Markə 1
1
Zââ Batistə mʉ̂ əpʉ kə azü
(Matiɔ 3.1-12; Luki 3.1-18; Zââ 1.19-28)
1Kə vɔtə̂ Ə̂rɔ̂ Əpʉ nə̂ Jezu Kristə, Ɨrɨ Ndjapä sə rəke. 2Lə fraka nə̂ awopandəma Ndjapä Ezayi, tshə tâ əpʉ ə pa:
«Ndjapä pâ: “Wü-a! Mə wla əyïawla nə̂ əmə ətshi zə
ndə kə pa tshə gamba äwä ətshi zə.”
3Ə̈bə̈ əzü sə kə ta râwâ lə ngbûndû ə pa:
“E gämba äwä ə̂në Âgbɔ̂ Əyïngerə ə na tə̂ nə kɔ,
e gämba äwä ye ndji.”»#1.3 Wu Eza 40.3.
4Zââ Batistə yî kumu ye lə ngbûndû ə yîsə̂ Əpʉ Ndjapä kə azü ə pâ: «E tshï äwä angbrɔ kə mbrə aərə nə̂ e tʉ ə zä batamo kanika Ndjapä gba tshelə anyaka nə̂ e.» 5Azü âfɔ lə ashɔ Jude nɔ̂ də azü gala Jeruzalamə nɔ̂ ə nâ gâ tə̂ Zââ. Əndje yîsə̂ anyaka nə̂ əndje gashu â Zââ nə zâ batamo kə əndje lə ə̂ngû Jurda.
6Zââ nə yî ləba ə̂në əndje mbrə̂ də əsu shamo kɔ ə î tshelə ye də ə̂wû akwa agia. Rəgo nə̂ ye kə də̂ alagbɔ̂ də əjerɔ akotrɔ. 7Tshə yîsə̂ əpʉ kə azü ə pa: «Ə̈bə̈ əzü sə kə na gu nə mandâ əmə, tshə sə tə worɔgbɔ ə rô əmə, mə lï lï ndə kə terə gâ tshekudu ye ndə kə wora ə̂wû tama nə̂ ye ne. 8Əmə, mə zâ batamo ə̂ngû kə e, bale, ətshə, tshə sə kə za batamo Âgbɔ̂ Yîrə̂ kə e.»
Batamo nə̂ Jezu
(Matiɔ 3.13-17; Luki 3.21-22)
9Tə̂ alɔ nə səkɔ, Jezu âfɔ mâ Nazaratə, lə ashɔ əgɔ Galile ə nâ â Zââ nə zâ batamo kə ətshə lə ə̂ngû Jurda nə. 10Alɔ ə̂në Jezu sə̂ kə wutu la ə̂ngû nə kɔ, tshə wû tshelafɔ ə krɔ̂ â Âgbɔ̂ Yîrə̂ jêrə gâ pâ ye mata gbakuduba. 11Ə̈bə̈ tshema tô mâ lafɔ ə pâ: «Bə sə tə Ɨrɨ əmə ə̂në mə yində zə tə bandanə, tshelə əmə mɔ tə̂ zə tə bandanə!»
Djablo trâ Jezu mâ lə ngbûndû
(Matiɔ 4.1-11; Luki 4.1-13)
12Trale mandânə, Âgbɔ̂ Yîrə̂ nə zâ Jezu nə ə nâ də ətshə mâ lə ngbûndû. 13Mâ lə ngbûndû nə mâ je, tshə mbrə̂ əlo zazü bishi â Sataa trâ lɔsu ye. Tshə sə̂ lə takpa tə̂ aagia güsü. Atrawaya nə̂ Ndjapä mâ kə ətshə.
Jezu mʉ̂ Ə̂rɔ̂ Əpʉ lə əgɔ Galile
(Matiɔ 4.12-17; Luki 4.14-15)
14Mandânə ə̂në əndje kânga Zââ nə gâ ye kɔ, Jezu nâ na ye lə əgɔ Galile ə mʉ̂ Ə̂rɔ̂ Əpʉ nə̂ Ndjapä kə azü. 15Tshə pâ: «Alɔ nə lî gâ ye, Əgɔngerə nə̂ Ndjapä ndô trö gâ ye. E tshï äwä angbrɔ kə mbrə tə̂ e tʉ ə yində Ə̂rɔ̂ Əpʉ də lɔsu e.»
Jezu ê aangbʉlî atrawaya nə̂ ye
(Matiɔ 4.18-22; Luki 5.1-11)
16Alɔ ə̂në Jezu sə̂ kə ro tə̂ ama dala ə̂ngû əgɔ Galile nə kɔ, tshə wû Shemɔ də aye nə də Andre, ə̂në əndje sə̂ kə wli gbânda la ə̂ngû nə kɔ mbrə ə̂në əndje sə̂ tə aawopra agiangû. 17Jezu pâ kə əndje ə pa: «E zä äwä əmə, mə sə kə mbrə e tə aawopra azü.» 18Kʉ pə kôto səkɔ, əndje tshî agbânda nə̂ əndje nə tʉ ə zâ äwä ye.
19Tshə rô kwatə̂ye teashe ə wû Zake də aye nə də Zââ ə̂në əndje sə tə aləvu Zebede kɔ. Əndje sə̂ gâ lə əgerə âgbâ nə̂ əndje â sə̂ kə gamba agbânda nə̂ əndje. 20Pa nə ə̂në Jezu wû əndje kɔ, tshə ê əndje. Əndje tshî abä əndje də Zebede nə də alayïkosəra nə̂ ye tʉ lə əgerə âgbâ nə ə zâ äwä Jezu nə.
Jezu grɔ̂ afrɔ yîrə̂ tə̂ ə̈bə̈ koshe
(Luki 4.31-37)
21Jezu də atrawaya nə̂ ye nâ mâ Kaprənayɔmə. Tə̂ əlo saaba, Jezu lî gâ lə anda aangbɔ ə vɔ̂tə̂ kə yisə̂ Əpʉ Ndjapä kə azü. 22Azü nə ə̂në əndje sə̂ kə dji əpʉ nə ə̂në tshə sə̂ kə pa nə kɔ, kumu əndje kpê pâ əndu əndje mbrə kə yisə̂ əpʉ nə̂ ye nə. Mbrə ə̂në tshə yîsə̂ əpʉ nə̂ ye nə tə əyïngerə, tshə yîsə̂ nə yî mata aawoyisə̂ âgbɔ̂ əpʉ nə̂ Mayïzə ne.
23Bale, lə anda aangbɔ nə̂ əndje nə, ə̈bə̈ koshe sə̂ je də afrɔ yîrə̂ lə ye. Tshə tâ râwâ tə âgbɔ̂ ə pa: 24«Wââ! Jezu, əzü əgɔ Nazaratə, ərə yekɔ nə̂ zə tə̂ ä a? Bə nâ ndə kə wo ä a? Mə wusə̂ zə: bə sə kpî tə əzü ə̂në Ndjapä wlâ əbə kɔ.» 25Jezu ngâ kə afrɔ yîrə̂ nə ə pâ: «Sə̈ ngboo ə wütu lə koshe səye!» 26Afrɔ yîrə̂ nə même koshe nə tə bandanə â wûtu lə ye ə tâ râwâ tə âgbɔ̂. 27Rawa zâ azü nə nɔ̂, əndje yû tə̂ əndje ə pa: «Ərə yekɔ kə sə̂? Ə̈bə̈ tafa kə yisə̂ əpʉ tə əyïngerə kə sə̂ a? Tshə zâ ama ndje kə aafrɔ ayirə̂ â əndje djî əpʉ ama ye.» 28Kʉ pə kôto, əɨrɨ Jezu nə zâ ətshe lə ashɔ əgɔ Galile nə nɔ̂.
Jezu grɔ̂ rəka tə̂ mbea Piarə tə yashe
(Matiɔ 8.14-15; Luki 4.38-39)
29Pa nə ə̂në əndje wûtu lə anda aangbɔ nə kɔ, Jezu də Zake gâ ndə Zââ nâ mâ lə anda nə̂ Shemɔ də Andre. 30Tshelə akwa mbea Shemɔ nə tə yashe sə̂ kədjï kədjï â tshə shô gâ tʉ. Pa nə ə̂në Jezu nə yî kumu ye kɔ, əndje pâ ndə ye kə Jezu nə. 31Tshə nâ trö də ətshə ə têgbɔ kəna ye ə gbə̂tɔ ətshə gâ lafɔ. Trale, rəka nə kâtə̂ ye â tshə vɔ̂tə̂ kə ko rəgo ndə kə pa əndje zɨ.
Jezu grɔ̂ arəka tə̂ ə̂kpû azü
(Matiɔ 4.24; 8.16-17; Luki 4.40-41)
32Də lɔkədɨ nə, azü nâ də alayïrəka nɔ̂ də azü ə̂në aafrɔ ayirə̂ sə̂ lə əndje kɔ kə Jezu. 33Azü tshelə gala nə nɔ̂ ngbô tə̂ əndje gâ lə manda nə. 34Tshə grɔ̂ adongo arəka tə̂ azü nə ngbatshe. Tshə grɔ̂ ndje aafrɔ ayirə̂ ngbatshe lə azü nə. Tshə kâtə̂ äwä kâ kə aafrɔ ayirə̂ nə ndə kə pa əndje pa əpʉ ne mbrə ə̂në əndje wûsə̂ ye gâ ye.
Jezu nâ na ye ndə kə mʉ Ə̂rɔ̂ Əpʉ
(Luki 4.42-44)
35Pə-ê də əzɨ, ə̂në ətshe sə̂ pə kə bu nə kɔ, Jezu âfɔ ə wûtu lagɔ nə ə nâ mâ lə ngbûndû â vɔ̂tə̂ kə yu Ndjapä. 36Shemɔ də agbɔbəngâ nə vɔ̂tə̂ kə pra ətshə. 37Alɔ ə̂në əndje sɔ̂tə̂ ye kɔ, əndje pâ kə ətshə ə pa: «Azü nɔ̂ sə kə pra əbə.» 38Jezu pâ kə əndje ə pa: «A na na ye tə̂ ə̈bə̈ ata ətshe lə alabə̈ tshelagɔ ə̂në ə sə trö koye kɔ ndə kə pa mə mʉ Ə̂rɔ̂ Əpʉ ndje lə nə, mbrə ə̂në lə kumu nə də̂ mə nâ kɔ.» 39Rəkɔ, Jezu nâ na ye lə aanda aangbɔ lə ashɔ əgɔ Galile nɔ̂. Tshə yîsə̂ Ə̂rɔ̂ Əpʉ kə azü ə grɔ̂ ndje aafrɔ ayirə̂ tə̂ azü.
Jezu grɔ̂ broma tə̂ ə̈bə̈ əzü
(Matiɔ 8.1-4; Luki 5.12-16)
40Ndə ə̈bə̈ alɔ, ə̈bə̈ əyïbroma nâ gâ ngotə̂ Jezu ə tê gâ tshekudu ye ə kɨ̂ ə̂sə̂ əyo tə̂ ye kə ətshə ə pa: «Kədə bə yində nə, bə lï ndə kə mbrə ndə kə pa akwa əmə sə mvo.» 41Əyo ye mbrə̂ Jezu nə, â tshə yî kəna ye ə gôro əyïbroma nə ə pa kə ətshə ə pa: «Mə yîndə nə gâ ye, akwa zə nə sə̈ mvo.» 42Kʉ pə kôto səkɔ, broma nə kâtə̂ ye gâ ye â akwa ye sə̂ mvo. 43Mandânə, Jezu ngâ kə ətshə tə bandanə ə grɔ̂ ətshə, 44ə pâ kə ətshə ə pa: «Pä ndə nə pä kə ə̈bə̈ əzü bale ne. Bale, nä ə mä tə̂ zə kə awotokrɔ. Tö əkrɔ mata ə̂në âgbɔ̂ əpʉ nə̂ Mayïzə yû tshuku nə kɔ ndə kə yisə̂ nə ə pa broma nə̂ zə nə nglɔ̂ gâ ye.» 45Bale, koshe nə rô â vɔ̂tə̂ kə mʉ əpʉ ərə nə ə̂në ə wûtu kɔ tə̂ ətshe nɔ̂ kə azü nɔ̂. Mbrə nə, Jezu lî lî ndə kə ma tə̂ ye, lə ə̈bə̈ gala, gashu lə ala azü ne. Tshə dâka pə tʉ lə ngbûndû nə. Azü âfɔ lə aəgɔ bale bale ə nâ gâ tə̂ ye.
Currently Selected:
Markə 1: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
Markə 1
1
Zââ Batistə mʉ̂ əpʉ kə azü
(Matiɔ 3.1-12; Luki 3.1-18; Zââ 1.19-28)
1Kə vɔtə̂ Ə̂rɔ̂ Əpʉ nə̂ Jezu Kristə, Ɨrɨ Ndjapä sə rəke. 2Lə fraka nə̂ awopandəma Ndjapä Ezayi, tshə tâ əpʉ ə pa:
«Ndjapä pâ: “Wü-a! Mə wla əyïawla nə̂ əmə ətshi zə
ndə kə pa tshə gamba äwä ətshi zə.”
3Ə̈bə̈ əzü sə kə ta râwâ lə ngbûndû ə pa:
“E gämba äwä ə̂në Âgbɔ̂ Əyïngerə ə na tə̂ nə kɔ,
e gämba äwä ye ndji.”»#1.3 Wu Eza 40.3.
4Zââ Batistə yî kumu ye lə ngbûndû ə yîsə̂ Əpʉ Ndjapä kə azü ə pâ: «E tshï äwä angbrɔ kə mbrə aərə nə̂ e tʉ ə zä batamo kanika Ndjapä gba tshelə anyaka nə̂ e.» 5Azü âfɔ lə ashɔ Jude nɔ̂ də azü gala Jeruzalamə nɔ̂ ə nâ gâ tə̂ Zââ. Əndje yîsə̂ anyaka nə̂ əndje gashu â Zââ nə zâ batamo kə əndje lə ə̂ngû Jurda.
6Zââ nə yî ləba ə̂në əndje mbrə̂ də əsu shamo kɔ ə î tshelə ye də ə̂wû akwa agia. Rəgo nə̂ ye kə də̂ alagbɔ̂ də əjerɔ akotrɔ. 7Tshə yîsə̂ əpʉ kə azü ə pa: «Ə̈bə̈ əzü sə kə na gu nə mandâ əmə, tshə sə tə worɔgbɔ ə rô əmə, mə lï lï ndə kə terə gâ tshekudu ye ndə kə wora ə̂wû tama nə̂ ye ne. 8Əmə, mə zâ batamo ə̂ngû kə e, bale, ətshə, tshə sə kə za batamo Âgbɔ̂ Yîrə̂ kə e.»
Batamo nə̂ Jezu
(Matiɔ 3.13-17; Luki 3.21-22)
9Tə̂ alɔ nə səkɔ, Jezu âfɔ mâ Nazaratə, lə ashɔ əgɔ Galile ə nâ â Zââ nə zâ batamo kə ətshə lə ə̂ngû Jurda nə. 10Alɔ ə̂në Jezu sə̂ kə wutu la ə̂ngû nə kɔ, tshə wû tshelafɔ ə krɔ̂ â Âgbɔ̂ Yîrə̂ jêrə gâ pâ ye mata gbakuduba. 11Ə̈bə̈ tshema tô mâ lafɔ ə pâ: «Bə sə tə Ɨrɨ əmə ə̂në mə yində zə tə bandanə, tshelə əmə mɔ tə̂ zə tə bandanə!»
Djablo trâ Jezu mâ lə ngbûndû
(Matiɔ 4.1-11; Luki 4.1-13)
12Trale mandânə, Âgbɔ̂ Yîrə̂ nə zâ Jezu nə ə nâ də ətshə mâ lə ngbûndû. 13Mâ lə ngbûndû nə mâ je, tshə mbrə̂ əlo zazü bishi â Sataa trâ lɔsu ye. Tshə sə̂ lə takpa tə̂ aagia güsü. Atrawaya nə̂ Ndjapä mâ kə ətshə.
Jezu mʉ̂ Ə̂rɔ̂ Əpʉ lə əgɔ Galile
(Matiɔ 4.12-17; Luki 4.14-15)
14Mandânə ə̂në əndje kânga Zââ nə gâ ye kɔ, Jezu nâ na ye lə əgɔ Galile ə mʉ̂ Ə̂rɔ̂ Əpʉ nə̂ Ndjapä kə azü. 15Tshə pâ: «Alɔ nə lî gâ ye, Əgɔngerə nə̂ Ndjapä ndô trö gâ ye. E tshï äwä angbrɔ kə mbrə tə̂ e tʉ ə yində Ə̂rɔ̂ Əpʉ də lɔsu e.»
Jezu ê aangbʉlî atrawaya nə̂ ye
(Matiɔ 4.18-22; Luki 5.1-11)
16Alɔ ə̂në Jezu sə̂ kə ro tə̂ ama dala ə̂ngû əgɔ Galile nə kɔ, tshə wû Shemɔ də aye nə də Andre, ə̂në əndje sə̂ kə wli gbânda la ə̂ngû nə kɔ mbrə ə̂në əndje sə̂ tə aawopra agiangû. 17Jezu pâ kə əndje ə pa: «E zä äwä əmə, mə sə kə mbrə e tə aawopra azü.» 18Kʉ pə kôto səkɔ, əndje tshî agbânda nə̂ əndje nə tʉ ə zâ äwä ye.
19Tshə rô kwatə̂ye teashe ə wû Zake də aye nə də Zââ ə̂në əndje sə tə aləvu Zebede kɔ. Əndje sə̂ gâ lə əgerə âgbâ nə̂ əndje â sə̂ kə gamba agbânda nə̂ əndje. 20Pa nə ə̂në Jezu wû əndje kɔ, tshə ê əndje. Əndje tshî abä əndje də Zebede nə də alayïkosəra nə̂ ye tʉ lə əgerə âgbâ nə ə zâ äwä Jezu nə.
Jezu grɔ̂ afrɔ yîrə̂ tə̂ ə̈bə̈ koshe
(Luki 4.31-37)
21Jezu də atrawaya nə̂ ye nâ mâ Kaprənayɔmə. Tə̂ əlo saaba, Jezu lî gâ lə anda aangbɔ ə vɔ̂tə̂ kə yisə̂ Əpʉ Ndjapä kə azü. 22Azü nə ə̂në əndje sə̂ kə dji əpʉ nə ə̂në tshə sə̂ kə pa nə kɔ, kumu əndje kpê pâ əndu əndje mbrə kə yisə̂ əpʉ nə̂ ye nə. Mbrə ə̂në tshə yîsə̂ əpʉ nə̂ ye nə tə əyïngerə, tshə yîsə̂ nə yî mata aawoyisə̂ âgbɔ̂ əpʉ nə̂ Mayïzə ne.
23Bale, lə anda aangbɔ nə̂ əndje nə, ə̈bə̈ koshe sə̂ je də afrɔ yîrə̂ lə ye. Tshə tâ râwâ tə âgbɔ̂ ə pa: 24«Wââ! Jezu, əzü əgɔ Nazaratə, ərə yekɔ nə̂ zə tə̂ ä a? Bə nâ ndə kə wo ä a? Mə wusə̂ zə: bə sə kpî tə əzü ə̂në Ndjapä wlâ əbə kɔ.» 25Jezu ngâ kə afrɔ yîrə̂ nə ə pâ: «Sə̈ ngboo ə wütu lə koshe səye!» 26Afrɔ yîrə̂ nə même koshe nə tə bandanə â wûtu lə ye ə tâ râwâ tə âgbɔ̂. 27Rawa zâ azü nə nɔ̂, əndje yû tə̂ əndje ə pa: «Ərə yekɔ kə sə̂? Ə̈bə̈ tafa kə yisə̂ əpʉ tə əyïngerə kə sə̂ a? Tshə zâ ama ndje kə aafrɔ ayirə̂ â əndje djî əpʉ ama ye.» 28Kʉ pə kôto, əɨrɨ Jezu nə zâ ətshe lə ashɔ əgɔ Galile nə nɔ̂.
Jezu grɔ̂ rəka tə̂ mbea Piarə tə yashe
(Matiɔ 8.14-15; Luki 4.38-39)
29Pa nə ə̂në əndje wûtu lə anda aangbɔ nə kɔ, Jezu də Zake gâ ndə Zââ nâ mâ lə anda nə̂ Shemɔ də Andre. 30Tshelə akwa mbea Shemɔ nə tə yashe sə̂ kədjï kədjï â tshə shô gâ tʉ. Pa nə ə̂në Jezu nə yî kumu ye kɔ, əndje pâ ndə ye kə Jezu nə. 31Tshə nâ trö də ətshə ə têgbɔ kəna ye ə gbə̂tɔ ətshə gâ lafɔ. Trale, rəka nə kâtə̂ ye â tshə vɔ̂tə̂ kə ko rəgo ndə kə pa əndje zɨ.
Jezu grɔ̂ arəka tə̂ ə̂kpû azü
(Matiɔ 4.24; 8.16-17; Luki 4.40-41)
32Də lɔkədɨ nə, azü nâ də alayïrəka nɔ̂ də azü ə̂në aafrɔ ayirə̂ sə̂ lə əndje kɔ kə Jezu. 33Azü tshelə gala nə nɔ̂ ngbô tə̂ əndje gâ lə manda nə. 34Tshə grɔ̂ adongo arəka tə̂ azü nə ngbatshe. Tshə grɔ̂ ndje aafrɔ ayirə̂ ngbatshe lə azü nə. Tshə kâtə̂ äwä kâ kə aafrɔ ayirə̂ nə ndə kə pa əndje pa əpʉ ne mbrə ə̂në əndje wûsə̂ ye gâ ye.
Jezu nâ na ye ndə kə mʉ Ə̂rɔ̂ Əpʉ
(Luki 4.42-44)
35Pə-ê də əzɨ, ə̂në ətshe sə̂ pə kə bu nə kɔ, Jezu âfɔ ə wûtu lagɔ nə ə nâ mâ lə ngbûndû â vɔ̂tə̂ kə yu Ndjapä. 36Shemɔ də agbɔbəngâ nə vɔ̂tə̂ kə pra ətshə. 37Alɔ ə̂në əndje sɔ̂tə̂ ye kɔ, əndje pâ kə ətshə ə pa: «Azü nɔ̂ sə kə pra əbə.» 38Jezu pâ kə əndje ə pa: «A na na ye tə̂ ə̈bə̈ ata ətshe lə alabə̈ tshelagɔ ə̂në ə sə trö koye kɔ ndə kə pa mə mʉ Ə̂rɔ̂ Əpʉ ndje lə nə, mbrə ə̂në lə kumu nə də̂ mə nâ kɔ.» 39Rəkɔ, Jezu nâ na ye lə aanda aangbɔ lə ashɔ əgɔ Galile nɔ̂. Tshə yîsə̂ Ə̂rɔ̂ Əpʉ kə azü ə grɔ̂ ndje aafrɔ ayirə̂ tə̂ azü.
Jezu grɔ̂ broma tə̂ ə̈bə̈ əzü
(Matiɔ 8.1-4; Luki 5.12-16)
40Ndə ə̈bə̈ alɔ, ə̈bə̈ əyïbroma nâ gâ ngotə̂ Jezu ə tê gâ tshekudu ye ə kɨ̂ ə̂sə̂ əyo tə̂ ye kə ətshə ə pa: «Kədə bə yində nə, bə lï ndə kə mbrə ndə kə pa akwa əmə sə mvo.» 41Əyo ye mbrə̂ Jezu nə, â tshə yî kəna ye ə gôro əyïbroma nə ə pa kə ətshə ə pa: «Mə yîndə nə gâ ye, akwa zə nə sə̈ mvo.» 42Kʉ pə kôto səkɔ, broma nə kâtə̂ ye gâ ye â akwa ye sə̂ mvo. 43Mandânə, Jezu ngâ kə ətshə tə bandanə ə grɔ̂ ətshə, 44ə pâ kə ətshə ə pa: «Pä ndə nə pä kə ə̈bə̈ əzü bale ne. Bale, nä ə mä tə̂ zə kə awotokrɔ. Tö əkrɔ mata ə̂në âgbɔ̂ əpʉ nə̂ Mayïzə yû tshuku nə kɔ ndə kə yisə̂ nə ə pa broma nə̂ zə nə nglɔ̂ gâ ye.» 45Bale, koshe nə rô â vɔ̂tə̂ kə mʉ əpʉ ərə nə ə̂në ə wûtu kɔ tə̂ ətshe nɔ̂ kə azü nɔ̂. Mbrə nə, Jezu lî lî ndə kə ma tə̂ ye, lə ə̈bə̈ gala, gashu lə ala azü ne. Tshə dâka pə tʉ lə ngbûndû nə. Azü âfɔ lə aəgɔ bale bale ə nâ gâ tə̂ ye.
Currently Selected:
:
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation