Matayo 9
9
Yesʉ alamya mʉndʉ w'amakonongola
(Mar 2:1-12; Luk 5:17-26)
1Yesʉ mwashambɨra mo bwatho, mwashʉba shabʉka engetsɨ n'ihika mo muyi ʉwe.#9:1 Ɨkwamana na Marɨko 2:1-12, Kaperenaʉmʉ ni muyi wo Yesʉ ikalagamo. Matayo 4:13. 2Bandʉ bagʉma mobamʉlethera mʉndʉ wa makonongola nɨalɨ ku kipoyi. Yesʉ abere ashʉnga olwɨkɨrɨtsyo lwabo, mwabwɨra ow'amakonongola athɨ: «Magala ayo mbe mʉgala aye! Ebɨtsɨbʉ byawe byamaganyɨrwa!» 3Aho bakangɨrɨtsya bagʉma b'oMʉgomba mobayinegenia bathɨ: «Omʉndʉ oyu amahatsya kʉ Gongo#9:3 Soma Balawi 24:16.!» 4Yesʉ mwamɨnyerera ebyo bagenda abaganɨtsya, mwabwɨrabo athɨ: «Bʉshana na ki mʉlɨ n'emɨganɨtsye mɨbɨ mo mɨthɨma enyu? 5Kɨhe kyo kyolo, ɨnegena mbʉ: “Ebɨtsɨbʉ byawe byamaganyɨrwa kʉtse ɨnegena mbʉ wimana na ʉgende”? 6Aho, bʉshana mʉmɨnye kw'oMʉgala w'oMʉndʉ alɨ n'amaka w'erɨganyɨra ebɨtsɨbʉ ko kɨhʉgo.» Honyuma kw'aho mwabwɨra ow'amakonongola athɨ: «Wimana, tsɨmba ekipoyi kyawe na ʉshʉbe ewawe!» 7Omʉndʉ oyo mwimana na mwayɨgendera ewe. 8Omuhindano abere ashʉnga kw'ebyo, mwafwa bʉba n'ɨthanga ɨsɨma Gongo yo wahaga abandʉ bw'amaka alɨ ng'aya.
Yesʉ abɨrɨkɨra Matayo
(Mar 2:13-17; Luk 5:27-32)
9Yesʉ abere alɨ atsʉka, mwashʉnga mʉndʉ mʉgʉma yo wagenda ahʉlwamo Matayo n'ikere mo biro by'erɨlɨhɨsɨra ekoli. Yesʉ mwamʉbwɨra athɨ: «Nyɨkwame!» Matayo mwimana n'ɨmʉkwama. 10Yesʉ abere anemulya ko kalyo kw'omwa Matayo, bakarani bangɨ b'ekoli na bakoli b'ebɨtsɨbʉ mobayalya hagʉma na Yesʉ n'abɨga bʉwe. 11Abafarisayo babere bashʉnga kw'ebyo, mobabwɨra abɨga bʉwe bathɨ: «Bʉshana na ki omʉkangɨrɨtsya enyu alya hagʉma n'abakarani b'ekoli na bakoli b'ebɨtsɨbʉ?»#9:11 Soma Luka 15:1-2. 12Yesʉ abere onvwa ebyo bagenda abanegena, mwabwɨrabo athɨ: «Abandʉ batsibuhire bathalɨ abanalaga kʉ mʉshake, he nɨ abo balwere. 13Mʉgende mʉyɨge aMashako Abuyirire owanegenire athɨ: “Nyilayire kʉ shashi, he nyithalayire kʉ bʉhere#9:13 Osea 6:6..” Kʉshangwa nyithahikaga bʉshana n'ɨbɨrɨkɨra abathʉnganene hewethuwe abakoli b'ebɨtsɨbʉ.»
Yesʉ n'iyima akalyo
(Mar 2:18-22; Luk 5:33-39)
14 Abɨga ba Yoani Mubatisya mobahika ahalɨ Yesʉ n'ɨmʉbʉtsya bathɨ: «Bʉshana na ki ithwe n'aBafarisayo othunayima akalyo, he abɨga bawe ɨbo bathalɨ abanayima akalyo?» 15Yesʉ mwashʉbɨtsyabo athɨ: «Omʉganɨtsya mʉthɨ abo bathalalɨkwa mo buheruki banganabya mʉ kɨrɨro omuherukya alɨ akɨnalɨ hagʉma nabo? Kiro! Hewethuwe ebɨro byandahika andabya athokibwa mʉbo, aho bandayima akalyo.»
Tifayi nyihya na bɨrega bihya
16«Hathalɨ mʉndʉ yo ʉnalandɨra ko lʉkɨmba lwa kera ko kɨbandɨko kihya-kihya, kʉshangwa ekɨbandɨko ekyo nɨkyakʉra olʉkɨmba lwa kera olo, aho ekɨthobo nɨ kyagalɨha kʉtsɨbʉ.»
17«Kuthyo abandʉ bathalɨ abanahira etifayi nyihya-nyihya mʉ bɨrega bya ngobi sikulire. Bɨthalɨ bithyo etifayi nɨyaberenga ebɨrega ebyo, etifayi nɨyashesheka n'ebɨrega nɨbyabɨha. Hewethuwe abanahira etifayi nyihya-nyihya mʉ bɨrega bihya-bihya, aho etifayi n'ebɨrega nɨbyabɨkɨka kʉbʉya.»
Yesʉ alamya mʉkatsɨ na alubukya mʉthasha
(Mar 5:21-43; Luk 8:40-56)
18Yesʉ abere anemʉbwɨrabo athyo, mʉkʉlʉ mʉgʉma w'aBayuta mwahika, mwafʉkama embere sɨwe n'ɨmʉbwɨra athɨ: «Omʉthasha aye amafwa lɨno-lɨno, hewethuwe hika umuhireko eminwe, naye ashʉba byaho.» 19Yesʉ mwimana n'ɨmʉkwama hagʉma n'abɨga bʉwe.
20Kwabyaga mʉkatsɨ mʉgʉma yo wabyaga alwere bukoni bw'ɨthokwamo mʉsasɨ mʉ mɨaka ikumi n'ibiri, mwayɨfʉnda ahalɨ Yesʉ nɨamʉhʉlʉka enyuma, na mwakola ko pindo y'olʉkɨmba lʉwe, 21kʉshangwa agenda ayinegenia athɨ: «Nyanamakola ko lʉkɨmba lʉwe, nɨnyalama.» 22Yesʉ abere abɨndʉka, mwamʉshʉnga n'ɨnegena athɨ: «Magala ayo mbe mwalɨ waye! olwɨkɨrɨtsyo lwawe lwamakulamya.» Aho n'aho omʉkatsɨ oyo mwalama.
23Yesʉ abere ahika mo nyʉmba y'omʉkʉlʉ w'aBayuta, abere ashʉnga ko babuhi b'ehɨpʉlɨ#9:23 Abɨmbɨrɨtsɨ kʉtse abawathi b'ehɨpʉlɨ, bagenda baherekeretsya abaliri bo babyaga nibetsi ɨrɨra bʉshana n'omuhindano wabyaga mo nyʉmba yo banahiramo abaholi., n'omuhindano ow'abyaga nɨayɨkʉngʉtha mo kɨrɨro, 24mwanegena athɨ: «Mʉthoke hano, kʉshangwa omʉthasha athafwire, he alɨtho.» Hewethuwe mobamʉsheka. 25Babere bamamala iriitha abandʉ, Yesʉ mwɨngɨra mo kɨshenge, mwatsɨmba omʉthasha y'oko kʉboko n'omʉthasha mwimana. 26Omwatsɨ oyo mwaya-ngʉlʉ mo kɨhʉgo ekyo.
Yesʉ alamya mbumi ibiri
27Yesʉ abere athoka aho, mbumi ibiri mosamʉkwama nɨesɨhambala sɨthɨ: «Thʉshashɨre mbe Mʉgala wa Tawiti.»
28Yesʉ abere ahika mo nyʉmba, esombumi mosayɨfʉnda hofɨ naye, naye mwabʉtsyatho athɨ: «Mwɨkɨrɨtsye ko nyangakola ebyo?» Mosamʉshʉbɨtsya sɨthɨ: «Ega mbe Nyinya-kowethʉ.» 29Aho Yesʉ mwakola ko mesho watho n'ɨnegena athɨ: «Bɨkoleke kw'imwe ɨkwamana n'olwɨkɨrɨtsyo lwenyu!» 30N'amesho wabo mwakɨngʉkala. Honyuma kw'aho Yesʉ mwahamʉlabo kʉtsɨbʉ athɨ: «Ohe, hathabyaga mʉndʉ n'omʉgʉma yo wamɨnya ebi.» 31Hewethuwe ɨbo babere bathoka aho mobayathulagania engʉlʉ yɨwe mo kɨhʉgo kyoshi ekyo.
Yesʉ alamya kɨtsɨrʉ
32Abandʉ babɨrɨ abo babere balɨ abathoka aho, bandɨ bandʉ mobalethera Yesʉ yo mʉndʉ yo wabyaga kɨtsɨrʉ kʉshangwa abyagako mʉtsɨmʉ mʉbɨ. 33Yesʉ abere amamala ɨbɨnga omʉtsɨmʉ oyo, ekɨtsɨrʉ ekyo mokyathanga ɨnegena. Abandʉ boshi mobashweka nɨabanegena bathɨ: «Thʉthahera thwathashʉnga kʉ kɨrɨ ng'eki mo kɨhʉgo ky'iIsiraeli.» 34Hewethuwe aBafarisayo bagenda abanegena bathɨ: «Nɨ omʉkʉlʉ w'emɨtsɨmʉ yo ʉmʉha akagala k'erɨbɨnga emɨtsɨmʉ mɨbɨ!»#9:34 Soma 12:24.
Yesʉ afwɨra abandʉ bo shashi
35«Yesʉ agenda athimba mo miyi n'omo mɨrongo yoshi, agenda akangɨrɨtsya mo sosinakoki sabo, alɨafʉla eNgʉlʉ Mbʉya y'oBwamɨ bwa Gongo, n'ilamya amakoni woshi n'obʉlema bwoshi. 36Mo ndambi Yesʉ agenda ashʉnga muhindano wa bandʉ bangɨ, mwagenda afwɨrabo shashi kʉshangwa babyaga nɨbamalʉha n'ɨfwa bulundu nga mbuli sithawithe mulishya.#9:36 Mɨganzo 27:17; Bamɨ bambere 22:17. 37Aho mwabwɨra abɨga bʉwe athɨ: “Emyaka yerire nɨ mɨngɨ, hewethuwe abageshi nɨ bake. 38Aho mʉshabe omwenye emyaka athʉme bakoli bangɨ mw'ɨshwa lɨwe.”»
Currently Selected:
Matayo 9: ver
Highlight
Share
Copy
Want to have your highlights saved across all your devices? Sign up or sign in
2025 Group of Associations for the Promotion of Languages, Cultures for Integral Development