1 SAMUEL 2
2
Eimbilo lehambelelo laHanna
1Opo nee Hanna okwa ilikana ndele ta ti:
“Omutima wange otau kuwilile mOmwene.
Oluvinga lange ola yeluka pombada mOmwene.
Okanya kange ka makukila ovatondadi vange,
osheshi ame ohandi nyakukilwa ekwafo loye!
2“Pehe nomuyapuki ngaashi Omwene.
Heeno, pehe na nande umwe ponho yaye.
Ndele pehe na emanya ngaashi Kalunga ketu.
3Inamu kala nokulitanga unene alushe.
Inamu pitifa mo mokanya keni eendjovo doukolokoshi.
Osheshi Omwene Oye Kalunga omushiivi waaishe.
Ye ota yeleke oilonga.
4Omauta ovaladi a teywa po,
ndelenee oingone ya dikwa eenghono.
5Ava va li va kuta, hava longele ondjabi yomungome,
ndelenee ava va li va fya ondjala, itava fi vali ondjala.
Ongadji otai dala vaheyali,
ndelenee oshipuna shovana tashi kanifa eenghono.
6Omwene ta yandje efyo, ndele ta yandje omwenyo.
Ye ota twala moshovafi, ndele ta alula mo.
7Omwene ta tokeke omunhu, ndele te mu punike.
Ye ota ninipike, ndele Ye ta nenepeke yo.
8Mondwi Ye ota yambula omufyoona
ndele ta lenge omukwanaluhepo moshala shomute,
vo va kale omutumba peehamba,
va fyuulule olukalwa lado lefimano.
“Osheshi eengudi dedu odo dOmwene,
ndele kombada yado Ye okwa dika ounyuni.
9Eemhadi dovayuki vaye ote di amene,
ndelenee ovahenakalunga tava kana momilaulu.
Osheshi omunhu ita dulu sha neenghono daye mwene.
10Ava hava twifa Omwene eemhata tava ka teyaulwa po.
Vo ote va ndundumine meulu.
Omwene ta tokola omaxulilo ongonga yedu,
ndele Ye ta yandje eenghono kohamba yaye
ndele ta yelula oluvinga lomuvaekwa waye.”
11Opo nee Elkana okwa ya keumbo laye mu Rama,
fimbo okaana okamati ka kala pomupristeli
Eli, okulongela Omwene.
Oukolokoshi wovana vaEli
12Ndelenee ovana ovamati vaEli va li ovapwidi. Vo inava yavala Omwene. 13Mokukalafana kwavo novanhu, eenghedi da li ngaha: Umwe ngeenge a toma ongobe yeyambo, opo nee ombelela eshi ya pya, omupiya womupristeli e uya, e nefoloko leenyala nhatu meke laye, 14ndele te li tu mombiya i noikongo ile mombiya yomaulu ile moshipana ile moshiyaxa. Aishe oyo tai kwatwa kefoloko omupristeli te likufile. Osho ngaha va ningila Ovaisraeli aveshe ava ve uya kuSilo. 15Nokuli fimbo inava xwika po omakaadi, omupiya womupristeli e uya ndele ta lombwele omulumenhu ou ta yambe: “Yandja ombelela, i telekelwe omupristeli, osheshi ye ita tambula kwoove ombelela ya telekwa, ndelenee ombelela iishu.” 16Omulumenhu ngeenge te mu lombwele ta ti: “Nava xwike po tete omakaadi, opo nee u kufe osho omwenyo woye wa hala.” Opo ye ta ti: “Ahowe, ndelenee u noku i yandja paife eshi. Nongeenge hasho, ame ohandi i likufile.” 17Nomatimba ovalumenhu ovanyasha a li manene koshipala shOmwene, osheshi ovalumenhu ava va dina eyambo lOmwene.
18Ndelenee okamati Samuel ka yakula moilonga koshipala shOmwene, ndele ka li ka djala oshikutu shokomapepe sholiina. 19Ndele ina yako okwe ka tungila oshikutu shinini shokombada nokwe shi ka etela omudo nomudo, vo nomulumenhu waye eshi ve uya ko okweeta eyambo lomudo keshe; 20opo nee Eli okwa nangeka noupuna Elkana nomwalikadi waye, ndele ta ti: “Omwene ne ku pe okaana momwalikadi ou ponhele yaaka ye e ka yandja kOmwene.” Opo nee va shuna keumbo lavo.
21NOmwene okwa dimbulukwa Hanna, onghee ye a ninga oufimba nokwa dala natango ovana vatatu oulume novana vavali oukadona. Nomumati Samuel okwa kula pOmwene.
22Ndelenee Eli okwa kulupa nokukulupilila, ndele ye eshi a uda ashishe eshi ovana vaye ovamati hava ningile Ovaisraeli aveshe naashi hava nangala novakainhu ava hava yakula moilonga yoposhivelo shetwali leongalo, 23ye ota ti kuvo: “Omolwashike tamu ningi oinima ya tya ngaha, ame ondi nokuuda kovanhu ava aveshe oinima yeni ii. 24Inashi yuka ngaha, ovamwange! Osheshi eendjovo odo handi di udu, kadi fi diwa nande. Nye otamu nyonifa ovanhu vOmwene. 25Omunhu ngeenge ta nyono komukwao ota tokolwa komutokoli, ndelenee omunhu ngeenge ta nyono kOmwene, olyelye ta dulu oku mu popila?” Ndelenee vo inava pwilikina xe yavo, osheshi Omwene okwa li a hala oku va komba po. 26Ndelenee omumati Samuel a kula ndele ta wapalele Omwene novanhu.
Okuxulifwa po kwepata laEli taku xunganekwa
27Ndele omulumenhu waKalunga e uya kuEli ndele te mu lombwele: “Omwene osho ta ti: Ame inandi lihololela hamba epata laxo, lo eshi la li muEgipiti meumbo laFarao? 28Ndele Ame onde mu hoolola momapata aeshe aIsrael ngaashi omupristeli, a londe koaltari yange a xwameke oitwiminifo ndele a djale oshikutu shokomapepe moipafi yange. Ndele Ame nda yandja kepata laxo omindiloyambo adishe dovana vaIsrael. 29Omolwashike nye tamu dini etomenoyambo lange neendjayambo dange, nde di lombwela di ningwe mongulu yange, ndele to fimaneke ovana voye ovamati komesho yange, opo tamu lyondola naashi shiwelela shomoshaliyambo shovanhu vange Israel? 30Onghee hano Omwene Kalunga kaIsraeli ta ti: ‘Ame nde shi tonga shili nokutya, eumbo loye neumbo laxo tali ka enda koshipala shange fiyo alushe.’ Ndelenee paife Omwene ta ti: ‘Ahowe, shi dalelwe! Osheshi ava hava fimaneke nge, Ame ohandi ke va fimaneka. Ndelenee ava tava dini nge, otava ka dinika. 31Tala, omafiku tae uya, Ame ohandi ka teta po okwooko kwoye nokwooko kwepata laxo, paha kale meumbo loye nande umwe ta fiki koukulunhu. 32Ndele ove oto ka tala omutondadi e li mongulu yange nomouwa aushe ou Ye ote ke u ningila Israel. Ndele meumbo loye itamu ka kala nande umwe ta fiki koukulunhu. 33Ndelenee umwe aeke womovakweni, itandi mu kandula po moaltari yange, omesho oye opo aha loloke nomwenyo woye uha nyike oufiye. Ndele aveshe vomoludalo loye otava ka fya mounyasha wavo. 34Ndele edidiliko loinima ei oleli: ovana voye ovamati vavali, Hofni naPinehas, tava ka fya mefiku limwe alike. 35Ndele Ame ohandi ke lipendulila omupristeli omudiinini, ou ta ka longa pamutima wange nopamwenyo wange; ndele Ame ohandi ke mu tungila ongulu tai kala po, ndele ye ota ka kala nokweenda alushe koshipala shOmuvaekwa wange.’ 36Ndele aveshe ava tava ka xupa po meumbo loye, otave ke uya okulinyongamena koshipala shaye va pewe okamaliwa nokapambu komungome, ndele tava ka tya: ‘Tambule nge yo meyakulolonga limwe loupristeli, ndi shiive okulya okapambu komungome.’ ”
Currently Selected:
1 SAMUEL 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.