ZAA 'BƆGƲ 2
2
-Ma Kanaa 'gbë 'möö nglʋkwapɩpɩ
1'Ylɩ 'sɔ 'plɩ-a, ta -leyi 'mö, -ma Galilee dʋdʋ -gömöö -glɔ wa la-a Kana 'n nglʋkwapɩpɩ ji-e -ma bhɩa, Zezwie -da-a la -bha. 2Zezwi -yɛ ɔ 'wʋbhlinɩngwa 'sɔ 'n wa jua 'yɛ-a -nɩ wɔzɩ. 3Wa-a 'bhli 'le, 'pɩpɩ 'wʋɔ nʋ bhɩa-a, Zezwie -da nɛ -bha ɔ de naa: “Wa nʋ yɛ bhɩa 'bhë.” 4Ɔ -da gba-a sa'a, Zezwi nɛ -bha ɔ de: “'Nyia, -ɩ n ji-a nʋɔ -nmö -nɩmɩ'ɩ-ɩ -slʋnʋɔ ji, na de 'nɩ-ɛ -bhla nyini.” 5Zezwi gba-a sa'a, ɔ -da nɛ -bha lilidlinɩngwaa de: “-Ɩ 'bhuo ɔ ji-a a de gbaa, a nʋɩ.”
6'Kpöakunakö -ngbʋpʋlʋ -ɩ 'zwiföa -yɛ -Lagɔ -bɛlɩ 'paa mö 'le -wʋ, -ɩɩ 'möö 'nyu wa pa-a kpli yawʋ, -ɩ 'nyubïteliaa gwlɩ -mʋna, gwlɩ -ngbʋpʋlʋ pla-a 'mö glɩ -bha. 7Zezwi nɛ -bha wa de naa: “A yena -kunakö -la 'nyu 'mö.” 'N wa jiɩ-a yenanɩ. 8Ɔ nɛ 'yɛ -bha wa de naa: “A 'pli-a 'mö -sɩka'a, a 'yɛ -ma lilie 'jiwʋnyɔɔ 'bhɛyɩ kwa.” Wa 'pli-e -bha 'nyuo de, 'n wa ji-e -ma lilie 'jiwʋnyɔɔ 'bhɛyɩ kwa. 9Lilie 'jiwʋnyɔ 'jɩ-a nyu la'a -ʋ zʋ-a nʋ ngli-e, la 'mʋ nʋ 'bhönɩ ɔ'ɔ -bha de -ji, lilidlinɩngwa la'a -wa 'pli-a -nɩ 'mʋ 'nyu -ji -bha -nɩ de. Lilie 'jiwʋnyɔ wɔzɩ-a nglʋkwanyɔ, 10ɔ nɛ -bha ɔ de: “'Kɩkɩ nʋɔ -nʋ wa dlinɩ-a nɩkpa cɛ wa 'na -bɛ 'wʋ 'nɩma 'bhë, 'n wa dlinʋa-a nʋ -ʋ 'nɩ-a tenyi ngli nanɩ cɛ. -Nmöö -nɩ-ɛ, nʋɔ -nʋ -n zʋ-a yɛ 'n sa'a do'o ji-a nyinie?” 11'Ma bhata la'a, ma-a -yɛ-a Zezwie bhatɩ gla'aa taka -la. -Ma Galilee dʋdʋ -gömö, -ma Kanaa 'gbë 'mö ɔ nʋnʋa-a nɛ, 'n ɔ ji-a ɔ 'ghlinɔ tulua, 'n ɔ 'wʋbhlinɩngwa jio-a dlɩ 'wʋ -ka. 12-Mɩ la'a 'plɩ-a 'bhë, 'n ɔ -yɛ ɔ -da-a, ɔ -dagwie -yɛ ɔ 'wʋbhlinɩngwa 'sɔ ji-e -ma Kapɛnaɔmöö 'gbë 'mö mö, 'n wa ji-e -ma 'ylɩ jaa -sɛ -sa.
Zezwi yɛ -lie 'pɛlʋpangwa -ma -Lagɔbudu 'kadʋ 'mö kpëti
13'Zwiföaa pɩpɩ 'kadɛ wa la-a gïyikwlaa 'möwlʋpɩpɩ ɛ de -wʋ-a nyini 'le, 'n Zezwi ji-e -ma Zelwizalɛmö mö. 14-Ma -Lagɔbudu 'kadʋɔ -kʋkwa 'mö, 'n ɔ ji-e -ma bhilia-a, 'bhlabhlɩ -yɛ -kpakʋɩɛ 'pɛlʋpangwa 'sɔ ghlɩ, mënie 'mözigbanɩngwa glɩ 'yɛ -bha wa 'tabhli yawʋ. 15Ɔ lɩbha-a 'likpïë -pla-a, 'n ɔ ji-a wa 'bhuo -ma -Lagɔbudu 'kadʋɔ -kʋkwa 'mö kpëti, wa -yɛ wa 'bhlabhlɩ -yɛ wa bhilia 'sɔ, 'n ɔ ji-a mënie 'mözigbanɩngwaa mëni -yɛ wa 'tabhli 'sɔ 'kwla 'papanɩ. 16Ɔ nɛ -bha -kpakʋɩɛ 'pɛlʋpangwaa de: “A -sa ma'a -ɩ la'a, a 'na-a zʋa na -Tɩbhaa -budu 'pɛlʋɔ 'möpanɩbudu 'wʋ -nɩ.” 17Ɔ gba-a -sɩbha, 'n ɔ 'wʋbhlinɩngwaa dlɩ ji-a wɛlɩ -ɩ 'cɛlɩɔ la-a -ma -Lagɔwɛlɩɛ 'bɔgʋ 'möö de bhlinɩ, sa'a naa:
“-Na -buduo 'jɩbhajɩbhʋ-ʋ ji'i-a sɛ -saa.”
18Zezwi nʋ-ɔ -sɩbha, 'n 'zwiföa jio-a ngli 'jɩbha naa: “Bhata -ma -n -jiya-a 'ji tuluanɩɛ 'n -a 'yɛ-a sɛ -ji naa -n bhɛlɩ -n 'yɛ -ɩ -la nʋ 'nɩ?” 19Zezwi nɛ: “A wla -Lagɔbudu 'kadʋ -la, 'ylɩ ta 'mö n jiʋ -bha ʋ 'bhle 'wʋ 'nɩgbanɩ.” 20Ɔ gba-a sa'a, 'zwiföa nɛ -bha ɔ de naa: “-Lagɔbudu 'kadʋ -la 'ylʋböö gwlɩ 'sɔ 'ylʋbö -ngbʋpʋlʋ 'mö wa 'sɩbhanʋ -bha, mʋ -n ji-e -na 'ylɩ ta 'mö -bha ʋ 'bhle 'wʋ 'nɩgbanɩɛ?” 21Zezwi 'yɛ-ɛ -sɩbha gba-a, ɔjɩɛ ku 'mʋ ɔ la-a -Lagɔbudu 'kadʋ, ʋ gbʋ ɔ gba la -bha. 22Ɔ yɛ -ma 'kudungwa 'gbamö 'wlʋ 'bhë, 'n ɔ 'wʋbhlinɩngwaa dlɩ ji-a 'ma köbhë -a ɔ gba la-aa de bhlinɩ, 'n wa ji-a wɛlɩ -ɩ 'cɛlɩɔ-ɔ -ma -Lagɔwɛlɩɛ 'bɔgʋ 'mö ɔ gba la-a 'sɔ dlɩ 'wʋ -ka.
Zezwi -ji -ma nɩkpɛɛ dlɩ zɔmöö -li
23Zezwi -wʋ-ɔ -ma Zelwizalɛmö gïyikwlaa 'möwlʋpɩpɩɛ 'bhlibhlido'o, bhatɩ ɔ -wʋ-ɔ -ma nɛ nʋ 'le nɩkpa yɩlɩɩ-a, 'n wa -bɛ jio-a dlɩ 'wʋ -ka. 24Zezwie -nɩ, ɔ -ji la wa 'bhuoo zɔmöö yɛ, ɔ 'nʋa la dlɩ 'tɛnɩ. 25Nɩkpɛ 'nɩ la bhɛlɩ ɔ 'kɔ nɩkpɛɛ -gömöö 'dɩ -sanɩ, -wʋʋ yɛ-a, ɔ -nɩ 'bhë -ji -ɩ -wʋ-ɔ -ma nɩkpɛɛ dlɩ zɔmö.
Currently Selected:
ZAA 'BƆGƲ 2: BNT96
Highlight
Share
Copy
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996