ᔪᐊᓇᓯᐅᑉ ᐊᒡᓚᖏᑦ 11
11
ᓛᓴᕉᓯᐅᑉ ᑐᖁᓂᖓ
1 #
ᓘᑲᓯ 10:38,39. ᐊᖑᒻᒥᒃ ᖃᓂᒪᔪᖃᖅᐳᖅ, ᓛᓴᕉᓯᒥᒃ ᐱᑕᓂᒥ ᓄᓇᓕᖕᒥᒃ, ᒥᐊᕆᐅᑉ ᒫᑕᐅᓪᓗ ᓄᑲᕇᒃ ᓄᓇᖓᓂ. 2#ᔪᐊᓇᓯ 12:3.ᒥᐊᕆ ᑖᓐᓇᐅᕗᖅ ᐊᑕᓂᐅᑉ ᐃᑎᒐᖏᓐᓂᒃ ᒥᖑᐊᖅᓯᓚᐅᖅᑐᖅ ᑎᐱᑦᓯᐊᕆᒃᓴᐅᒻᒧᑦ ᓄᔭᕐᖕᒥᓄᓪᓗ ᐊᓪᓚᖅᑎᖅᖢᒋᑦ, ᑖᑦᓱᒪ ᐊᓂᖓ ᓛᓴᕉᓯ ᖃᓂᒪᕗᖅ. 3ᑕᕝᕙ ᓇᔭᖏᒃ ᑎᓕᓯᕘᒃ ᔩᓱᓯᒧᑦ, ᐅᖃᐅᑦᔭᐅᖁᓪᓗᒍ, “ᐊᑕᓃᖅ, ᓇᒡᓕᒋᔧᑦ ᖃᓂᒻᒪᒃᐳᖅ.”
4ᔩᓱᓯ ᑕᒪᑐᒥᖓ ᑐᓴᕋᒥ ᐅᖃᖅᐳᖅ, “ᑕᒪᓐᓇ ᖃᓂᒻᒪᓯᖅ ᑐᖁᒧᑦ ᐃᓕᖓᓐᖏᓚᖅ; ᒎᑎᐅᓪᓕ ᓂᖅᑐᖅᑕᐅᓂᒃᓴᖓᓄᑦ, ᒎᑎᐅᑉ ᐃᕐᖕᓂᖓ ᑕᒪᑐᒨᓇ ᓂᖅᑐᕐᖕᓇᖅᑎᑕᐅᖁᓪᓗᒍ.”
5ᔩᓱᓯᐅᑉ ᑖᒃᑯᐊ ᐃᓚᒌᑦ ᓇᒡᓕᒋᕔᑦ ᒫᑕ, ᒥᐊᕆᓗ, ᐊᓂᖓᓪᓗ ᓛᓴᕉᓯ. 6ᓛᓴᕉᓯᐅᑉ ᖃᓂᒪᓂᖓᓂᒃ ᑐᓴᖅᓯᒪᓕᕐᓗᓂ, ᓇᔪᖅᑕᒥᓃᓚᐅᖅᐳᖅ ᓱᓕ ᐅᓪᓘᖕᓂᒃ ᒪᕐᕉᖕᓂᒃ. 7ᑭᖑᕐᖓᒍᑦ ᐃᓕᓐᓂᐊᖅᑎᓄᑦ ᐅᖃᖅᐳᖅ, “ᔫᑎᐊᒧᑦ ᐂᓚᐅᕐᖕᒥᑕ.”
8ᐃᓕᓐᓂᐊᖅᑎᖏᑕ ᑭᐅᕚᑦ, “ᕌᑉᐰ, ᔫᑎᑦ ᐅᔭᖅᑲᓄᑦ ᑍᑲᓂ ᒥᓪᓗᕈᒪᓚᐅᖅᐹᑎᑦ; ᑍᑯᖓ ᐅᑎᕈᒪᓕᕆᕖᑦ?”
9ᔩᓱᓯᐅᑉ ᑭᐅᕔᑦ, “ᐅᓪᓗᖅ 12ᓂᒃ ᐃᑲᕐᕋᖃᓐᖏᓛᖅ? ᓇᓪᓕᐊᑦ ᐅᓪᓗᒃᑯᑦ ᖃᐅᒪᑎᓪᓗᒍ ᐱᓱᒃᑐᖅ ᐹᓪᓚᖕᓂᐊᓐᖏᓚᖅ, ᓯᓚᕐᔫᑉ ᑕᒪᑐᒪ ᖃᐅᒪᓂᖓᓄᑦ ᑕᐅᑐᒃᑎᑕᐅᒐᒥ. 10ᐅᓐᓄᐊᖑᑎᓪᓗᒍᓕ ᐱᓱᒃᑐᖅ ᐹᓪᓚᖕᓂᐊᖅᐳᖅ, ᖃᐅᒪᓯᐅᖏᓐᓇᒥ.” 11ᑍᒫᒃ ᐅᖃᕇᕋᒥ, ᐅᖃᐅᑎᒃᑲᓐᓂᖅᐰᑦ, “ᐃᓚᓐᓇᕆᔭᕗᑦ ᓛᓴᕉᓯ ᓯᓂᓕᖅᐳᖅ, ᐅᐸᖕᓂᐊᖅᐸᕋᓕ ᑐᐹᕆᐊᖅᑐᕐᓗᒍ.”
12ᑕᕝᕙ ᐃᓕᓐᓂᐊᖅᑎᖏᑕ ᐅᖃᐅᑎᕚᑦ, “ᐊᑕᓃᖅ, ᓯᓂᒃᑯᓂ ᐱᐅᓯᕙᓕᐊᓂᐊᖅᐳᖅ.”
13ᔩᓱᓯᓕ ᐅᖃᐅᓯᖃᖅᐳᖅ ᓛᓴᕉᓯᐅᑉ ᑐᖁᓂᖓᓂᒃ, ᑖᒃᑯᐊᓕ ᐃᓱᒪᖃᖅᐳᑦ ᓯᓂᑐᐃᓐᓇᖅᑐᕆᒃᓯᓪᓗᑎᒃ. 14ᑕᕝᕙ ᔩᓱᓯᐅᑉ ᑐᑭᓯᑎᓕᖅᐰᑦ ᐅᖃᐅᑎᓪᓗᒋᑦ, “ᓛᓴᕉᓯ ᑐᖁᕗᖅ; 15ᐱᑦᔪᑎᒋᓪᓗᓯᓕ ᖁᕕᐊᓱᒃᐳᖓ ᓇᔪᓚᐅᖏᓐᓇᒃᑯ, ᐅᒃᐱᓕᖁᓪᓗᓯ. ᒫᓐᓇ ᐅᐸᓚᐅᕐᓚᕗᑦ.”
16ᑑᒪᓯ, ᒪᕐᕈᓕᐊᕕᓂᕐᖕᒥᒃ ᑍᔭᐅᕙᒃᑐᖅ, ᐃᓕᓐᓂᐊᖅᑎᐅᖃᑎᒥᓄᑦ ᐅᖃᖅᐳᖅ, “ᑕᒪᑦᑕ ᒪᓕᓕᕐᓚᕗᑦ, ᑐᖁᖃᑎᒋᓂᐊᕋᑦᑎᒍ.”
ᔩᓱᓯᐅᑉ ᒪᑭᑦᔪᑎᒃᓴᐅᓂᖓ ᐃᓅᑦᔪᑎᒃᓴᐅᓂᖓᓗ
17ᔩᓱᓯ ᑕᕝᕗᖓ ᑎᑭᓐᓇᒥ, ᖃᐅᔨᕗᖅ ᓛᓴᕉᓯ ᐅᓪᓗᓂ ᓯᑕᒪᓂᒃ ᐃᓗᕕᖅᑕᐅᓯᒪᓕᕇᕐᒪᑦ. 18ᐱᑕᓂ ᔨᕉᓴᓕᐅᑉ ᖃᓂᒋᔮᓃᑉᐳᖅ, 2ᒤᓕᐅᑉ ᖃᓂᒋᔮᓂ ᐅᖓᓯᖕᓂᖃᕐᓗᓂ, 19ᔫᑎᓪᓗ ᐊᒥᓱᑦ ᐅᐸᒍᑎᓯᒪᓚᐅᖅᐳᑦ ᒫᑕᒥᒃ ᒥᐊᕆᒥᒡᓗ ᐃᑲᔪᖅᓯᕆᐊᖅᑐᕈᒪᓪᓗᑎᒃ ᐊᓂᖓᑦᑕ ᐃᓅᔪᓐᓃᕐᓂᖓ ᐱᑦᔪᑎᒋᓪᓗᒍ.
20ᒫᑕ ᑐᓴᕋᒥ ᔩᓱᓯᐅᑉ ᕾᓕᕐᖕᓂᖓᓂᒃ, ᐊᓂᓪᓗᓂ ᐸᕐᕆᐊᖅᐹ, ᒥᐊᕆᓕ ᐃᒡᓗᒥ ᓅᓚᐅᓐᖏᓚᖅ. 21ᒫᑕᐅᑉ ᔩᓱᓯ ᐅᖃᐅᑎᕚ, “ᐊᑕᓃᖅ, ᐅᕙᓃᓚᐅᕈᕕᑦ, ᐊᓂᒐ ᑐᖁᒐᔭᓚᐅᓐᖏᓚᖅ. 22ᓱᓕᓗ ᒫᓐᓇ ᖃᐅᔨᒪᒋᕗᖓ ᓱᓇᑐᐃᓐᓇᕐᖕᒥᒃ ᒎᑎᒧᑦ ᑐᒃᓯᐊᕈᕕᑦ, ᒎᑎᐅᑉ ᑐᓂᓯᕕᒋᓂᐊᕐᖕᒪᑎᑦ.”
23ᔩᓱᓯᐅᑉ ᐅᖃᐅᑎᕚ, “ᐊᓃᑦ ᒪᑭᓐᓂᐊᕆᕗᖅ.”
24ᒫᑕᐅᑉ ᐅᖃᐅᑎᕚ, “ᖃᐅᔨᒪᕗᖓ, ᒪᑭᑦᓱᒫᕐᖕᒪᑦ ᒪᑭᕝᕕᒃᓴᒥ ᐅᓪᓗᐃᑦ ᑭᖑᓪᓕᖅᐹᖓᓐᓂ.”
25ᔩᓱᓯᐅᑉ ᐅᖃᐅᑎᕚ, “ᐅᕙᖓ ᒪᑭᑦᔪᑎᒃᓴᐅᓪᓗᖓᓗ ᐃᓅᑦᔪᑎᒃᓴᐅᕗᖓ; ᓇᓪᓕᐊᑦ ᐅᕙᓐᓄᑦ ᐅᒃᐱᖅᑐᖅ, ᑐᖁᒐᓗᐊᕈᓂ, ᓱᓕ ᐃᓅᔪᒫᖅᐳᖅ, 26ᐃᓅᔪᕐᓗ, ᐅᕙᓐᓄᑦ ᐅᒃᐱᕐᓗᓂ ᑐᖁᓚᐅᖅᓯᒪᓂᐊᓐᖏᓚᖅ. ᑕᒪᓐᓇ ᐅᒃᐱᕆᕕᐅᒃ?”
27ᑖᑦᓱᒪ ᐅᖃᐅᑎᕚ, “ᐊᑕᓃᖅ, ᐃᓛᒃ ᐅᒃᐱᖅᐳᖓ ᙭ᔅᑑᓯᐅᒐᕕᑦ, ᒎᑎᐅᑉ ᐃᕐᖕᓂᖓ, ᓯᓚᕐᔪᐊᕐᖕᒧᑦ ᑎᑭᓯᒪᔪᖅ.”
ᔩᓱᓯᐅᑉ ᖁᕝᕕᐅᕐᖕᓂᖓ
28ᒫᑕᓕ ᑍᒫᒃ ᐅᖃᕇᕋᒥ, ᐊᖏᕐᕋᐅᓪᓗᓂ ᓄᑲᓂ ᒥᐊᕆ ᐃᓄᑑᖃᑎᒋᓪᓗᓂᐅᒃ ᐅᖃᐅᑎᕚ, “ᐃᓕᓮᔨ ᑎᑭᒻᒪᑦ ᑖᑦᓱᒪ ᕾᖁᕚᑎᑦ.” 29ᒥᐊᕆ ᑕᒪᑐᒥᖓ ᑐᓴᕋᒥ, ᑐᐊᕕᕐᓗᓂ ᑖᑦᓱᒧᖓ ᐅᐸᒍᑎᕗᖅ. 30ᔩᓱᓯ ᐃᒡᓗᒐᓴᖕᓄᑦ ᓱᓕ ᑎᑭᓯᒪᖏᒻᒪᑦ, ᓅᓚᐅᓐᖏᓚᕐᓕ ᓱᓕ ᒫᑕᒧᑦ ᐅᐸᒃᑕᐅᕕᒋᖅᑲᐅᔭᒥᓂ. 31ᔫᑎᓪᓕ ᐃᒡᓗᒦᑦᑐᑦ, ᐃᑲᔪᕆᐊᖅᓯᒪᔪᑦ ᑖᑦᓱᒥᖓ, ᒥᐊᕆ ᑕᑯᒐᒥᑦᔪᒃ ᑐᐊᕕᕐᓗᓂ ᐊᓂᖕᒪᑦ, ᒪᓕᒃᓴᖅᐹᑦ, ᕿᐊᔭᖅᑐᕋᓱᒋᓪᓗᒍ ᐃᓗᕕᕐᖕᒧᑦ.
32ᒥᐊᕆ ᔩᓱᓯᒧᑦ ᑎᑭᐅᑎᒐᒥ ᑕᑯᒐᒥᐅᒡᓗ ᐃᑎᒐᖏᑕ ᓵᖓᓄᑦ ᐹᒻᒪᒃᐳᖅ, ᐅᖃᕐᓗᓂᓗ, “ᐊᑕᓃᖅ, ᐅᕙᓃᓚᐅᕈᕕᑦ, ᐊᓂᒐ ᑐᖁᒐᔭᓚᐅᓐᖏᓚᖅ.” 33ᔩᓱᓯᐅᓪᓗ ᕿᐊᔪᖅ ᑕᑯᒐᒥᐅᒃ, ᔫᑎᓪᓗ ᕾᖃᑎᒋᔭᖏᑦ ᕿᐊᖕᒥᖕᒪᑕ, ᐊᒃᑐᖅᑕᐅᒻᒪᕆᒃᐳᖅ ᐊᓂᕐᖕᓂᕐᖕᒥᒍᑦ ᓮᒪᔪᓐᓃᕐᓗᓂ; 34ᐅᖃᕐᓗᓂᓗ, “ᓇᒧᑦ ᐃᓗᕕᓚᐅᖅᐱᓯᐅᒃ?”
ᐅᖃᐅᑎᕚᑦ, “ᐊᑕᓃᖅ, ᕾᓗᑎᑦ ᑕᑯᔭᖅᑐᕈᒃ.”
35ᔩᓱᓯᓗ ᕿᐊᕗᖅ. 36ᑕᕝᕙ ᔫᑎᑦ ᐅᖃᖅᐳᑦ, “ᑕᑯᒋᑦ ᐊᖏᔪᒥᒃ ᓇᒡᓕᒋᓐᓂᖅᐹ!” 37ᐃᓚᖏᓪᓕ ᐅᖃᖅᐳᑦ, “ᑕᐅᑐᖏᑦᑐᒥᒃ ᑕᐅᑐᓕᖅᑎᑦᓯᔪᓐᓇᕐᓗᓂ, ᑖᑦᓱᒥᖓ ᑐᖁᑦᑍᓕᑎᑦᓯᔪᓐᓇᓚᐅᓐᖏᓛᖅ?”
ᓛᓴᕉᓯᐅᑉ ᒪᑭᑎᑕᐅᓂᖓ ᑐᖁᖓᔪᓂᑦ
38ᔩᓱᓯ, ᐊᖏᔪᒥᒃ ᐊᒃᑐᖅᑕᐅᒃᑲᓐᓂᕆᕗᖅ, ᐃᓗᕕᕐᖕᒧᑦ ᑎᑭᓐᓇᒥᒃ; ᐃᓗᕕᖅ ᕾᖅᑐᒥ ᐃᓗᓕᐅᖅᓯᒪᓚᐅᖅᐳᖅ, ᐃᑎᖅᑕᕐᕕᖓᓗ ᐅᔭᕋᖕᒥᒃ ᒪᑐᓯᒪᓪᓗᓂ. 39ᔩᓱᓯ ᐅᖃᖅᐳᖅ, “ᐅᔭᕋᒃ ᐲᖅᓯᐅᒃ.”
ᒫᑕ, ᑐᖁᖓᔫᑉ ᓇᔭᖓ ᐅᖃᖅᐳᖅ, “ᐊᑕᓃᖅ ᑎᐱᓗᓕᕇᖅᐳᖅ, ᐅᓪᓗᓂᒃ ᓯᑕᒪᓂᒃ ᐃᓗᕕᖅᓯᒪᓕᕋᒥ.”
40ᔩᓱᓯᐅᑉ ᐅᖃᐅᑎᕚ, “ᐅᖃᐅᑎᓚᐅᓐᖏᓚᒌᑦ ᐅᒃᐱᕈᕕᑦ ᒎᑎᐅᑉ ᓂᖅᑐᕐᖕᓇᕐᖕᓂᕐᔪᐊᖓ ᑕᑯᔪᓐᓇᕋᕕᐅᒃ?” 41ᑕᕝᕙ ᐅᔭᕋᒃ ᐲᖅᐹᑦ ᐃᓗᕕᕐᖕᒥᑦ. ᔩᓱᓯ ᖁᒻᒧᑦ ᑕᑯᓴᕐᓗᓂ, ᐅᖃᖅᐳᖅ, “ᐊᑖᑕᒃ, ᖁᔭᒋᕙᒋᑦ ᑐᓴᓚᐅᕋᕕᖓ. 42ᖃᐅᔨᒪᕗᖓᓕ ᑐᓴᑦᓮᓐᓇᕋᕕᖓ, ᑍᒫᒡᓕ ᐅᖃᖅᐳᖓ ᐅᑯᐊ ᐅᕙᓃᑦᑐᑦ ᐱᑦᔪᑎᒋᓪᓗᒋᑦ, ᐅᒃᐱᓕᖁᓪᓗᒋᑦ ᑎᓕᓚᐅᕋᕕᖓ.” 43ᔩᓱᓯ ᑍᒫᒃ ᐅᖃᕇᕋᒥ, ᓂᐱᖅᑯᖅᑐᓪᓗᓂ ᐅᖃᖅᐳᖅ, “ᓛᓴᕉᓯ, ᐊᓂᒋᑦ.” 44ᓛᓴᕉᓯ ᐊᓂᕗᖅ, ᐊᒡᒐᖏᑦ ᐃᑎᒐᖏᓪᓗ ᑐᖁᔪᒧᑦ ᐃᒻᒧᑎᒋᔭᐅᓲᓂᒃ ᓂᒥᖅᓯᒪᓪᓗᑎᒃ, ᑮᓇᖓᓗ ᖃᓪᓗᓈᖅᑕᒥᒃ ᓂᒥᖅᓯᒪᒋᓪᓗᓂ. ᔩᓱᓯᐅᑉ ᐅᖃᐅᑎᕔᑦ, “ᐃᒻᒧᑎᖏᑦ ᐲᔭᖅᓯᐅᒃ, ᐱᓱᓕᕐᓕ.”
ᔩᓱᓯᐅᑉ ᑐᖁᑕᒃᓴᐅᖁᔭᐅᓂᖓ
ᒫᑎᐅᓯ 26:1-5; ᒫᑯᓯ 14:1-2; ᓘᑲᓯ 22:1-2
45ᔫᑎᑦ ᐊᒥᓱᑦ ᒥᐊᕆᒧᑦ ᐳᓛᕆᐊᖅᓯᒪᔪᑦ ᔩᓱᓯᐅᑉ ᐱᓂᐊᕐᖕᓂᕆᔭᖓᓂᒃ ᑕᑯᔪᑦ, ᔩᓱᓯ ᐅᒃᐱᕆᓕᖅᐹᑦ. 46ᐃᓚᖏᓪᓕ ᐹᕆᓯᓄᑦ ᐅᑎᕐᓗᑎᒃ ᐅᓂᒃᑳᖅᐳᑦ ᔩᓱᓯᐅᑉ ᐱᓂᐊᕐᖕᓂᕆᔭᖓᓂᒃ. 47ᑕᕝᕙ ᐹᕆᓯᑦ ᑐᓂᕐᕈᓯᖅᑎᑦᓯᔩᓪᓗ ᐊᖓᔪᖅᑳᖏᑦ ᑲᑎᒪᔨᓂᒃ ᑲᑎᒪᖃᑎᖃᕐᓗᑎᒃ ᐅᖃᖅᐳᑦ, “ᖃᓄᐃᓕᐅᕆᐊᖃᓕᖅᐱᑖ? ᑖᓐᓇ ᐊᒥᓱᓂᒃ ᓇᓗᓁᒃᑯᑕᕐᖕᓂᒃ ᐱᓇᓱᐊᖃᑦᑕᕐᖕᒪᑦ. 48ᑲᒪᒋᖏᓪᓗᒍ ᐃᓱᒪᖅᓱᖅᑎᓐᓂᐊᕈᑦᑎᒍ, ᑕᕝᕙ ᐃᓄᓕᒫᑦ ᐅᒃᐱᓕᕐᖕᓂᐊᖅᐳᑦ ᑖᑦᓱᒧᖓ, ᕉᒪᒥᐅᓪᓗ ᐅᕙᑦᑎᓐᓄᑦ ᕾᓗᑎᒃ ᐊᓯᕈᐃᔪᒫᖅᐳᑦ ᑐᒃᓯᐊᕐᕕᒡᔪᐊᑦᑎᓐᓂᒃ ᐃᓄᖁᑎᑦᑎᓐᓂᒡᓗ.”
49ᑖᒃᑯᐊ ᐃᓚᖓᑦ, ᑬᐊᐹᓯᒥᒃ ᐊᑎᓕᒃ, ᐊᕐᕌᒍᒥ ᑕᒪᑐᒪᓂ ᑐᓂᕐᕈᓯᖅᑎᑦᓯᔨᓄᑦ ᐊᖓᔪᖅᑳᒻᒪᕆᐅᔫᑉ, ᐅᖃᐅᑎᕔᑦ, “ᓱᓕ ᖃᐅᔨᒪᓐᖏᓚᓯ; 50ᑐᑭᓯᓐᖏᓐᓇᑦᓯ ᐃᓕᑦᓯᓐᓄᑦ ᐱᐅᓂᖅᓴᐅᒐᔭᕐᖕᒪᑦ ᐃᓄᒃ ᐊᑕᐅᓯᖅ ᑐᖁᒃᐸᑦ ᐃᓅᖃᑎᒌᑦ ᐱᑦᔪᑎᒋᓗᒋᑦ, ᐃᓅᖃᑎᒌᑦ ᐊᓯᕈᖅᑕᐅᒐᔭᕐᖕᓂᖏᓐᓃᑦ?” 51ᑕᒪᑐᒥᖓ ᐃᒻᒥᓂᒃ ᐅᖃᓚᐅᓐᖏᓚᖅ; ᐊᕐᕌᒍᒥᓕ ᑕᒪᑐᒪᓂ ᑐᓂᕐᕈᓯᖅᑎᑦᓯᔨᓄᑦ ᐊᖓᔪᖅᑳᒻᒪᕆᒋᔭᐅᒐᒥ ᒎᑎᐅᑉ ᐅᖃᖅᑕᐅᖁᔭᖓᓂᒃ ᐅᖃᐅᓯᖃᓚᐅᖅᐳᖅ ᔩᓱᓯ ᑐᖁᑕᐅᔪᒃᓴᐅᖕᒪᑦ ᐃᓅᖃᑎᒌᒡᔪᐊᑦ ᐱᓪᓗᒋᑦ, 52ᐃᓅᖃᑎᒌᒡᔪᐊᓪᓕ ᑖᒃᑯᐊᑐᐊᖅ ᐱᓇᒋᑦ, ᒎᑎᐅᓪᓕ ᕿᑐᕐᖓᖏᑦ ᓇᒧᑐᐃᓐᓇᖅ ᓯᐊᒻᒪᖅᓯᒪᔪᑦ ᑲᑎᖅᓱᖅᑕᐅᖁᓪᓗᒋᑦ ᐊᑕᐅᓯᕐᖕᒧᑦ.
53ᐅᓪᓗᒥᑦ ᑕᕝᕙᓐᖓᑦ ᐱᒋᐊᕐᓗᑎᒃ ᐃᓱᒪᒃᓴᖅᓯᐅᖃᑎᒌᓕᖅᐳᑦ ᔩᓱᓯᒥᒃ ᖃᓄᐃᓕᐅᕐᓗᑎᒃ ᑐᖁᑦᓯᒐᔭᕐᖕᒪᖔᕐᖕᒥᒃ. 54ᑍᒤᒻᒪᑦ ᔩᓱᓯ ᖃᐅᔨᒪᔭᐅᓗᓂ ᐃᖏᕐᕋᖃᑦᑕᕈᓐᓃᖅᐳᖅ ᔫᑎᑦ ᓄᓇᖓᒍᑦ, ᐃᓄᖃᖏᑦᑑᓪᓕ ᖃᓂᒋᔮᓂ ᐃᓂᖃᓕᖅᐳᖅ, ᓄᓇᓕᖕᓂ ᐃᕗᕅᒻᒥᒃ ᐊᑎᓕᖕᓂ; ᑕᕝᕙᓃᓕᓚᐅᖅᐳᖅ ᐃᓕᓐᓂᐊᖅᑎᓂ ᐃᓚᒋᓪᓗᒋᑦ.
55ᔫᑎᑦ ᓇᓪᓕᐅᓐᓂᖅᓯᐅᕐᕕᖓᑦ ᖄᖏᖅᑕᐅᕕᖕᒥᒃ ᖃᒡᓕᓕᕐᖕᒪᑦ, ᐃᓄᒐᓴᒡᔪᐊᑦ ᓇᓂᑐᐃᓐᓇᖅ ᓄᓇᓖᑦ ᔨᕉᓴᓕᒻᒧᐊᖅᐸᓪᓕᐊᓕᖅᐳᑦ ᖄᖏᖅᑕᐅᕕᐅᑉ ᓯᕗᓂᖓᓂ, ᓴᓗᒻᒪᖅᓴᖅᑕᐅᓂᕐᖕᒥᒃ ᐊᑐᕈᒪᓪᓗᑎᒃ. 56ᔩᓱᓯᒥᒃ ᕿᓂᓚᐅᕋᒥᒃ, ᐅᖃᖃᑎᒌᓕᓚᐅᖅᐳᑦ ᑲᑎᓪᓗᑎᒃ ᑐᒃᓯᐊᕐᕕᒡᔪᐊᒥ, “ᖃᓄᕐᓕ ᐃᓱᒪᕕᓰ? ᓇᓪᓕᐅᓐᓂᖅᓯᐅᑐᓄᑦ ᕾᓂᐊᖂᖏᒻᒪᑦ.” 57ᑐᓂᕐᕈᓯᖅᑎᑦᓯᔩᓪᓕ ᐊᖓᔪᖅᑳᖏᑦ ᐹᕆᓯᓪᓗ ᐱᖁᔨᓚᐅᖅᐳᑦ ᓇᓪᓕᐊᑐᐃᓐᓇᖅ ᔩᓱᓯᐅᑉ ᓇᓃᓐᓂᖓᓂᒃ ᖃᐅᔨᔪᖅ, ᖃᐅᔨᑎᑦᓯᖁᕙᑦ, ᑎᒍᔭᐅᓂᐊᕐᖕᒪᑦ.
Currently Selected:
ᔪᐊᓇᓯᐅᑉ ᐊᒡᓚᖏᑦ 11: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.