Matayo 10
10
aBathʉmwa ikumi na babɨrɨ
(Mar 3:13-19; Luk 6:12-16)
1Yesʉ mwabɨrɨkɨra abɨga bʉwe ikumi na babɨrɨ na mwahabo maka w'ɨbɨnga emɨtsɨmʉ mɨbɨ n'ilamya bʉlɨ bukoni boshi, na bʉlɨ bʉlema boshi. 2Ano wo matsɨna w'abathʉmwa ikumi na babɨrɨ: omʉmbere nɨ Simoni yo walʉkawamo Petero, na Ndereya mʉgala abo. Yakobo mʉgala wa Sebetayo, na Yoani mʉgala abo, 3Filipo na Barɨtolomayo, Tomasɨ na Matayo omukarani w'ekoli, Yakobo mʉgala wa Alʉfayo, na Tatei, 4Simoni w'omo kɨkembe ky'aBaselote#10:4 aBaselote kyabyaga kɨkembe ky'aBayuta bo babyaga nibathatsiire obuthegeki bw'aBaroma. na Yuta Isikariote yo wahotheraga Yesʉ.
Omʉlɨmo w'abathʉmwa ikumi na babɨrɨ
(Mar 6:7-13; Luk 9:1-6)
5Yesʉ mwathʉma abɨga bʉwe ikumi na babɨrɨ mo mʉlɨmo n'ɨhamʉlabo athɨ: «Mʉthayaga mo bɨhʉgo by'abandʉ b'ebɨndɨ bɨhanda na mʉthɨngɨraga mo miyi y'aBasamarɨa. 6Hewethuwe mʉgendere esombuli siherire s'omo nyʉmba ya Isiraeli. 7Mo nzɨra mw'eyo mʉgende omʉkangɨrɨtsya abandʉ mʉthɨ: “oBwamɨ bw'elʉbʉla bʉlɨ hofɨ!” 8Mulamye abakoni, mulubukye abaholi, mwetsye ababenzɨ, mʉbɨnge emɨtsɨmʉ mɨbɨ. Mwahabawa bʉsha nemwe mʉhane bʉsha. 9Mʉthahekaga horo kʉtse faranga, kʉtse bɨtsere bya mʉlɨnga mo bɨla byenyu. 10Na mʉthahekaga shaho, kʉtse koti ibiri, kʉtse bɨrato, kʉtse kɨkoma. Kʉshangwa omukoli atholere nialya.#10:10 1Banyakorinto 9:14; 1Timote 5:18.»
11«Mo ndambi mwandabya mwahika mʉ muyi kʉtse mʉ mʉrongo, mushondye mʉndʉ yo ʉtholere ibakokya na mwikale omwe ihika ko kɨro mwandathoka mʉwo. 12Mwandabya mwɨngɨra mʉ nyʉmba mʉketsye abalɨmo, mʉthɨ: “Obʉholo bubye nemwe.” 13Abandʉ b'omo nyʉmba eyo bamabakokya, obʉholo bwenyu nibwabya nabo. Hewethuwe bathabakokitsye obʉholo bwenyu nɨbwabashʉbʉlɨra. 14Na kwamabya nyʉmba kʉtse muyi wo bamathɨnda ibakokyamo, kʉtse ɨbahʉlɨkɨrɨtsya, mʉthokemo na mʉkʉngʉthe oluthuthu ly'oko bɨshando byenyu.#10:14 Ko Bayuta, ekɨnwa erɨkʉngʉtha oluthuthu ko bɨshando n'ɨnegena mbʉ abandʉ bathahʉlɨkɨrɨrene kʉbʉya. Kandɨ nɨ negena mbʉ yo ʉthathʉmwa athakɨrɨko mwinda w'oyo athathʉmwako. Marɨko 6:11. 15Kwenene enyɨbabwɨra, ekɨro ky'esohi abahimbani b'omo kɨhʉgo ky'eSotomo na eky'eNgomora bandasohwa kʉke kʉtsɨbʉ kʉlenga abandʉ b'omo muyi oyo.»
Emɨnʉbo yo yihika
(Mar 13:9-13; Luk 21:12-17)
16Mʉhʉlɨkɨrɨtsye! Enyɨbathʉma ng'esombuli mo kathi k'esonyambwe. Mubye nyengeshu ng'esonzoka na balonvʉ ng'othulikuku. 17Muyitheye ko bandʉ, kʉshangwa bandabathwala ko tɨrɨbɨnalɨ na bandabahumba mihumbo mo sosinakoki sabo. 18Na kuthyo bandabathwala embere s'abakʉlʉ n'abamɨ bʉshana nangye, bʉshana mubye batimo baye embere sabo n'embere s'abandʉ b'ebɨndɨ bɨhanda. 19Mo ndambi bandagenda ababathwala ko tɨrɨbɨnalɨ, mʉthagenda omuyigangya-gangyaga nga mʉthɨ ko mwanegena kʉtse nga mwanegena ki. Ebɨnwa mwandanegena Gongo andabahabyo ko kathambi ako. 20Kandɨ mʉthalɨ imwe momwandanegena, hewethuwe nɨ oMʉthɨma Mwerʉ wa Thatha wenyu wo andabanegeneramo. 21Omʉndʉ andahothera mʉgala abo bʉshana ithwe, n'ishe w'omwana andahothera mʉgala ʉwe, abana nabo bandabɨndʉkɨra ababuthi babo na bandɨthɨsabo. 22Abandʉ boshi bandababaga bʉshana nangye. Hewethuwe yo wandatsitsinia ihika ko nduli andashabʉlwa. 23Bandabya babanubya mu muyi mʉlebe mʉshayɨre mʉ ʉndɨ. Enyɨbabwɨra ekwenene, mʉthɨndamale ithimba mo miyi yoshi y'iIsiraeli Mʉgala w'oMʉndʉ athetsi ahika.
24«Hathalɨ mwɨga yo ulengitsye omʉkangɨrɨtsya ʉwe, kʉtse hathalɨ mʉkobe yo ulengitsye nyinya-kowabo. 25Hewethuwe bikwirire omwɨga ibya ng'omʉkangɨrɨtsya ʉwe n'omʉkobe ibya nga nyinya-kowabo. Bamabya nɨabahʉla omʉkʉlʉ w'olʉganda mo Belisebuli#10:25 Belisebuli n'ɨtsɨna lyahabawa eSitani nga mʉkʉlʉ w'emɨtsɨmʉ., bathangabʉsha ɨahʉla abandʉ b'omo lʉganda lʉwe mʉ matsɨna mabɨ kʉtsɨbʉ!»
Oyo wangʉbahwa
(Luk 12:2-7)
26Aho, mʉthʉbahaga abandʉ abo. Kʉshangwa hathalɨ kɨndʉ kyoshi-kyoshi kyo kibishire kyo kithindabishulwe, kʉtse hathalɨ lʉfʉmɨ lolʉthɨndamɨnywe. 27Ekyo nyɨbabwɨra mo mwitsimya mʉnegenekyo mʉ kathɨ ka mwɨshɨ, na kuthyo ekyo abababʉherera ko kuthwi, mʉhambalɨrekyo ko lʉthwe lw'enyʉmba. 28Mʉthʉbahaga abandʉ bo bang'itha omʉbɨrɨ kuroshi he nibathangitha ekirimu, hewethuwe mwʉbahe Gongo yo wang'itha#10:28 Yakobo 4:12. omʉbɨrɨ n'ekirimu okw'ɨrʉnga. 29Ewono, ebishwi bɨbɨrɨ bɨthalɨ ebɨnagʉtsɨbwa sengi ngʉma? He namo bɨnalɨ bithyo hathalɨ kɨgʉma kya kʉbyo kyo kyangathogera ko kɨthaka lɨthalɨ ɨshasha lya Gongo Thatha wenyu. 30Na kw'imwe Gongo etsi emɨganzo y'esonzwɨrɨ soshi s'oko mithwe enyu. 31Aho mʉthʉbahaga, kʉshangwa muwithe kɨtsɨro kɨnene kʉlenga bishwi bɨngɨ!
Ɨkɨrɨtsya kʉtse ɨthɨnda Yesʉ Kirisito
(Luk 12:8-9)
32«Bʉlɨ mʉndʉ yo wandanyɨkɨrɨtsya embere s'abandʉ nangye nyandamwɨkɨrɨtsya embere sa Thatha yo ʉlɨ elʉbʉla. 33Hewethuwe omʉndʉ amanyɨthɨnda embere s'abandʉ nangye nɨnyandamʉthɨnda embere sa Thatha yo ʉlɨ elʉbʉla.»
Yesʉ aletha ɨgabana
(Luk 12:51-53; 14:26-27)
34«Muthaganitsaya mʉthɨ nyahikaga ɨretha bʉholo ko kɨhʉgo. Nyithahikaga ɨretha bʉholo hewethuwe muyali. 35Kʉshangwa nyahikaga igabania omʉndʉ n'ishe ʉwe, omʉthasha na nyinya ʉwe, omwatsana na nyatsala. 36N'esonzigu s'omʉndʉ bandabya bandʉ b'omo nyʉmba yɨwe.#10:36 Mika 7:6. 37Oyo utsiire ishe kʉtse nyinya kʉlenga ingye, athanyɨtholere. N'oyo utsiire mʉgala kʉtse mwalɨ kʉlenga ingye, athanyɨtholere. 38Oyo uthahekire omʉsalaba ʉwe n'ɨnyɨkwama athanyɨtholere. 39Oyo wandashondya ilamya obʉyɨngo bʉwe andahetsyabo. Hewethuwe yo wandahetsyabo bʉshana nangye andalamyabo.»
Lʉhembo lw'abo bakokya abɨga ba Yesʉ
(Mar 9:41)
40«Omʉndʉ yo ubakokya niamanyikokya, n'oyo unyikokya niakokya yo wanyɨthʉmaga. 41Oyo wamakokya omʉmɨnyeretsɨ kʉshangwa nɨ mʉmɨnyeretsɨ, andabona lʉhembo lw'omʉmɨnyeretsɨ, n'oyo ukokya omʉthʉnganene kʉshangwa nɨ mʉthʉnganene andabona lʉhembo lw'omʉthʉnganene. 42Kwenene enyɨbabwɨra, oyo ʉha mʉgʉma w'oko bake-bake b'omo bɨga baye yo lwatha lwa metsi mʉfʉ, kʉshangwa nɨ mwɨga aye, athɨndabʉshe ɨhabwa olʉhembo lʉwe.»
Currently Selected:
Matayo 10: ver
Highlight
Share
Copy
Want to have your highlights saved across all your devices? Sign up or sign in
2025 Group of Associations for the Promotion of Languages, Cultures for Integral Development