Luk 22
22
Äa Plon, Jesus doot to moaken
Mat 26:1-5,14-16; Mrk 14:1-2,10-11
1Doa nodad sikj oba daut Fast von de onjesuade Brood, waut Passafast jenant woat. 2Un de Huagepriesta un Schreftjelieede sochten doa no, woo see Am ombrinjen kunnen, wiels see ferchten sikj fa daut Volkj. Luk 20:19
3Dan fua Soton en Judas nenn, Iskariot jenant, dee ut de Zol von de Twalw wia. Joh 13:2,27 4Un hee jinkj han un beräd sikj met de Huagepriesta un Hauptlied, woo hee Am mucht äant äwajäwen. 5Un see freiden sikj un stemden met, am Jelt to jäwen. 6Un hee vespruak un socht Jeläajenheit, Am to veroden, onen daut daut Volkj doabie wia.
De Jinja moaken reed fa daut Passa
Mat 26:17-19; Mrk 14:12-16
7Dan kjeem de Dach von de onjesuade Brood, aun däm daut Passa must jeschlacht woaren. 2Mo 12:18-20 8Un Hee schekjt Petrus un Johanes un säd: Got han un moakt daut Passa reed, daut wie daut äten. 9See oba säden to Am: Wua west Du, daut wie daut reed-moaken? 10Un Hee säd to äant: Kjikj, wan jie en de Staut nenkomen, woa jie een Mensch bejäajnen, dee eene Kruck Wota drajcht; got am hinjaraun en daut Hus, wua hee nenjeit, 11un sajcht to däm Husharn: De Liera lat die sajen: Wua es de Gauststow, en dee Ekj met miene Jinja daut Passa äten kaun? 12Un hee woat junt eene groote utjepolstade Bowastow wiesen; doa moakt reed. 13See jinjen han un fungen daut, soo aus Hee äant jesajcht haud; un see muaken daut Passa reed. Luk 19:32
Daut Owentmol
Mat 26:20-30; Mrk 14:17-26; Joh 13:21-30
14Un aus de Stund kjeem, sad Hee sikj aum Desch un de twalw Apostel met Am. 15Un Hee säd to äant: Met een Velangen haft Mie velangt, dit Passa met junt toop to äten, ea Ekj lieden mott. 16Wiels Ekj saj junt, Ekj woa nich mea doavon äten, bat daut erfelt sennen woat en Gott sien Rikj. 17Dan neem Hee daut Kuffel, dankt un säd: Nämt dit un deelt junt daut en, Luk 13:29 18wiels Ekj saj junt: Ekj woa nich mea von de Wienstud-Frucht drinkjen, bat Gott sien Rikj komen woat. 19Un hee neem Broot, dankt, bruak daut, jeef äant daut un säd: Dit es mien Kjarpa, dee fa junt jejäft woat: Dit doot to mienem Jedajchnis. 1Kor 11:23-25 20Jrod soo uk daut Kuffel, no de Moltiet, un säd: Dit Kuffel es de niea Bunt en mien Bloot, daut fa junt vegoten woat.
21Doch kjikj, de Haunt von däm, dee Mie verot, es met Mie äwa däm Desch. Joh 13:21-22 22Wiels de Menschensän jeit soo doahan, aus bestemt es; oba wee däm Mensch, derch wäm Hee verot woat! 23Un see fungen aun, sikj unjarenaunda to froagen, wäa von äant daut doch sennen wudd, dee dit doonen wudd.
Wäa es de Jratsta
24Doa kjeem oba uk een Striet opp mank äant, wäa von äant sull fa dän Jratsten jehoolen woaren. Mat 20:25-28; Mrk 10:42-45; Luk 9:46 25Un Hee säd to äant: De Kjennichs von de Nazionen harschen äwa äant un dee, waut Jewault äwa äant eewen, woaren Goots-Doona jenant. 26Jie oba nich soo aus daut; oba de Jratsta mank junt saul soo sennen aus de Jinjsta un de Leida soo aus een Deena. 27Wiels wäa es jrata: Dee aum Desch sett, ooda dee doa bedeent? Es daut nich dee, dee aum Desch sett? Oba Ekj sie mank junt soo aus een Deena. Joh 13:4-14
28Jie oba sent et, dee doa derchjehoolen haben met Mie en miene Vesieekjungen. Joh 6:67-68 29Un Ekj orden junt een Rikj aun, soo aus mien Voda Mie daut aunjeordent haft, 30daut jie muchten äten un drinkjen aun mienem Desch en mien Rikj un opp Troonen setten un rechten de twalw Stam von Israel. Mat 19:28
Petrus woat Jesus velieejen
Mat 26:31-35; Mrk 14:27-31; Joh 13:36-38
31Un de Har säd: Simon, Simon, kjikj, de Soton haft junt jefoddat, daut hee junt mucht säwen soo aus dän Weit. 2Kor 2:11 32Oba Ekj hab fa die jebät, daut dien Gloowen nich opphieren sull; un wan du die eenmol trigj-kjieescht, dan stoakj diene Breeda. Joh 17:11,15 33Hee oba säd to Am: Har, ekj sie reed, met Die en daut Jefenkjnis un en dän Doot to gonen. 34Hee oba säd: Ekj saj die, Petrus: De Hon woat vondoag nich kjreien, ea du dreemol woascht veloagen haben, daut du Mie kjanst.
Jelttausch, Sak un Schwieet
35Un Hee säd to äant: Aus Ekj junt onen Jelttausch, onen Tausch un Schoo rutschekjt, fäld junt daut aun irjent waut? See säden: Nuscht! Luk 9:3; 10:4 36Dan säd Hee to äant: Oba nu, wäa eene Jelttausch haft, saul dee nämen un jrod soo uk eene Tausch; un wäa nich een Schwieet haft, saul sien Kjleet vekjeepen un eent kjeepen. 37Wiels Ekj saj junt: Uk dit, daut doa jeschräwen steit, mott sikj aun Mie erfellen: “Un Hee es mank de Jesazloose jetalt worden.” Wiels uk, waut Mie aunbelangt, haft siene Erfellunk. Jes 53:12 38See oba säden: Har, kjikj, hia sent twee Schwieets. Un Hee säd to äant: Daut es jenuach.
Jesus sien Jebäd em Goaden
Mat 26:36-46; Mrk 14:32-42
39Un Hee jinkj wieda, un no siene Jewanheit jinkj Hee no däm Oliewen-Boajch. Siene Jinja kjeemen Am oba uk hinjaraun. 40Un aus see bat de Städ kjeemen, säd Hee to äant: Bät, daut jie nich en Vesieekjunk nenkomen! 41Un Hee trock sikj von äant onjefäa “eenen Steen schmieten” wajch, kjneed han, bäd 42un säd: Voda, wan Du west, dan nemm dit Kuffel von Mie; oba doch nich mien Wellen, oba diena saul jedonen. Mat 6:10 43Doa erscheen Am een Enjel vom Himmel un stoakjt Am. 44Un Hee jeroot em Kaumf un bäd noch stoakja#22:44 Ooda: iernsthaufta.; un sien Schweet wort soo aus Blootdreppen, dee oppe Ieed follen. 45Un Hee stunt opp vom Jebäd un kjeem no siene Jinja un funk äant enjeschlopen fa Truarichkjeit. 46Un Hee säd to äant: Waut schlop jie? Stot opp un bät, daut jie nich en Vesieekjunk nenfaulen.
Jesus woat verot un faustjenomen
Mat 26:47-56; Mrk 14:43-50; Joh 18:1-11
47Wäarent Hee oba noch räd, kjikj, doa kjeem eene Volkjshäad, un eena von de Twalw, dee Judas heet, jinkj ver äant un nodad sikj no Jesus, om Am to kussen. 48Jesus oba säd to am: Judas, verotst du dän Menschensän met eenem Kuss? 49Aus oba dee, dee met Am wieren, sagen, waut doa woaren wull, säden see to Am: Har, sell wie met daut Schwieet doa mank-schlonen? 50Un eena von äant schluach däm Huagenpriesta sien Kjnajcht un hakt am daut rajchte Ua auf. 51Dan auntwuad Jesus un säd: Lot daut soo wiet! Un Hee rieed daut Ua aun un heeld am. 52Jesus oba säd to de Huagepriesta un Hauptlied vom Tempel un de Eltestasch, dee jäajen Am jekomen wieren: Sent jie soo aus jäajen eenen Reiba rutjegonen met Schwieets un Kjneppels? 53Aus Ekj däachlich bie junt em Tempel wia, hab jie de Haunt nich jäajen Mie utjestrakjt; oba dit es june Stund un de Macht von de Diestanis. Joh 7:30; 8:20
Petrus velicht, daut hee Jesus kjant
Mat 26:57,69-75; Mrk 14:53,66-72; Joh 18:12-14,25-27
54Un aus see Am jejräpen#22:54 Ooda: jenomen. hauden, fieeden see Am han un brochten Am en daut Hus von däm Huagenpriesta. Petrus oba kjeem von wietauf hinjaraun. 55Aus see oba medden em Hoff een Fia aunjestekjt hauden, sauten see toop un Petrus saut doa medden mank äant. 56Doa sach am eene jewesse Deenstmejal biem Fia setten un kjikjt am schoap aun un säd: Disa wia uk met Am. 57Hee oba veluach Am un säd: Fru, ekj kjan Am nich. 58Un boolt doaropp sach am een aundra un säd: Du best uk eena von äant. Petrus oba säd: Mensch, ekj sie nich. 59Un no een Stoot, von onjefäa eene Stund, behaupt daut een aundra un säd: En Woarheit, disa wia uk met Am, wiels hee es een Galiläa. 60Petrus oba säd: Mensch, ekj weet nich, waut du sajchst. Un fuaz, wäarent hee noch räd, kjreid de Hon. 61Un de Har dreid sikj om un kjikjt Petrus aun. Dan docht Petrus aun däm Harn sien Wuat, woo Hee to am jesajcht haud: Ea de Hon kjreit, woascht du Mie dreemol velieejen. 62Un Petrus jinkj rut un hield bettalich. Ps 51:19
Jesus woat vespott un jeschloagen
Mat 26:57,58; Mrk 14:65
63Un de Mana, dee Jesus fausthilden, vespotten un schluagen Am, 64dakjten Am unja, schluagen Am em Jesecht un fruagen Am un säden: Profezei! wäa es daut, dee Die schluach? 65Un väl aundre lastaliche Dinja säden see jäajen Am.
Jesus verem Rot
Mat 26:59-65; Mrk 14:55-64; Joh 18:19-24
66Un aus daut Dach wort, vesaumeld sikj de Eltestaschoft vom Volkj, uk de Huagepriesta un Schreftjelieede un leiden Am no äaren Rot 67un säden: Wan Du de Christus best, saj ons daut. Hee oba säd to äant: Wan Ekj junt daut saj, dan wudd jie Mie doch nich jleewen; Joh 3:12 68wan Ekj oba froagen wudd, wudd jie Mie nich auntwuaten un uk nich loosloten. 69Von nu aun woat de Menschensän setten bie de Rajchte von Gott siene Macht. Ps 110:1 70Dan säden see aula: Best Du dan Gott sien Sän? Un Hee säd to äant: Jie sajen, daut Ekj sie. 71Dan säden see: To waut bruck wie mea Zeichnis? Wiels wie selfst haben daut ut sien Mul jehieet.
Lukas
Currently Selected:
Luk 22: DKB
Highlight
Share
Copy
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft