Matiɔ 27
27
Əndje nâ də Jezu mâ ndə Pilatə
(Markə 15.1-2; Luki 22.66; 23.1; Zââ 18.28)
1Pə-ê də əzɨ, aâgbɔ̂ azü nə̂ aawotokrɔ nɔ̂ də aâgbɔ̂ azü nə̂ Ajuwufu djî tə̂ əndje äwä bale ndə kə wo Jezu. 2Əndje î ətshə ə nâ də ətshə ə zâ ətshə gâ lə kəna Pilatə, komandâ əgɔ nə, tshekudu əgɔ Rɔmə kɔ.
Kuzu Judasə
3Alɔ ə̂në Judasə nə ə̂në tshə kâ Jezu kɔ wû ə pa əndje wâ ngbanga gâ pâ Jezu gâ ye kɔ, əkɔ əpʉ nə kô ətshə â tshə nâ də əndʉ ə̂lê ngendja nə zazü bale də morofo nə kə aâgbɔ̂ azü nə̂ aawotokrɔ nə də aâgbɔ̂ azü nə. 4Tshə pâ kə əndje ə pa: «Mə mâ əmbrʉ ərə gâ ye, mə kâ əzü ə̂në tshə mâ ə̈bə̈ ərə mâ ne kɔ ndə kə pa əndje wo ətshə.» Əndje kîrə əpʉ ə pa: «Ənə̂ ä lə nə də̂ yea? Əpʉ nə̂ zə kə sə̂.» 5Judasə nə kô ngendja nə vê gâ lə Anda Ndjapä nə ə wûtu ə nâ ə dû ə̂wû gâ lə əgʉ ye â wô tə̂ ye. 6Aâgbɔ̂ azü nə̂ aawotokrɔ nə rɔ̂ ə̂lê ngendja nə â pâ: «Ə lï lï ndə kə pa a ko əndʉ ngendja səye gâ lə agrɔ Anda Ndjapä ne, mbrə ə̂në ə sə tə ngendja ə̈ndjï.»
7Mandânə ə̂në əndje djî tə̂ əndje gâ ye kɔ, əndje yɔ̂ kəndɨ nə̂ ə̈bə̈ awoso ləsû də ngendja nə ndə kə pa əndje shi akuzu atshângâ gâ lə nə. 8Âdârə ə̂në əndje ê kəndɨ səkɔ ə pa «Kəndɨ ə̈ndjï», ʉrrr ndjɔ kpəsəye kɔ kə sə̂. 9Bale, ndəma əpʉ ə̂në awopandəma Ndjapä Jeremi pâ kɔ mbrə̂ gâ ye, ə̂në tshə pâ: «Əndje kô ə̂lê ngendja zazü bale də morofo ə̂në azü əgɔ Isərayalə wû lə ala əndje tə ndogɔ ye kɔ, 10ə yɔ̂ də kəndɨ nə awoso ləsû, mata ə̂në Âgbɔ̂ Əyïngerə zâ ama də nə kə əmə gâ ye kɔ.»#27.10 Wu Zaka 11.12-13; Jer 32.6-15.
Jezu gâ ətshi Pilatə
(Markə 15.2-5; Luki 23.2-5,9-10; Zââ 18.29-38)
11Əndje nâ də Jezu gâ ətshi komandâ Pilatə nə. Komandâ nə yû ətshə də əpʉ ə pa: «Əbə, bə sə tə əyïngerə nə̂ Ajuwufu a?» Jezu kîrə əpʉ ə pa: «Əpʉ nə kə sə̂ â bə pa kɔ.»
12Bale, tshə kîrə əpʉ kîrə bale gâ pâ kə lea ətshə ə̂në aâgbɔ̂ azü nə̂ aawotokrɔ nə də aâgbɔ̂ azü nə lêa ətshə kɔ ne. 13Bale, Pilatə nə pâ kə ətshə ə pa: «Bə djî aəpʉ sə̂ nɔ̂ ə̂në əndje lea əbə tə̂ nə kɔ djî ne a?» 14Bale, Jezu kîrə əpʉ kîrə gâ pâ ə̈bə̈ əpʉ bale ne, â kumu komandâ nə kpê pâ əndu ye rô pâ nə.
Əndje wâ ngbanga kuzu gâ pâ Jezu
(Markə 15.6-15; Luki 23.13-25; Zââ 18.39–19.16)
15Alɔnɔ̂ tə̂ əlo sandaga Pakə, komandâ nə sə̂ kə wora ə̈bə̈ əyïkânga, ətshə ə̂në ə̂kpû azü nə ə yû tshuku ye kɔ kə əndje. 16Kandää, tə̂ alɔ nə səkɔ, ə̈bə̈ əyïkânga sə̂ je ə̂në azü wusə̂ ye tə bandanə, əɨrɨ ye kə də̂ Barabasə. 17Rəkɔ, Pilatə nə yû azü nə ə̂në əndje ngbô tə̂ əndje gâ tə̂ nə kɔ ə pa: «Əde də̂ e yində nə ə pa mə wora ətshə kə e? Barabasə, wala Jezu ə̂në əndje e ətshə ə pa Kristə kɔ a?» 18Mbrə ə̂në tshə wûsə̂ nə ə pa əndje zâ tshelə əndje ə zâ gâ tə̂ Jezu â kâ ətshə kə əne kɔ.
19Alɔ ə̂në Pilatə nə sə̂ gâ tʉ gâ ə̂sə̂ ngbanga kɔ, əwɔ nə wlâ ətshe kə ətshə ə pa: «Yï ama zə yï gâ lə əpʉ nə̂ ə̂rɔ̂ əzü səye ne, mbrə ə̂në də tsheləbu səye, mə wû əyo tə bandanə lə ə̈lü lə kumu ye.»
20Bale, aâgbɔ̂ azü nə̂ aawotokrɔ nə gâ ndə aâgbɔ̂ azü nə pâ kʉtə̂ nə kə ə̂kpû azü nə ə pa əndje yu tshuku Barabasə ə pa əndje wo də̂ Jezu nə. 21Komandâ nə kwâtə̂ye ə zâ əpʉ ə pâ kə əndje ə pa: «Əde lə takpa tə̂ əndje bishi nə, də̂ e yində nə ə pa mə wora ətshə kə e?» Əndje kîrə əpʉ ə pa: «Barabasə!» 22Pilatə nə pâ kə əndje ə pa: «Rəkɔ, mə sə kə ma yekɔ tə̂ Jezu nə ə̂në e e ətshə ə pa Kristə nə kɔ?» Əndje nɔ̂ kîrə əpʉ ə pa: «Kü ətshə gâ ala masheyɔ!» 23Pilatə nə yû əndje ə pa: «Bale, əmbrʉ ərə yekɔ də̂ tshə mâ a?» Əndje tâ râwâ kwatəndje rô pâ nə ə pa: «Kü ətshə gâ ala masheyɔ!» 24Alɔ ə̂në Pilatə nə wû ə pa əne lï lï ndə kə ma ə̈bə̈ ərə bale ne, â ə̂kpû azü nə âfɔ də əpʉ nə rô pâ nə gâ ye kɔ, tshə zâ ə̂ngû ə yûtu kəna ye lə ala ə̂kpû azü nə ə pâ: «Əpʉ ə̈ndjï koshe səye sə sə gâ lə kumu əmə ne! Əpʉ nə̂ e kə sə̂!» 25Ə̂kpû azü nə nɔ̂ kîrə əpʉ ə pa: «Əpʉ ə̈ndjï ye sə gâ lə kumu ä də aneshe nə̂ ä!» 26Bale, Pilatə nə wôra Barabasə nə kə əndje, ə zâ ama â əndje dâ Jezu nə də djakwa, â mandânə, tshə zâ ətshə kə əndje ndə kə pa əndje wo ətshə gâ ala masheyɔ nə.
Atrugu zâ Jezu tə ərə amɔ
(Markə 15.16-20; Luki 23.11; Zââ 19.2-3)
27Atrugu nə̂ Pilatə nə nâ də Jezu nə mâ lə anda nə̂ komandâ â ə̂dû atrugu nə nɔ̂ ngbô tə̂ əndje gâ ngotə̂ ye. 28Əndje vêrə aləba nə̂ ye tə̂ ye gâ ye â yî ə̈bə̈ ə̂drɔ̂ əgerə ləba gâ tə̂ ye. 29Mandânə, əndje djô ə̈bə̈ kpɔtɔ ngerə də aəshi â zâ gâ tə̂ kumu ye, ə zâ ə̈bə̈ wara gâ lə ndəkɔ ye. Â əndje gbə̂te gâ tshekudu ye ə mɔ̂ ətshə ə pa: «Wanda, əyïngerə nə̂ Ajuwufu!»
30Əndje kû ngrusu gâ tə̂ ye, ə zâ wara nə ə dâ tshelə kumu ye də nə. 31Ə̂në əndje mɔ̂ ətshə ʉrrr gâ ye kɔ, əndje djɔ̂ əgerə ləba nə tə̂ ye gâ tʉ ə yî aləba nə̂ ye nə gâ tə̂ ye, ə nâ də ətshə ndə kə ku ətshə gâ ala masheyɔ nə.
Atrugu kû Jezu gâ ala masheyɔ
(Markə 15.21-32; Luki 23.26-43; Zââ 19.16-24)
32Alɔ ə̂në əndje sə̂ kə wutu lə gala nə kɔ, əndje tê ə̈bə̈ koshe ə̂në əɨrɨ ye kə də̂ Shemɔ, əzü əgɔ Siranə kɔ. Əndje zâ ətshə də awlra ndə kə pa tshə za masheyɔ nə̂ Jezu nə. 33Əndje yî kumu əndje mâ tə̂ ətshe ə̂në əndje djî əɨrɨ nə ə pa Gɔlgɔta kɔ, âdâ nə kə də̂: «Ə̂sə̂ gbɔkrɔ». 34Əndje zâ duva ə̂në əndje za ə̈bə̈ ərə ə̂në ə shu ə shu kɔ gâ lə nə kə ətshə ndə kə pa tshə ndju; bale, alɔ ə̂në tshə trâ kɔ, tshə wə̂ra tə̂ ye ndə kə ndju nə.
35Əndje kû ətshə gâ ala masheyɔ nə, ə krû tshelə aləba nə̂ ye lə takpa tə̂ əndje tə̂ äwä kə tɔ də kədi. 36Mandânə, əndje sə gâ tʉ kôto ndə kə bata ətshə.
37Djoko lafɔ, pâ kumu ye, əndje tâ ə̈bə̈ ngrowô ndə kə yisə̂ âdâ ngbanga kuzu nə ə̂në əndje wâ gâ lə kumu ye kɔ ə pa: «Ətshə koye kə də̂ Jezu, əyïngerə nə̂ Ajuwufu.» 38Əndje kû Jezu nə gâ ala masheyɔ nə kôto gâ ndə alabə̈ aəmbrʉ azü bishi, əndje kû ə̈bə̈ nə djoko ndə ndəkɔ ye ə kû bale nə djoko ndə gəle ye.
39Azü ə̂në əndje sə̂ kə ro nə kɔ gû ətshə ə wûlu kumu əndje, 40ə pâ: «Əbə ə̂në bə ngɔ Anda Ndjapä gâ tʉ ə ma əndʉ nə lə aəlo vəta kɔ, shë tə̂ zə də ə̂tə̂ zə lə kuzu! Kədə bə sə tə Ɨrɨ Ndjapä, jërə la masheyɔ nə gâ tʉ.»
41 Aâgbɔ̂ azü nə̂ aawotokrɔ nə də aawoyisə̂ âgbɔ̂ əpʉ nə̂ Mayïzə nə gâ ndə aâgbɔ̂ azü nə ndje mɔ̂ ətshə ə pa: 42«Tshə tshɔ̂ alabə̈ azü lə kuzu, tshə lï lï ndə kə she tə̂ ye lə kuzu də ə̂tə̂ ye ne! Tshə də̂ əyïngerə əgɔ Isərayalə, ə̂në a lə ye, tshə jërə la masheyɔ nə gâ tʉ ka a yində əpʉ nə̂ ye nə. 43Tshə zâ lɔsu ye nɔ̂ kə Ndjapä, Ndjapä nə tshɔ̈ ətshə kpəsəye, kədə tshə yində ye, mbrə ə̂në tshə pâ: “Mə sə tə Ɨrɨ Ndjapä.”» 44Aəmbrʉ azü nə ə̂në əndje kû əndje gâ ala masheyɔ nə gâ ngotə̂ Jezu nə kɔ, gû ətshə äwä bale rə.
Kuzu Jezu
(Markə 15.33-41; Luki 23.44-49; Zââ 19.28-30)
45Ə̂në alɔ kâ kpə ə̂grû ətshe kɔ, ətshe bû sɔ pâ ashɔ nɔ̂ ʉrrr alɔ nɔ̂nɔ tə̂ ye gâ ə̂grû nə. 46Ə̂në alɔ nə nɔ̂nɔ tə̂ ye gâ ə̂grû nə gâ ye kɔ, Jezu tâ râwâ tə âgbɔ̂ ə pa: «Eli, Eli, lama sabakətani?», âdâ nə kə də̂: «Ndjapä nə̂ əmə, Ndjapä nə̂ əmə, mbrə yekɔ də̂ bə tshî əmə tʉ kɔ?»#27.46 Wu Ətsh 22.2. 47Alabə̈ azü nə ə̂në əndje sə̂ je kɔ, djî əpʉ ə̂në tshə pâ kɔ ə pâ: «E djï-a, tshə sə kə e Eli!» 48Trale, ə̈bə̈ nə bale kpê ärɔ̈ ə zâ ə̈bə̈ ndɔkɔrɔ ə ndrû gâ lə duva ə̂në ə kpi ə kpi kɔ ə î gâ tə̂ wara ə yî kə Jezu ndə kə pa tshə ndju. 49Bale, ə̂dû azü nə pâ: «E kä ə kä, a wü kədə Eli ə na ə tshɔ ətshə je!»
50Bale, Jezu kwâtə̂ye ə tâ râwâ tə âgbɔ̂ ə tshû.#27.50 Jezu…tshû: Jezu də ə̂tə̂ ye kə yində nə â tshu də alɔ nə səkɔ. Tshə tshû tshû mata əmbrʉ azü bishi səkɔ ə̂në əndje kû əndje də aəndje gâ ala masheyɔ kɔ ne. 51Kʉ pə kôto səkɔ, əgerə ləba ə̂në əndje dû gâ lafɔ ə wâ tshelə Anda Ndjapä nə kɔ, tshelə nə sûru kprû bishi ə vɔ̂tə̂ nə mâ lafɔ ʉrrr ndjɔ mâ tə̂ budu nə. Ashɔ même, tshelə əgbro aəkpʉ sûru, 52amanda aə̂dû krɔ̂ â ə̂kpû azü nə̂ Ndjapä ə̂në əndje tshû gâ ye kɔ shê. 53Əndje wûtu lə aə̂dû nə ə gû gâ lə gala Jeruzalamə nə ə̂në ə sə kpî mbrə Ndjapä kɔ, mandâ kə shê Jezu nə, â azü ngbatshe wû əndje.
54Alɔ ə̂në kapita nə̂ atrugu də atrugu nə ə̂në əndje sə̂ kə bata Jezu nə kɔ wû kə meme ashɔ nə də aərə ə̂në ə wûtu kɔ, âgbɔ̂ awa zâ əndje â əndje pâ: «Koshe səye sə ngâ tə Ɨrɨ Ndjapä.» 55Alabə̈ ayashe ə̂në əndje ngba ə ngba kɔ sə̂ je kôto ə kâ ngrʉ̂ â sə̂ kə lishi. Əndje vɔ̂tə̂ kə za äwä Jezu nə pə mâ Galile ndə kə ma kosəra kə ətshə. 56Lə takpa tə̂ əndje, Marə̂ əzü əgɔ Magədala də Marə̂ əyï a-Zake də Jozafu gâ ndə əyï aləvu Zebede sə̂ je.
Jozafu zâ əko Jezu gâ lə ə̈bə̈ ə̂dû
(Markə 15.42-47; Luki 23.50-56; Zââ 19.38-42)
57Də lɔkədɨ nə, ə̈bə̈ əyïrishi gala Arimate ə̂në əɨrɨ ye kə də̂ Jozafu kɔ yî kumu ye; tshə sə̂ ndje tə trawaya nə̂ Jezu. 58Tshə nâ mâ ndə Pilatə nə ə yû ətshə tə̂ əko Jezu nə. Bale, Pilatə nə zâ ama ndə kə pa əndje za əko ye nə kə ətshə. 59Jozafu nə zâ əko ye nə ə wôle ətshə də ləba ə̂në ə sə mvo kɔ 60ə zâ ətshə gâ lə ə̈bə̈ ə̂dû ə̂në əndje djî lə əgerə əkpʉ mbrə ətshə tə tafa nə kɔ. Mandânə, tshə wûru ə̈bə̈ əgerə əkpʉ gâ tə̂ manda ə̂dû nə ə gû na ye. 61Marə̂, əzü əgɔ Magədala də ə̈bə̈ Marə̂ nə sə̂ je, ə̂në əndje sə̂ gâ tʉ gâ ətshi ə̂dû nə.
Atrugu bâta ə̂dû Jezu nə
62Tshe nə krâ, ə̂në ə sə tə əlo mandâ əlo kə gamba aərə nə̂ Ajuwufu mbrə saaba kɔ, aâgbɔ̂ azü nə̂ aawotokrɔ də Afariza nâ mvrɔ mâ ndə Pilatə nə 63ə pâ: «Âgbɔ̂ əzü, ə̂sə̂ əpʉ sə̂ ə̂në əyïəterə səye pâ alɔ ə̂në tshə sə̂ pə tə sorô kɔ djerə ä djerə ne, tshə pâ: “Mandâ əlo vəta, mə sə kə she nə.” 64Rəkɔ, zä ama ndə kə pa atrugu bata ə̂dû nə, ʉrrr gâ tə̂ əlo vəta nə, kanika atrawaya nə̂ ye na na ə zɨ angba əko ye ka ə pa pa kə azü ə pa: “Tshə shê gâ ye!” ne. Əpʉ əterə səye ənə̂ tshe mandânə sə kə ro ənə̂ ətshinə səkɔ.»#27.64 Əpʉ əterə: Əlî əpʉ əterə nə, lə ala əndje kə də̂ əpʉ ə̂në Jezu pâ əne sə tə Kristə, Ɨrɨ Ndjapä kɔ. 65Bale, Pilatə nə pâ kə əndje ə pa: «Atrugu kə səye! E kö əndje ə gü ə bäta ə̂dû nə mata ə̂në tshelə e yində nə kɔ.» 66Rəkɔ, əndje gû ə zâ tapɔ gâ pâ əgerə əkpʉ nə ə̂në əndje zâ gâ tə̂ manda ə̂dû nə kɔ ə kô atrugu nə gâ tə̂ manda ə̂dû nə â əndje bâta.
Currently Selected:
Matiɔ 27: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
Matiɔ 27
27
Əndje nâ də Jezu mâ ndə Pilatə
(Markə 15.1-2; Luki 22.66; 23.1; Zââ 18.28)
1Pə-ê də əzɨ, aâgbɔ̂ azü nə̂ aawotokrɔ nɔ̂ də aâgbɔ̂ azü nə̂ Ajuwufu djî tə̂ əndje äwä bale ndə kə wo Jezu. 2Əndje î ətshə ə nâ də ətshə ə zâ ətshə gâ lə kəna Pilatə, komandâ əgɔ nə, tshekudu əgɔ Rɔmə kɔ.
Kuzu Judasə
3Alɔ ə̂në Judasə nə ə̂në tshə kâ Jezu kɔ wû ə pa əndje wâ ngbanga gâ pâ Jezu gâ ye kɔ, əkɔ əpʉ nə kô ətshə â tshə nâ də əndʉ ə̂lê ngendja nə zazü bale də morofo nə kə aâgbɔ̂ azü nə̂ aawotokrɔ nə də aâgbɔ̂ azü nə. 4Tshə pâ kə əndje ə pa: «Mə mâ əmbrʉ ərə gâ ye, mə kâ əzü ə̂në tshə mâ ə̈bə̈ ərə mâ ne kɔ ndə kə pa əndje wo ətshə.» Əndje kîrə əpʉ ə pa: «Ənə̂ ä lə nə də̂ yea? Əpʉ nə̂ zə kə sə̂.» 5Judasə nə kô ngendja nə vê gâ lə Anda Ndjapä nə ə wûtu ə nâ ə dû ə̂wû gâ lə əgʉ ye â wô tə̂ ye. 6Aâgbɔ̂ azü nə̂ aawotokrɔ nə rɔ̂ ə̂lê ngendja nə â pâ: «Ə lï lï ndə kə pa a ko əndʉ ngendja səye gâ lə agrɔ Anda Ndjapä ne, mbrə ə̂në ə sə tə ngendja ə̈ndjï.»
7Mandânə ə̂në əndje djî tə̂ əndje gâ ye kɔ, əndje yɔ̂ kəndɨ nə̂ ə̈bə̈ awoso ləsû də ngendja nə ndə kə pa əndje shi akuzu atshângâ gâ lə nə. 8Âdârə ə̂në əndje ê kəndɨ səkɔ ə pa «Kəndɨ ə̈ndjï», ʉrrr ndjɔ kpəsəye kɔ kə sə̂. 9Bale, ndəma əpʉ ə̂në awopandəma Ndjapä Jeremi pâ kɔ mbrə̂ gâ ye, ə̂në tshə pâ: «Əndje kô ə̂lê ngendja zazü bale də morofo ə̂në azü əgɔ Isərayalə wû lə ala əndje tə ndogɔ ye kɔ, 10ə yɔ̂ də kəndɨ nə awoso ləsû, mata ə̂në Âgbɔ̂ Əyïngerə zâ ama də nə kə əmə gâ ye kɔ.»#27.10 Wu Zaka 11.12-13; Jer 32.6-15.
Jezu gâ ətshi Pilatə
(Markə 15.2-5; Luki 23.2-5,9-10; Zââ 18.29-38)
11Əndje nâ də Jezu gâ ətshi komandâ Pilatə nə. Komandâ nə yû ətshə də əpʉ ə pa: «Əbə, bə sə tə əyïngerə nə̂ Ajuwufu a?» Jezu kîrə əpʉ ə pa: «Əpʉ nə kə sə̂ â bə pa kɔ.»
12Bale, tshə kîrə əpʉ kîrə bale gâ pâ kə lea ətshə ə̂në aâgbɔ̂ azü nə̂ aawotokrɔ nə də aâgbɔ̂ azü nə lêa ətshə kɔ ne. 13Bale, Pilatə nə pâ kə ətshə ə pa: «Bə djî aəpʉ sə̂ nɔ̂ ə̂në əndje lea əbə tə̂ nə kɔ djî ne a?» 14Bale, Jezu kîrə əpʉ kîrə gâ pâ ə̈bə̈ əpʉ bale ne, â kumu komandâ nə kpê pâ əndu ye rô pâ nə.
Əndje wâ ngbanga kuzu gâ pâ Jezu
(Markə 15.6-15; Luki 23.13-25; Zââ 18.39–19.16)
15Alɔnɔ̂ tə̂ əlo sandaga Pakə, komandâ nə sə̂ kə wora ə̈bə̈ əyïkânga, ətshə ə̂në ə̂kpû azü nə ə yû tshuku ye kɔ kə əndje. 16Kandää, tə̂ alɔ nə səkɔ, ə̈bə̈ əyïkânga sə̂ je ə̂në azü wusə̂ ye tə bandanə, əɨrɨ ye kə də̂ Barabasə. 17Rəkɔ, Pilatə nə yû azü nə ə̂në əndje ngbô tə̂ əndje gâ tə̂ nə kɔ ə pa: «Əde də̂ e yində nə ə pa mə wora ətshə kə e? Barabasə, wala Jezu ə̂në əndje e ətshə ə pa Kristə kɔ a?» 18Mbrə ə̂në tshə wûsə̂ nə ə pa əndje zâ tshelə əndje ə zâ gâ tə̂ Jezu â kâ ətshə kə əne kɔ.
19Alɔ ə̂në Pilatə nə sə̂ gâ tʉ gâ ə̂sə̂ ngbanga kɔ, əwɔ nə wlâ ətshe kə ətshə ə pa: «Yï ama zə yï gâ lə əpʉ nə̂ ə̂rɔ̂ əzü səye ne, mbrə ə̂në də tsheləbu səye, mə wû əyo tə bandanə lə ə̈lü lə kumu ye.»
20Bale, aâgbɔ̂ azü nə̂ aawotokrɔ nə gâ ndə aâgbɔ̂ azü nə pâ kʉtə̂ nə kə ə̂kpû azü nə ə pa əndje yu tshuku Barabasə ə pa əndje wo də̂ Jezu nə. 21Komandâ nə kwâtə̂ye ə zâ əpʉ ə pâ kə əndje ə pa: «Əde lə takpa tə̂ əndje bishi nə, də̂ e yində nə ə pa mə wora ətshə kə e?» Əndje kîrə əpʉ ə pa: «Barabasə!» 22Pilatə nə pâ kə əndje ə pa: «Rəkɔ, mə sə kə ma yekɔ tə̂ Jezu nə ə̂në e e ətshə ə pa Kristə nə kɔ?» Əndje nɔ̂ kîrə əpʉ ə pa: «Kü ətshə gâ ala masheyɔ!» 23Pilatə nə yû əndje ə pa: «Bale, əmbrʉ ərə yekɔ də̂ tshə mâ a?» Əndje tâ râwâ kwatəndje rô pâ nə ə pa: «Kü ətshə gâ ala masheyɔ!» 24Alɔ ə̂në Pilatə nə wû ə pa əne lï lï ndə kə ma ə̈bə̈ ərə bale ne, â ə̂kpû azü nə âfɔ də əpʉ nə rô pâ nə gâ ye kɔ, tshə zâ ə̂ngû ə yûtu kəna ye lə ala ə̂kpû azü nə ə pâ: «Əpʉ ə̈ndjï koshe səye sə sə gâ lə kumu əmə ne! Əpʉ nə̂ e kə sə̂!» 25Ə̂kpû azü nə nɔ̂ kîrə əpʉ ə pa: «Əpʉ ə̈ndjï ye sə gâ lə kumu ä də aneshe nə̂ ä!» 26Bale, Pilatə nə wôra Barabasə nə kə əndje, ə zâ ama â əndje dâ Jezu nə də djakwa, â mandânə, tshə zâ ətshə kə əndje ndə kə pa əndje wo ətshə gâ ala masheyɔ nə.
Atrugu zâ Jezu tə ərə amɔ
(Markə 15.16-20; Luki 23.11; Zââ 19.2-3)
27Atrugu nə̂ Pilatə nə nâ də Jezu nə mâ lə anda nə̂ komandâ â ə̂dû atrugu nə nɔ̂ ngbô tə̂ əndje gâ ngotə̂ ye. 28Əndje vêrə aləba nə̂ ye tə̂ ye gâ ye â yî ə̈bə̈ ə̂drɔ̂ əgerə ləba gâ tə̂ ye. 29Mandânə, əndje djô ə̈bə̈ kpɔtɔ ngerə də aəshi â zâ gâ tə̂ kumu ye, ə zâ ə̈bə̈ wara gâ lə ndəkɔ ye. Â əndje gbə̂te gâ tshekudu ye ə mɔ̂ ətshə ə pa: «Wanda, əyïngerə nə̂ Ajuwufu!»
30Əndje kû ngrusu gâ tə̂ ye, ə zâ wara nə ə dâ tshelə kumu ye də nə. 31Ə̂në əndje mɔ̂ ətshə ʉrrr gâ ye kɔ, əndje djɔ̂ əgerə ləba nə tə̂ ye gâ tʉ ə yî aləba nə̂ ye nə gâ tə̂ ye, ə nâ də ətshə ndə kə ku ətshə gâ ala masheyɔ nə.
Atrugu kû Jezu gâ ala masheyɔ
(Markə 15.21-32; Luki 23.26-43; Zââ 19.16-24)
32Alɔ ə̂në əndje sə̂ kə wutu lə gala nə kɔ, əndje tê ə̈bə̈ koshe ə̂në əɨrɨ ye kə də̂ Shemɔ, əzü əgɔ Siranə kɔ. Əndje zâ ətshə də awlra ndə kə pa tshə za masheyɔ nə̂ Jezu nə. 33Əndje yî kumu əndje mâ tə̂ ətshe ə̂në əndje djî əɨrɨ nə ə pa Gɔlgɔta kɔ, âdâ nə kə də̂: «Ə̂sə̂ gbɔkrɔ». 34Əndje zâ duva ə̂në əndje za ə̈bə̈ ərə ə̂në ə shu ə shu kɔ gâ lə nə kə ətshə ndə kə pa tshə ndju; bale, alɔ ə̂në tshə trâ kɔ, tshə wə̂ra tə̂ ye ndə kə ndju nə.
35Əndje kû ətshə gâ ala masheyɔ nə, ə krû tshelə aləba nə̂ ye lə takpa tə̂ əndje tə̂ äwä kə tɔ də kədi. 36Mandânə, əndje sə gâ tʉ kôto ndə kə bata ətshə.
37Djoko lafɔ, pâ kumu ye, əndje tâ ə̈bə̈ ngrowô ndə kə yisə̂ âdâ ngbanga kuzu nə ə̂në əndje wâ gâ lə kumu ye kɔ ə pa: «Ətshə koye kə də̂ Jezu, əyïngerə nə̂ Ajuwufu.» 38Əndje kû Jezu nə gâ ala masheyɔ nə kôto gâ ndə alabə̈ aəmbrʉ azü bishi, əndje kû ə̈bə̈ nə djoko ndə ndəkɔ ye ə kû bale nə djoko ndə gəle ye.
39Azü ə̂në əndje sə̂ kə ro nə kɔ gû ətshə ə wûlu kumu əndje, 40ə pâ: «Əbə ə̂në bə ngɔ Anda Ndjapä gâ tʉ ə ma əndʉ nə lə aəlo vəta kɔ, shë tə̂ zə də ə̂tə̂ zə lə kuzu! Kədə bə sə tə Ɨrɨ Ndjapä, jërə la masheyɔ nə gâ tʉ.»
41 Aâgbɔ̂ azü nə̂ aawotokrɔ nə də aawoyisə̂ âgbɔ̂ əpʉ nə̂ Mayïzə nə gâ ndə aâgbɔ̂ azü nə ndje mɔ̂ ətshə ə pa: 42«Tshə tshɔ̂ alabə̈ azü lə kuzu, tshə lï lï ndə kə she tə̂ ye lə kuzu də ə̂tə̂ ye ne! Tshə də̂ əyïngerə əgɔ Isərayalə, ə̂në a lə ye, tshə jërə la masheyɔ nə gâ tʉ ka a yində əpʉ nə̂ ye nə. 43Tshə zâ lɔsu ye nɔ̂ kə Ndjapä, Ndjapä nə tshɔ̈ ətshə kpəsəye, kədə tshə yində ye, mbrə ə̂në tshə pâ: “Mə sə tə Ɨrɨ Ndjapä.”» 44Aəmbrʉ azü nə ə̂në əndje kû əndje gâ ala masheyɔ nə gâ ngotə̂ Jezu nə kɔ, gû ətshə äwä bale rə.
Kuzu Jezu
(Markə 15.33-41; Luki 23.44-49; Zââ 19.28-30)
45Ə̂në alɔ kâ kpə ə̂grû ətshe kɔ, ətshe bû sɔ pâ ashɔ nɔ̂ ʉrrr alɔ nɔ̂nɔ tə̂ ye gâ ə̂grû nə. 46Ə̂në alɔ nə nɔ̂nɔ tə̂ ye gâ ə̂grû nə gâ ye kɔ, Jezu tâ râwâ tə âgbɔ̂ ə pa: «Eli, Eli, lama sabakətani?», âdâ nə kə də̂: «Ndjapä nə̂ əmə, Ndjapä nə̂ əmə, mbrə yekɔ də̂ bə tshî əmə tʉ kɔ?»#27.46 Wu Ətsh 22.2. 47Alabə̈ azü nə ə̂në əndje sə̂ je kɔ, djî əpʉ ə̂në tshə pâ kɔ ə pâ: «E djï-a, tshə sə kə e Eli!» 48Trale, ə̈bə̈ nə bale kpê ärɔ̈ ə zâ ə̈bə̈ ndɔkɔrɔ ə ndrû gâ lə duva ə̂në ə kpi ə kpi kɔ ə î gâ tə̂ wara ə yî kə Jezu ndə kə pa tshə ndju. 49Bale, ə̂dû azü nə pâ: «E kä ə kä, a wü kədə Eli ə na ə tshɔ ətshə je!»
50Bale, Jezu kwâtə̂ye ə tâ râwâ tə âgbɔ̂ ə tshû.#27.50 Jezu…tshû: Jezu də ə̂tə̂ ye kə yində nə â tshu də alɔ nə səkɔ. Tshə tshû tshû mata əmbrʉ azü bishi səkɔ ə̂në əndje kû əndje də aəndje gâ ala masheyɔ kɔ ne. 51Kʉ pə kôto səkɔ, əgerə ləba ə̂në əndje dû gâ lafɔ ə wâ tshelə Anda Ndjapä nə kɔ, tshelə nə sûru kprû bishi ə vɔ̂tə̂ nə mâ lafɔ ʉrrr ndjɔ mâ tə̂ budu nə. Ashɔ même, tshelə əgbro aəkpʉ sûru, 52amanda aə̂dû krɔ̂ â ə̂kpû azü nə̂ Ndjapä ə̂në əndje tshû gâ ye kɔ shê. 53Əndje wûtu lə aə̂dû nə ə gû gâ lə gala Jeruzalamə nə ə̂në ə sə kpî mbrə Ndjapä kɔ, mandâ kə shê Jezu nə, â azü ngbatshe wû əndje.
54Alɔ ə̂në kapita nə̂ atrugu də atrugu nə ə̂në əndje sə̂ kə bata Jezu nə kɔ wû kə meme ashɔ nə də aərə ə̂në ə wûtu kɔ, âgbɔ̂ awa zâ əndje â əndje pâ: «Koshe səye sə ngâ tə Ɨrɨ Ndjapä.» 55Alabə̈ ayashe ə̂në əndje ngba ə ngba kɔ sə̂ je kôto ə kâ ngrʉ̂ â sə̂ kə lishi. Əndje vɔ̂tə̂ kə za äwä Jezu nə pə mâ Galile ndə kə ma kosəra kə ətshə. 56Lə takpa tə̂ əndje, Marə̂ əzü əgɔ Magədala də Marə̂ əyï a-Zake də Jozafu gâ ndə əyï aləvu Zebede sə̂ je.
Jozafu zâ əko Jezu gâ lə ə̈bə̈ ə̂dû
(Markə 15.42-47; Luki 23.50-56; Zââ 19.38-42)
57Də lɔkədɨ nə, ə̈bə̈ əyïrishi gala Arimate ə̂në əɨrɨ ye kə də̂ Jozafu kɔ yî kumu ye; tshə sə̂ ndje tə trawaya nə̂ Jezu. 58Tshə nâ mâ ndə Pilatə nə ə yû ətshə tə̂ əko Jezu nə. Bale, Pilatə nə zâ ama ndə kə pa əndje za əko ye nə kə ətshə. 59Jozafu nə zâ əko ye nə ə wôle ətshə də ləba ə̂në ə sə mvo kɔ 60ə zâ ətshə gâ lə ə̈bə̈ ə̂dû ə̂në əndje djî lə əgerə əkpʉ mbrə ətshə tə tafa nə kɔ. Mandânə, tshə wûru ə̈bə̈ əgerə əkpʉ gâ tə̂ manda ə̂dû nə ə gû na ye. 61Marə̂, əzü əgɔ Magədala də ə̈bə̈ Marə̂ nə sə̂ je, ə̂në əndje sə̂ gâ tʉ gâ ətshi ə̂dû nə.
Atrugu bâta ə̂dû Jezu nə
62Tshe nə krâ, ə̂në ə sə tə əlo mandâ əlo kə gamba aərə nə̂ Ajuwufu mbrə saaba kɔ, aâgbɔ̂ azü nə̂ aawotokrɔ də Afariza nâ mvrɔ mâ ndə Pilatə nə 63ə pâ: «Âgbɔ̂ əzü, ə̂sə̂ əpʉ sə̂ ə̂në əyïəterə səye pâ alɔ ə̂në tshə sə̂ pə tə sorô kɔ djerə ä djerə ne, tshə pâ: “Mandâ əlo vəta, mə sə kə she nə.” 64Rəkɔ, zä ama ndə kə pa atrugu bata ə̂dû nə, ʉrrr gâ tə̂ əlo vəta nə, kanika atrawaya nə̂ ye na na ə zɨ angba əko ye ka ə pa pa kə azü ə pa: “Tshə shê gâ ye!” ne. Əpʉ əterə səye ənə̂ tshe mandânə sə kə ro ənə̂ ətshinə səkɔ.»#27.64 Əpʉ əterə: Əlî əpʉ əterə nə, lə ala əndje kə də̂ əpʉ ə̂në Jezu pâ əne sə tə Kristə, Ɨrɨ Ndjapä kɔ. 65Bale, Pilatə nə pâ kə əndje ə pa: «Atrugu kə səye! E kö əndje ə gü ə bäta ə̂dû nə mata ə̂në tshelə e yində nə kɔ.» 66Rəkɔ, əndje gû ə zâ tapɔ gâ pâ əgerə əkpʉ nə ə̂në əndje zâ gâ tə̂ manda ə̂dû nə kɔ ə kô atrugu nə gâ tə̂ manda ə̂dû nə â əndje bâta.
Currently Selected:
:
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation