala mouyapuki nomouyuki ndele tuhe noshipo mokati keni nye ovaitaveli, 11ngaashi mu shi shii, otwa li hatu mu kumaida keshe umwe womunye ngaashi xe novana vaye noku mu twa omukumo, 12noku mu kunghilila shili, mu ende ngaashi sha wapalela Kalunga, ou e mu ifanena mouhamba waye nomoshinge shaye.
Elididimiko mokutewatewa
13Onghee hano nafye yo ohatu pandula Kalunga tuhe nedimbuko, osheshi ondjovo yaKalunga mwe i uda kufye, mwe i tambula hangaashi ondjovo yovanhu, ndelenee ongaashi i li shili ondjovo yaKalunga, ei tai longo yo munye ava mwa itavela. 14Osheshi ovamwatate nye, omwa ninga ovashikuli vomaongalo aKalunga enya omuJudea a kala muKristus Jesus, osheshi nanye yo omwa hepekwa kuvakweni, ngaashi venya kOvajuda, 15ovo va dipaa yo Omwene Jesus novaxunganeki nove tu taataa, vo inava wapalela Kalunga, ndele ve nondubo novanhu aveshe, 16eshi have tu kelele okuudifila ovapaani, opo va xupifwe; osho ngaha tava yadifa alushe oulunde wavo. Ndelenee ehandu ole uya nokuli kombada yavo.
17Ndelenee ovamwatate nye, eshi twa li tu nokutukauka nanye okafimbo palutu, hapamwenyo, otwa hala nodjuulufi inene tu mone oipala yeni. 18Onghee hano otwa li twa hala okuuya kunye, aame Paulus, halumwe aluke, ndelenee Satana okwe tu shilika ko. 19Osheshi olyelye vali eteelelo letu nehafo noshishani shelitango letu, ngeenge hanye yo koshipala shOmwene wetu Jesus mokuuya kwaye? 20Osheshi nye efimano letu nehafo letu.
Currently Selected:
1 OVATESSALONIKI 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.