ᔪᐃᓕᐅᑉ ᐊᒡᓚᖏᑦ 1
1
1ᐊᑕᓂᖅ ᐅᖃᖅᐳᖅ ᔪᐃᓕᒧᑦ ᐱᑐᐃᓕᐅᑉ ᐃᕐᖕᓂᖓᓄᑦ.
ᐃᓄᐃᑦ ᕿᒃᓵᖕᓂᖏᑦ ᓂᐊᖂᔭᒃᓮᑦ ᐊᓯᕈᖅᑕᐅᓂᖏᓐᓄᑦ
2ᒪᑐᒥᖓ ᑐᓴᕆᑦᓯ, ᐃᓕᑦᓯ ᐊᖓᔪᒃᓯᐅᔪᓯ;
ᔫᑕᒥᐅᑕᐅᔪᓯ ᐃᓘᓐᓇᓯ ᓈᓚᒋᑦᓯ!
ᑍᒤᑦᑐᒦᒃ ᓇᓪᓕᐅᑎᔪᖃᓚᐅᖅᓯᒪᕚ ᐃᓅᑎᓪᓗᓯ,
ᐅᕝᕙᓘᓐᓃᑦ ᐊᑖᑕᒋᓚᐅᖅᑕᓯ ᐃᓅᑎᓪᓗᒌᑦ?
3ᕿᑐᕐᖓᓯ ᐅᓂᒃᑲᐅᑎᓯᒋᑦ ᑕᒪᑐᒥᖓ;
ᕿᑐᕐᖓᒥᖕᓄᑦ ᐅᓂᒃᑳᖁᓪᓗᒋᑦ,
ᕿᑐᕐᖓᖏᑕᓗ ᑭᖑᕚᖏᓐᓄᑦ.
4ᐅᓄᖅᑐᕐᔪᐊᑦ ᓂᕆᔩᑦ ᐱᒡᓕᖅᑕᐅᔮᖅᑐᑦ ᓂᕆᓂᐊᖅᐳᑦ ᐱᕈᖅᑐᓂᒃ,
ᐊᒥᐊᒃᑯᖏᑦ ᓂᕆᔭᐅᓂᐊᖅᐳᑦ ᐱᒡᓕᖅᑕᐅᔮᖅᑐᓄᑦ ᐹᕐᖑᖅᑐᓄᑦ ᐅᓄᖅᑐᕐᔪᐊᓄᑦ,
ᐱᒡᓕᖅᑕᐅᔮᖅᑐᓪᓗ ᐹᕐᖑᖅᑐᑦ ᐊᒥᐊᒃᑯᖏᑦ,
ᓂᕆᔭᐅᓂᐊᖅᐳᑦ ᓄᖑᕅᔨᓄᑦ ᐱᒡᓕᖅᑕᐅᔮᖅᑐᓄᑦ.
5ᑐᐸᓕᕆᑦᓯ, ᐃᓕᑦᓯ ᐋᖓᔮᖅᑎᐅᔪᓯ, ᕿᐊᓗᓯᓗ;
ᓂᐹᓕᕆᑦᓯ ᐃᓕᑦᓯ ᕔᓂᑐᖅᑎᐅᔪᓯ,
ᕔᓂᐅᑉ ᐃᑦᓯᒃᓴᖏᑦ ᓄᑖᑦ ᐊᓯᕈᖅᑕᐅᖕᒪᑕ.
6 #
ᑕᑯᑎ 9:8. ᐱᒡᓕᖅᑕᐅᔮᖅᑐᑦ ᐃᓅᖃᑎᒌᒡᔪᐊᑎᑐᑦ ᐊᓯᕈᐃᒋᐊᖅᑐᕐᖕᒪᑕ ᓄᓇᖁᑎᑦᑎᓐᓂᒃ,
ᐅᓄᓗᐊᕐᖕᒪᑕ ᐊᔪᖏᑦᑑᓗᐊᖅᓗᑎᒡᓗ ᓈᓴᒐᒃᓴᐅᖏᑦᑐᑦ;
ᑭᒍᑎᖃᖅᐳᑦ ᓛᔭᑎᑐᑦ,
ᑐᓗᕆᐊᖏᑦ ᓛᔭᐅᑉ ᐊᕐᖕᓇᓪᓗᖏᑎᑐᑦ ᑍᒤᑉᐳᑦ.
7ᕔᓂᓕᐅᕐᕕᕗᑦ ᐊᓯᕈᖅᑕᐅᖕᒪᑕ,
ᓇᐹᖅᑐᐃᓪᓗ ᐸᐅᕐᖓᓖᑦ ᐱᒋᓕᖕᓂᒃ ᓂᕆᔭᐅᖕᒪᑕ,
ᓇᐹᖅᑐᐃᑉ ᐊᒥᕅᔭᑦᓯᐊᖅᓗᒋᑦ ᐃᒋᑕᐅᕗᑦ;
ᐊᕙᓚᖓᔪᖏᓪᓗ ᖃᑯᖅᓯᓪᓗᑎᒃ.
8ᕿᐊᒋᑦᓯ, ᐃᓕᑦᓯ ᐃᓅᔪᓯ,
ᐊᕐᖕᓇᑐᑦ ᐃᓅᓱᒃᑑᓪᓗᓂ ᕿᒃᓵᒍᑎᖃᖅᑐᑐᑦ
ᐅᐃᑖᕆᓂᐊᓚᐅᖅᑕᖓ ᑐᖁᖕᒪᑦ.
9ᓂᐊᖂᔭᒃᓴᒥᒃ ᕔᓂᒥᒡᓘᓐᓃᑦ ᑐᓂᕐᕈᓯᕈᑎᒃᓴᖃᕈᓐᓁᕐᖕᒪᑦ
ᐊᑕᓂᐅᑉ ᐃᒡᓗᖓᓂ;
ᑐᓂᕐᕈᓯᖅᑎᑦᓯᔩᑦ ᐱᓇᓱᐊᖅᐸᒃᑐᑦ
ᕿᒃᓵᓕᖅᐳᑦ ᑐᓂᕐᕈᑎᒃᓴᖅᑕᖃᕈᓐᓁᕐᖕᒪᑦ ᐊᑕᓂᕐᖕᒧᑦ.
10ᐱᕈᖅᓰᕖᑦ ᐊᑐᕈᓐᓁᖅᐳᑦ;
ᓄᓇᓗ ᕿᒃᓵᒃᐳᖅ, ᓂᐊᑰᔭᒃᓮᑦ ᐊᓯᕈᖅᑕᐅᓂᖏᓐᓄᑦ,
ᐸᐅᕐᖎᓪᓗ ᐸᓂᖅᐳᑦ ᕔᓂᒃᓮᑦ,
ᓇᐹᖅᑐᐃᓪᓗ ᐅᖅᓱᒃᓴᖅᑕᓖᑦ ᑐᖁᓕᕗᑦ.
11ᐅᒡᒍᐊᓕᕆᑦᓯ ᐃᓕᑦᓯ ᐱᕈᖅᓰᕕᓕᕆᔨᐅᔪᓯ,
ᕿᐊᓕᕆᑦᓯ ᐃᓕᑦᓯ ᕔᓂᓕᐅᖅᑎᐅᔪᓯ,
ᕿᒃᓵᒍᑎᒋᓕᖅᓯᒋᒃ ᐃᕖᑦ ᓂᐊᑰᔭᒃᓮᓪᓗ ᐱᕈᖅᓰᕕᖕᒥ ᐊᓯᕈᖅᑕᐅᖕᒪᑕ.
12ᕔᓂᒃᓮᑦ ᐸᓂᕐᖕᒪᑕ,
ᓇᐹᖅᑐᐃᓪᓗ ᐸᐅᕐᖓᒃᓴᓖᑦ ᑐᖁᓕᖕᒪᑕ;
ᓇᐹᖅᑐᐃᑦ ᐱᕈᖅᑐᓖᑦ ᐃᓘᓐᓇᑎᒃ ᑐᖁᓕᖕᒪᑕ,
ᐃᓄᐃᑦ ᖁᕕᐊᓱᖕᓂᖏᑦ ᐊᓯᐅᕗᑦ.
13ᐊᓐᓄᕌᓕᕆᑦᓯ ᐊᕐᔭᓂᓕᖅᑎᖅᓯᒪᔪᓂᒃ ᕿᐊᓗᓯᓗ,
ᐃᓕᑦᓯ ᑐᓂᕐᕈᓯᖅᑎᑦᓯᔨᐅᔪᓯ,
ᕿᒃᓵᒋᑦᓯ ᐃᓕᑦᓯ ᐱᔨᑦᓯᖅᑎᐅᔪᓯ ᑐᓂᕐᕈᓯᕐᕕᖕᒥ,
ᕾᒋᑦᓯ, ᐅᓐᓄᐊᓕᒫᖅ ᐊᓐᓄᕌᖅᓯᒪᓗᓯ ᐊᕐᔭᓂᓕᖅᑎᖅᓯᒪᔪᓂᒃ,
ᐃᓕᑦᓯ ᐊᔪᕆᖅᑐᐃᕙᒃᑐᓯ! ᑐᓂᕐᕈᓯᕈᑎᒃᓴᖃᕈᓐᓁᕐᖕᒪᑦ
ᓂᐊᖂᔭᒃᓴᓂᒃ ᕔᓂᒥᒡᓘᓐᓃᑦ ᒎᑎᒧᑦ.
14ᓂᕆᑦᑍᓕᖁᔨᒋᑦᓯ,
ᑲᑎᖁᔨᓗᓯ ᐃᓄᓕᒫᓂᒃ;
ᓯᕗᓕᖅᑏᑦ ᑲᑎᖁᓯᒋᑦ ᔫᑕᐅᓪᓗ ᐃᓄᓕᒫᖏᑦ,
ᐊᑕᓂᐅᑉ ᒎᑎᓯ ᐃᒡᓗᖓᓄᑦ,
ᑐᒃᓯᐊᖅᓗᓯ ᕿᓄᒋᑦᓯ ᐊᑕᓂᕐᖕᒧᑦ.
15 #
ᐂᓮᐊᓯ 13:6. ᐊᑕᓂᐅᑉ ᐅᓪᓗᖓ ᖃᒡᓕᕗᖅ;
ᑎᑭᓐᓂᐊᖅᐳᖅ ᐊᓯᕈᐃᔭᖅᑐᖅᑐᑐᑦ ᐊᔪᒐᖃᖏᑦᑐᕐᔪᐊᕐᖕᒥᓐᖔᖅᓗᓂ.
16ᓂᕿᒃᓴᕗᑦ ᐊᓯᕈᖅᑕᐅᕗᑦ ᑕᑯᓐᓇᑐᐃᓐᓇᖅᑎᓪᓗᑕ,
ᖁᕕᐊᓱᖕᓂᖅᑕᖃᕉᓐᓁᖅᐳᖅ ᒎᑎᑦᑕ ᐃᒡᓗᖓᓂ.
17ᐱᕈᖅᓯᐊᒃᓮᑦ ᑐᖁᕗᑦ ᓄᓇᐅᑉ ᐸᓂᕐᖕᓂᖓᓄᑦ,
ᓯᖅᓗᐊᑦ ᓱᕋᒃᑎᖅᐳᑦ ᐃᓗᓕᖃᖏᓐᓇᒥᒃ ᓂᐊᖂᔭᒃᓴᓂᒃ.
18ᐃᒻᒧᒃᓯᐅᒊᑦ ᓂᓪᓕᐊᖏᓐᓇᓕᖅᐳᑦ ᑳᖕᓂᕐᖕᒧᑦ,
ᕿᑲᕈᓐᓁᓪᓕᕗᑦ ᓂᕆᔭᒃᓴᖃᖏᓐᓇᒥᒃ,
ᓰᐲᓪᓗ ᐱᖅᓕᓕᖅᐳᑦ.
19ᐃᓕᖕᓄᑦ ᐊᑕᓃᖅ ᐃᓗᖏᖅᓱᖅᓗᖓ ᑐᒃᓯᐊᖅᐳᖓ,
ᐃᑯᒪᒧᑦ ᓄᓇᐅᑉ ᐱᕈᖅᑐᖏᑦ ᐊᓯᕈᖅᑕᐅᖕᒪᑕ,
ᓇᐹᖅᑐᐃᓪᓗ ᐃᑯᒪᒧᑦ ᓄᖑᑕᐅᖕᒪᑕ.
20ᐆᒪᔪᐃᑦ ᓄᔪᐊᖅᑐᑦ ᐊᒡᓛᑦ ᕾᒐᓛᓕᖅᐳᑦ ᐃᓕᖕᓄᑦ,
ᑰᑦ ᐸᓂᕐᖕᒪᑕ,
ᐃᑯᒪᒧᓪᓗ ᓄᓇᐅᑉ ᐱᕈᖅᑐᖏᑦ ᐊᓯᕈᖅᑕᐅᖕᒪᑕ.
Currently Selected:
ᔪᐃᓕᐅᑉ ᐊᒡᓚᖏᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.