MATIEE 'BƆGƲ 5
5
Zezwi yɛ 'mʋnaa -mʋna nɩkpa -slʋnʋ
1Zezwi yɩlɩ-a nɩkpa -bebe la'a, 'n ɔ ji-e -ma -gɔgɔgbʋ 'klʋ -gbla. Ɔ glɩ-a yɛ, 'n ɔ 'wʋbhlinɩngwa ji-e -bha ɔ yawʋ nyini. 2'N ɔ jua-a -Lagɔwɛlɩ ngli 'pa, ɔ nɛ:
3“Nɩkpa -wa ji-a sɛ naa 'pʋangwa wa glɩnɩ-ɛ -bha -Lagɔ 'ji 'klʋ, 'mʋna 'lɩbhʋa, -wʋʋ yɛ-a, mʋa-a ji-e -ma -Lagɔɔ nyininyinipɩ 'wʋ möö.
4-Wa -wʋ-a -zɩnɩ'ɩ wi 'le, 'mʋna 'lɩbhʋa, -wʋʋ yɛ-a, -Lagɔ jua 'ylɩ -bhlʋ dɛpö.
5-Waa dlɩ-ɩ bhɩa-a, 'mʋna 'lɩbhʋa, -wʋʋ yɛ-a, mʋa-a ji-a dʋdʋkpata -a -Lagɔ nʋ la-a ʋ ji nɩkpa 'nyɛɛ nyinie.
6-Wa 'jɩbha-a naa nɩkpa 'bhuo nʋ -ɩ -Lagɔ 'jɩbha-a, 'mʋna 'lɩbhʋa, -wʋʋ yɛ-a, -Lagɔɔ 'nglɩ 'mö wa dlɩ ji 'ylɩ -bhlʋ 'mö ji.
7-Wa pa-a wa linɩkpaa de ngazɩdlɩ, 'mʋna 'lɩbhʋa, -wʋʋ yɛ-a, -Lagɔ ji-a wa de ngazɩdlɩ 'paa.
8-Waa dlɩa-a -wʋ-a 'wlawla -Lagɔɔ de, 'mʋna 'lɩbhʋa, -wʋʋ yɛ-a, wa ji 'ylɩ -bhlʋ -Lagɔ 'ji 'mö yɩlɩ.
9-Wa yɩlɩ-a nɩkpaa -ghöbhanɔ yɛ, 'mʋna 'lɩbhʋa, -wʋʋ yɛ-a, -Lagɔ jua ʋ 'gwie la.
10-Ɩ nanɩ-a -Lagɔ dlɩ yawʋ, -wa wa zia-a ɩ yɛ 'zwɩ, 'mʋna 'lɩbhʋa, -wʋʋ yɛ-a, mʋa-a ji-e -ma -Lagɔɔ nyininyinipɩ 'wʋ möö.
11Abha na -lʋa, nɩkpa kaya na yɛ 'jinylɔwɛlɩ gbanɩ wa kaya 'zwɩ zia, wa kaya yuoyuogbɩ -gömö 'pa, 'mʋna 'lɩbhaya. 12-Sɩbha wa köbha-a -bɛnyido'o -Lagɔɔ 'mögbanɩngwaa yɛ, wa kaya -sɩbha köbha 'le -wʋ, 'mʋna 'lɩbhaya tenyi, -Lagɔ jiya -ma ʋ yawʋ -lie -lie -bɛ 'nyɛ.
Zezwi yɛ ɔ 'wʋbhlinɩngwa gïbhï -yɛ 'napɛ 'sɔ 'wʋ palɩ
13Gïbhïë swɩ a -wʋ-ɔ ma'a dʋdʋkpata -gömö. 'N gïbhï -yɛ 'nʋ ngli bhɩa, 'manɩ nya wa jiɩ-a 'nʋ ngli zʋnʋɔ 'nɩ? Ɩ'ɩ-a 'mö -lu 'ji -ka 'sɔ, 'kwla wa pɩ -bha 'n nɩkpa namönɩɩ-a -gömö.
14Abha na -lʋa, sa 'napɛ lɩ-ɛ la'a 'n ɛ ngöna-a nɩkpa 'wʋ-ɔ, -sɩbha a -wʋ-ɔ ma'a 'pɩ 'wʋɔ nɩkpaa de. A -ji sɛ naa gbë -a glɩ-a -gɔgɔ 'wlu a'a 'zuzo-o. 15Wa'a-a -bhla 'napɛ 'ji -dɩ wa 'kɛ -lu 'wlumö -gbli. Wa -kɛɛ 'ji -dɩ -bha ghayɩ wa zʋɛ-a yɛ nɩkpa bhuo -wa -wʋ-ɔ -ma -budu'u, 'n ɛ ngönʋa-a 'wʋ. 16A namönamölɩ ngöna -sɩbha 'napɛɛ swɩ'ɩ nɩkpa 'wʋ, wa -yɛ a -lie -lie nʋnʋlɩ yɩlɩ-ɛ, wa 'yɛ a -Tɩbha -Lagɔ -ʋ -wʋ-ɔ -ma ghayɩɛ 'nglɩ 'ghlimanɩ.
Zezwi yɛ -Lagɔɔ gböö gbʋ gba
17A 'na-a 'pa dlɩ -nɩ naa -Lagɔɔ gbö -yɛ -Lagɔɔ 'mögbanɩngwa 'sɔɔ nglipawɛlɩ n ji-a sɛ -sa kwla'a -nɩ. Ɛ'ɛ -lɛ mɩ-ɩ, n 'kɩ nyinianɩɛ yɛ n ji -bha. 18'Dɩɛ -dɩ n nyɛya-a naa: -Lagɔtapɛ -yɛ dʋdʋkpata 'sɔ -yɛ -bhla -bhlɩ, -Lagɔɔ gböö gla'aa 'köbhëyi 'kikeyie 'bhë 'na sɛ yɩla 'n -ɩ 'bhuo ɩ gba-a 'yɛ-a 'wʋ 'wlenɩ. 19-Ɔ la'a -ɔ -yɛ -Lagɔɔ gbö gla'aa 'kikeyi -bhlʋɔ 'bhë -bha -sa, ɔ -yɛ 'yɛ a -bhasasɩɛ nɩkpa -slʋnʋ, 'mɔ wa ji-a -ma -Lagɔɔ nyininyinipɩ 'wʋ 'kikeyi laa. -Ma ɩ 'mö, -ɔ -kaa -bha zʋ, -ɔ -yɛ 'yɛ a -bhazʋzʋɛ nɩkpa -slʋnʋ, mɔ-ɔ ji-e -ma -Lagɔɔ nyininyinipɩ 'wʋ 'kadɔ glɩnɩɛ. 20Wʋ yɛ n gba-a sa'a a de naa: -Ɩ -Lagɔ 'jɩbha-a, a nɩɩ -Lagɔɔ gböö nglipangwa -yɛ falizɩɛ 'sɔɔ bhla nʋ, a 'na -ma -Lagɔɔ nyininyinipɩ 'wʋ mö.
Zezwi yɛ yʋlʋɔ gbʋ gba
21Gba wa 'nyɛ-a -aa -tɩbhatɩbhangwa a -jia, ma-a nʋ-ɔ naa:
-N 'na-a 'lɩbha 'kuë -nɩ,
-ɔ -yɛ 'kuë 'lɩbha,
ɩ gbʋ -kɔɔ -bha -zijlitungwa cɛ'ɛ ghlɩ-ɛ,
-ɩ wa 'kɔ la-a 'ji nʋ mɩ -bha.
22-Amöö -nɩ-ɛ, sa'a n gba-a a de naa, -ɔ -yɛ ɔ -dagu yʋlʋ yawʋ 'panɩ ɩ gbʋ -kɔɔ -bha -zijlitungwa cɛ'ɛ ghlɩ-ɛ, -ɩ wa 'kɔ la-a 'ji nʋ mɩ-ɩ -bha. -Ɔ -yɛ ɔ -dagu 'gwɩnyɔ la, -zijlitungwa -kɔɔ gbʋ köbha, -ɩ wa 'kɔ la-a 'ji nʋ mɩ -bha. Ɔ -kɔɔ 'yɛ 'mödɔnyɔ la, ɔ -yɛ -ma -kosu'u mö-ö, -ɩ 'kɔ la-a ghlɩ mɩ-ɩ ghlɩɔ -bha. 23Sa'a n gba 'yɛ-a naa: -N -yɛ -ma -Lagɔbudu'u -Lagɔ -lu 'nyɛɛ mö 'le -wʋ-ɔ, -na dlɩ -yɛ -bha bhlinɩ naa -na -dagu ka na 'kalɛ 'mlɩ-ɛ, 24-lu la'a -n ji la-a -Lagɔ 'nyɛɛ, zʋʋ -bhla -bha yɛ, mö -n -yɛ -na -dagu 'sɔ 'yɛ -lɛ -ghöbhanɩ 'bhë -n 'yɛ ji -n 'yɛ -Lagɔ 'nyɛ. 25-N -yɛ nɩkpɛ 'sɔ -yɛ wɛlɩ nyɩdɩ'ɩ -ka, bhla 'mʋ gbʋ 'nɩ-ɛ -bhla -ma -zijlitunyɔ dlɩ'ɩ nyini-e, 'pa nɩkpɛ la'a -bɛlɩ a 'kʋ 'mö -sanɩ a 'yɛ -ghöbhanɩ. -N nɩ -sɩbha nʋ, gbʋ la'a -yɛ -ma -zijlitunyɔ dlɩ'ɩ nyini-e, ɔ -kamö -zijle tunʋ 'bhë, 'n ɔ 'yɛ-a 'slʋja 'dɩ 'nyɛ wa -kamö-a -die 'mö 'pa. 26'Dɩɛ -dɩ n -nyɛmö-a naa, mëni wa -dɩnɩmö-a, -n 'na ɛ 'bhuo 'pɛnɩ 'bhë -n 'yɛ-a 'mɛ -die la'a 'mö 'wlʋ.
Zezwi yɛ gbʋyɩlɩyɩlɩɛɛ gbʋ gba
27-Ɩ wa gba-a -ɩ a nʋ-a mɩ-ɩ -yɛ-a naa: -Nn yɩlɩ gbʋ -nɩ. 28-Amöö -nɩ-ɛ, sa'a n gba na-a naa: Nɩkpɛ -mɔ -yɛ 'nglɔ jɩla ɔ 'tʋ -kɔɔ 'lɩbha, -ma ɔ dlɩ zɔmö ɔ -nyɔɔ 'sɔ yɛ gbʋ yɩlɩ 'bhë. 29-Na linɩkpɛsɔ ji -kamö 'jinyloli 'mö kwa 'le -wʋ-ɔ, -sɛɛ -ma -n 'kɛ 'kwla 'pa. -Wʋʋ yɛ-a, ɩ -ga na de cɛ -n 'yɛ nɩmɛlɛ -ka -mɩzlɩ -na 'gblʋ 'bhuo -kpö 'yɛ -ma -kosu'u mö. 30-Na linɩkpɛsɔ -kɔta -kamö 'jinyloli 'wʋ tia 'le -wʋ-ɔ, -dɩa -bha -n 'ka 'kwla 'pa. -Wʋʋ yɛ-a, ɩ -ga -na de cɛ -n 'yɛ nɩmɛlɛ -ka -mɩzlɩ -na 'gblʋ 'bhuo -kpö 'yɛ -ma -kosu'u mö.
Zezwi yɛ 'nglɔɔ 'kwlasagbʋ gba
31Ɩ wa gba-a mɩ-ɩ -yɛ-a naa:
-Ɔ -yɛ 'nglɔ 'kwla -saa ji-e,
ɔ zʋɔ 'kwlasabɔgʋ -gömö.
32-Amöö -nɩ-ɛ, 'dɩ n nyɛya-a naa: Nɩkpɛ -mɔɔ nglɔ-ɔ nɩ bheyi li 'bhë ɔ -kɔɔ 'kwla -sa, gbɩyɩlɩyɩlɩɛ ɔ tio-a 'wʋ. Nglɔ -mɔ ɔ 'luwli -yɛ 'kwla -sa, nɩkpɛ -mɔ -kɔɔ 'yɛ -nɩ kwa, gbʋ ɔ yɩlɩ -bha.
Zezwi yɛ zlugozlugwiee gbʋ gba
33-Ɩ wa gba-a a -tɩbhatɩbhangwaa de a kɩ 'nʋ 'bhë. Sa'a wa gba-a naa:
-Nn 'bhönɩ wɛlɩ -ɩɩ yɛ -n zlugo-a 'wʋ -nɩ,
-n -yɛ Nyininyɔɔ 'nglɩ 'mö zlugonʋ,
-ɩɩ yɛ -n zlugo-a nʋɩ.
34-Amöö -nɩ-ɛ, 'dɩ n nyɛya na-a naa, a'a zlugo 'lɩlɩlɩɛ 'bhë -nɩ, a'a zlugonʋ -Lagɔtapɛ 'mö -nɩ, -Lagɔɔ glɩglɩde -bha. 35A'a zlugonʋ dʋdʋkpata 'mö -nɩ, -Lagɔ nyinia -bha. A'a zlugonʋ Zelwizalɛmö 'mö -nɩ, dʋdʋnyininyɔ 'kadɔ -Lagɔɔ -glɔ -bha. 36-Nn zlugonʋ 'yɛ -na 'wlukple 'mö -nɩ, -wʋʋ yɛ-a, -nn bhɛlɩ -n 'yɛ -na nyukojeyi -bhlʋɔ 'bhëë 'fʋ pɔlʋmanɩ, -nn 'yɛ bhɛlɩ -n 'kɛ julumanɩ. 37A -yɛ 'mö -sanɩɛ ji-e, ɛ -yɛ köön de glɩnɩ, a nʋ köön, ɛ -yɛ 'bhëbhëë de glɩnɩ-ɛ, a nʋ 'bhëbhë. -Ɩ wa pa-a -bha -ɩ la'a -gömö, 'Jinylozuzuko 'mö ɩ 'bhönɩ -bha.
Zezwi yɛ kpasagbʋ gba
38-Ɩ wa gba-a -ɩ a 'nʋ-a mɩ-ɩ -yɛ-a naa:
'Ji -yɛ 'ji bhli,
gleyi -yɛ gleyi bhli.
39-Amöö -nɩ-ɛ, 'dɩ n nyɛya na-a naa: Nɩkpɛ kaya 'jinyloli 'ji nʋ-ɔ, a 'na-a -sa ɩ kpa -nɩ. 'N nɩkpɛ -yɛ -ma -na linɩkpɛsɔ -yukwli 'mö 'pa, tuluanɩɔ kɔpɛsɔ -leyi 'ji ɔ 'yɛ 'yɛ -ma 'pa. 40Nɩkpɛ -yɛ nʋ ɔ -kamö -zijle'e kwa ɔ 'yɛ -na -bana 'wʋ 'libhï nʋ-ɔ, 'nyɔ 'yɛ -na 'möpalokwi 'ye. 41Nɩkpɛ -kamö 'wlu köbhanɩ, ɔ -kamö 'gbluko -sulua ɔ -yɛ nʋ -n -nyɔɔ bhli kilo -bhlʋ nʋ-ɔ, -sua -n -nyɔɔ 'yɛ kwli 'sɔ bhli. 42Nɩkpɛ -kamö -lu 'jɩbhanɩ, 'nyɔ. -Ɔ -yɛ nʋ 'pɔ gagbʋ nʋ, nglui 'wʋ.
Zezwi nɛ naa: A 'jɩbha a tʋngwa
43-Ɩ wa gba-a -ɩ a 'nʋ-a mɩ-ɩ -yɛ-a naa:
'Jɩbha -na linɩkpɛ
-n 'yɛ -na tʋnyɔ 'jɛbhɛlɩ.
44-Amöö -nɩ-ɛ, sa'a n gba na-a a de naa: A 'jɩbha a tʋngwa. A 'pa -wa wʋya-a 'zwɩ zia 'lee 'wlumö -Lagɔ -bɛlɩ. 45-Bhaa do'o, a -Tɩbha -Lagɔ -ʋ -wʋ-ɔ -ma -Lagɔtapɛ'ɛ ʋ 'gwiee -gwie a ji-a zʋɔ. -Wʋʋ yɛ-a, ʋ -yɛ 'ylʋzalʋ 'pʋa, cɛganɩngwa -yɛ nyanɩklangwa 'sɔɔ yɛ -bha. Ʋ -yɛ 'nyizako lɩbha-a, -waa nʋnʋli slɛnɩ-a 'mö -yɛ -waa -li 'nɩ-a 'mö slɛnɩ 'sɔɔ yɛ -bha. 46-Ma ɩ 'mö, nɩkpa -wa 'jɩbhaya-a a -yɛ wa 'nyize 'jɩbha, a 'na-a 'pa dlɩ -nɩ naa, -Lagɔ jiya ɩ 'wlumö -lu 'nyɛ. -Wʋʋ yɛ-a, -sɩbha lepoo mëniköbhangwa nʋ 'yɛ-a -nɩ 'gamö. 47'N a -yɛ a -dagwiee 'nyize bhalɩ-ɛ, -lie -li 'kadɩɛ -mɩ a nʋ-a 'nɩ? Nɩkpa -wa 'nɩ-a -Lagɔ -ji -sɩbha wa nʋ 'yɛ-a -nɩ 'gamö. 48-Ɩ la'aa yɛ n gba-a naa: Sa a -Tɩbha -Lagɔ -ʋ -wʋ-ɔ -ma -Lagɔtapɛ'ɛ -wʋ-a -kpöön, a -wʋ -sɩbha -kpöön.
Currently Selected:
MATIEE 'BƆGƲ 5: BNT96
Highlight
Share
Copy
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996